CIKHULUPIRO ciri na mphambvu kakamwe. Mwacitsandzo, maseze Sathani asafuna kufudza uxamwali wathu na Yahova, cikhulupiro cinatiphedza toera ‘kuthimisa mapswimo onsene akugaka a nyakuipa.’ (Aef. 6:16) Tingakhala na cikhulupiro tinakwanisa kuthimbana na nyatwa zikulu ninga mapiri. Yezu apanga anyakupfundzace: “Imwe mungakhala na cikhulupiro ninga mbeu ya mostardha, munakwanisa kupanga phiri iyi kuti: ‘Buluka pano uende kule,’ iyo inabulukadi.” (Mat. 17:20) Nakuti tisadziwa kuti cikhulupiro cinakwanisa kuwangisa uxamwali wathu na Yahova, natenepa tisafunika kudinga mibvundzo iyi: Kodi cikhulupiro ninji? Kodi makhaliro a ntimathu anakhuya tani cikhulupiro cathu? Tinawangisa tani cikhulupiro cathu? Pontho mbani anafunika ife kukhulupira?—Aroma 4:3.

Cikhulupiro cisaphataniza pizinji kusiyapo basi ene kutawira pinalonga Bhibhlya, ngakhale “madimonyo asatawirambo [kuti Mulungu alipo] mbatetemera.” (Tiya. 2:19) Mphapo cikhulupiro ninji?

Bhibhlya isafokotoza cikhulupiro munjira ziwiri. Yakutoma, “cikhulupiro ndi cidikhiro cakunyindirika ca pinthu pinadikhirwa.” (Aheb. 11:1a) Imwe mungakhala na cikhulupiro, munanyindira na ntima onsene kuti pyonsene pinalonga Yahova mphyandimomwene, pontho pinadzakwanirisika. Mwacitsandzo, Yahova apanga Aizraeli: ‘Mungakhonda kutoweza cibverano canga thangwi ya masikati, na cibverano canga thangwi ya masiku, toera masiku na masikati akhonde kuoneka pa ndzidzi wakuthema, basi ene ndi munjira ineyi yakuti cibverano canga cidacita ine na ntumiki wanga Dhavidhi nee cinatowezwa.’ (Yer. 33:20, 21) Kodi imwe musagopa kuti ntsiku inango dzuwa inakhonda kubuluka mbikhonda kubira, mbicitisa kuti kukhonde kuoneka masiku na masikati? Khala nee musapenula mitemo yacibaliro inacitisa dziko kuzungulira nkhundu mwa dzuwa, mphapo musapenula kuti Ule adacita mitemo ineyi anakwanirisa mapikiro ace? Mwandimomwene nkhabe!—Iza. 55:10, 11; Mat. 5:18.

Yaciwiri, cikhulupiro ndi ‘cipangizo ca pinthu pinakhonda kuoneka na maso.’ M’mafala anango, cikhulupiro ndi ‘cipangizo ca pinthu,’ peno ‘cipangizo cakunyindirika ca pinthu pinakhonda kuoneka na maso pyakuti ndi pyandimomwene. (Aheb. 11:1b; cidzindikiro capantsi.) Munjira ipi? Nyerezerani khala mwana akubvundzani kuti: ‘Musadziwa tani kuti muya ulipo?’ Maseze imwe cipo mwaona kale muya, munakwanisa kuphedza mwana mukumpanga pinthu pinapangiza kuti muya ulipo, ninga kupuma, pinthu pinatekenyeswa na mphepo na pinthu pinango. Mwana angatawira pyenepi, anakwanisambo kutawira kuti pinthu pinakhonda iye kuona na maso piripo. Munjira ibodzi ene, cikhulupiro cisabulukira ku pinthu pinaona munthu na maso.—Aroma 1:20.

