NSOLO WA PFUNDZIRO 8
NYIMBO 130 Khalani Akulekererana
Munatowezera Tani Kulekerera Kwa Yahova?
“Ninga mudakulekererani Yahova na ntima onsene, imwe musafunikambo kucita pibodzi pyene.”—AKOL. 3:13.
PINAFUNA IFE KUPFUNDZA
Tinapfundza pinafunika ife kucita toera kulekerera munthu adatitsukwalisa.
1-2. (a) Ndi mu ndzidzi upi wakuti pisakhala pyakunentsa kulekerera munthu? (b) Mulongo Denise acitanji?
KODI imwe musanentseka toera kulekerera anango? Kuna azinji a ife, pisakhala pyakunentsa kulekerera munthu adatitsukwalisa kakamwe. Mbwenye ndi pyakukwanisika kucita pinthu toera tikhonde kukoya kuipirwa muntima mbatilekerera. Mwacitsandzo, onani pidacitikira mulongo Denise. a Iye akwanisa kulekerera munjira yakudzumisa. Mu caka ca 2017, Denise na banjace akhadamala kuona Ofesi Ikulu ya Mboni za Yahova, yakuti ikhatoma kwene kuphatisirwa. Mu ndzidzi ukhabwerera iwo kunyumba, motorista unango adhima karu ikhadakwira Denise pabodzi na banjace. Denise akomoka thangwi ya cidengwa ceneci. Mudasisimuka iye, adzindikira kuti anace aphekeka kakamwe, pontho mamunace, Brian afa. Denise alonga tenepa thangwi ya pinthu pidancitikira: “Ine ndatsukwala kakamwe, pontho ndikhali wakudzudzumika.” Mukupita kwa ndzidzi, Denise adzindikira kuti mamuna unoyu nee akhadaledzera, nee akhadamwa mitombwe yakuledzeresa, pontho nee akhadzudzumika na ntokodzi peno pinthu pinango. Natenepa, iye aphemba Yahova toera ampase ntendere.
2 Motorista unoyu afungirwa nkaidi, pontho apambizirwa kuti apha munthu mwasusudeu. Iye mbadaoniwa kuti ali na mulando, mbadapitiriza nkaidi. Mbwenye nyakutonga miseru apanga Denise kuti nseru unoyu mbudanyindira pikhafuna kulonga iye pakutongwa. Denise alonga: “Ine ndapibva ninga munthu abulusa usalu udasonwa na ine pa cironda mbaikha munyu, thangwi ndikhafunika kukumbuka pinthu pyonsene pyakuipa pidandicitikira.” Pakupita masumana mangasi, Denise akhali pa thando yakutongera miseru toera kulonga na mamuna adabweresa nyatwa pabanja pace. Denise alonganji? Iye aphemba nyakutonga miseru toera alekerere mamuna unoyu. b Pidamala iye kulonga pyenepi, nyakutonga miseru alira. Iye alonga: “Ine cipo ndaona kale acibale a munthu adacitirwa pinthu pyakuipa mbalonga kuti munthu adaacitira pinthu pyakuipa alekererwe. Ine cipo ndabva kale mafala ninga anewa aufuni na akulekerera.”
3. Ninji pidaphedza mulongo Denise toera kulekerera?
3 Ninji pidaphedza mulongo Denise toera kulekerera? Iye anyerezera kulekerera kwa Yahova. (Mik. 7:18) Tinganyerezera njira inatilekerera Yahova, tisakhalambo na cifuno cakulekerera anango.
4. Yahova asafuna kuti ticitenji? (Aefesi 4:32)
4 Yahova asafuna kuti tilekerere anango, ninga munalekerera iye m’bodzi na m’bodzi wa ife. (Lerini Aefesi 4:32.) Yahova asafuna kuti tilekerere ale anatidawira. (Mas. 86:5; Luka 17:4) Mu nsolo uno, tinaona pinthu pitatu pinafunika ife kucita toera tikhale akulekerera kakamwe.
LEKANI KUPWAZA MABVERO ANU
5. Mwakubverana na Misangani 12:18, panango tinapibva tani tingatsukwaliswa na anango?
5 Panango tinaipirwa kakamwe thangwi ya pidacita munthu peno pidalonga iye, makamaka khala ndi xamwali wathu wa ponda ndipondembo peno wacibale wathu. (Mas. 55:12-14) Midzidzi inango, kutsukwala kunakhala na ife kusakhala ninga talaswa na mpeni. (Lerini Misangani 12:18.) Panango tinayesera kupwaza mabvero anewa mbatikhala ninga nee pacitika pinthu. Mbwenye kucita pyenepi kusakhala ninga nee tabulusa mpeni udatilasa. Munjira ibodzi ene, ife nee tinakwanisa kuduwala pinthu pyakuipa pidaticitikira tingapwaza mabvero athu.
