Mibvundzo Inacitwa na Anyakuleri
Lemba ya 2 Atesalonika 3:14 isalonga pya ‘kuikha cidzindikiro’ anthu anango. Mbani anafunika kucita pyenepi? Akulu a mpingo, peno m’bodzi na m’bodzi mu mpingo?
Mpostolo Paulu alembera Akristu a ku Tesalonika kuti: “Munthu angakhonda kubvera pinalonga ife mu tsamba iyi, muikheni cidzindikiro.” (2 Ates. 3:14) Kale tikhalonga kuti pitsogolero pyenepi piri kuperekwa kuna akulu a mpingo. Munthu angapitiriza kukhonda kubvera mitemo ya Bhibhlya pakumala kuphedzwa kazinji kene, akulu a mpingo akhafunika kucita nkhani mu mpingo toera kulonga pinthu pyenepi. Buluka penepo, amwazi mphangwa nee akhafunika kucedza na munthu unoyu, kusiyapo pa misonkhano na m’basa yakumwaza mphangwa.
Ngakhale tenepo, tisafunika kucinja kubvesesa kwathu. Cincino tisabvesesa kuti uphungu wa Paulu usalonga pya cisankhulo cakuti Nkristu m’bodzi na m‘bodzi anakwanisa kucicita. Natenepa, akulu a mpingo nee asafunika kucita nkhani toera kuikha cidzindikiro. Thangwi yanji tacita macinjo anewa? Onani pikhalonga Paulu mu ndzidzi ukhapereka iye uphungu unoyu.
Paulu alonga kuti Akristu anango mu mpingo wa Tesalonika akhali “akukhonda bvera.” Paulu akhadapereka uphungu wa m’Bhibhlya kuna iwo, mbwenye iwo nee akhabvera. Paulendo unango udaenda iye ku mpingo unoyu, Paulu aapanga: “Khala munthu nkhabe funa kuphata basa, mbaleke kudya.” Mbwenye anango nee akhafuna kuphata basa toera kutsalakanika, maseze akhali na mphambvu yakucita pyenepi. Kusiyapo pyenepi, iwo akhadzudzumika na pinthu pya anango. Akristu akhafunika kutsalakana tani anthu anewa akukhonda bvera?—2 Ates. 3:6, 10-12.
Paulu alonga: “Muikheni cidzindikiro.” Mafala anewa mu Cigerego asapangiza kuti munthu unoyu asafunika kudziwika, pontho anthu asafunika kucita mphole-mphole toera akhonde kukhuyiwa na makhaliro ace. Paulu apereka uphungu unoyu kuna mpingo onsene, tayu basi ene kuna akulu a mpingo. (2 Ates. 1:1; 3:6) Natenepa, Nkristu m’bodzi na m’bodzi wakuti panango aona m’bale peno mulongo mbakhonda kubvera Mafala a Mulungu, anakwanisa kucita cisankhulo ca ‘kucalira’ munthu unoyu wakukhonda bvera.
Kodi pyenepi pisabveka kuti iye asafunika kutsalakanwa ninga munthu adabuluswa mu mpingo? Nkhabe. Thangwi Paulu alonga: “Pitirizani kumpasa uphungu.” Natenepa, Nkristu m’bodzi na m’bodzi anakwanisa kucedza na munthu unoyu pa misonkhano na m’basa yakumwaza mphangwa. Mbwenye anasankhula kukhonda kukhala pabodzi na iye midzidzi inango peno kucita ubalangazi pabodzi na munthu unoyu. Thangwi yanji? Paulu alonga: “Toera iye akhale na manyadzo.” Tingacalira m’bale unoyu, panango iye anakhala na manyadzo thangwi ya pinthu pinacita iye, mbacinja.—2 Ates. 3:14, 15.
Tinadziwa tani kuti tisafunika kuikha munthu cidzindikiro? Pakutoma, tisafunika kukhala na cinyindiro cakuti makhaliro a munthu asapangiza kuti ndi ‘wakukhonda bvera,’ ninga pidalonga Paulu. Iye nee akhalonga pya anthu akuti ali na maonero akusiyana na athu thangwi ya cikumbuntima peno cisankhulo ca m’bodzi na m’bodzi. Kusiyapo pyenepi, nee akhalonga pya anthu akuti basi ene atitsukwalisa. M’mbuto mwace, Paulu akhalonga anthu adasankhula kukhonda bvera uphungu wa Mafala a Mulungu.
Lero, tingaona kuti m’bale peno mulongo nee asabvera Mafala a Mulungu, a tinakwanisa kucita cisankhulo cakukhonda kucedza na munthu unoyu peno kukhonda kucita naye ubalangazi midzidzi inango. Nakuti cisankhulo ceneci ndi ca m’bodzi na m’bodzi wa ife, nee tisafunika kulonga pyenepi kuna anthu anango, kusiyapo anthu a pabanja pathu. Pontho ife tinapitiriza kucedza na munthu unoyu pa misonkhano na mu utumiki. Iye angacinja makhaliro ace, ife tinatoma pontho kucedza naye.
a Mwacitsandzo, m’bale panango anakhonda kuphata basa toera kutsalakanika maseze akhale na mphambvu zakucita pyenepi, panango anabanyirana na munthu wakuti nee asatumikira Yahova, peno kulonga mwakuipa pitsogolero pidaperekwa mu mpingo, kupokanya pipfundziso pya Bhibhlya peno kulonga mapsweda. (1 Akor. 7:39; 2 Akor. 6:14; 2 Ates. 3:11, 12; 1 Tim. 5:13) Ale anapitiriza kucita pyenepi ndi ‘akukhonda bvera.’