Nakuti cikhulupiro cisabulukira ku pinthu pinaoniwa na maso, toera munthu akhale na cikhulupiro asafunika “adziwe mwadidi undimomwene.” (1 Tim. 2:4) Mbwenye pyenepi nee pyakwana. Mpostolo Paulu alemba: “Kubulukira muntima, munthu asakhulupira.” (Aroma 10:10) Munthu nee asafunika basi ene kukhulupira undimomwene, mbwenye asafunikambo kuulemedza. Angacita pyenepi, anakulumizika toera kukhulupira, mbakhala maso munjira inakomeresa Mulungu. (Tiya. 2:20) Munthu anakhonda kulemedza  undimomwene, panango anakhonda pipangizo pyakuoneka na maso thangwi iye nkhabe funa kucinja pinakhulupira iye peno asafuna kucita pinakomerwa na iye. (2 Ped. 3:3, 4; Yuda 18) Ndi na thangwi ineyi, kale nee ndi anthu onsene adaona pirengo akhala na cikhulupiro cakuwanga. (Num. 14:11; Juw. 12:37) Nzimu wakucena wa Mulungu basi ene usaphedza anthu anafuna undimomwene toera kukhala na cikhulupiro.—Agal. 5:22; 2 Ates. 2:10, 11.

Mambo Dhavidhi akhali m’bodzi mwa ale akuti akhali na cikhulupiro cakuwanga. (Aheb. 11:32, 33) Mbwenye nee ndi onsene m’banja ya Dhavidhi akuti akhali na cikhulupiro cakuwanga. Mwacitsandzo, ntsiku inango, Eliabhe m’baleace Dhavidhi wankulu, apangiza kuti nee akhali na cikhulupiro cakuwanga pidasandika iye Dhavidhi thangwi yakudzudzumika na kuthusa kukhacita Goliyati. (1 Sam. 17:26-28) Nkhabe munthu adabalwa na cikhulupiro; pontho nkhabe munthu anatambira cikhulupiro kubulukira kuna anyakubalace, natenepa cikhulupiro ca Dhavidhi cisapangiza kuti iye akhali xamwali wa Mulungu.

Pa lemba ya Masalmo kapitulu 27, Dhavidhi asapangiza kuti akhala tani na cikhulupiro cakuwanga. (Vesi 1) Dhavidhi akhanyerezera mwadidi pinthu pidatamba iye, pontho kuti Yahova antsidzikiza tani kuna anyamalwa ace. (Vesi 2, 3) Iye akhalemedza kakamwe tabhernakulo ya Yahova. (Vesi 4) Dhavidhi akhalambira Mulungu pa tabhernakulo pabodzi na anyakukhulupira andzace. (Vesi 6) Ndzidzi onsene iye akhacita phembero kuna Yahova. (Vesi 7, 8) Dhavidhi akhafunambo kupfundziswa na Yahova. (Vesi 11) Cikhulupiro cikhali cakufunika kakamwe kuna Dhavidhi, natenepa iye abvundzika: ‘Kodi ine mbandidakhala kupi mbidasowa cikhulupiro?’—Vesi 13, Tradução do Novo Mundo.

Imwe munakwanisa kukhala na cikhulupiro ninga ca Dhavidhi mungacitambo pinthu pidalonga iye pa lemba ya Masalmo kapitulu 27. Nakuti cikhulupiro cisabulukira ku udziwisi wandimomwene, mungapfundza kakamwe Mafala a Mulungu na mabukhu akubuluswa m’Bhibhlya, pinakhala pyakukhonda nentsa kukhala na n’khaliro unoyu wakuti usacita khundu ya misapo ya nzimu wa Mulungu. (Masal. 1:2, 3) Nyerezerani mwadidi mu ndzidzi unapfundza imwe. Tinganyerezera mwadidi pinapfundza ife, kupereka kwathu takhuta kuna Yahova kunathimizirika. Mu ndzidzi unathimizirika kupereka kwanu takhuta kuna Yahova, imwe munadzafuna kupangiza cikhulupiro canu kubulukira mu kumulambira pa misonkhano na kumwaza mphangwa kuna anango. (Aheb. 10:23-25) Tinapangizambo cikhulupiro tingapitiriza ‘kucita phembero ndzidzi onsene mbatikhonda kuneta.’ (Luka 18:1-8) Natenepa, “citani phembero ndzidzi onsene” kuna Yahova, mbamunyindira kuti “iye asakutsalakanani.” (1 Ates. 5:17; 1 Ped. 5:7) Cikhulupiro cinatiphedza toera kucita pinthu pyadidi, pontho tingacita pyenepi, cikhulupiro cathu cinakhala cakuwanga.—Tiya. 2:22.