6. Panango tinacitanji tingatsukwaliswa?
6 Munthu angatitsukwalisa, panango tinaipirwa na munthu unoyu. Bhibhlya isapangiza kuti midzidzi inango kuipirwa nee ndi kwakuipa. Mbwenye iyo isaticenjeza toera tikhonde kupitiriza kukhala akuipirwa. (Mas. 4:4; Aef. 4:26) Thangwi yanji? Thangwi mabvero athu anakwanisa kutikulumiza kucita pinthu. Pontho kuipirwa nee kusaphedza. (Tiya. 1:20) Tonsene tisaipirwa tingatsukwaliswa, mbwenye kupitiriza kuipirwa ndi cisankhulo ca munthu.
Tonsene tisaipirwa tingatsukwaliswa, mbwenye kupitiriza kuipirwa ndi cisankhulo ca munthu
7. Ndi mabvero api anango akuipa akuti panango tinakhala nawo tingatsukwaliswa?
7 Tingatsukwaliswa na anango, panango tinakhala na mabvero akuipa. Mwacitsandzo, mulongo anacemerwa Ann alonga: “Pikhali ine mwana, pai wanga asiyana na mai wanga mbamanga banja na nkazi akhandilera. Ine ndikhapibva kuti ndikhali ndekhene. Buluka penepo iwo abala ana, pontho ine ndikhapibva kuti nee ndine mwanawobve. Ine ndakula mbandikapibva ninga ndakhondwa.” Mulongo anacemerwa Georgette alonga mabvero adakhala na iye mu ndzidzi udacita mamunace upombo. Iye alonga: “Ife tikhali axamwali kutomera pikhali ife ana. Ife tikhatumikira pabodzi ninga apainiya! Ine ndatsukwala kakamwe.” Mulongo unango anacemerwa Naomi alonga: “Ine nee ndikhadikhira kuti mamunanga mbadanditsukwalisa. Pidandipanga iye kuti asaona ucipezipezi, ine ndatsukwala kakamwe.”
8. (a) Ndi api mathangwi anango ali na ife toera kulekerera anango? (b) Thangwi yanji kulekerera ndi kwadidi kuna ife? (Onani bokosi ya nsolo wakuti “ Tinacitanji Munthu Angatitsukwalisa?”)
8 Ife nee tinakwanisa kukhondesa munthu kutitsukwalisa, mbwenye tinakwanisa kusankhula pinafuna ife kucita tingatsukwaliswa. Pontho kazinji kene, njira yadidi ndi kulekerera, thangwi ife tisafuna Yahova, pontho Yahova asafuna kuti tikhale akulekerera. Tingapitiriza kuipirwa mbatikhonda kulekerera, pinakhala pyakukhonda nentsa kucita pisankhulo pyakuipa mbatiphekesa ungumi wathu. (Mis. 14:17, 29, 30) Onani citsandzo ca mulongo unango anacemerwa Christine. Iye alonga: “Ine ndingatsukwala peno ndingatsukwaliswa, nee ndisaseka, nee ndisadya mwadidi, nee ndisapuma mwakukwana, pontho pisakhala pyakunentsa kutsalakana mabvero anga. Pyenepi pisakhuya njira inatsalakana ine mamunanga na anthu anango.”
9. Thangwi yanji nee tisafunika kukoya kuipirwa muntima?
9 Maseze munthu adatitsukwalisa akhonde kuphemba kulekererwa, ife tinakwanisa kupungula kutsukwala kwathu. Munjira ipi? Georgette adalongwa pa ndima 7 alonga: “Pyakhala pyakunentsa kakamwe, mbwenye mukupita kwa ndzidzi ndasiya kuipirwa na mamunanga wakale. Thangwi yakucita pyenepi, ndakhala na ntendere ukulu kakamwe.” Tingasiya kuipirwa, tisakhala anthu adidi, pontho tisatsalakana mwadidi anango. Tingakhonda kukoya kuipirwa, pisakhala ninga tapasika muoni, pontho tisakwanisa kupitiriza kukhala akutsandzaya. (Mis. 11:17) Mphapo munacitanji khala nee muli kukwanisa kulekerera munthu adakutsukwalisani?
