KUNA ANYAKUBALA
7: Makhaliro Adidi
PYENEPI PISABVEKANJI
Fala yakuti makhaliro isalonga thangwi ya pinthu pinasankhula imwe toera kupitowezera mu umaso wanu. Mwacitsandzo, kodi imwe musawangisira toera kukhala wakukhulupirika mu pinthu pyonsene? Khala ndi tenepo, panango musapfundzisambo ananu makhaliro mabodzi ene.
Munthu wa makhaliro adidi asacitambo pinthu pyadidi. Mwacitsandzo, munthu wa makhaliro adidi ndi waphinga, wakunyindirika, pontho nkhabe kunyerezera pinafuna iye basi. Pontho munthu asafunika kupfundziswa makhaliro anewa mbali wang’ono.
PINALONGA BHIBHLYA: “Pfundzisa mwana njira inafunika iye kutoweza; thangwi maseze akalambe, iye nkhabe kudzaisiya.”—Misangani 22:6.
THANGWI YANJI NDI PYAKUFUNIKA KUPFUNDZISA ANA MAKHALIRO ADIDI
Mu ndzidzi uno wakuthambaruka kwa tekinolojiya, makhaliro adidi ndi akufunika kakamwe. Nkazi unango anacemerwa Karyn alonga: “Anthu anakwanisa kugumana pinthu pyakuipa ndzidzi onsene mu ntokodzi. Ife tinakwanisa kukhala dhuzi na anathu uku iwo mbakaona pinthu pyakuipa ife nee kupidziwa.”
PINALONGA BHIBHLYA: ‘Anthu akukola mwauzimu thangwi yakuphatisira luso yawo yakudzindikira, apfundza kusiyanisa cinthu cadidi na cakuipa.’ —Ahebheri 5:14.
Kupangiza cilemedzo ndi kwakufunikambo kakamwe. Pyenepi pisaphataniza kuphemba cinthu mwacilemedzo, kupereka takhuta na kucita pinthu mbatinyerezerambo anango. Lero anthu asadzudzumika kakamwe na mitcini peno mitokodzi m’mbuto mwakutsalakana anango.
PINALONGA BHIBHLYA: “Pinafuna imwe kuti anthu akucitireni, imwe muacitirembo pibodzi pyene.”—Luka 6:31.
PINAFUNIKA IMWE KUCITA
Pangani ananu makhaliro adidi. Mwacitsandzo, anyakufufudza andzikira kuti aphale na atsikana angapangwa kugopswa kwa kupita m’mabonde mbadzati kumanga banja pisakhala pyakukhonda nentsa kuna iwo kubvera uphungu unoyu.
PINTHU PINAFUNA KUKUPHEDZANI: Phatisirani pinthu pidacitika toera kutoma kucedza na ananu thangwi ya makhaliro adidi. Mwacitsandzo, khala mwabva mphangwa mbazikalonga pyauphanga, imwe munakwanisa kupanga mwananu: “Mphyakutsukwalisa kuona anthu mbakacitira anango pinthu pyausumankha ninga pyenepi. M’maonero ako thangwi yanji anthu asacita pyenepi?”
“Mphyakunentsa kakamwe kuna ana kusiyanisa cadidi na cakuipa khala iwo nkhabe kudziwa kuti cadidi ndi cipi, cakuipa ndi cipi.”—Brandon.
Apfundziseni cilemedzo. Anan’gono anakwanisa kupfundziswa kuphemba cinthu mwacilemedzo, kupereka takhuta na kucita pinthu mbanyerezera anango. Bukhu yakuti Parenting Without Borders yalonga: “Ana angadzindikira kuti ndi akufunika kakamwe m’banja, kuxikola peno pacisa, iwo asacitira anango pinthu pyadidi tayu kunyerezera pinafuna iwo basi.”
PINTHU PINAFUNA KUKUPHEDZANI: Pasani ananu mabasa a panyumba toera kuaphedza kudziwa kufunika kwakucita pinthu toera kuphedza anango.
“Anathu angadzolowera kucita mabasa cincino, nee pinadzaanentsa kucita mabasa angadzakula mbakhala okhene. Iwo anadzakhala amala dzolowera kale kucita mabasa.”—Tara.
