1. Yahova acitanji pidadawa Adhamu na Eva? (Genesi 3:15)

 ADHAMU na Eva pidadawa iwo, mwakukhonda dembuka Yahova aphatisira profesiya yakufunika kakamwe toera kupereka cidikhiro kuna anawo. Pidalonga iye pyalembwa pa Genesi 3:15.—Lerini.

2. Thangwi yanji profesiya inagumanika pa Genesi 3:15 ndi yakufunika kakamwe?

² Profesiya ineyi isagumanika m’bukhu yakutoma ya Bhibhlya. Mbwenye mabukhu anango a Bhibhlya asalongambo thangwi ya profesiya ineyi. Ninga bukhu yakudhindwa yakuti isakhala na matsamba mazinji pa mbuto ibodzi ene, mafala adalembwa pa Genesi 3:15 asagumanyiza mphangwa zinagumanika m’mabukhu onsene a Bhibhlya mbizikhala mphangwa zibodzi zene. Pontho mphangwa zenezi ndi zakuti Mulungu mbadatuma Mpulumusi toera kufudza Dyabo na anthu onsene anam’phedzera. * Pyenepi pinadzakhala pyakutsandzayisa kakamwe kuna anthu onsene anafuna Yahova.

3. Ndi mibvundzo ipi inafuna ife kutawira mu nsolo uno?

³ Mu nsolo uno, ife tinatawira mibvundzo iyi thangwi ya profesiya inagumanika pa Genesi 3:15: Ndi anthu api analongwa mu profesiya ineyi? Kodi profesiya ineyi iri kukwanirisika tani? Pontho tisaphedzeka tani na profesiya ineyi?

4. ‘Nyoka’ mbani, pontho tisadziwa tani pyenepi?

⁴ Anthu analongwa pa Genesi 3:14, 15 ndi ‘nyoka, dzindza ya nyoka, nkazi na dzindza ya nkazi.’ Bhibhlya isatiphedza toera  kudziwa mwadidi m’bodzi na m’bodzi wa iwo. * Tendeni titome na “nyoka.” Nyoka yandimomwene nee mbidakwanisa kubvesesa mafala adalonga Yahova m’munda wa Edheni. Natenepa, Yahova akhalonga mafala anewa kuna munthu waudziwisi. Mbani munthu unoyu? Lemba ya Apokalipse 12:9 isatiphedza kubvesesa kuti nyoka ineyi mbani. ‘Nyoka ineyi yakale’ ndi Sathani Dyabo. Mphapo dzindza ya nyoka ndi ani?

5. Mbani anacita khundu ya dzindza ya nyoka?

⁵ Midzidzi inango Bhibhlya isaphatisira fala yakuti dzindza toera kulonga anthu akuti asatowezera kakamwe makhaliro a munthu unango mbakhala ninga ana a munthu unoyu. Natenepa, anacita khundu ya dzindza ya nyoka ndi aanju akukhonda khulupirika na anthu akuti ninga Sathani, nee asaphedzera Yahova Mulungu, pontho asatcinga atumiki Ace. Anthu anewa asaphataniza aanju adabuluka kudzulu mbabwera pa dziko yapantsi mu ntsiku za Nowa na anthu akuti makhaliro awo ndi ninga babawo, Dyabo.—Gen. 6:1, 2; Juwau 8:44; 1 Juwau 5:19; Yuda 6.

6. Thangwi yanji “nkazi” analongwa pa Genesi 3:15 nee ndi Eva?

⁶ Cincino tendeni tione kuti mbani “nkazi.” Nkazi unoyu nee ndi Eva. Thangwi yanji? Onani thangwi ibodzi: Profesiya ineyi isalonga kuti dzindza ya nkazi ‘mbidanyedza’ nsolo wa nyoka. Ninga pidalonga ife, nyoka ndi anju wakuipa, Sathani. Pontho anthu akusowa ungwiro nee mbadakwanisa kun’nyedza. Mphapo Sathani mbadafudzwa tani?

