1. Ndi pinthu pipi pyadidi pinacita atumiki a Yahova?

 BHIBHLYA yalonga kale kuti atumiki a Mulungu mbadaperekeka toera kutumikira Yahova mbakatsogolerwa na Yezu. (Masal. 110:3) Profesiya ineyi iri kukwanirisika lero. Pyaka pyonsene atumiki a Yahova asaphatisira maora mazinji kakamwe m’basa yakumwaza mphangwa. Iwo nee asalipwa toera kucita basa ineyi. Mbwenye asacita pyenepi mwakufuna. Kusiyapo pyenepi, asaphedza abale awo mu pinthu pinafuna iwo, pontho asaaphedza toera kuwangisa cikhulupiro cawo kuna Yahova. Akulu a mpingo na atumiki akutumikira asamala maora mazinji mbakakhunganyika misonkhano na kucedzera abale na alongo awo toera kuawangisa. Thangwi yanji atumiki a Yahova asacita mabasa anewa onsene? Thangwi asafuna Yahova, pontho asafunambo anthu anango.—Mat. 22:37-39.

2. Mwakubverana na Aroma 15:1-3, ndi citsandzo cipi cidapangiza Yezu?

² Yezu apangiza citsandzo cadidi thangwi yakutsalakana kakamwe pifuno pya anango kupiringana pyace. Ife tisacita pyonsene pinakwanisa ife toera kutowezera citsandzo cace. (Lerini Aroma 15:1-3.) Pontho tingacita pyenepi tinaphedzeka kakamwe. Yezu alonga: “Kupasa kusatsandzayisa kakamwe kupiringana kutambira.”—Mabasa 20:35.

3. Tinapfundzanji mu nsolo uno?

³ Mu nsolo uno tinapfundza pinthu pingasi pidacita Yezu toera kuphedza anthu anango, pontho tinapfundza kuti tinatowezera tani citsandzo cace. Kusiyapo pyenepi, tinapfundza kuti tinacitanji toera kuthimizira cifuno cathu cakuphedza anango.

4. Yezu aikha tani pifuno pya anango pa mbuto yakutoma?

⁴ Yezu aphedza anango ngakhale kuti akhadaneta. Nyerezerani pidacita Yezu mu ndzidzi udantowera anthu paphiri yakuti panango ikhali dhuzi na Kafarnau. Yezu akhadamala masiku amumphu mbakacita phembero. Panango iye akhadaneta kakamwe. Mbwenye pidaona iye mwinji wa anthu, aabvera ntsisi thangwi anango mwa iwo akhali akutcerenga, pontho anango akhabva kupha. Iye aawangisa, mbaacitira nkhani yakuwangisa kakamwe kupiringana zonsene, yakuti yadzadziwika ninga Nkhani ya Paphiri.—Luka 6:12-20.

5. Ale akuti ndi misolo ya banja asatowezera tani citsandzo ca Yezu cakupangiza ufuni angakhala akuneta?

⁵ Misolo ya banja isatowezera tani citsandzo ca Yezu. Nyerezerani kuti nsolo wa banja amala ntsiku yamumphu mbakaphata basa, natenepa iye afika panyumba uku mbali wakuneta kakamwe. Panango ntsiku ineyi, iye nee anafuna kucitisa Kulambira kwa Banja. Mbwenye asaphemba ciphedzo ca Yahova toera ampase mphambvu. Yahova asatawira phembero yace, pontho iwo asacita Kulambira kwa Banja ninga pinacita iwo masumana onsene. Namasiku anewa, anawo asapfundza kuti cinthu cakufunika kakamwe kuna anyakubala awo ndi kulambira Yahova.

