1. Thangwi yanji Abhabhilonya akomerwa na mprofeta Dhanyeli?

 PIKHALI mprofeta Dhanyeli m’phale akwatwa na anyankhondo a Bhabhilonya, mbaendeswa ku Bhabhilonya kutali na dziko yace. Maseze iye akhali m’phale, iwo aona makhaliro ace adidi. Iwo aona na maso awo kuti Dhanyeli akhali ‘wakusowa cilema, wa maonekero adidi,’ pontho akhadabuluka pabanja yakufunika. (1 Sam. 16:7) Na thangwi ineyi, Abhabhilonya ampfundzisa toera atumikire pa nyumba ya mambo.—Dhan. 1:3, 4, 6.

2. Yahova akhaona tani Dhanyeli? (Ezekiyeli 14:14)

² Yahova akhafuna Dhanyeli, tayu thangwi ya maonekero ace peno cidzo cace, mbwenye akhanfuna thangwi ya makhaliro ace adidi. Mwandimomwene, mu ndzidzi udalonga Yahova kuti Dhanyeli akhali ninga Nowa na Yobe, panango Dhanyeli akhali na pyaka 20 pyakubalwa. Natenepa, Yahova aona kuti Dhanyeli akhali wakulungama ninga Nowa na Yobe akuti atumikira Mulungu mwakukhulupirika mu pyaka pizinji. (Gen. 5:32; 6:9, 10; Yobe 42:16, 17; lerini Ezekiyeli 14:14.) Pontho Yahova apitiriza kufuna Dhanyeli mu umaso wace onsene.—Dhan. 10:11, 19.

3. Tinapfundzanji mu nsolo uno?

³ Mu nsolo uno tinaona makhaliro mawiri a Dhanyeli adancitisa kukhala wakufunika kakamwe kuna Yahova. Pakutoma, tinaona n’khaliro ubodzi na ubodzi, pontho tinaonambo ndzidzi udaupangiza iye. Buluka penepo, tinaona kuti ninji pidaphedza Dhanyeli toera kupangiza makhaliro anewa. Pakumalisa tinaona kuti tinatowezerambo tani citsandzo cace. Maseze nsolo uno walemberwa aphale na atsikana, ife tonsene tinakwanisambo kupfundza na citsandzo ca Dhanyeli.

4. Dhanyeli apangiza tani cipapo? Perekani citsandzo.

⁴ Anthu acipapo panango asagopa, mbwenye nee asatawirisa  kuti kugopa kweneku kuapingize kucita pinthu pyadidi. Dhanyeli akhali m’phale wacipapo kakamwe. Onani maulendo mawiri adapangiza iye cipapo. Ulendo wakutoma ndi pidapita pyaka piwiri pakumala kufudzwa kwa Yerusalemu na Abhabhilonya. Mambo Nabhukodhonozore wa ku Bhabhilonya alota dzimunthu ikulu kakamwe. Natenepa iye alonga kuti mbadapha amuna onsene audziwisi, kuphatanizambo Dhanyeli angacimwana kulonga ndoto zidalota iye na kufokotoza mabvekero azo. (Dhan. 2:3-5) Dhanyeli akhafunika kucita pinthu mwakucimbiza, thangwi umaso wawo ukhali pangozwi. Iye “aenda kuna mambo mbaphemba ndzidzi toera afokotoze ndoto ya mambo.” (Dhan. 2:16) Pyenepi pisapangiza kuti Dhanyeli akhali na cipapo na cikhulupiro. Thangwi Bhibhlya nee isalonga kuti Dhanyeli akhadafokotoza kale ndoto. Iye aphemba axamwali ace akuti ku Bhabhilonya akhacemerwa na madzina a Sadhrake, Mezaki na Abhedhinego “kuti acite phembero kuna Mulungu wakudzulu toera aabvere ntsisi thangwi ya cibisobiso ceneci.” (Dhan. 2:18) Yahova atawira maphembero awo. Na ciphedzo ca Yahova, Dhanyeli afokotoza ndoto ya Nabhukodhonozore. Natenepa Dhanyeli pabodzi na axamwali ace nee aphiwa.