7. Mwakubverana na Apokalipse 12:1, 2, 5, 10, mbani nkazi analongwa pa Genesi 3:15?

⁷ Bukhu ya Apokalipse isapangiza kuti mbani nkazi analongwa pa Genesi 3:15. (Lerini  Apokalipse 12:1, 2, 5, 10.) Nkazi unoyu nee ndi wa pa dziko yapantsi. Iye ali na mwezi pantsi pa manyalo ace, pontho mu nsolo mwace muli na nthimba yakuti iri na nyenyezi 12. Iye abala mwana wakusiyana kakamwe, wakuti ndi Umambo wa Mulungu. Umambo unoyu ndi wakudzulu, natenepa nkazi ndi wakudzulumbo. Iye ndi khundu yakudzulu ya gulu ya Yahova, pontho anacita khundu ya gulu ineyi ndi aanju ace akukhulupirika.—Agal. 4:26.

8. Mbani khundu yakutoma ya dzindza ya nkazi, pontho akhala lini khundu yakutoma? (Genesi 22:15-18)

⁸ Mafala a Mulungu asatiphedza kubvesesa kuti mbani khundu yakutoma ya dzindza ya nkazi. Iye akhafunika kukhala wa dzindza ya Abrahamu. (Lerini Genesi 22:15-18.) Ninga pinalonga profesiya ineyi, Yezu akhali wa dzindza ya mamuna unoyu wakukhulupirika. (Luka 3:23, 34) Mbwenye dzindza ya nkazi ikhafunika kukhala yamphambvu kakamwe, thangwi iyo mbidanyedza mbifudza Sathani Dyabo. Natenepa pikhali Yezu na pyaka 30 pyakubalwa, iye adzodzwa na nzimu wakucena, mbakhala khundu yakutoma ya dzindza ya nkazi. (Agal. 3:16) Pidafa Yezu mbalamuswa muli akufa, Mulungu ‘ampasa mbiri na cilemedzo,’ pontho ampasa “mphambvu zonsene kudzulu na pa dziko yapantsi,” kuphatanizambo mphambvu “toera kufudza mabasa a Dyabo.”—Aheb. 2:7; Mat. 28:18; 1 Juwau 3:8.

9-10. (a) Mbani anango anacita khundu ya dzindza ya nkazi, pontho ndi ndzidzi upi unatoma iwo kucita khundu ya dzindza ya nkazi? (b) Ninji pinafuna ife kuona cincino?

⁹ Pali na khundu yaciwiri ya dzindza ya nkazi. Mpostolo Paulu alonga kuti iwo mbani mu ndzidzi udalonga iye mafala awa kuna Ayuda akudzodzwa na Akristu anango akudzodzwa akuti nee akhali Ayuda: “Khala imwe ndimwe atumiki a Kristu, mwandimomwene ndimwe a dzindza ya Abhrahamu, ale anafuna kutambira unthaka wa pikiro idacitirwa Abhrahamu.” (Agal. 3:28, 29) Yahova angadzodza Nkristu na nzimu wakucena, Nkristu unoyu asacita khundu ya dzindza ya nkazi. Natenepa, Yezu Kristu na Akristu akudzodzwa akukwana 144.000 asacita khundu ya dzindza ya nkazi. (Apok. 14:1) Onsene mwa iwo asawangisira toera kunyerezera na kucita pinthu ninga Babawo, Yahova Mulungu.

¹⁰ Nakuti tamala kuona anthu anacita khundu ya profesiya ya Genesi 3:15, cincino tendeni tione kuti Yahova asakwanirisa tani profesiya ineyi, pontho ife tisaphedzeka tani.

11. Ndi munjira ipi dzindza ya nkazi yalumwa pa ‘citende’?

¹¹ Mwakubverana na profesiya ya Genesi 3:15, nyoka ‘mbidaluma citende ca nkazi.’ Pyenepi pyakwanirisika mu ndzidzi udacitisa Sathani kuti Ayuda na Aroma aphe Mwana wa Mulungu. (Luka 23:13, 20-24) Ninga cironda candimomwene ca pa citende, cinacitisa munthu kukhonda kukwanisa kufamba mu ndzidzi wakucepa, kufa kwa Yezu kwancitisa kukhala mu nthumbi mbakhonda kucita pinthu mu ntsiku zitatu.—Mat. 16:21.

