Mariya na Juwau a asakhala mu dziko yakuti anthu azinji a ku Filipina asaenda kaphata basa, pontho iye asaamwazira mphangwa. Mu ndzidzi wa utenda wa COVID-19, Mariya atomesa mapfundziro a Bhibhlya, tayu basi ene mu dziko yace, mbwenye kuphatanizambo madziko anango. Iye acita tani pyenepi?

Mariya akhabvundza anyakupfundzace a Bhibhlya: “Kodi musadziwa munthu unango asafuna kupfundza Bhibhlya? Iwo angalonga inde, iye akhaaphemba toera ampangize. Kucita mbvundzo unoyu kazinji kene kusaphedza kakamwe. Thangwi yanji? Thangwi anthu anakomerwa na pinapfundza iwo m’Bhibhlya, kazinji kene asafuna kupanga axamwali awo na acibale awo pinthu pinapfundza iwo. Mphapo anyakupfundza a Mariya acitanji pidaabvundza Mariya pyenepi?

Nyakupfundza wa Mariya anacemerwa Jasmin ampangiza anthu anango anai akuti akhafuna kupfundza Bhibhlya. M’bodzi wa iwo akhacemerwa Kristina. Iye akomerwa kakamwe na kupfundza Bhibhlya mbapanga Mariya toera ampfundzise kawiri pa sumana. Pidambvundza Mariya khala asadziwa anthu anango anafuna kupfundza Bhibhlya, Kristina alonga: “Inde ndinakupangizani axamwali anga.” Nkati mwa masumana mangasi, Kristina apangiza Mariya axamwali ace anai akhafuna kupfundza Bhibhlya. Mukupita kwa ndzidzi, Kristina apangiza Mariya axamwali ace anango, pontho anango mwa axamwali ace anewa apangizambo Mariya anthu anango akuti akhafuna kupfundza Bhibhlya.

Kristina akhafunambo kuti acibale ace a ku Filipina apfundzembo Bhibhlya. Natenepa iye acedza na mwanace Andrea. Andrea alonga: ‘Uphemberi wa Mboni za Yahova ndi wakusiyana. Iwo nee asakhulupira Yezu, pontho basi ene asaphatisira Velho Testamento ya Bhibhlya.’ Mbwenye pidapfundza iye Bhibhlya kabodzi basi, Andrea adzindikira kuti pikhanyerezera iye thangwi ya Mboni za Yahova pikhali pyakuphonyeka. Ndzidzi onsene ukhapfundza iye pinthu pipswa m’Bhibhlya akhalonga: “Uyu ndi undimomwene thangwi pyalembwa m’Bhibhlya.”

Mukupita kwa ndzidzi, Andrea apangiza Mariya axamwali ace awiri na ndzace wakubasa m’bodzi akuti atomambo kupfundza Bhibhlya. Andrea akhalimbo na tiya wace akhacemerwa Angela. Iye ndi boliboli, pontho ndzidzi onsene akhabvesera mu ndzidzi ukhapfundza Andrea Bhibhlya, mbwenye Mariya nee akhadziwa pyenepi. Ntsiku inango, Angela apanga Andrea kuti asafuna kucedza na Mariya, pontho alonga kuti asafunambo kupfundza Bhibhlya. Angela akomerwa na pikhapfundza iye. Nkati mwa mwezi ubodzi, iye akwanisa kudziwa malemba mazinji, pontho akhafuna kupfundza kanai pa sumana. Na ciphedzo ca Andrea,  Angela atoma kubvesera misonkhano ndzidzi onsene mukuphatisira vidhyukonferensya.

Pidabva Mariya kuti Joshua mamunace Kristina akhabvesera mu ndzidzi ukhapfundza iwo Bhibhlya, Mariya ambvundza khala iye akhafunambo kupfundza. Joshua alonga: “Ine basi ene ndisafuna kubvesera, mbwenye lekani kundicita mibvundzo. Mungandicita mibvundzo, ndinaenda pyanga.” Mu mphindi zixanu zakutoma zidapfundza iye, acita mibvundzo mizinji kupiringana mibvundzo ikhacita Kristina, pontho akhafuna kupitiriza kupfundza Bhibhlya.

Mbvundzo wakukhonda nentsa udacita Mariya wamphedza toera akhale na anyakupfundza a Bhibhlya azinji. Nakuti iye akhali na mapfundziro mazinji, acita masasanyiro toera abale na alongo anango acitise mapfundziro anewa. Anthu akukwana 28 atoma kupfundza Bhibhlya na Mariya m’madziko manai akusiyana.

Nyakupfundza wakutoma wa Mariya anacemerwa Jasmin, abatizwa mwezi wa Abril wa 2021. Kristina abatizwa mwezi wa Maio wa 2022, pontho abwerera ku Filipina toera kakhala na acibale ace. Anyakupfundza anango awiri a Mariya adapangizwa iye na Kristina, abatizwambo. Angela abatizwa pakupita miyezi mingasi, pontho cincino ndi mpainiya wa ndzidzi onsene. Mamunace Kristina, Joshua na mwanawo anacemerwa Andrea, kuphatanizambo anyakupfundza anango azinji ali kupitiriza kupfundza Bhibhlya na kuthambaruka mwauzimu.

Mu ndzidzi wa apostolo, anthu azinji akhapanga acibale awo na axamwali awo pinthu pikhapfundza iwo thangwi ya Yezu. (Juw. 1:41, 42a; Mabasa 10:24, 27, 48; 16:25-33) Musaona tani kubvundza nyakupfundza wanu wa Bhibhlya na anthu anango anafuna kupfundza Bhibhlya kuti: “Kodi musadziwa munthu unango wakuti asafuna kupfundza Bhibhlya?” Mungacita mbvundzo unoyu wakukhonda nentsa, panango munagumanambo anthu azinji anafuna kupfundza Bhibhlya.