1. Thangwi yanji Yahova acita umaso?

UKHALIPO ndzidzi wakuti Yahova akhali ekhene. Mbwenye iye nee akhala wakutsukwala thangwi iye nee asafunika kukhala na munthu unango toera kukhala wakutsandzaya. Ngakhale tenepo, Mulungu akhafuna kuti anango akhale na umaso wakutsandzaya. Thangwi ya ufuni, Yahova acita umaso.—Masal. 36:9; 1 Juwau 4:19.

2. Ndi mabvero api adakhala na Yezu pabodzi na aanju thangwi ya pinthu pidacita Yahova?

² Pakutoma, Yahova acita Yezu. Buluka penepo, Yahova pabodzi na Yezu acita “pinthu pinango pyonsene,” kuphatanizambo pikwi na pikwi pya aanju. (Akol. 1:16) Yezu atsandzaya kakamwe kuphata basa pabodzi na Babace. (Mis. 8:30) Pontho aanju akhalimbo na mathangwi adidi toera kutsandzaya. Thangwi iwo akhaona mu ndzidzi ukhacita Yahova na Yezu kudzulu na dziko yapantsi. Kodi aanju apangiza tani kuti akhali akutsandzaya? Thangwi iwo ‘atoma kusekera na kuimba manja’ mu ndzidzi ukhacitwa dziko yapantsi, pontho apitiriza kuimba manja mpaka Yahova kumalisa kucita pinthu pyonsene. Pontho aanju atsandzaya kakamwe mu ndzidzi udaona iwo Yahova mbacita anthu. (Yobe 38:7; Mis. 8:31) Pinthu pyenepi pidacita Yahova pyapangiza ufuni na udziwisi wace.—Masal. 104:24; Aroma 1:20.

3. Mwakubverana na 1 Akorinto 15:21, 22, thangwi yanji ntsembe yaciomboli ya Yezu ndi yakufunika?

³ Yahova akhafuna kuti anthu akhale kwenda na kwenda pa dziko yapantsi idacita iye. Mbwenye Adhamu na Eva adawira Yahova,  natenepa anthu nee asakhala kwenda na kwenda pa dziko yapantsi. (Aroma 5:12) Kodi Yahova acitanji? Mwakukhonda dembuka, iye alonga pikhafuna iye kucita toera kupulumusa anthu. (Gen. 3:15) Yahova mbadapereka Yezu ninga ntsembe ya ciomboli toera kusudzula ana a Adhamu na Eva ku madawo na kufa. Yahova mbadapasambo umaso wakukhonda mala munthu onsene anasankhula kuntumikira.—Juwau 3:16; Aroma 6:23; lerini 1 Akorinto 15:21, 22.

4. Ndi mibvundzo ipi inafuna ife kudinga munsolo uno?

⁴ Pikiro ya Mulungu yakulamusa anthu muli akufa isaticitisa kukhala na mibvundzo mizinji. Mwacitsandzo, kodi kulamuswa muli akufa kunadzacitika tani? Kodi tinakwanisa kudzindikira acibale peno axamwali athu angadzalamuswa muli akufa? Ndi munjira ipi kulamuswa muli akufa kunadzakhala kwa kutsandzayisa? Pontho kulamuswa muli akufa kusatipfundzisanji thangwi ya ufuni, udziwisi na kupirira kwa Yahova? Tendeni tidinge mibvundzo ineyi.