5. Ndi ndzidzi upi unango wakuti Dhanyeli akhafunika kupangiza cipapo?

⁵ Mukupita kwa ndzidzi, mudamala Dhanyeli kufokotoza ndoto ya mambo thangwi ya dzimunthu ikulu, cipapo cace cayeserwa pontho. Munjira ipi? Nabhukodhonozore alota ndoto inango yakugopesa kakamwe. Iye alota muti ukulu kakamwe. Mwacipapo, Dhanyeli afokotozera mambo mabvekero a ndoto ineyi, mbampanga kuti iye mbadakhala nyansala, mbasiya kukhala mambo. (Dhan. 4:25) Mphangwa zenezi mbazidacitisa mambo kuona Dhanyeli ninga nyamalwa wace mbamupha. Mbwenye mwakukhonda tsalakana pyenepi, Dhanyeli apangiza cipapo mbazilonga.

6. Ninji pidaphedza Dhanyeli toera kukhala wacipapo?

⁶ Ninji pidaphedza Dhanyeli toera kukhala wacipapo mu umaso wace onsene? Pikhali iye mwana, Dhanyeli apfundza pizinji na citsandzo ca anyakubalace. Mwakukhonda penula, iwo akhabvera pitsogolero pidapereka Yahova kuna anyakubala Aizraeli, pontho akhapfundzisa mwanawo Mwambo wa Mulungu. (Dheu. 6:6-9) Dhanyeli akhadziwa Matongero Khumi kuphatanizambo pinthu pizinji thangwi ya Mwambo. Mwacitsandzo, iye akhadziwa pinthu pyakuti Aizraeli akhafunika kupidya na pinthu  pyakuti nee akhafunika kupidya. b (Lev. 11:4-8; Dhan. 1:8, 11-13) Dhanyeli apfundzambo pya umaso wa atumiki a Mulungu a kale na pinthu pidaacitikira thangwi yakukhonda bvera Yahova. (Dhan. 9:10, 11) Pinthu pidacitikira Dhanyeli pyampasa cinyindiro cakuti Yahova pabodzi na aanju ace akham’phedza. —Dhan. 2:19-24; 10:12, 18, 19.

7. Ninji pontho pidaphedza Dhanyeli toera kukhala wacipapo? (Onanimbo foto.)

⁷ Dhanyeli akhapfundza mabukhu a aprofeta a Mulungu kuphatanizambo maprofesiya a Yeremiya. Thangwi yakupfundza kweneku, mukupita kwa ndzidzi, Dhanyeli adzindikira kuti ubitcu wa Ayuda ku Bhabhilonya ukhali cifupi toera kumala. (Dhan. 9:2) Kuona kukwanirisika kwa mafala a Yahova kwaphedza Dhanyeli toera kunyindira kakamwe Yahova, pontho ale ananyindira Mulungu na ntima onsene anakwanisa kukhala na cipapo kakamwe. (Onani Aroma 8:31, 32, 37-39.) Cinthu cakufunika kakamwe ndi cakuti ndzidzi onsene Dhanyeli akhacita phembero kuna Babace wakudzulu. (Dhan. 6:10) Iye abweka madawo ace kuna Yahova, pontho ampanga mabvero ace. Kusiyapo pyenepi, Dhanyeli aphemba ciphedzo ca Yahova. (Dhan. 9:4, 5, 19) Iye akhali munthu ninga ife wakuti nee abalwa na cipapo. Mbwenye akwanisa kukhala na cipapo thangwi yakupfundza Mafala a Mulungu, kucita phembero na kunyindira Yahova.

8. Tisafunika kucitanji toera tikhale acipapo?

⁸ Tisafunika kucitanji toera tikhale acipapo? Panango anyakubalathu anatipanga toera tikhale acipapo, mbwenye ife nee tinakhala na cipapo basi ene thangwi iwo ali na cipapo. Kukhala na cipapo ndi sawasawa na kupfundza kucita cinthu. Munthu anakwanisa kudziwa kucita mwadidi cinthu angayang’ana mwadidi ule anampfundzisa, buluka penepo mbatowezera citsandzo cace. Munjira ibodzi ene, ife tinakwanisambo kukhala acipapo tingayang’ana mwadidi kuti anango asapangiza tani n’khaliro unoyu, buluka penepo mbatitowezera citsandzo cawo. Mphapo tapfundzanji na citsandzo ca Dhanyeli? Ninga Dhanyeli, tisafunika kudziwa mwadidi Mafala a Mulungu. Ife tisafunika kucita phembero ndzidzi onsene toera tikhale na uxamwali wakuwanga na Yahova. Pontho tisafunika kunyindira Yahova, mbatikhala na cinyindiro cakuti ndzidzi onsene iye anatiphedza. Tingacita pyenepi, cikhulupiro cathu cingayeserwa, tinakwanisa kukhala acipapo.