6. Perekani citsandzo cinapangiza kuti Yezu aphatisira ndzidzi wace toera kuphedza anango.

⁶ Yezu akhaphatisira ndzidzi wace toera kuphedza anango. Nyerezerani kuti Yezu apibva tani pidadziwa iye kuti xamwali wace Juwau M’batizi aphiwa. Panango iye atsukwala kakamwe. Bhibhlya isalonga: “Pidabva iye [thangwi yakufa kwa Juwau], Yezu abuluka penepo na mwadiya mbaenda ku mbuto yakutali na anthu toera akhale ekhene.” (Mat. 14:10-13) Tisakwanisa kubvesesa kuti thangwi yanji iye akhafuna kukhala ekhene. Anthu anango asaona kuti ndi pyadidi kukhala okhene angaferwa. Mbwenye Yezu nee akwanisa kukhala ekhene. Mwinji wa anthu wafika pa mbuto ikhafuna kukhala iye ekhene, Yezu mbadzati kufika. Yezu pidaaona iye acitanji? Iye anyerezera thangwi ya pinthu pikhafuna mwinji wa anthu, pontho “aabvera ntsisi.”  Yezu adzindikira kuti iwo akhafuna ciphedzo na cibalangazo, natenepa iye aaphedza mwakucimbiza. Mwandimomwene, “iye atoma kuapfundzisa pinthu pizinji.”—Marko 6:31-34; Luka 9:10, 11.

7-8. Longani kuti akulu a mpingo asatowezera tani citsandzo ca Yezu munthu angafuna ciphedzo mu mpingo.

⁷ Akulu a mpingo aufuni asatowezera tani Yezu. Ife tisapereka takhuta kakamwe thangwi ya basa inacita akulu a mpingo akuti asawangisira toera kuphedza anango. Abale na alongo azinji mu mpingo nee asaona mabasa onsene anacita iwo. Mwacitsandzo, abale na alongo angathimbana na nyatwa za ungumi, akulu a mpingo asaphata basa na Komiti Inapita Ncibverano na Nyumba za Ungumi toera kuphedza abale na alongo mwakucimbiza. Kazinji kene nyatwa zenezi za ungumi zisacitika namasiku. Mbwenye thangwi yakubvera ntsisi abale na alongo awo akuti ali kuthimbana na nyatwa, akulu a mpingo anewa pabodzi na mabanja awo asaikha pifuno pya abale na alongo awo pa mbuto yakutoma.

⁸ Akulu a mpingo asaphedzerambo basa yakumanga Nyumba za Umambo, nyumba zinango za gulu na kupereka ciphedzo pangacitika cidengwa. Pontho iwo asamala ndzidzi wawo uzinji toera kutipfundzisa na kutiwangisa. Abale anewa pabodzi na mabanja awo athema kusimbwa. Yahova mbapitirize kupasa nkhombo abale anewa thangwi ya mabasa anacita iwo. Mwandimomwene, ninga ife tonsene akulu ampingo asafunika kukhala na maonero adidi. Iwo nee asafunika kumala ndzidzi uzinji na mabasa a gulu ya Yahova, mbasowa ndzidzi toera kutsalakana mabanja awo.

9. Mwakubverana na Afilipi 2:4, 5, ndi pinthu pipi pyakuti Akristu onsene asafunika kupicita?

⁹ Lerini Afilipi 2:4, 5. Nee ndi akulu a mpingo basi anafunika kutowezera citsandzo ca Yezu cakuikha pifuno pya anango pa mbuto yakutoma. Ife tonsene tisafunikambo kucita pyenepi. Bhibhlya isalonga kuti ‘Yezu akhala ninga bitcu.’ (Afil. 2:7) Onani kuti tinapfundzanji na vesi ineyi. Bitcu wadidi peno ntumiki wadidi asasaka miyai toera kukomeresa mbuyace. Ninga mabitcu a Yahova na atumiki a abale anu, mwakukhonda penula musafuna maningi kuphatisirwa na Yahova na kutumikira abale anu. Tendeni tione njira zingasi toera kucita pyenepi.

