1, 2. Thangwi yanji Mboni za Yahova asabvala nguwo zakuthema? (Onani cithundzithundzi cakutoma.)

 TSAMBA ya mphangwa ya Holanda yafokotoza pya nguwo zinabvala atsogoleri a mauphemberi pa misonkhano yawo. Iyo yalonga: “Iwo akhabvala nguwo zakukhonda thema, makamaka m’midzidzi yakupisa.” Mbwenye tsamba ibodzi ene yalonga kuti Mboni za Yahova nee akhabvala munjira ineyi pa misonkhano yawo ya gawo. Tsamba ineyi yafokotoza kuti aphale akhabvala mafato na magaravata, atsikana akhabvala masaya akuthema, maseze ndi a ntundu wacincino. Kazinji kene Mboni za Yahova asasimbwa thangwi ya mabvaliro awo. Mpostolo Paulu alonga kuti nguwo zinabvala Akristu zisafunika kupangiza ‘makhaliro akulinganira na ndzeru zadidi,’ makhaliro anewa ndi akufunika kwa atumiki a Mulungu. (1 Timoti 2:9, 10) Maseze Paulu akhalonga pya akazi, midida ineyi isaphatisirwambo kwa amuna Acikristu.

² Kudziwa mitundu ya nguwo zinakomeresa Yahova, mphyadidi kakamwe kwa ife ninga Mboni za Yahova na kwa Mulungu wathu analambira ife. (Genesi 3:21) Bhibhlya isapangiza pakweca  kuti Yahova, Mulungu wa Mphambvu Zonsene, asafuna kuti atumiki ace abvale munjira inakomerwa na Iye. Natenepa, nguwo zinasankhula ife nee zisafunika kukomeresa ife basi, mbwenye makamaka zisafunika kukomeresa Yahova, Mulungu wa Mphambvu Zonsene.

3. Tinapfundzanji kubulukira ku Mwambo wa Mose unalonga pya mabvaliro?

³ Mwambo wa Mose ukhali na mitemo ikhatsidzikiza Aisraele toera akhonde kubvala ninga anthu aulukwali a madzindza anango akhali cifupi na iwo. Mwambo wa Mose usapangiza kuti Yahova nkhabe kukomerwa na mitundu ya nguwo zakuti munthu angazibvala, pisanentsa kakamwe kundzindikira kuti ndi mamuna peno nkazi. Lero, mitundu ineyi ya nguwo zisadziwika kakamwe n’Cizungu ninga moda sem gênero peno unissexo. (Lerini Deuteronomyo 22:5.) Mwambo unoyu usapangiza pakweca kuti Yahova nee asakomerwa na nguwo zinacitisa mamuna kuoneka ninga nkazi, peno nkazi kuoneka ninga mamuna, anthu mbacimwana kusiyanisa mamuna na nkazi.

4. Ninji cinafuna kuphedza Akristu toera kucita pisankhulo pyadidi pakusankhula nguwo?

⁴ Midida ya Bhibhlya inatiphedza toera kucita pisankhulo pyadidi thangwi ya mabvaliro. Midida ineyi isaphata basa konsene kwene, mwakukhonda tsalakana khala makhaliro a cisa cinakhala ife ndi akupisa peno akutonthola. Ife nee tisafunika kukhala na ndandanda ya nguwo zakuthema na nguwo zakukhonda thema. Basi ene tisafunika kutoweza midida ya Bhibhlya yakuti isapitiriza kutitawirisa kubvala nguwo zinafuna ife. Tendeni tidinge midida mingasi ya Bhibhlya yakuti inatiphedza toera kudziwa ‘pyadidi, pyakutawirika na cifuno ca Mulungu’ pakusankhula nguwo zathu.—Aroma 12:1, 2.

5, 6. Kodi nguwo zathu zinakhuya tani anango?

⁵ Mpostolo Paulu alemba uphungu wakufunika kakamwe unagumanika pa 2 Akorinto 6:4. (Lerini.) Kubulukira ku mabvaliro athu, anthu anakwanisa kunyerezera pyadidi peno pyakuipa thangwi ya ife. (1 Samweli 16:7) Nakuti ndife atumiki a Mulungu, tisafunika kucita pizinji kupiringana kusankhula nguwo zadidi, peno zinakomerwa na ife. Midida ya Bhibhlya inatiphedza toera kucalira kubvala nguwo zakuphata, zakubvira, zakuphenekera, zinapangiza khundu ya mabere kunja, peno zinacemerwa sexy. Pyenepi pisabveka kuti nee tisafunika kubvala nguwo zakuphenekera na zakupata zakuti zinapangiza khundu ya manungo athu yakuti nee yathema kupangizwa. Nee tisafuna kuti anthu anentseke peno akakamizike kuyang’ana kukhundu inango thangwi ya nguwo idabvala ife.