12. Kodi nsolo wa nyoka unadzanyedzwa tani, pontho lini?

¹² Profesiya inagumanika pa Genesi 3:15 isapangiza kuti Yezu nee mbadapitiriza mu nthumbi. Thangwi yanji? Thangwi mwakubverana na profesiya ineyi, dzindza ya nkazi mbidanyedza nsolo wa nyoka. Pyenepi pisabveka kuti Yezu mbadalamuswa muli akufa. Pontho pyenepi pyacitikadi! Pa ntsiku yacitatu Yezu pidamala iye kale kufa, iye alamuswa muli akufa toera akhale na umaso wakwenda na kwenda kudzulu. Pa ndzidzi wakuthema  kuna Mulungu, Yezu anadzanyedza Sathani. (Aheb. 2:14) Ale anafuna kutonga pabodzi na Kristu, anadzafudza anyamalwa a Mulungu, akuti ndi dzindza ya nyoka.—Apok. 17:14; 20:4, 10. *

13. Tinaphedzeka tani na kukwanirisika kwa profesiya ineyi?

¹³ Khala ndimwe ntumiki wa Mulungu, imwe mukuphedzeka na kukwanirisika kwa profesiya ineyi. Yezu abwera pa dziko yapantsi ninga munthu. Iye akhapangiza mwadidi makhaliro a Babace. (Juwau 14:9) Natenepa, kubulukira kwa iye, ife tisadziwa, pontho tisafuna Yahova Mulungu. Ife tisaphedzeka na pitsogolero pya Yezu na pipfundziso pinapereka iye kuna mpingo Wacikristu lero. Iye atipfundzisa kuti tinakhala tani m’maso munjira yakutawirika kuna Yahova. Pontho ife tonsene tinakwanisa kuphedzeka na kufa kwa Yezu, kwakuti ndi kulumwa kwa citende cace. Munjira ipi? Pidalamuswa Yezu muli akufa, iye apereka ciropa cace ninga ntsembe yaungwiro yakuti ‘isacenesa madawo athu onsene.’—1 Juwau 1:7.

14. Tisadziwa tani kuti profesiya idalonga Yahova m’munda wa Edheni nee mbidakwanirisika mu ndzidzi ubodzi ene? Fokotozani.

¹⁴ Mafala adalonga Yahova m’munda wa Edheni asapangiza kuti mbapadapita ndzidzi profesiya ineyi mbidzati kukwanirisika yonsene. Mbapadapita ndzidzi toera nkazi abale dzindza idapikirwa, toera Dyabo akhale na anyakum’phedzera, pontho toera kuidana kuthimizirike pakati pa misoka ineyi miwiri. Tingabvesesa profesiya ineyi tisaphedzeka thangwi isatipanga kuti dziko ino inatongwa na Sathani inaida alambiri a Yahova. Mukupita kwa ndzidzi, Yezu apangambo anyakupfundzace pinthu pibodzi pyene. (Marko 13:13; Juwau 17:14) Ife tisaona kukwanirisika kwa khundu ineyi ya profesiya, makamaka nkati mwa pyaka 100 nduli. Munjira ipi?

15. Thangwi yanji anthu azinji lero asatiida kakamwe kupiringana kale, pontho thangwi yanji nee tisafunika kugopa Sathani?