9. Tinaphedzeka tani tingakhala acipapo?

⁹ Tingakhala acipapo, tisaphedzeka munjira zizinji. Onani citsandzo ca Ben. Iye akhapfundza ku Alemanya pa xikola yakuti anthu onsene akhakhulupira kuti pinthu pyacita kusanduka, pontho akhaona kuti pinalonga Bhibhlya kuti pinthu pyacitwa na Mulungu ndi pyauthambi. Ntsiku inango, Ben apaswa mwai toera afokotozere anyakupfundza andzace kuti thangwi yanji asakhulupira kuti pinthu pyacitwa na Mulungu. Mwacipapo, Ben afokotoza pinakhulupira iye. Mphapo ninji pidacitika? Ben alonga: “Mpfundzisi wanga andibvesera mwadidi, pontho iye adhinda mphangwa zidaphatisira ine toera kufokotoza pinakhulupira ine mbapasa anyakupfundza andzanga onsene.” Kodi anyakupfundza andzace acitanji? Ben alonga: “Azinji mwa iwo abvesera pikhalonga ine, pontho iwo alonga kuti asakomerwa na makhaliro anga.” Pidacitikira Ben pisapangiza kuti anthu acipapo kazinji kene asalemedzwa na anango. Kusiyapo pyenepi, iwo asacitisambo kuti anthu a mitima yadidi afune kupfundza  pya Yahova. Mwandimomwene, ife tiri na mathangwi adidi toera kukhala acipapo.

10. Kukhulupirika ninji?

¹⁰ Kazinji kene Bhibhlya isalonga pya “kukhulupirika” peno “ufuni wakukhonda mala” unapangiza Mulungu kuna atumiki ace. Fala ibodzi ene isaphatisirwambo toera kulonga pya ufuni unapangiza atumiki a Mulungu kuna unango na ndzace. (2 Sam. 9:6, 7) Kukhulupirika kwathu kunakwanisa kukhala kwakuwanga mukupita kwa ndzidzi. Tendeni tione kuti kukhulupirika kwa Dhanyeli kwadzakhala tani kwakuwanga.

11. Dhanyeli apangiza tani kuti akhali wakukhulupirika mu ndzidzi ukhali iye nkhalamba? (Onani foto iri patsamba yakutoma.)

¹¹ Kukhulupirika kwa Dhanyeli kuna Yahova kwayeserwa munjira zizinji. Mbwenye kuyeserwa kukulu kakamwe kwacitika mu ndzidzi ukhali iye na pyaka pyakupiringana 90. Ndzidzi unoyu, Bhabhilonya akhadakundwa na Amedhi na Apersya, pontho akhatongwa na Mambo Dhariyo. Atongi na aimiriri a mambo nee akhakomerwa na Dhanyeli, pontho nee akhalemedza Mulungu wace. Na thangwi ineyi, iwo acita masasanyiro toera kuphesa Dhanyeli. Iwo apanga mambo toera akhazikise ntemo wakuti mbudayesera kukhulupirika kwa Dhanyeli. Dhanyeli akhafunika kusiya kucita phembero kuna Yahova mu ntsiku 30 toera kupangiza kuti ndi wakukhulupirika kuna mambo ninga pikhacita anthu anango onsene. Dhanyeli akhonda kucita pyenepi. Na thangwi ineyi, iye aponywa mu djenje ya nkhalamu. Mbwenye Yahova apasa nkhombo kukhulupirika kwa Dhanyeli mukumpulumusa mbakhonda dyiwa na nkhalamu. (Dhan. 6:12-15, 20-22) Tinakhalambo tani akukhulupirika kuna Yahova ninga pidacita Dhanyeli?

12. Dhanyeli akwanisa tani kukhala wakukhulupirika kakamwe kuna Yahova?

¹² Ninga pidapfundza ife mu ndima zidamala, toera tikhale akukhulupirika kuna Yahova, tisafunika kunfuna kakamwe. Dhanyeli apitiriza kukhala wakukhulupirika kuna Yahova thangwi ntsiku zonsene iye akhafuna Babace wakudzulu. Mwakukhonda penula, Dhanyeli akhafuna Yahova munjira ineyi thangwi akhali na ndzidzi wakunyerezera makhaliro a Yahova na njira ikhapangiza iye makhaliro anewa. (Dhan. 9:4) Dhanyeli akhanyerezerambo pinthu pyonsene pyadidi pidacita Yahova kuna iye na kuna mbumba Yace.—Dhan. 2:20-23; 9:15, 16.

