1. Ndi basa ipi idapereka Yahova kuna anyakubala?

YAHOVA acita banja yakutoma na cifuno cakubala ana. Ndi thangwi yace Bhibhlya isalonga: ‘Ana ndi miyoni ya Yahova.’ (Masal. 127:3) Mafala anewa asabvekanji? Nyerezerani kuti xamwali wanu akuphembani toera mukoye kobiri yace. Munapibva tani? Panango munakomerwa thangwi iye akunyindirani. Mbwenye panango munadzudzumika kuti munakoya tani kobiri ineyi. Yahova, xamwali wathu wa ponda ndipondembo, apasa anyakubala cinthu cakufunika kakamwe kupiringana kobiri. Iye apasa basa anyakubala toera atsalakane anawo na kuacitisa kuti akhale akutsandzaya.

2. Ndi mibvundzo ipi inafuna ife kutawira mu nsolo uno?

² Mbani anafuna kucitira cisankhulo anyakumanga banja thangwi yakubala ana, pontho mbani anafuna kukhazikisa ndzidzi toera iwo abale ana? Anyakubala anaphedza tani anawo toera akhale akutsandzaya? Tendeni tione midida mingasi ya m’Bhibhlya yakuti inaphedza mabanja Acikristu toera kucita pisankhulo pyadidi.

3. (a) Mbani anafuna kucitira cisankhulo banja thangwi yakubala ana? (b) Ndi midida ipi ya Bhibhlya yakuti axamwali na acibale a banja asafunika kuikumbuka?

³ M’madziko anango, anthu angamala kwene kumanga banja asadikhirwa kuti pingakwanisika abale ana mwakukhonda dembuka. Acibale awo na anango asaakakamiza toera abale ana mwakucimbiza kakamwe. M’bale wa ku Azya anacemerwa Jethro alonga: “Mu mpingo abale na alongo anango akuti ali na  ana asakakamiza mabanja akusowa ana toera abale ana.” M’bale unango wa ku Azya anacemerwa Jeffrey alonga: “Abale na alongo anango asapanga mabanja akusowa ana kuti nee anadzakhala na munthu wa kuatsalakana angakalamba.” Mbwenye banja ibodzi na ibodzi isafunika kucita yokha cisankhulo cakubala ana. Ceneci ndi cisankhulo cawo; pontho basa ineyi ndi yawo. (Agal. 6:5, cidzindikiro capantsi.) Ndimomwene kuti axamwali na acibale asafuna kuti banja ineyi ipswa ikhale yakutsandzaya. Mbwenye onsene asafunika kukumbuka kuti cisankhulo cakubala ana ndi ca banja.—1 Ates. 4:11.

4-5. Ndi mibvundzo ipi miwiri yakuti banja isafunika kuidinga, pontho ndi ndzidzi upi wakuthema toera kucita pyenepi? Fokotozani.

⁴ Banja yakuti isafuna kubala ana isafunika kudinga mibvundzo miwiri yakufunika: Wakutoma, ndi ndzidzi upi unafuna iwo kubala ana? Waciwiri, ndi ana angasi anafuna kukhala na iwo? Ndi ndzidzi upi wakuthema wakuti banja isafunika kucedza pya nkhani ineyi? Pontho thangwi yanji mibvundzo ineyi miwiri ndi yakufunika kakamwe?

⁵ Kazinji kene, m’bale na mulongo anafuna kumanga banja asafunika kucedza pyenepi mbadzati kumanga banja. Thangwi yanji? Pyenepi ndi pyakufunika kakamwe toera akhale na maonero mabodzi ene thangwi yakubala ana. Pontho, iwo asafunika kuona khala ndi akukhunganyika toera kutsalakana ana. Anango angamala kumanga banja, asadikhira caka cibodzi peno piwiri toera kubala ana, thangwi angadzakhala na ana iwo anaphatisira ndzidzi uzinji na mphambvu zawo toera kuatsalakana. Pontho pyenepi pinaphedza toera akhale na ndzidzi wakudzolowera umaso wa m’banja na kudzolowerana unango na ndzace.—Aef. 5:33.

6. Mabanja anango asasankhula kucitanji midzidzi ino yakunentsa?

⁶ Mabanja anango asasankhula kutowezera citsandzo ca ana atatu a Nowa na akazawo. Iwo nee abala ana mwakucimbiza pidamanga iwo banja. (Gen. 6:18; 9:18, 19; 10:1; 2 Ped. 2:5) Yezu asalandanisa ndzidzi wathu na “mu ntsiku za Nowa,” pontho mwandimomwene ife tikukhala ‘m’midzidzi yakugopswa na yakunentsa kupirira.’ (Mat. 24:37; 2 Tim. 3:1) Na thangwi ineyi, mabanja anango asankhula kukhonda kubala ana toera akwanise kucita pizinji m’basa ya Yahova.

