Yahova asafuna kuti mamuna na nkazi angamanga banja, akhale akutsandzaya, pontho akhale na uxamwali wakuwanga wakuti unapitiriza. (Mat. 19:4-6) Khala imwe musafuna kumanga banja, munagumana tani munthu wakuthema toera kumanga naye banja? Yahova ndiye adaticita, na thangwi ineyi, iye asadziwa pinthu pisafunika ife kucita toera tikhale akutsandzaya m’banja. Natenepa, mungaphatisira uphungu udatipasa iye, imwe munakhala wakutsandzaya kakamwe. Onani uphungu ungasi unalonga pyenepi.

Pakutoma, ife tisafunika kudziwa kuti: ‘Ntima ndi wakunyengeza kakamwe kupiringana cinthu cinango consene, pontho ndi wakugoswa kakamwe.’ (Yer. 17:9) Mamuna na nkazi akuti asafuna kumanga banja, angatoma kubvundzirana, mwakukhonda dembuka, mabvero akufunana kwawo unango na ndzace asakhala akuwanga kakamwe. Pyenepi pingacitika, pisakhala pyakunentsa kuna iwo kucita pisankhulo pyadidi. Anthu angasankhula kumanga banja basi ene thangwi ya mabvero ali na iwo kuna unango na ndzace, mukupita kwa ndzidzi, pinthu nee pisafamba mwadidi. (Mis. 28:26) Na thangwi ineyi, nee ndi pyadidi kuti mamuna na nkazi alonge mafala aufuni kuna unango na ndzace peno kucita pikiro kuna unango na ndzace mbadzati kudziwana mwadidi.

Lemba ya Misangani 22:3 isalonga: ‘Munthu wandzeru angaona cinthu cakugoswa asabisala, mbwenye anthu akusowa ndzeru asapitiriza kuenda kutsogolo, mbaona nyatwa.’ Ndi ngozwi ipi yakuti panango inaoneka thangwi yakuphatisira masaiti anaphedza anthu toera kugumana munthu wakumanga naye banja? Mwakutsukwalisa, anango adziwana na munthu mu interneti mbatoma kubvundzirana naye, mbwenye mukupita kwa ndzidzi, adzindikira kuti anyengezwa na munthu akhabvundzirana na iwo mu interneti. Kusiyapo pyenepi, anango akuti asafuna kunyengeza anthu asalemba pinthu pyauthambi toera kupangiza kuti iwo ndi anthu adidi, mbwenye cifuno cawo ndi kuba kobiri ya anthu akuti nkhabe maluso. Midzidzi inango, anthu anewa adanyengeza andzawo, akhalonga kuti ndi Mboni za Yahova.

Onani ngozwi inango. Masaiti anango, asaphatisira maprogramu a komputadhori mbapangiza kuti anaphedza anthu toera kugumana munthu wakuthema kubvundzirana naye. Mbwenye nkhabe cinthu cinapangiza kuti mwandimomwene pyenepi pisaphedza. Kodi ndi pyandzeru kunyindira maprogramu a komputadhori toera kuphedza munthu kucita cisankhulo cakufunika kakamwe ninga kusankhula munthu wakumanga naye banja? Maprogramu anewa a komputadhori, cipo anakhala akunyindirika ninga uphungu wa Bhibhlya.—Mis. 1:7; 3:5-7.

Lemba ya Misangani 14:15 isalonga: ‘Munthu wakusowa ndzeru asakhulupira mafala onsene, mbwenye  munthu wandzeru asanyerezera mwadidi mbadzati kucita cinthu.’ Mbamudzati kusankhula munthu wakuthema toera kumanga naye banja, pakutoma imwe musafunika kundziwa mwadidi. Mbwenye mungasaka munthu mu interneti pinakhala pyakunentsa toera kundziwa mwadidi. Maseze munakwanisa kupangizana mafoto anu, mbamucedza mu ndzidzi uzinji, kodi munakwanisadi kulonga kuti musadziwana unango ndzace? Anango anyerezera kuti agumana munthu wakuti asafunana naye kakamwe, mbwenye pakumalisa atsukwala pidaonana iwo nkhope na nkhope.