⁶ Tingabvala mwadidi munjira yakulemedzeka, anthu anatilemedza kakamwe ninga atumiki a Yahova. Kusiyapo pyenepi, tingabvala nguwo zakuthema, pinakhala pyakukhonda nentsa kuti anthu akhale na cifuno cakudziwa Mulungu analambira ife, kulemedza kakamwe gulu yathu na kufuna kubva mphangwa zathu zakupasa umaso.

7, 8. Ndi midzidzi ipi isafunika ife kucita mpholemphole pakusankhula nguwo zathu?

 ⁷ Ife tisafunika kubvala nguwo zinapangiza kuti tisalemedza Yahova, abale na alongo na anthu apacisa, pyenepi pinacitisa anthu kulemedza mphangwa zadidi zinamwaza ife. (Aroma 13:8-10) Tingaenda ku misonkhano peno kamwaza mphangwa, tisafunika kucita mpholemphole na nguwo zinabvala ife. Tisafunika kubvala nguwo zinapangiza kuti tisalambira Mulungu. (1 Timoti 2:10) Ndimomwene kuti nguwo zinabvala ife pa mbuto inango nee zinathema pa mbuto inango. Mbwenye mwakukhonda tsalakana kunakhala ife, ninga Mboni za Yahova, nee tisafunika kubvala nguwo zakuti anango anadzudzumika nazo.

⁸ Lerini 1 Akorinto 10:31. Tingaenda ku misonkhano ya cisa na ya gawo, nguwo zathu zisafunika kukhala zakuthema na zakulemedzeka. Nee tisafunika kusangizira anthu a dziko anabvala ninga munafunira iwo. Ngakhale pa ndzidzi unafika ife peno unabuluka ife pa oteli, ndzidzi unacedza ife nsonkhano mbudzati toma peno pakumala kwa nsonkhano tisafunika kuonesesa mwadidi toera mabvaliro athu akhonde kukhala akukhonda thema. Munjira ineyi tinakhala akusudzuka toera kudziwisa  anango mwaufulu kuti ndife Mboni za Yahova, pontho tinakhala akusudzuka toera kupereka umboni ndzidzi onsene.

9, 10. Kodi lemba ya Afilipi 2:4 inatiphedza tani pakusankhula nguwo zathu?

⁹ Lerini Afilipi 2:4. Thangwi yanji tisafunika kunyerezera pya abale na alongo athu tingaenda kasankhula nguwo zathu? Thangwi ibodzi ndi yakuti atumiki a Yahova asawangisira toera kubvera uphungu uyu unagumanika pa Akolose 3:2, 5, NM: “Pipheni mphapo pya m’manungo mwanu ku macitiro a pantsi pano, ninga pyaulukwali na pyakuzuda pyonsene, pyakupasa manyadzo, pya kufuna kakamwe kupita m’mabonde.” Anango mwa abale na alongo athu asiya umaso waulukwali, mbwenye panango asapitiriza kuthimbana na pifuno pyakuipa. (1 Akorinto 6:9, 10) Ife nkhabe funa kuti nguwo zathu zithimizire nkandzo unathimbana na Akristu anewa toera kubvera midida ya Bhibhlya! Na thangwi ineyi, tisafunika kunyerezera mwadidi kakamwe pakusankhula nguwo zinafuna ife kubvala.

¹⁰ Mwakukhonda tsalakana khala tiri pa Nyumba ya Umambo peno pa mbuto inango, tisafunika kubvala nguwo zakuti zinakomeresa Yahova. Dziko yadzala na anthu aulukwali. Mbwenye tingakhala pakati pa abale na alongo athu, tisabva kuti tiri akutsidzikizika ku dziko ya Sathani. Ndimomwene kuti tiri na ufulu wakusankhula nguwo zinafuna ife kubvala. Mu ndzidzi ubodzi ene, Yahova asafuna kuti tibvale nguwo zakuti zinaphedza andzathu toera kupitiriza kukhala na manyerezero akucena, makhaliro adidi, mbacedza makani akuti anakomeresa Mulungu. (1 Pedro 1:15, 16) Munthu anafuna ndzace na ntima onsene, ‘nkhabe kucita pinthu munjira yakukhonda thema, pontho nkhabe kusaka pinthu pinakomerwa na iye basi.’—1 Akorinto 13:4, 5.

11, 12. Kodi lemba ya Koelete 3:1, 17 inatiphedza tani toera kubvala munjira yakuthema?