5. Thangwi yanji pisaoneka kuti anthu onsene adafa nee anadzalamuswa mu ndzidzi ubodzi ene?

⁵ M’paraizu, Yahova anadzaphatisira Mwanace toera kulamusa muli akufa pikwi na pikwi pya anthu. Pisaoneka kuti anthu anewa nee anadzalamuswa mu ndzidzi ubodzi ene. Thangwi yanji? Thangwi anthu azinji kakamwe angalamuswa pa dziko yapantsi mu ndzidzi ubodzi ene, panango panadzaoneka uviyaviya ukulu. Pontho Yahova cipo asacita pinthu munjira yakukhonda thema. Iye asadziwa kuti toera anthu akhale mu ntendere pinthu pisafunika kucitwa mwakulinganira. (1 Akor. 14:33) Mu ndzidzi ukhacita Yahova pabodzi na Yezu dziko yapantsi iye apangiza kuti ndi waudziwisi na wakupirira, thangwi iye acita dziko yapantsi mwapang’ono-pang’ono mbadzati kucita anthu. Yezu anadzatowezerambo citsandzo ca Babace mu ndzidzi unafuna kudzaphata iye basa toera kukhunganya dziko yapantsi pabodzi na ale  anfuna kudzapulumuka pa nkhondo ya Armajedhoni. Iwo anadzacita pyenepi toera kutambira anthu anafuna kudzalamuswa muli akufa.

6. Mwakubverana na Mabasa 24:15, ndi anthu api anafuna kudzalamuswa muli akufa?

⁶ Cinthu cakufunika kakamwe cinafuna kudzacita ale anafuna kudzapulumuka pa Armajedhoni ndi kupfundzisa ale anafuna kudzalamuswa muli akufa pya Umambo wa Mulungu na midida ya Yahova. Thangwi yanji? Thangwi mwa anthu azinji anafuna kudzalamuswa muli akufa anango ndi “akukhonda kulungama.” (Lerini Mabasa 24:15.) Iwo anadzacita macinjo mazinji toera akwanise kuphindula na ntsembe yaciomboli ya Kristu mbakhala kwenda na kwenda. Mwandimomwene, inadzakhala basa ikulu kakamwe kupfundzisa undimomwene wa Mulungu pikwi na pikwi pya anthu anafuna kulamuswa muli akufa toera adziwe Yahova. Kodi iwo anadzapfundziswa m’bodzi na m’bodzi ninga pinapfundzisa ife anyakupfundza athu a Bhibhlya lero? Kodi iwo anadzasonkhana m’mipingo mbapfundziswa toera kupfundzisambo anango anafuna kudzalamuswa muli akufa? Tisafunika kudikhira toera kudzaona. Mbwenye ife tisadziwa kuti kunkhomo kwa Utongi wa Kristu wa Pyaka Cikwi, ‘dziko yapantsi inadzadzala na udziwisi wa Yahova.’ (Iza. 11:9) Ife tinadzakhala na basa yakutsandzayisa kakamwe mu ndzidzi unoyu wa pyaka cikwi.

7. Thangwi yanji atumiki a Mulungu anadzabvera ntsisi pakupfundzisa anthu anafuna kudzalamuswa muli akufa?

⁷ Mu ndzidzi wa Pyaka Cikwi pya Utongi wa Kristu, atumiki onsene a Yahova anadzapitiriza kucita macinjo toera kunkomeresa. Na thangwi ineyi, iwo anadzabvera ntsisi pakupfundzisa ale anafuna kudzalamuswa muli akufa. Thangwi asadziwa kuti pisafunika kuwangisira toera kukunda pipendamiro pyakuipa na kubvera midida ya Yahova. (1 Ped. 3:8) Ale anafuna kudzalamuswa muli akufa anadzaona kuti atumiki a Yahova ndi akucepeseka, pontho asapitiriza kucita macinjo toera kukomeresa Yahova, natenepa iwo anadzafunambo kulambira Yahova pabodzi na iwo.—Afil. 2:12.

8. Thangwi yanji tiri na cinyindiro cakuti tinadzadzindikira acibale athu na axamwali athu angadzalamuswa muli akufa?

⁸ Pana mathangwi mazinji anatipasa cinyindiro cakuti tinadzakwanisa kudzindikira acibale peno axamwali athu angadzalamuswa muli akufa. Mwacitsandzo, tingaona njira idalamusa Yahova anthu anango nduli pisapangiza kuti iye anadzalamusa anthu muli akufa na manungo mabodzi ene, malongero na manyerezero ninga akhali na iwo mbadzati kufa. Kumbukani kuti Yezu alandanisa kufa na citulo, pontho iye alandanisa kulamuka muli akufa na kulamuka ncitulo. (Mat. 9:18, 24; Juwau 11:11-13) Anthu angalamuka pakugona, asapitiriza kubva, kuona na kunyerezera ninga pikhali iwo mbadzati gona. Onani citsandzo ca Lazaro. Iye amala ntsiku zinai mu nthumbi, natenepa iye akhatoma kubvunda. Yezu pidalamusa iye Lazaro muli akufa, Marta na Mariya adzindikira Lazaro, pontho Lazaro aadzindikirambo.—Juwau 11:38-44; 12:1, 2.