7. Midida inagumanika pa Luka 14:28, 29 na Misangani 21:5 inaphedza tani banja?

 ⁷ Pakucita cisankhulo cakuti anabala lini ana, pontho ndi ana angasi asafuna kubala iwo, mabanja audziwisi asaphatisira n’dida unagumanika pa Luka 14:28, 29 (Lerini.) Pyenepi ndi sawasawa na munthu anafuna kumanga nyumba wakuti pakutoma asakhala pantsi toera kuona khala kobiri yace inakwana. Anyakubala anango alonga kuti kukuza ana nee pisaphemba kobiri basi, mbwenye pisaphembambo ndzidzi na mphambvu. Natenepa ndi pyakufunika kakamwe banja idinge mibvundzo ninga iyi: ‘Kodi uwiri wathu tisafunika kuphata basa toera kutsalakana banja yathu? Kodi uwiri wathu tisaona kuti ndi pinthu pipi pyakufunika kakamwe kwa ife? Uwiri wathu tingaphata basa, mbani anafuna kutsalakana anathu? Manyerezero na macitiro a anathu anakhuyiwa tani na munthu anafuna kuatsalakana?’ Mabanja anadinga mibvundzo ineyi asaphatisira mafala anagumanika pa Misangani 21:5.—Lerini.

8. Ndi pinentso pipi pyakuti mabanja Acikristu asathimbana napyo, pontho mamuna waufuni asafunika kucitanji?

⁸ Mwana asafunika kutsalakanwa, pontho anyakubala asafunika kumala ndzidzi uzinji na mwanawo. Mbwenye, khala banja iri na ana azinji akuti pyaka pyawo piri cifupi kakamwe unango na ndzace, panango pinakhala pyakunentsa kwa iwo toera kutsalakana m’bodzi na m’bodzi. Anyakubala anango adakhala na ana azinji akuti pyaka pyawo pikhali cifupi unango na ndzace, alonga kuti anentseka kakamwe toera kuatsalakana. Panango mai ananeta kakamwe, mbacimwana kupfundza, kucita phembero na kumwaza mphangwa mwakukhonda phonya. Pontho pinakhala pyakunentsa kuna iye kubvesera mwadidi pa misonkhano mbaphedzeka nayo. Mwandimomwene mamuna waufuni asacita pinakwanisa iye toera kuphedza nkazace kutsalakana ana panyumba na pa misonkhano. Mwacitsandzo, iye anakwanisa kuphedza nkazace mabasa a panyumba. Iye asafunika kuwangisira toera onsene aphedzeke na Kulambira kwa Banja mwakukhonda phonya. Pontho iye asafunika kuenda kamwaza mphangwa kazinji kene na banjace.

9-10. Anyakubala asafunika kucitanji toera aphedze anawo?

⁹ Kodi anyakubala asafunika kucitanji toera anawo apfundze kufuna Yahova? Iwo anatsidzikiza tani anawo ku ngozwi za dziko ino yakuipa? Onani pinthu pingasi pyakuti anyakubala anakwanisa kupicita.

¹⁰ Phembani ciphedzo ca Yahova. Onani citsandzo ca Manowa na nkazace, akuti adzakhala anyakubala a Samisoni. Pidadziwa Manowa kuti iye na nkazace anabala mwana, iye aphemba citsogolero ca Yahova toera akwanise kukuza mwanawo.

11. Anyakubala anatowezera tani citsandzo ca Manowa cinagumanika pa Atongi 13:8?

 ¹¹ M’bale Nihad na nkazace Alma anakhala ku Bósnia-Herzegovina apfundza kubulukira ku citsandzo ca Manowa. Iwo alonga: “Ninga Manowa, ife taphemba Yahova toera atipfundzise kuti tinakhala tani anyakubala adidi. Pontho Yahova atawira maphembero athu kubulukira m’Bhibhlya, m’mabukhu akubuluswa m’Bhibhlya, misonkhano ya mpingo na ya gawo.”—Lerini Atongi 13:8.