MUNACITANJI TOERA MUSIYE KUKHALA WAKUIPIRWA?
10. Thangwi yanji pasafunika ndzidzi toera kumalisa mabvero akuipirwa? (Onanimbo mafoto.)
10 Munacitanji toera musiye kukhala wakuipirwa mungatsukwaliswa? Njira ibodzi ndi kudikhira kuti papite ndzidzi pang’ono. Mwacitsandzo, munthu angaphekeka kakamwe pasapita ndzidzi toera kuwanga. Munjira ibodzi ene, pasapita ndzidzi toera kumalisa mabvero akuipa mbatidzati kukhala dzololo toera kulekerera na ntima onsene munthu adatitsukwalisa.—Ekle. 3:3; 1 Ped. 1:22.
Tingaphekeka tisafunika kutsalakanwa, pontho pasapita ndzidzi toera kuwanga. Pyenepi pisacitikambo tingatsukwaliswa (Onani ndima 10)
11. Citsandzo ca Ann cisatipfundzisanji thangwi ya phembero?
11 Citani phembero kuna Yahova toera akuphedzeni kukhala wakulekerera. c Ann alonga kuti phembero yam’phedza tani. Iye alonga: “Ine ndaphemba Yahova toera alekerere m’bodzi na m’bodzi m’banja mwathu thangwi ya pinthu pyakuipa pidacita iye na pidalonga iye. Buluka penepo, ine ndalembera tsamba pai wanga na nkazace mbandilonga kuti ndaalekerera thangwi ya pinthu pidacita iwo.” Ann alonga kuti pikhali pyakunentsa kakamwe kucita pyenepi. Mbwenye iye alonga: “Ine ndisadikhira kuti thangwi yakutowezera kwanga kulekerera kwa Yahova, pai wanga na nkazace anakhala na cifuno cakupfundza pizinji thangwi ya Yahova.”
12. Thangwi yanji tisafunika kunyindira Yahova m’mbuto mwakunyindira mabvero athu? (Misangani 3:5, 6)
12 Nyindirani Yahova, tayu mabvero anu. (Lerini Misangani 3:5, 6.) Ndzidzi onsene Yahova asadziwa pinthu pyakufunika kuna ife. (Iza. 55:8, 9) Iye nee anatiphemba toera kucita cinthu cakuti cinatibweresera nyatwa. Natenepa angatipanga toera tikhale akulekerera, ife tisafunika kunyindira kuti pyenepi ndi pyadidi kuna ife. (Mas. 40:4; Iza. 48:17, 18) Mbwenye tinganyindira mabvero athu, panango nee tinakwanisa kulekerera anango. (Mis. 14:12; Yer. 17:9) Mulongo Naomi adalongwa pa ndima 7 alonga: “Pakutoma ndikhanyerezera kuti ndiri na ufulu wakukhonda kulekerera mamunanga pidadzindikira ine kuti akhaona ucipezipezi. Ine ndikhagopa kuti mbadanditsukwalisa pontho ntsogolo peno mbadaduwala kuti anditsukwalisa kakamwe. Pontho ndikhanyerezera kuti Yahova asabvesesa mwadidi mabvero anga. Ine ndadzindikira kuti maseze Yahova asabvesesa mabvero anga, pyenepi nee pisabveka kuti iye asaaphedzera. Yahova asabvesesa mwadidi mabvero anga, pontho asadziwa kuti pisakwata ndzidzi toera munthu asiye kukhala wakuipirwa. Mbwenye iye asafuna kuti ndikhale wakulekerera.” d
TINAKULISA TANI MABVERO ADIDI?
13. Mwakubverana na Aroma 12:18-21, tisafunika kucitanji?
13 Tingalekerera munthu adatitsukwalisa kakamwe, tisafunika kucita pizinji kupiringana basi ene kukhonda kulonga pontho pinthu pidacitika. Khala munthu adatitsukwalisa ndi m’bale peno mulongo, tisafunika kuwangisira toera kukhazikisa ntendere. Thangwi ceneci ndi cifuniro cathu. (Mat. 5:23, 24) M’mbuto mwakukhala akuipirwa, ife tisafunika kubvera ntsisi anango na kualekerera. (Lerini Aroma 12:18-21; 1 Ped. 3:9) Ninji pinafuna kutiphedza toera kucita pyenepi?