9. Thangwi yanji anafuna kulamuswa muli akufa nee anadzalamuswa aungwiro?

⁹ Yahova apikira kuti m’paraizu nee munthu m’bodzi anadzalonga kuti ‘ndiri kubva kupha.’ (Iza. 33:24; Aroma 6:7) Natenepa, ale anafuna kudzalamuswa muli akufa anadzakhala na ungumi wadidi. Mbwenye iwo nee anadzalamuswa aungwiro. Thangwi angadzalamuswa aungwiro, panango acibale awo nee anakwanisa kuadzindikira. Pisaoneka kuti mu Utongi wa Kristu wa Pyaka Cikwi, anthu onsene anadzakhala aungwiro mwa pang’ono-pang’ono. Yezu anadzapereka Umambo kuna Babace basi ene kunkhomo kwa pyaka cikwi. Mu ndzidzi unoyu  Umambo wa Mulungu unagumanika wamala cita pinthu pyonsene pikhafuna Yahova, kuphatanizambo kucitisa anthu onsene kukhala aungwiro.—1 Akor. 15:24-28; Apok. 20:1-3.

10. Ndi mabvero api anafuna kudzakhala na imwe thangwi ya kulamuswa kwa anthu muli akufa?

¹⁰ Pinadzakhala pyakutsandzayisa kakamwe kuona pontho acibale na axamwali athu. Kodi imwe munadzalira peno munasekera? Kodi munadzaimba nyimbo toera kusimba Yahova? Tinakwanisa kukhala na cinyindiro cakuti tinadzafuna kakamwe babathu wacitsalakano na mwanace, thangwi ya kulamusa muli akufa acibale na axamwali athu.

11. Mwakubverana na mafala a Yezu anagumanika pa lemba ya Juwau 5:28, 29, ndi pinthu pipi pinafuna kudzacitika na ale anafuna kubvera Mulungu?

¹¹ Mwandimomwene, anthu anafuna kulamuswa muli akufa anadzakhala akutsandzaya kakamwe angaona kuti ali kusiya uunthu wawo wakale mbatoma kubvera Yahova. Anthu anafuna kucita macinjo anewa ndiwo anafuna kudzakhala m’Paraizu kwenda na kwenda. Mbwenye Yahova nee anatawirisa kuti anthu akukhonda kubvera akhale m’Paraizu.—Iza. 65:20; lerini Juwau 5:28, 29.

12. Ndi nkhombo zipi zinafuna kudzakhala na anthu pa dziko yapantsi?

¹² Umambo wa Mulungu ungatonga, atumiki onsene a Mulungu anaona undimomwene wa mafala anagumanika pa lemba ya Misangani 10:22 analonga kuti: ‘Nkhombo za Yahova ndizo zinapfumisa, pontho iye nkhabe kuthimizira nyatwa.’ Na ciphedzo ca nzimu wa Yahova, mwapang’ono-pang’ono atumiki a Mulungu anadzakhala ninga Kristu mpaka kukhala aungwiro. (Juwau 13:15-17; Aef. 4:23, 24) Ntsiku zonsene iwo anadzakhala na ungumi wadidi. Mwandimomwene umaso unadzakhala wakutsandzayisa kakamwe. (Yobe 33:25) Kodi kunyerezera thangwi ya kulamuswa muli akufa kunakuphedzani cincino?

13. Mwakubverana na Masalmo 139:1-4, kodi kulamuswa muli akufa kunadzapangiza tani kuti Yahova asadziwa mwadidi m’bodzi na m’bodzi wa ife?