13. (a) Kukhulupirika kwa aphale na atsikana kusayeserwa tani? Perekani citsandzo. (Onanimbo foto.) (b) Ninga pidapangizwa mu vidhyu, munatawira tani anango angakubvundzani khala Mboni za Yahova zisaphedzera ale anapita m’mabonde mamuna na mamuna peno nkazi na nkazi?

 ¹³ Ninga Dhanyeli, aphale na atsikana anatumikira Yahova azungulirwa na anthu akuti nee asalemedza Yahova na mitemo yace. Anthu anewa panango anaida onsene ale analonga kuti asafuna Mulungu. Anango panango anayesera kusingirira aphale na atsikana anewa toera asiye kukhala akukhulupirika kuna Yahova. Mwacitsandzo, onani pidacitikira m’bale Gabriel c anakhala ku Australya. Iye athimbana na mayesero makulu mu ndzidzi ukhapfundza iye kuxikola sekundarya. Mpfundzisi wace ambvundza pabodzi na anyakupfundza andzace onsene kuti iwo mbadacitanji khala xamwali wawo aapanga kuti iye akhapita m’mabonde mamuna na mamuna? Buluka penepo mpfundzisi alonga kuti onsene anaphedzera pyenepi mbakhale kukhundu ibodzi, pontho ale anakhonda kuphedzera mbakhale kukhundu inango. Gabriel alonga: “Andzanga onsene aenda kukhundu ya ale anaphedzera kupita m’mabonde kwa mamuna na mamuna peno nkazi na nkazi kusiyapo ine na Mboni za Yahova zinango.” Buluka penepo pinthu pidacitika pyayesera kakamwe cikhulupiro ca Gabriel. Iye alonga: “Andzathu onsene kuphatanizambo mpfundzisi atoma kutisingirira na kutipwaza. Ine ndacita pyonsene pidakwanisa ine toera kutsidzikiza cikhulupiro canga mwakukhurudzika, mbwenye iwo nee akhabvesera pikhalonga ine.” Kodi pyenepi pyayesera tani kukhulupirika kwa m’bale Gabriel? Iye alonga: “Ine nee ndikhakomerwa na kusingirirwa, mbwenye ndikhali wakutsandzaya thangwi ndikhali wakukhulupirika kuna Yahova mbanditsidzikiza cikhulupiro canga. d

14. Ninji pinafuna kutiphedza toera kukhala akukhulupirika kakamwe kuna Yahova?

¹⁴ Ninga Dhanyeli, ife tingafuna kakamwe Yahova, tinasankhula kukhala akukhulupirika kuna Iye. Ife tinakulisa ufuni unoyu tingapfundza makhaliro a Yahova. Mwacitsandzo, ife tinakwanisa kupfundza pinthu pidacita iye. (Aroma 1:20) Khala musafuna kufuna kakamwe Yahova na kumulemedza, imwe munakwanisa kuleri misolo inagumanika pa khundu yakuti “Será Que Hove Um Projecto?” peno kuona mavidhyu. Imwe munakwanaisambo kuleri bhruxura yakuti A Vida—Teve Um Criador? na A Origem da Vida—Cinco Perguntas Que Merecem Respota. Onani pidalonga mulongo m’bodzi wa ku Dinamarka anacemerwa Esther thangwi ya mabhruxura anewa. Iye alonga: “Njira inafokotozwa mphangwa zinagumanika mwenemu ndi yakudzumatirisa kakamwe. Mabhruxura anewa nee asalonga pinafunika munthu kukhulupira; basi ene iwo asapangiza undimomwene mbasiya munthu toera acite ekha cisankhulo.” Ben adalongwa pakutoma alonga: “Mabhruxura anewa awangisa kakamwe cikhulupiro canga. Iwo andipangiza pakweca kuti pinthu pyonsene pyacitwa na Mulungu.” Munthu angamala kupfundza mabhruxura anewa asatawira mafala awa anagumanika m’Bhibhlya: “Wakuthema ndimwe Yahova Mulungu wathu, toera kutambira mbiri, cilemedzo na mphambvu, thangwi mwacita pinthu pyonsene, pontho pinthu pyonsene pyacitwa thangwi yakufuna kwanu.”—Apok. 4:11. e

