Munakwanisa kutawira mibvundzo iyi idapfundzwa m’marevista a Ncenjezi a 2019?

Kodi pikiro ya Mulungu yakuti: “Pida pyonsene pinacimwana kukulasani” isabvekanji? (Iza. 54:17)

Ife tinakwanisa kukhala na cinyindiro cakuti Mulungu anadzatitsidzikiza ku pinthu pyakugopswa ninga “condzi cikulu.” (Iza. 25:4, 5) Anyamalwa athu cipo anadzatikunda.—Ncenjezi 01/19 tsa. 6-7.

Njira idatsalakana Mulungu Akanani na Aizraeli akukhonda bvera isapangiza tani ulungami wace?

Mulungu afudza ale akhacita ulukwali na akhatsalakana mwakuipa akazi na anapiana. Iye apasa nkhombo ale akhambvera na akhatsalakana anango mwaulungami.—Ncenjezi 02/19 tsa. 22-23.

Tisafunika kucitanji munthu wakukhonda khulupira angacita phembero ife tiri penepo?

Mwacilemedzo tisafunika kumatama, mbwenye nee tisafunika kucita “ameni,” peno kuphatana manja mu ndzidzi wa phembero. Panango tinacita phembero yathu yamuntima.—Ncenjezi 03/19 tsa. 31.

Thangwi yanji kupita m’mabonde na mwana ndi madawo makulu?

Munthu anapita m’mabonde na mwana asadawira ule anakakamizwa, mpingo, mautongi a dziko na Mulungu. M’mbuto zakuti mitemo ya dziko isatawirisa kuti munthu anapita m’mabonde na mwana asafunika kusumirwa, akulu a mpingo asawangisira toera kuiphatisira.—Ncenjezi 05/19 tsa. 9-10.

Munacinja tani mphambvu inatsogolera manyerezero anu?

Musafunika kucita ipi: Citani phembero kuna Yahova. Nyerezerani mwacidikhodikho pifuno pyanu. Sankhulani mwadidi axamwali anu.—Ncenjezi 06/19 tsa. 11.

Tinakhunganyika tani cincino toera tikwanise kupirira pakutcingwa?

Tisafunika kuwangisa uxamwali wathu na Yahova. Tisafunika kukhala na cinyindiro cakuti Yahova asatifuna kakamwe, pontho cipo anadzatisiya. Lerini Bhibhlya ntsiku zonsene, pontho citani phembero mwakukhonda phonya. Khalani na cinyindiro cakuti pinthu pidapikira Mulungu pinadzacitika. Koyani m’manyerezero mavesi na nyimbo za Umambo zinakomerwa na imwe.—Ncenjezi 07/19 tsa. 2-4.

Tinaphedza tani acibale athu toera apulumuswe?

Ndi pyakufunika kakamwe kwa ife kukhala akubvera ntsisi, kukhala na makhaliro adidi, kukhala akupirira na kulonga mwacilemedzo.—Ncenjezi 08/19 tsa. 15-17.

Kodi tisabalangazwa tani na pidapikira Yezu pa Mateu 11:28?

Ife tiri na akulu a mpingo aufuni, axamwali adidi na basa yadidi.—Ncenjezi 09/19 tsa. 23.

Mulungu anakwanisa tani kutipasa cifuno na mphambvu toera kucita pinafuna iye? (Afil. 2:13)

Tingaleri Bhibhlya na kunyerezera mwadidi pinaleri ife, Mulungu anakwanisa kutiphedza mukutipasa cifuno na mphambvu toera kucita pinafuna iye. Nzimu wace wakucena unakwanisa kukulisa maluso athu.—Ncenjezi 10/19 tsa. 21.

Musafunika kucitanji mbamudzati kucita cisankhulo cakufunika kakamwe?

Musafunika kucita pinthu pixanu: Fufudzani mwadidi, phembani udziwisi, dingani mathangwi a cisankhulo canu, khazikisani pifuno, pontho khalani na maonero akulinganira.—Ncenjezi 11/19 tsa. 27-29.

Pidalonga Sathani kuna Eva, kodi iye ampanga pya cipfundziso ca umaso wakukhonda kufa?

Mwandimomwene nkhabe. Sathani nee apanga Eva kuti angadya nsapo mbadakhala ninga afa, mbwenye iye apanga Eva kuti nee anafa. Pipfundziso pyonsene pyauphemberi wauthambi pyafudzwa pa Cigumula. Pisaoneka kuti cipfundziso ca umaso wakukhonda kufa catoma mu ndzidzi wakuti Mulungu mbadzati kubalalisa anthu akhamanga nzinda wa Bhabheli.—Ncenjezi 12/19 tsa. 15.