10. M’bodzi na m’bodzi wa ife asafunika kubvundzikanji?

¹⁰ Nyerezerani khala muli na cifuno cakuphedza anango. Bvundzikani: ‘Ndisakhala dzololo toera kuphatisira ndzidzi wanga na mphambvu zanga toera kuphedza anango? Ndinacitanji ndingaphembwa toera kuenda kacedzera m’bale wakugwesera wakuti ali kubva kupha n’nyumba ya ungumi peno kukwata mulongo wakugwesera toera kuenda naye ku misonkhano? Kodi ine ndisaperekeka toera kuphedzera kucenesa mbuto inacitwa misonkhano ya gawo peno kusasanyira Nyumba ya Umambo?’ Pidaperekeka ife kuna Yahova tapikira kuti tinaphatisira pyonsene piri na ife toera kuntumikira. Iye asafuna kuti tiphatisire ndzidzi wathu, mphambvu zathu na pinthu piri na ife toera kuphedza anango. Natenepa Yahova asakomerwa kakamwe tingacita pinthu toera kuphedza anango. Mphapo tingaona kuti tisafunika kucinja, tinacitanji?

11. Phembero inatiphedza tani toera tikhale na cifuno cakuphedza anango?

¹¹ Citani phembero kuna Yahova na ntima onsene. Imwe mungadzindikira kuti nee musaikha pifuno pya anango pa mbuto yakutoma, pontho pisakunentsani toera kucita pyenepi, musafunika kucita phembero kuna Yahova na ntima wanu onsene. Longani undimomwene onsene. Longani mabvero anu kuna Yahova, pontho mphembeni kuti akupaseni “cifuno na mphambvu toera mucite pinafuna iye.”—Afil. 2:13.

12. Aphale akubatizwa anaphedzera tani gulu ya Yahova?

¹² Khala imwe ndimwe m’phale wakubatizwa, phembani Yahova toera akuphedzeni kuti mukhale na cifuno cakucita pizinji toera kuphedza abale na alongo mu mpingo. M’madziko mazinji muli na akulu a mpingo azinji, mbwenye atumiki akutumikira akucepa. Kusiyapo pyenepi, azinji mwa atumiki akutumikira anewa ndi akugwesera. Nakuti gulu iri kuenda kutsogolo, ife tisafuna aphale azinji toera kutsalakana abale na alongo mu mpingo. Khala muli dzololo toera kutumikira konsene kunafunika imwe, munakhala wakutsandzaya. Thangwi yanji? Thangwi munakomeresa Yahova, abale na alongo anaona kuti muli dzololo toera kuphedza anango, pontho munatsandzaya kakamwe thangwi ya kuphedza anango.

13-14. Ndi pinthu pipi pyakuti tinakwanisa kupicita toera kuphedza abale na alongo athu? (Onani foto iri patsamba yakutoma.)

¹³ Onesesani khala anango asafuna ciphedzo. Mpostolo Paulu apanga Akristu akakhala ku Yudeya: “Lekani kuduwala kucita pinthu pyadidi, mbamupasambo anango pinthu piri na imwe, thangwi Mulungu asakomerwa na ntsembe zenezi.” (Aheb. 13:16) Uphungu unoyu ukhali wadidi kakamwe. Mukupita kwa ndzidzi, Akristu anewa akhafunika kusiya nyumba zawo, malonda awo, abale awo akuti nee akhali Akristu, pontho akhafunika “kuthawira ku mapiri.” (Mat. 24:16)  Mu ndzidzi unoyu, iwo akhafunika kakamwe kuphedzana unango na ndzace. Mbidakhala kuti iwo akhabvera uphungu wa Paulu wakupasa anango pinthu piri na iwo, mbipidakhala pyakukhonda nentsa kuna iwo kukhala na umaso upswa na kukhala na pinthu pyakucepa.

