▪ Mwandimomwene vesi ineyi nee isalonga pyenepi. M’mbuto mwace, vesi ineyi isalonga pya munthu anathimbana na nyatwa zizinji, mbwenye asakwanisa kupirira.

Toera kubvesesa pyenepi, tendeni tione vesi 15, 16 na 17. Mavesi anewa asalonga: ‘Leka kubisala ninga pinacita munthu wakuipa cifupi na nyumba ya munthu wakulungama, leka kufudza nyumba yace. Thangwi munthu wakulungama anakwanisa kugwa kanomwe mbalamuka pontho, mbwenye anyakuipa anadzagwa thangwi ya nyatwa. Nyamalwa wako angagwa, leka kukomerwa, pontho iye angagwegweduka, leka kutsandzaya muntima mwako.’—Mis. 24:15-17.

Anthu anango asanyerezera kuti vesi 16 isalonga pya munthu anacita madawo mbatcunyuka, buluka penepo mbakhala pontho na uxamwali wakuwanga na Mulungu. Mwacitsandzo, atsogoleri awiri a ku Inglatera alemba kuti amwazi mphangwa, akale na a cincino asafokotoza vesi 16 munjira ineyi, atsogoleri anewa alongambo kuti njira inafokotoza vesi ineyi isapangiza kuti: “Munthu wadidi anakwanisa kucita madawo makulu mbapitiriza kufuniwa na Mulungu basi ene angatcunyuka ndzidzi onsene.” Maonero anewa anakwanisa kucitisa munthu kupitiriza kucita madawo. Panango iye ananyerezera kuti angacita madawo mwakubwereza-bwereza Mulungu anamulekerera.

Mbwenye vesi 16 nee isalonga pyenepi.

Mu Cihebheri fala yakuti “kugwa” inagumanika pa vesi 16 na 17 inakwanisa kuphatisirwa munjira zakusiyana-siyana. Mwacitsandzo, fala ineyi inakwanisa kuphatisirwa kuna cinyama cingagwa panjira, munthu anagwa pantsoi peno mwala ungagwa. (Deut. 22:4, 8; Amosi 9:9) Mbwenye fala ibodzi ene inakwanisambo kukhala na mabvekero akusiyana ninga awa: ‘Yahova asatsogolera manyalo a munthu angakomerwa na pinacita munthu unoyu. Ngakhale iye agwegweduke, nee anadzagwa, thangwi Yahova anadzantsidzikiza na djanja yace.’—Masal. 37:23, 24; Mis. 11:5; 13:17; 17:20.

Professori Edward H. Plumptre alonga kuti: “Mu Cihebheri fala yakuti “kugwa” nee isaphatisirwa toera kulonga pya kugwa m’madawo.” Pontho nyakudziwisa unango wa Bhibhlya afokotoza vesi 16 munjira iyi: “Ndi pyakusowa ndzeru kutsalakana mwakuipa atumiki a Mulungu, thangwi iwo ndzidzi onsene asapembera, mbwenye munthu wakuipa nkhabe kupembera.”

Natenepa, mafala anagumanika pa Misangani 24:16 nee asalonga pya kugwa m’madawo, mbwenye asalonga pya nyatwa zinathimbana na munthu mwakubwereza-bwereza. Mu dziko ino yakuipa, munthu wakulungama anakwanisa kuthimbana na nyatwa za ungumi peno na nyatwa zinango. Kusiyapo pyenepi, iye anakwanisa kutcingwa na mautongi. Mbwenye iye anakwanisa kunyindira kuti Mulungu anantsidzikiza, pontho anamphedza toera kupirira nyatwa zenezi. Ninga ntumiki wa Mulungu, kazinji kene imwe musakwanisa kuona kuti pinthu pisafamba mwadidi. Thangwi yanji? Thangwi tiri na cinyindiro cakuti ‘Yahova asaphedza onsene ale adagwa, pontho asalamusa onsene ale adakotama.’—Masal. 41:1-3; 145:14-19.

“Munthu wakulungama” nee asakomerwa angaona anango akuthimbana na nyatwa. Mbwenye pina’balangaza ndi pyakuti iye ‘asadziwa kuti pinthu pinafamba mwadidi kuna ale anagopa Mulungu wandimomwene, thangwi iwo asan’gopa.’—Koel. 8:11-13; Yobe 31:3-6; Masal. 27:5, 6.