¹⁵ Pakupita ndzidzi pang’ono pidamala Yezu kukhazikiswa ninga Mambo wa Umambo wa Mulungu mu caka ca 1914, Sathani aponywa pa dziko yapantsi. Cincino iye ali pa dziko yapantsi, pontho ali kudikhira ndzidzi unafuna iye kufudzwa. (Apok. 12:9, 12) Mbwenye iye nee akudikhira kwene basi. Sathani ali wakuipirwa kakamwe, pontho thangwi yakuipirwa kweneku asatcinga atumiki a Mulungu. (Apok. 12:13, 17) Na thangwi ineyi, anthu azinji lero asaida kakamwe atumiki a Mulungu kupiringana kale. Ife nee tisafunika kugopa Sathani na ale anam’phedzera. Mbwenye tinakwanisa kukhala na cinyindiro cibodzi cene cidakhala na mpostolo Paulu adalemba: “Khala Mulungu ali kukhundu yathu, mbani anafuna kutikunda?” (Aroma 8:31) Ife tisanyindira Yahova, thangwi ninga pidaona ife, pinthu pizinji pidalongwa mu profesiya ya Genesi 3:15 pyakwanirisika.

16-18. Kodi Curtis, Ursula na Jessica aphedzeka tani thangwi ya kubvesesa Genesi 3:15?

¹⁶ Pikiro ya Yahova inagumanika pa Genesi 3:15 inakwanisa kutiphedza toera kuthimbana na nyatwa zakusiyana-siyana. Curtis, anatumikira ninga misiyonariyo ku Guam, alonga: “Midzidzi inango ine ndathimbana na nyatwa zakuti zayesera kukhulupirika kwanga kuna Yahova. Mbwenye kunyerezera mwadidi profesiya inagumanika pa Genesi 3:15 kwandiphedza toera kupitiriza kunyindira Babanga wakudzulu.” Curtis asadikhira ntsiku  yakuti Yahova anadzamalisa nyatwa zathu zonsene.

¹⁷ Mulongo unango wa ku Bavaria anacemerwa Ursula alonga kuti kubvesesa Genesi 3:15 kwam’phedza toera kukhala na cinyindiro cakuti Bhibhlya yalembwa mukutsogolerwa na Mulungu. Iye aona kuti maprofesiya anango asabverana tani na profesiya ineyi, pontho pyenepi pyan’dzumatirisa. Iye alongambo: “Ndadzumatirwa pidapfundza ine kuti Yahova acita pinthu mwakucimbiza toera anthu akhonde kusowa cidikhiro.”

¹⁸ Jessica, wa ku Mikroneziya, alonga: “Ndisapitiriza kukumbuka mabvero adakhala na ine pa ulendo wakutoma udadzindikira ine kuti ndagumana undimomwene. Pontho ndadziwa kuti profesiya inagumanika pa Genesi 3:15 ikukwanirisika. Pyenepi pyandiphedza kukumbuka kuti nyatwa zinathimbana na ife lero nee ndi cifuniro ca Yahova. Profesiya ineyi yawangisa cikhulupiro canga cakuti kutumikira Yahova kusatiphedza toera kukhala na umaso wadidi lero na umaso wadidi kakamwe ntsogolo.”

19. Thangwi yanji nee tisapenula kuti khundu yakumalisa ya profesiya ineyi inakwanirisika?

¹⁹ Ninga pidaona ife, profesiya inagumanika pa Genesi 3:15 iri kupitiriza kukwanirisika. Cincino dzindza ya nkazi na dzindza ya nyoka isadziwika mwadidi. Cironda ca pa citende ca Yezu, wakuti ndi khundu yakutoma ya dzindza ya nkazi, cawanga, pontho cincino iye ndi Mambo wamphambvu na wakwenda na kwenda. Kusiyapo pyenepi, kusankhulwa kwa ale anacita khundu yaciwiri ya dzindza ya nkazi kwasala pang’ono toera kufika kunkhomo. Nakuti khundu yakutoma ya profesiya yakwanirisika, ife nee tisapenula kuti khundu yakumalisa ya kunyedzwa kwa nsolo wa nyoka inakwanirisikambo. Sathani angafudzwa pinadzakhala pyakutsandzayisa kakamwe kuna anthu akukhulupirika. Mbwenye ndzidzi unoyu mbudzati kufika, lekani kubwerera nduli thangwi Mulungu wathu ndi wakunyindirika. Iye anaphatisira dzindza ya nkazi toera kucita pinthu pizinji pyadidi kuna ‘madzindza onsene pa dziko yapantsi.’—Gen. 22:18.