12. Thangwi yanji Mariya na Zuze akhali citsandzo cadidi kuna anawo?

¹² Apfundziseni kubulukira mu citsandzo canu. Pinacita imwe pisakhuya kakamwe mwananu kupiringana pinalonga imwe. Tinakwanisa kukhala na cinyindiro cakuti Zuze na Mariya akhali citsandzo cadidi kuna anawo, kuphatanizambo Yezu. Zuze akhaphata basa mwaphinga toera kutsalakana banjace. Kusiyapo pyenepi, Zuze akhaphedza banjace toera ipitirize kutumikira Yahova. (Deut. 4:9, 10) Maseze Mwambo nee ukhaphemba kuti misolo ya banja iende na mabanja awo ku Yerusalemu toera kacita Paskwa “pyaka pyonsene,” iye akhaenda na banjace. (Luka 2:41, 42) Misolo inango ya banja, panango ikhaona kuti ndi pyakunentsa kakamwe kucita ulendo pabodzi na banja yonsene, thangwi ulendo unoyu ukhali wakulapha, pontho ukhabvunga kobiri izinji. Mbwenye Zuze akhapasa ntengo pinthu pyauzimu, pontho akhapfundzisa anace toera acitembo pibodzi pyene. Mariya akhadziwambo mwadidi Malemba. Mwakukhonda penula, kubulukira m’mafalace na m’macitiro ace, Mariya apfundzisa anace toera afune Mafala a Mulungu.

13. Banja inango yatowezera tani citsandzo ca Zuze na Mariya?

¹³ Nihad na nkazace Alma adalongwa padzulu atowezera citsandzo ca Zuze na Mariya. Kodi pyenepi pyaaphedza tani toera kupfundzisa mwanawo kuti afune Mulungu na kuntumikira? Iwo alonga: “Kubulukira mu umaso wathu, tikhayesera kupangiza mwanathu kuti ndi pyakufunika kakamwe kukhala maso mwakubverana na midida ya Yahova.” Nihad athimiza: “Khalani na makhaliro akuti mwananu asafunika kuatowezera.”

14. Thangwi yanji anyakubala asafunika kudziwa axamwali a anawo?

¹⁴ Phedzani ananu toera asankhule axamwali adidi. Anyakubala asafunika kudziwa axamwali a anawo na pinacita iwo. Pyenepi pisabveka kuti anyakubala asafunika kudziwa anthu anacedza na anawo mukuphatisira interneti na ntokodzi wa m’manja. Thangwi axamwali anewa anakwanisa kukhuya macitiro na manyerezero a anawo.—1 Akor. 15:33.

15. Anyakubala anapfundzanji kubulukira mu citsandzo ca Jessie?

¹⁵ Anyakubala anacitanji khala nee asadziwa mwadidi kuphatisira mitcini ya ndzeru peno mitokodzi ya m’manja? Jessie wakuti ndi baba anakhala ku Filipina alonga: “Ife nee tisadziwa pizinji thangwi ya mitcini ya ndzeru. Mbwenye nee tisasiya kupfundzisa anathu pya ngozwi zakuphatisira mwakuipa mitcini ya ndzeru.” Jessie nee akhondesa anace kuphatisira mitcini ya ndzeru basi ene thangwi iye nee asadziwa mwadidi. Iye alonga: “Ndisawangisa ananga kuti aphatisire mitcini ya ndzeru toera apfundze cilongero cipswa, kukhunganyika misonkhano na kuleri Bhibhlya ntsiku zonsene.” Khala ndimwe nyakubala, kodi musaleri peno kucedza na ananu pya uphungu unagumanika mu jw.org^® pa seção “Adolescentes” unalonga pya kutumizirana mphangwa na mafoto mukuphatisira interneti? Kodi mwaona pabodzi na ananu vidhyu yakuti Imwe na Ntokodzi—Mbani Anatsogolera Ndzace? na Phatisirani Mwandzeru Interneti? * Mphangwa zenezi ndi  zakufunika kakamwe kwa imwe toera kuphedza ananu kuti aphatisire mwadidi mitcini ya ndzeru.—Mis. 13:20.

16. Anyakubala azinji asacitanji, pontho pyenepi pisabweresa nkhombo zipi?

¹⁶ Anyakubala azinji asacita masasanyiro toera anawo akhale na axamwali adidi. Mwacitsandzo, N’Déni na Bomine akuti ndi banja inakhala ku Costa do Marfim kazinji kene akhacemera muyang’aniri wa cisa toera afikire panyumba pawo. N’Déni alonga: “Pyenepi pyakhuya kakamwe mwanathu. Iye atoma kutumikira ninga mpainiya, pontho cincino asatumikira ninga nyakuphedzera muyang’aniri wa cisa.” Kodi imwe munakwanisambo kucita masasanyiro mabodzi ene kuna ananu?