15. Ndi njira ipi inango inafuna kutiphedza toera kukulisa ufuni wathu kuna Yahova?

¹⁵ Njira inango inafuna kutiphedza toera kufuna kakamwe Yahova ndi kupfundza pya umaso wa Mwanace, Yezu. Ndi pyenepi pidacita Mulongo Samira anakhala ku Alemanya. Iye  alonga: “Ine ndadziwa mwadidi Yahova kubulukira mwa Yezu.” Pikhali iye mwana, Samira nee akhabvesesa kuti Yahova ali na mabvero. Basi ene akhanyerezera kuti ali na mabvero ndi Yezu. Iye athimiza: “Ine ndisakomerwa na Yezu thangwi iye akhali xamwali wa anthu onsene, pontho akhafuna anang’ono.” Mu ndzidzi ukhapfundza iye pizinji thangwi ya Yezu, iye akhakulisambo ufuni wace kuna Yahova. Thangwi yanji? Iye alonga: “Mwapang’ono na pang’ono ndabvesesa kuti Yezu akhatowezera mwadidi Babace. Iwo ali na makhaliro akulandana kakamwe. Ine ndadzindikira kuti ineyi ndi ibodzi mwa mathangwi adacitisa Yahova kutuma Yezu pa dziko yapantsi toera anthu adziwe mwadidi Yahova.” (Juwau 14:9) Khala musafuna kuwangisa uxamwali wanu na Yahova, imwe musafunika kukhala na ndzidzi wakupfundza pya umaso wa Yezu. Mungacita pyenepi, imwe munafuna Yahova, pontho munakhala wakukhulupirika kakamwe kuna iye.

16. Thangwi yanji tisafunika kukhala akukhulupirika? (Masalmo 18:25; Mikeya 6:8)

¹⁶ Tingakhala akukhulupirika kuna anango, kazinji kene tisakhala na axamwali akuti asakhalambo akukhulupirika kuna ife. (Rute 1:14-17) Kusiyapo pyenepi, tingakhala akukhulupirika kuna Yahova, tisakhala akukhurudzika, pontho tisakhala na ntendere wa m’manyerezero. Thangwi yanji? Thangwi Yahova apikira kukhala wakukhulupirika kuna ale anakhala akukhulupirika kuna iye. (Lerini Masalmo 18:25; Mikeya 6:8.) Nyerezerani basi: Nciti wamphambvu zonsene ali dzololo toera kukhala na uxamwali wakuwanga na ife! Pontho tingakhala na uxamwali wakuwanga na Yahova, nee mayesero, nee anyakutcinga, nee kufa kunakwanisa kufudza uxamwali unoyu. (Dhan. 12:13; Luka 20:37, 38; Aroma 8:38, 39) Natenepa, ndi pyakufunika kakamwe kupitiriza kutowezera citsandzo ca Dhanyeli mbatikhala akukhulupirika kuna Yahova.

17-18. Ndi pinthu pipi pinango pyakuti tinakwanisa kupipfundza na citsandzo ca Dhanyeli?

¹⁷ Mu nsolo uno, ife tapfundza makhaliro mawiri basi a Dhanyeli, mbwenye pana pinthu pizinji pyakuti tinakwanisa kupipfundza na citsandzo cace. Mwacitsandzo, Yahova aonesa Dhanyeli masomphenya mazinji na ndoto, pontho ampasa maluso toera kufokotoza maprofesiya. Mazinji mwa maprofesiya anewa akwanirisika. Anango asalonga thangwi ya pinthu pinafuna kucitika ntsogolo pyakuti pinadzakhuya anthu onsene pa dziko yapantsi.

¹⁸ Mu nsolo unatowera tinapfundza maprofesiya mawiri adalembwa na Dhanyeli. Kubvesesa maprofesiya anewa kunaphedza ife tonsene, ana na akulu ene toera kucita pisankhulo pyadidi. Maprofesiya anewa anatiphedzambo toera tikhale akukhunganyika cincino, thangwi ntsogolo tinadzafunika kukhala acipapo kakamwe na akukhulupirika kuna Yahova.