Namasiku Yezu mbadzati kufa, iye apanga anyakupfundzace: “Khulupirani Mulungu; khulupiranimbo ine pano.” (Juw. 14:1) Natenepa, ife nee tisafunika basi ene kukhulupira Yahova, mbwenye tisafunikambo kukhulupira Yezu. Munakhulupira tani Yezu? Tendeni tione njira zitatu.

Yakutoma, onani ciomboli ninga muoni udakupasani Mulungu. Mpostolo Paulu alonga: ‘Ndiri maso thangwi yakukhulupira Mwana wa Mulungu, ule adandifuna mbaperekeka thangwi ya ine.’ (Agal. 2:20) Mungakhulupira Yezu, munatawira na ntima onsene kuti ciomboli cisaphata basa kuna imwe, ico cinacitisa kuti madawo anu alekererwe, cisakupasani cidikhiro cakukhala na umaso wakukhonda mala, pontho ndi cipangizo cikulu ca ufuni wa Mulungu kuna imwe. (Aroma 8:32, 38, 39; Aef. 1:7) Mungakhulupira kuti ciomboli cinakwanisa kukuphedzani, imwe nee munapasika mulando, mbamunyerezera pyakuipa thangwi ya imwe.—2 Ates. 2:16, 17.

Yaciwiri, fendedzerani Yahova mukucita phembero kubulukira mu ntsembe ya Yezu. Thangwi ya ciomboli, ife tinakwanisa kuphembera kuna Yahova “na cinyindiro toera atibvere ntsisi, pontho apangize kukoma ntima kukulu kuna ife toera kutiphedza pa ndzidzi wakuthema.” (Aheb. 4:15, 16; 10:19-22) Phembero inatiphedza toera kuthimbana na mayesero akucita madawo.—Luka 22:40.

Yacitatu, bverani Yezu. Mpostolo Juwau alemba: “Ule anakhulupira Mwana ali na umaso wakukhonda mala; ule anakhonda kubvera Mwana nee anadzawina umaso, mbwenye anadzaona ukali wa Mulungu.” (Juw. 3:36) Onani kuti Juwau asiyanisa kukhulupira na kukhonda bvera. Natenepa, imwe munakhulupira Yezu mungambvera. Imwe munabvera Yezu mukutowezera “mwambo wa Kristu,” wakuti ndi pinthu pyonsene pidapfundzisa iye na pidalonga iye. (Agal. 6:2) Imwe munabverambo Yezu mungatoweza pitsogolero pinapereka iye kubulukira kwa “m’bandazi wakukhulupirika na wandzeru.” (Mat. 24:45) Mungabvera Yezu, munadzakhala na mphambvu toera kupirira nyatwa zakulandana na condzi.—Luka 6:47, 48.

Ntsiku inango, mamuna m’bodzi akhuwa kuna Yezu: “Ine ndiri na cikhulupiro! Ndiphedzeni toera kuwangisa cikhulupiro canga!” (Marko 9:24) Iye akhali na cikhulupiro pang’ono, mbwenye akhali wakucepeseka mbadzindikira kuti akhafunika kuthimizira cikhulupiro cace. Ninga mamuna unoyu, ife tonsene tinathimbanambo na makhaliro akuti anadzaphemba kuthimizira cikhulupiro cathu. Pontho tonsene tinakwanisa kuwangisa cikhulupiro cathu cincino. Ninga pidaona ife, tinawangisa cikhulupiro cathu tingapfundza Mafala a Mulungu na kuanyerezera mwadidi, pyenepi pinatiphedza toera kuthimizira kupereka kwathu takhuta kuna Yahova. Cikhulupiro cathu cinakhala cakuwanga tingalambira Yahova pabodzi na Akristu andzathu, kulonga kuna anango pya cidikhiro cathu, mbatipiriza kucita phembero. Kusiyapo pyenepi, tingawangisa cikhulupiro cathu, tinatambira muoni ukulu kakamwe. Thangwi Bhibhlya isalonga: “Abale anga akufunika, wangisani cikhulupiro canu cakucena kakamwe . . . toera mupitirize kukhala mu ufuni wa Mulungu.”—Yuda 20, 21.