¹¹ Lemba ya Koelete 3:1, 17 isalonga: ‘Cinthu consene ciri na ndzidzi wace.’ Lemba ineyi isapfundzisa kuti tisafunika kubvala nguwo zakuthema pa ndzidzi wakuthema. Ndimomwene kuti kupisa, kutonthola, mbuto inakhala ife, kusowa kobiri na makhaliro anango anakwanisa kukhuya nguwo zinasankhula ife. Mbwenye maonero a Yahova thangwi ya pinthu pyadidi na pyakuipa, nkhabe kucinja.—Malakiya 3:6.

¹² M’midzidzi yakupisa pisanentsa kakamwe kubvala nguwo zakuthema. Mbwenye khala tisafuna abale na alongo athu, nee tinabvala nguwo zakupata, peno zikulu kakamwe zakuti zinapangiza makhundu a manungo athu akuti nee athema kupangizwa. (Yobe 31:1) Kusiyapo pyenepi, khala tiri ku bara peno pa piscina, nguwo zathu zakusamba nazo zisafunika kukhala zakuthema peno zakulemedzeka. (Misangani 11:2, 20) Anango asabvala nguwo zakusamba nazo zinapangiza makhundu a manungo akuti nee athema kupangizwa. M’bodzi na m’bodzi wa ife asafunika kucita cinthu cinakomeresa ndzace, toera kumuwangisa mwauzimu. Thangwi Kristu nee acita pikhakomerwa na iye basi tayu, natenepa, tisafunika kubvala nguwo zakuti zinacitisa anango kusimba Yahova Mulungu wathu.

13. Kodi lemba ya 1 Akorinto 10:32, 33 inatiphedza tani pakusankhula nguwo zathu?

 ¹³ Uphungu unango wakufunika wa Bhibhlya wakuti unatiphedza toera kusankhula nguwo usagumanika pa 1 Akorinto 10:32, 33. (Lerini.) Lemba ineyi isapangiza kuti tisafunika kucita mpholemphole toera tikhonde kuphekesa cikumbuntima ca anango. Natenepa, nee tisafunika kubvala nguwo zakuti zinadzudzumisa abale na alongo peno anthu anakhonda kulambira Yahova. Mpostolo Paulu alemba: ‘M’bodzi na m’bodzi wa ife asafunika kucita cinthu cinakomeresa ndzace, toera kumuwangisa. Thangwi Kristu nee acita pikhakomerwa na iye basi tayu.’ (Aroma 15:2, 3) Ninga Yezu, tisafunika kuona kuti kucita cifuno ca Mulungu na kuphedza anango, ndi pyakufunika kakamwe kupiringana pifuno pyathu. Kwa iye, cinthu cakufunika kakamwe cikhali kulonga pya Yahova kuna anango. Tisafunika kutowezera citsandzo cace. Natenepa, pakusankhula nguwo zathu, tisafunika kudziwa mwadidi kuti anango anaona tani nguwo zinasankhula ife. Ife tisafuna kuti anthu abvesere mphangwa zinamwaza ife, natenepa, nguwo zinabvala ife zisafunika kuaphedza kucita pyenepi.

14. Kodi anyakubala anaphedza tani anawo toera kusankhula nguwo zinakomeresa Yahova?

¹⁴ Anyakubala Acikristu ali na basa yakupfundzisa anawo toera abvere midida ya Bhibhlya. Anyakubala na ana asafunika kubvala nguwo zakulemedzeka, zakuti zinakomeresa Yahova. (Misangani 22:6; 27:11) Kodi anyakubala anaphedza tani anawo toera kubvesesa na kucita pinthu pinakomeresa Yahova? Pakutoma, anyakubala asafunika kupangiza citsandzo cadidi. Kusiyapo pyenepi, asafunika kupfundzisa anawo mwaufuni kuti anagula kupi nguwo zawo, pontho anasankhula tani nguwo zakuthema. Ana nkhabe funika kugula nguwo basi ene thangwi akomerwa nayo, m’mbuto mwace, cinthu cakufunika kakamwe ndi cakuti ana asafunika kusankhula nguwo zinapangiza kuti iwo asatumikira Yahova.

15. Ninji cinafuna kutiphedza toera kucita pisankhulo pyadidi?

¹⁵ Bhibhlya iri na pitsogolero toera kucita pisankhulo pyadidi. Nguwo zinabvala ife zisapangiza kuti ninji pinakomerwa na ife. Ndimomwene kuti ntundu wa nguwo zinakomerwa na ife na ntengo wa kobiri inaphatisira ife ndi pyakusiyana na pya anango. Ngakhale tenepo, ndzidzi onsene nguwo zathu zisafunika kukhala zakucena, zakulemedzeka, pontho zibverane na mbuto inagumanika ife mwakubverana na makhaliro a pacisa.