¹⁴ Midzidzi inango abale na alongo athu panango nee anatipanga kuti asafuna ciphedzo. Mwacitsandzo, m’bale aferwa na nkazace, pontho ali wakutsukwala kakamwe. Kodi m’bale unoyu asafuna ciphedzo toera kuphika, abuluke panyumba peno kucita mabasa anango panyumba? Panango iye nee anaphemba ciphedzo thangwi nee asafuna kutipasa basa. Mbwenye iye anapereka takhuta kakamwe tingam’phedza, ngakhale kuti nee atiphemba. Nee tisafunika kunyerezera kuti abale anango anam’phedza peno angafuna ciphedzo anatipanga. Bvundzikani: ‘Mbidakhala kuti ndine ali kuthimbana na nyatwa ineyi, ndi ciphedzo cipi cakuti mbandidakomerwa naco?’

15. Tisafunika kucitanji khala tisafuna kuphedza anango?

¹⁵ Khalani wakudzolowereka. Mwakukhonda penula, imwe musadziwa abale na alongo mu mpingo mwanu akuti ndzidzi onsene ali dzololo toera kuphedza anango. Iwo nee asaticitisa kupibva kuti tiri kuapasa basa. Tisadziwa kuti ndzidzi onsene ali dzololo toera kutiphedza, pontho tisafunambo kukhala ninga iwo. Nkulu wa mpingo m’bodzi anacemerwa Alan wakuti ali nkati mwa pyaka 40, akhafunambo kukhala wakudzolowereka. Iye alonga tenepa thangwi ya citsandzo ca Yezu: “Yezu ndzidzi onsene akhali na pinthu toera kucita, mbwenye anthu a mathunga onsene akhakomerwa kukhala dhuzi na iye, pontho nee akhagopa kumphemba ciphedzo.  Iwo akhadziwa kuti iye akhaatsalakana. Ndikhafuna kakamwe kukhala ninga Yezu mbandidziwika ninga munthu wakudzolowereka, wauxamwali na wacitsalakano.”

16. Lemba ya Masalmo 119:59, 60 inatiphedza tani toera kutowezera mwadidi citsandzo ca Yezu?

¹⁶ Nee Tisafunika kubwerera nduli tingaona kuti nee tiri kutowezera mwadidi citsandzo ca Yezu. (Tiya. 3:2) Nyakupfundza nee anakwanisa kupiringana mpfundzisi wace. Mbwenye angapfundza na madodo ace mbapitiriza kuwangisira toera kutowezera mpfundzisi wace, iye anakwanisa kuthambaruka. Munjira ibodzi ene, tingaphatisira pinapfundza ife m’Bhibhlya mbatipitiriza kuwangisira toera kusasanyira madodo athu, ife tinakwanisa kutowezera Yezu mwadidi.—Lerini Masalmo 119:59, 60.

17-18. Ndi nkhombo zipi zinafuna kukhala na ife tingaikha pifuno pya anango pa mbuto yakutoma?

¹⁷ Tingakhala dzololo toera kuphedza anango, pyenepi pinacitisambo anango kukhala na cifuno cakucita pibodzi pyene. Nkulu wa mpingo m’bodzi anacemerwa Tim alonga: “Tiri na aphale akuti athambaruka mbakhala atumiki akutumikira. Pidaacitisa kuthambaruka ndi kuona kuti abale anango ali dzololo toera kuphedza. Natenepa iwo acitambo pibodzi pyene. Aphale anewa asaphedza mpingo wathu, pontho asaphedzera akulu a mpingo.”

¹⁸ Anthu azinji lero asanyerezera pinthu pyawo basi. Mbwenye atumiki a Yahova ndi akusiyana na anthu anewa. Ife tapfundza kuti Yezu akhali dzololo toera kuphedza anango, pontho ife tisafuna kutowezera citsandzo cace. Mwandimomwene ife nee tinakwanisa kutowezera manyalo ace mwakukwana. Mbwenye tinakwanisa ‘kutowezera manyalo ace mwakukhulupirika.’ (1 Ped. 2:21) Tingawangisira kutowezera citsandzo ca Yezu, tinakhala akutawirika kuna Yahova, pontho pyenepi pinaticitisa kukhala akutsandzaya.