¹³ Ninga pidalonga ife pakutoma, Yahova angadzalamusa anthu muli akufa iwo anadzakhala na manyerezero mabodzi ene na makhaliro ninga akhali na iwo mbadzati kufa. Pyenepi pisabveka kuti Yahova asakufunani kakamwe, pontho asaona pinanyerezera imwe, pinalonga imwe, pinacita imwe na mabvero anu. Natenepa, khala Yahova ali kulamusa imwe muli akufa, mwakukhonda nentsa iye mbadakwanisa kukulamusani na makhaliro na manyerezero akhali na imwe mbamudzati kufa. Mambo Dhavidhi akhadziwa kuti Yahova asadziwa mwadidi m’bodzi na wa ife. (Lerini Masalmo 139:1-4.) Ndi mabvero api anakhala na ife tingadziwa kuti Yahova asatidziwa mwadidi?

14. Thangwi yanji ndi pyakufunika kakamwe kunyerezera kuti Yahova asatidziwa mwadidi?

¹⁴ Kunyerezera kuti Yahova asatidziwa mwadidi kunatiphedza toera tikhonde kudzudzumika. Thangwi yanji? Thangwi Yahova asatitsalakana kakamwe, pontho iye asaona kuti m’bodzi na m’bodzi wa ife ndi wakufunika kakamwe kuna iye. Kusiyapo pyenepi, iye asaona pinthu pyonsene pinathimbana na ife mu umaso. Natenepa, ndi pyakufunika kakamwe kudziwa pyenepi. Thangwi nee tiri tekhene. Yahova ndzidzi onsene ali na ife, pontho asasaka miyai toera kutiphedza.—2 Pya dziko. 16:9.

15. Kodi cidikhiro ca kulamuswa muli akufa cisapangiza tani kuti Yahova ndi wa udziwisi?

¹⁵ Kugopa kufa ndi nsampha wakugopswa. Anthu anatsogolerwa na Sathani asaphatisira kugopa kufa toera kucitisa anango kusiya pinakhulupira iwo. Mbwenye iwo nee anasiya  kuticitisa kusiya pinakhulupira ife. Thangwi tisadziwa kuti anyamalwa athu angatipha, Yahova anadzatilamusa muli akufa. (Apok. 2:10) Ife tiri na cinyindiro cakuti iwo cipo anakwanisa kuticitisa kusiya kutumikira Yahova. (Aroma 8:35-39) Yahova apangiza kuti iye ndi wa udziwisi kakamwe mukupasa cidikhiro ca kulamuswa kwa anthu muli akufa. Na thangwi ya cidikhiro ceneci ife nee tisagopa kuphiwa na anthu anaphatisirwa na Sathani tingakhonda kucita pinthu pinafuna iwo. Pontho, cidikhiro ceneci cisatipasa cipapo toera kupitiriza kukhala akukhulupirika kuna Yahova.

16. Ndi mibvundzo ipi inafunika imwe kucitika, pontho matawiro anu anakuphedzani tani kudziwa khala musanyindira Yahova?

¹⁶ Anyamalwa a Yahova angafuna kukuphani, munakhala na cinyindiro cakuti Yahova anadzakulamusani muli akufa? Toera kudziwa khala muli na cinyindiro ceneci kuna Mulungu bvundzikani: ‘Kodi pisankhulo pinacita ine, ngakhale ping’ono ndisapangiza kuti ndisanyindira Yahova?’ (Luka 16:10) Mbvundzo unango ndi uyu: ‘Kodi ine ndisanyindira kuti ndingaikha Umambo wa Mulungu pa mbuto yakutoma Yahova anatsalakana pinafuna ine?’ (Mat. 6:31-33) Khala mwatawira inde mibvundzo ineyi, ndi cidzindikiro cakuti musanyindira Yahova, pontho muli dzololo toera kuthimbana na mayesero onsene anafuna kuoneka ntsogolo?—Mis. 3:5, 6.

17. (a) Cidikhiro ca kulamuswa kwa anthu muli akufa cisapangiza tani kuti Yahova ndi wakupirira? (b) Tinapangiza tani kupereka takhuta thangwi yakupirira kwa Yahova?