14. Tisafunika kuwangisira toera kucitanji, pontho thangwi yanji?
14 Ife tisafunika kuwangisira toera kuona munthu adatitsukwalisa ninga munamuona Yahova. Iye asasankhula kuona pinthu pyadidi pinacita anthu. (2 Kro. 16:9; Mas. 130:3) Tingasaka makhaliro adidi a anthu tinaagumana, mbwenye tingasaka makhaliro akuipa tinaagumanambo. Tingasaka makhaliro adidi a anango pinakhala pyakukhonda nentsa kualekerera. Mwacitsandzo, m’bale anacemerwa Jarrod alonga: “Kuna ine, ndi pyakukhonda nentsa kulekerera m’bale ndinganyerezera pinthu pizinji pyadidi pinacita iye, m’mbuto mwakunyerezera cinthu cakuipa cidacita iye.”
15. Thangwi yanji ndi pyakufunika kupanga munthu adatitsukwalisa kuti tamulekerera?
15 Cinthu cinango cakufunika kakamwe ndi kupanga munthu adatitsukwalisa kuti tamulekerera. Thangwi yanji? Onani pidalonga Naomi adalongwa mu ndima za nduli. Iye alonga: “Mamunanga andibvundza: ‘Iwe wandilekerera?’ Mu ndzidzi ukhafuna ine kumpanga kuti ndamulekerera, nee ndakwanisa kulonga. Ine ndadzindikira kuti nee ndalekerera mamunanga na ntima onsene. Mbwenye mukupita kwa ndzidzi ndakwanisa kumpanga: ‘Ine ndakulekerera.’ Mu ndzidzi udalonga ine mafala anewa iye akhalira. Ine ndaona kuti mafala anewa acitisa mamunanga kukhala wakukhurudzika. Pontho ine ndakhalambo na ntendere wa m’manyerezero. Buluka penepo ndatoma kun’nyindira, pontho cincino ndife axamwali a ponda ndipondembo ninga pikhali ife kale.”
16. Mwapfundzanji thangwi ya kulekerera anango?
16 Yahova asafuna kuti tikhale akulekerera. (Akol. 3:13) Ngakhale tenepo, panango pinakhala pyakunentsa kulekerera anango. Mbwenye tinakwanisa kulekerera anango tingakhonda kupwaza mabvero athu mbatiwangisira toera tikhonde kukhala akuipirwa. Buluka penepo, tinakwanisa kukulisa mabvero adidi.—Onani bokosi yakuti “Pinthu Pitatu Pinafuna Kutiphedza Toera Kulekerera Anango.”
NYEREZERANI PINTHU PYADIDI PINACITIKA TINGALEKERERA ANANGO
17. Ndi maphindu api anakhala na ife tingalekerera anango?
17 Ife tiri na mathangwi mazinji toera kulekerera anango. Tingalekerera anango, tisatowezera Babathu Yahova, pontho pyenepi pisantsandzayisa kakamwe. (Luka 6:36) Pontho tisapangiza kuti tisapereka takhuta na njira inatilekerera Yahova. (Mat. 6:12) Kusiyapo pyenepi, tisakhala na ungumi wadidi, pontho tisakhala na uxamwali wakuwanga na anango.
18-19. Ninji pinacitika tingalekerera anango?
18 Tingalekerera anango, panango panacitika pinthu pyadidi pyakuti nee tikhapidikhira. Mwacitsandzo, onani pidacitikirwa na Denise. Iye nee akhadziwa kuti mamuna adacitisa cidengwa akhanyerezera kupheka pakumala kutongwa. Mbwenye thangwi yakulekererwa na Denise, iye atsandzaya kakamwe, pontho atoma kupfundza Bhibhlya na Mboni za Yahova.
19 Panango tinanyerezera kuti kulekerera anango ndi pyakunentsa kakamwe, mbwenye kucita pyenepi kusabweresa nkhombo zizinji kakamwe. (Mat. 5:7) Natenepa, tendeni ticite pyonsene pinakwanisa ife toera kutowezera kulekerera kwa Yahova.
NYIMBO 125 ‘Anthu Antsisi Ndi Akutsandzaya!’
a Madzina anango acinjwa.
b Mu pinthu ninga pyenepi, Nkristu m’bodzi na m’bodzi asafunika kusankhula ekhene pinthu pinafuna iye kucita.
c Onani mavidhyu a nyimbo zakuti “Perdoem uns aos outros,” “Esquecer e Perdoar” na “Tikhale Pontho Axamwali” mu jw.org
d Maseze kuona ucipezipezi ndi madawo makulu, mbwenye ineyi nee ndi thangwi toera kumalisa banja mwakubverana na Malemba.