17-18. Ndi ndzidzi upi unafuna kutoma anyakubala kupfundzisa anawo?

¹⁷ Tomani kupfundzisa ananu mbaciri ana. Anyakubala angatoma kupfundzisa anawo mbaciri ana, ndi pyadidi kakamwe. (Mis. 22:6) Onani citsandzo ca Timoti wakuti pidakula iye akhacita ulendo na mpostolo Paulu. Mai wace Timoti, Eunise na yavu wace Loidhi, apfundzisa Timoti “kubulukira mu uwana” wace.—2 Tim. 1:5; 3:15.

¹⁸ Jean-Claude na Peace akuti ndi banja inakhala ku Costa do Marfim, yakwanisa kupfundzisa anawo atanthatu toera afune Yahova na kuntumikira. Ninji pidaaphedza toera kucita pyenepi? Iwo atowezera citsandzo ca Eunise na Loidhi. Iwo alonga: “Ife takhomera Mafala a Mulungu m’mitima ya anathu kubulukira mu uwana wawo, kutomera pidamala iwo kwene kubalwa.”—Deut. 6:6, 7.

19. Kodi kukhomera Mafala a Mulungu m’mitima ya ananu kusabvekanji?

¹⁹ Pisabvekanji ‘kukhomera’ Mafala a Yahova m’mitima ya ananu? ‘Kukhomera’ pisabveka “kupfundzisa na kukumbusa mwakubwereza-bwereza.” Toera kucita pyenepi, anyakubala asafunika kumala ndzidzi uzinji na anawo. Midzidzi inango, panango pinakhala pyakufewesa manungo kuna anyakubala toera kupfundzisa anawo pinthu pibodzi pyene. Mbwenye anyakubala asafunika kuona pyenepi ninga mwai toera aphedze anawo kuti abvesese Mafala a Mulungu na kuaphatisira.

20. Fokotozani kuti anyakubala anaphatisira tani Masalmo 127:4 toera kukuza ana.

²⁰ Dziwani mwadidi ananu. Lemba ya Masalmo kapitulu 127 isalandanisa ana na  mapswimo. (Lerini Masalmo 127:4.) Ninga mapswimo akuti anakwanisa kukhala a pinthu pyakusiyana-siyana, ana ndi akusiyanambo unango na ndzace. Natenepa nyakubala asafunika kuona kuti anapfundzisa tani mwana m’bodzi na m’bodzi. Banja ibodzi inakhala ku Izraeli wa cincino yakuti yakuza mwadidi anawo awiri mbatumikira Yahova, yalonga kuti pidaaphedza ndi “Kupfundzisa Bhibhlya mwana m’bodzi na m’bodzi pace ekha.” Mwandimomwene, misolo ya banja isafunika kusankhula pinthu pinafuna iwo kupfundza na anawo.

21. Yahova asaphedza tani anyakubala?

²¹ Midzidzi inango anyakubala anaona kuti kupfundzisa ana ndi pyakunentsa kakamwe, mbwenye ana ndi muoni wa Yahova. Ndzidzi onsene iye ali dzololo toera kuphedza anyakubala. Yahova asabvesera maphembero a anyakubala. Pontho iye asatawira maphembero anewa kubulukira m’Bhibhlya, m’mabukhu, pitsandzo na uphungu wa anyakubala anango akukola mwauzimu anagumanika mu mpingo.

22. Ndi pinthu pipi pyakufunika kakamwe pyakuti anyakubala anakwanisa kupasa anawo?

²² Anthu anango asalonga kuti kukuza ana ndi basa yakuti inakwanisa kumala pyaka 20, mbwenye anyakubala cipo anasiya kukhala anyakubala. Pinthu pinango pyakufunika kakamwe pyakuti anyakubala anakwanisa kupasa anawo ndi ufuni, ndzidzi na kuapfundzisa toera atumikire Yahova. Mwana m’bodzi na m’bodzi anakhala na maonero akusiyana pakupfundziswa. Mulongo unango wa ku Azya anacemerwa Joanna Mae alonga: “Ndinganyerezera njira idapfundziswa ine na anyakubalanga, ndisapereka takhuta kakamwe thangwi iwo andipfundzisa toera kufuna Yahova. Iwo nee andipasa basi ene umaso, mbwenye andipasa umaso wakutsandzayisa kakamwe.” (Mis. 23:24, 25) Akristu azinji akuti akuzwa na anyakubala Acikristu ali na mabvero mabodzi ene.