¹⁷ Yahova akhazikisa kale ntsiku na ndzidzi toera kufudza dziko ino yakuipa. (Mat. 24:36) Iye nee anafudza dziko ino yakuipa mbudzati kufika ndzidzi udakhazikisa iye. Maseze asafuna kakamwe kulamusa anthu muli akufa, iye asapitiriza kudikhira mwakupirira. (Yobe 14:14, 15) Iye ali kudikhira ndzidzi wakuthema toera kulamusa anthu muli akufa. (Juwau 5:28) Ife tiri na mathangwi adidi toera kupereka takhuta kuna Yahova thangwi ya kupirira kwace. Nyerezerani basi: Thangwi ya kupirira kwa Yahova, anthu azinji akhala na ndzidzi toera ‘kutcunyuka,’ kuphatanizambo ife. (2 Ped. 3:9) Yahova asafuna kuti pingakwanisika anthu azinji akhale na umaso wakukhonda mala. Natenepa, tisafunika kupereka takhuta kuna iye thangwi ya kupirira kwace. Tinacita tani pyenepi? Mukusaka anthu anafuna “kutawira undimomwene unapasa umaso wakukhonda mala,” mbatiaphedza toera afune Yahova na kuntumikira. (Mabasa 13:48) Natenepa, iwo anadzakwanisambo kuphindula na kupirira kwa Yahova ninga ife.

18. Thangwi yanji tisafunika kupirira anango?

 ¹⁸ Yahova asadziwa kuti basi ene ife tinakhala aungwiro pakumala kwa pyaka cikwi. Mbudzati kufika ndzidzi unoyu Yahova anapitiriza kulekerera madawo athu mwakupirira. Natenepa ife tisafunika kutowezera citsandzo cace, pontho tisafunika kuona makhaliro adidi a anango mbatialekerera mwakupirira. Onani citsandzo ca mulongo unango wakuti mamunace akhathimbana na nyatwa mbasiya kusonkhana. Iye alonga: “Pyenepi pyanditsukwalisa kakamwe. Umaso wathu wacinja mwakukhonda dikhira, pontho ife nee mbatidakwanisabve kucita pinthu pyonsene pikhafuna ife kucita.” Mbwenye nkazace apitiriza kupirira nyatwa zikhathimbana na mamunace. Iye anyindira Yahova, pontho nee abwerera nduli. Munjira ineyi, iye atowezera citsandzo ca Yahova thangwi m’mbuto mwakunyerezera nyatwa zikhathimbana na mamunace iye akhanyerezera pinthu pyadidi thangwi ya mamunace. Iye alonga: “Mamunanga ali na makhaliro adidi kakamwe, pontho ali kuwangisira toera kukunda nyatwa zinathimbana na iye.” Ndi pyakufunika kakamwe kupirira acibale athu peno abale na alongo mu mpingo akuti asawangisira toera kukunda pinentso pinathimbana na iwo.

19. Tisafunika kuwangisira toera kucitanji?

¹⁹ Yezu na aanju atsandzaya kakamwe mu ndzidzi udamalisa Yahova kucita dziko yapantsi. Mwandimomwene iwo anadzakhala akutsandzaya kakamwe angadzaona kuti dziko yonsene yapantsi yadzala na anthu a ungwiro akuti asafuna Yahova na kuntumikira. Pontho Akristu akudzodzwa anafuna kudzatonga na Kristu kudzulu anadzakhala akutsandzaya kakamwe angaona kuti anthu ali kuphindula na basa inacita iwo. (Apok. 4:4, 9-11; 5:9, 10) Kusiyapo pyenepi, pinadzakhala pyakutsandzayisa kakamwe kukhala mu dziko yakuti nee munadzaonekabve kufa, nee kutsukwala, nee kulira, nee kubva kupha. (Apok. 21:4) Mu ndzidzi unadikhira ife ndzidzi unoyu, tisafunika kuwangisira toera kutowezera Babathu waufuni, waudziwisi na wakupirira. Tingacita pyenepi, ife tinapitiriza kukhala akutsandzaya mwakukhonda tsalakana nyatwa zinathimbana na ife. (Tiya. 1:2-4) Ife tisapereka takhuta kakamwe kuna Yahova thangwi ya pikiro yace yakuti “kunadzaoneka kulamuswa muli akufa.”—Mabasa 24:15.