Nyamasalmo alonga: ‘Ine nee ndisacita uxamwali na anthu analonga uthambi, pontho ndisacalira anthu aumpfakafaka.’ (Masal. 26:4) Anthu azinji asaona kuti nee ndi pyakuipa kulemba mphangwa zauthambi thangwi ya iwo mu interneti toera aoneke ninga ndi anthu adidi kuna ule anafuna kubvundzirana na iwo. Iwo anakwanisa kubisa makhaliro awo akuipa, peno kukhonda pangiza makhaliro awo akuipa pakucedza na munthu mu interneti peno pakutumiza mphangwa kuna anango. Ngakhale kuti anango anakwanisa kulonga kuti ndi Mboni za Yahova, kodi mwandimomwene iwo ndi Akristu akubatizwa? Kodi ndi akukola mwauzimu, Pontho ali na uxamwali wakuwanga na Yahova? Kodi iwo ndi anthu akuti asalemedzwa mu mpingo wawo? Panango iwo nee ndi anthu a citsandzo cadidi, peno ndi ‘axamwali akuipa.’ (1 Akor. 15:33; 2 Tim. 2:20, 21) Mwakubverana na midida ya Bhibhlya, kodi iwo ali akusudzuka toera kumanga banja? Imwe musafunika kudziwa matawiro a mibvundzo ineyi, mbwenye ndi pyakunentsa khala imwe nee muli na ciphedzo ca abale anango akuti asadziwa mwadidi munthu unoyu. (Mis. 15:22) Mwandimomwene, ntumiki wakukhulupirika wa Yahova nee asafunika kumanga banja na munthu wakuti nkhabe kutumikira Yahova, thangwi angacita pyenepi, ‘anamangirirwa pa goli ibodzi ene’ na munthu unoyu.—2 Akor. 6:14; 1 Akor. 7:39.

Pana ngozwi zizinji zakuphatisira interneti toera kusaka munthu wakumanga naye banja, mbwenye pana njira zadidi kakamwe zakusaka munthu wakumanga naye banja, kucita naye uxamwali mpaka kumanga banja yakulemedzeka. Mphapo munagumana kupi munthu wakuthema toera kumanga naye banja? Midzidzi inakwanisa ife kusonkhana pabodzi pene, tinakwanisa kudziwana na anango nkhope na nkhope pa misonkhano ya mpingo, misonkhano ya cisa, misonkhano ya gawo peno misonkhano inango.

Midzidzi yakuti nee tisakwanisa kusonkhana pabodzi pene ninga mu ndzidzi uno wa Koronaviru, ife tisaphatisira maprogramu a interneti toera kucita misonkhano yathu ya mpingo. Pa misonkhano ineyi, imwe munakwanisa kudziwana na abale na alongo akuti adzati kumanga banja. Imwe munakwanisa kuabva mbakacita nkhani pa misonkhano, peno angapereka matawiro anapangiza cikhulupiro cawo. (1 Tim. 6:11, 12) Munakwanisambo kucedza unango na ndzace mungagawiwa m’misoka pakumala kwa misonkhano. Kucedza na abale na alongo m’misoka ineyi, kunakuphedzani toera kuona kuti munthu anafuna imwe kubvundzira asacedza tani na anango, pontho pyenepi pinakuphedzani toera kudziwa mwadidi makhaliro a munthu unoyu. (1 Ped. 3:4) Mukupita kwa ndzidzi, imwe munakwanisa kudziwana mwadidi, pontho munakwanisa kuona khala muli na pifuno pibodzi pyene peno khala makhaliro anu anakuphedzani toera kubverana mungamanga banja.

Abale na alongo akuti adzati kumanga banja, angasaka munthu wakumanga naye banja mwakubverana na midida ya Bhibhlya, nee pisanentsa toera kubvesesa undimomwene unagumanika pa Misangani 18:22. Lemba ineyi isalonga: ‘Ule anagumana nkazi wadidi peno mamuna wadidi agumana nkhombo; pontho iye asakhala wakutawirika kuna Yahova.’