16. Thangwi yanji mphyadidi kakamwe kuwangisira toera kugumana nguwo zakuthema?

¹⁶ Kazinji kene pisanentsa kugumana nguwo zakuthema. Maloja mazinji asagulisa mitundu ya nguwo zinabuluka cincino basi. Na thangwi ineyi, panango pinanentsa kugumana nguwo zakuthema ninga masaya, mavistidu, mabhuluza, peno kusankhula makarasau peno mafato akuti nee ndi akupata. Mbwenye mphyadidi kakamwe kuwangisira, thangwi abale na alongo athu asapereka takhuta kakamwe tingabvala nguwo zakubalika, mu ndzidzi ubodzi ene mbazikhala zakuthema. Cinthu cakufunika kakamwe ndi cakuti tingacita pyenepi, tinakomeresa Babathu wakudzulu, ceneci ndi cinthu ca ntengo ukulu kakamwe.

17. Kodi mphyakuthema kwa abale kukoya ndebvu?

¹⁷ Kodi mphyakuthema kwa abale kukoya ndebvu? Kale, Mwambo wa Mose ukhalonga kuti amuna akhafunika kukoya ndebvu. Mbwenye lero abale nee asafunikabve kutowezera Mwambo wa Mose. (Levitiko 19:27; 21:5;  Agalata 3:24, 25) M’madziko anango, kukhala na ndebvu zakutsalakanwa mwadidi nee pisadzudzumisa anthu. Natenepa, anthu asatawira kubva mphangwa za Bhibhlya zinamwazwa na munthu anakoya ndebvu. M’madziko anewa, abale akuti ndi akulu a mpingo na atumiki akutumikira asakoya ndebvu, mbwenye anango asasankhula kucinga ndebvu. (1 Akorinto 8:9, 13; 10:32) Mbwenye m’madziko anango, anthu azinji nee asakoya ndebvu. Mu pisa pyenepi, nee ndi pyakutawirika kwa atumiki Acikristu kukoya ndebvu. Natenepa, m’bale angakoya ndebvu, anthu anaxola dzina ya Yahova. Pontho, m’bale wakuti asakoya ndebvu, nee anaoniwa ninga munthu ‘wakusowa mathangwi akusandikwa,’ pisabveka kuti iye nee athema kuoniwa ninga citsandzo cadidi mu mpingo.—1 Timoti 3:2, 7; Aroma 15:1-3.

18, 19. Kodi uphungu unagumanika pa Mikeya 6:8 unatiphedza tani pakusankhula nguwo?

¹⁸ Tisatsandzaya kudziwa kuti Yahova nee asatipasa ndandanda wa nguwo zakuthema na zakukhonda thema. M’mbuto mwace, iye asatipasa ufulu wakusankhula nguwo zinafuna ife mwakubverana na uphungu wa Bhibhlya. Ngakhale tenepo, tisafunika kukumbuka kuti nguwo zinabvala ife zisafunika kupangiza kuti tikufamba na Mulungu munjira yakulinganira.—Mikeya 6:8.

¹⁹ Mphapo pisabvekanji kufamba na Mulungu munjira yakulinganira? Pisabveka kuti khala ndife anthu a manyerezero akulinganira na akucepeseka, tinaona kuti Yahova basi ndiye adathema kutitsogolera mu umaso wathu. Kusiyapo pyenepi, tinadzalemedza maonero na mabvero a andzathu. Pontho, cinthu cakufunika kakamwe ndi cakuti, tingakhala na maonero akulinganira, pinatiphedza toera kukumbuka kuti Yahova ndi wakucena, pontho ndzidzi onsene asafuna udidi wathu.

20. Kodi tisafuna kuti anthu anyerezerenji thangwi ya ntundu wa nguwo zathu?

²⁰ Nguwo zathu zisafunika kupangiza pakweca kwa anthu onsene kuti ndife atumiki a Yahova. Tisatsandzaya kakamwe tingabvala munjira inakomerwa na iye. Abale na alongo azinji athema kusimbwa thangwi ya kuwangisira kunacita iwo toera kubvala mwakulemedzeka na kupangiza makhaliro adidi. Kazinji kene, pyenepi pisakhuya anthu azinji mpaka kukhala na cifuno cakupfundza pya Yahova. Munjira ineyi, Yahova asakomerwa kakamwe na makhaliro athu. Tingacita pisankhulo pyadidi pakusankhula nguwo zathu na kubvala mwadidi, tisakomeresa Yahova, wakuti asalongwa kuti “abvala ukulu na mbiri ninga nguwo.”—Masalmo 104:1, 2.