1. Thangwi yanji Yahova alandanisika na nkazi wakuti ali na mwana wa pabere?

‘KODI nkazi anaduwala mwanace wa pabere’? Yahova acita mbvundzo unoyu mu ntsiku za mprofeta Izaiya. (Iza. 49:15) Yahova alonga kuna atumiki ace: ‘Maseze nkazi aduwale mwanace, ine cipo ndinakuduwalani’. Ufuni unapangiza Yahova kuna atumiki ace, kazinji kene nee asaulandanisa na ufuni unapangiza mama kuna mwanace wa pabere. Mwandimomwene Yahova aphatisira citsandzo ceneci ca mama anafuna kakamwe mwanace toera kupangiza kuti iye asafuna kakamwe atumiki ace. Akazi azinji akuti ali na anawo a pabere, asakhala na mabvero mabodzi ene ninga a Jasmin adalonga kuti: “Ungayamwisa mwana usakulisa ufuni kuna iye wa kwenda na kwenda.”

2. Yahova asabva tani angaona atumiki ace asiya kusonkhana na kumwaza mphangwa?

² Yahova asaona ntumiki wace angasiya kusonkhana na kumwaza mphangwa. Natenepa, iye asabva kupha kakamwe angaona atumiki ace mbakhala inativo * pyaka pyonsene.

3. Ninji pisafuna Yahova kuna anthu anasiya kusonkhana na kumwaza mphangwa?

³ Abale na alongo azinji anakhala inativo mukupita kwa ndzidzi asatoma pontho kusonkhana na kumwaza mphangwa, natenepa ife tisatsandzaya kakamwe angacita pyenepi. Kusiyapo pyenepi, Yahova asafuna kakamwe kuti iwo atome pontho kuntumikira, pontho ife tisafunambo. (1 Ped. 2:25) Kodi ife tinaaphedza tani toera atome pontho kusonkhana na kumwaza mphangwa? Mbatidzati kutawira mbvundzo unoyu, cakutoma  tisafunika kudziwa kuti thangwi yanji anango asasiya kusonkhana na kumwaza mphangwa.

4. Kodi basa ya kudziko isadzudzumisa tani anango?

⁴ Anango asasiya kutumikira Yahova thangwi asaikha basa yawo yakudziko pa mbuto yakutoma. M’bale anacemerwa Hung * anakhala kunterero kwa Azya alonga: “Ine ndikhabvunga ndzidzi uzinji na basa yanga yakudziko. Ine ndikhanyengezeka kuti ndingakhala na kobiri izinji ndinakwanisa kutumikira Yahova mwadidi. Natenepa ndikhabvunga ndzidzi uzinji kakamwe na kuphata basa. Mwapang’ono-pang’ono ndatoma kudjomba misonkhano mpaka kusiya kusonkhana. Sathani asaphatisira dziko toera kucitisa anthu kuti asiye kutumikira Mulungu.”

5. Ndi nyatwa zipi zinathimbana na mulongo Anne?

⁵ Abale na alongo anango asakhala akutsukwala kakamwe thangwi ya nyatwa. Anne anakhala ku Britaniya wakuti ali na ana axanu alonga: “Mwananga m’bodzi abalwa na utenda wakugopswa. Unango wankazi abuluswa mu mpingo, pontho unango ali na utenda wansala. Natenepa ine ndatsukwala kakamwe mbandisiya kusonkhana na kumwaza mphangwa. Mwapang’ono-pang’ono ndakhala inativo.” Ndi pyakutsukwalisa kakamwe kudziwa nyatwa zinathimbana na Anne na anthu a pabanja pace kuphatanizambo abale na alongo.

6. Thangwi yanji ndi pyakufunika kuphatisira uphungu unagumanika pa Akolose 3:13?

⁶ Lerini Akolose 3:13. Atumiki anango a Yahova asakhala akutsukwala kakamwe thangwi yakutsalakanwa mwakuipa na akristu andzawo mu mpingo. Mpostolo Paulu alonga kuti midzidzi inango panango tinakhala akutsukwala thangwi yakutsalakanwa mwakuipa na m’bale peno mulongo. Natenepa tingakhonda cita mphole-mphole tinakwanisa kukoya mathangwi muntima. Pyenepi panango pinacitisa munthu kusiya kutumikira Yahova. Onani pidacitika na m’bale Pablo anakhala ku Amerika dhu Sul. Iye apambizirwa kuti acita pinthu pyakuipa, buluka penepo aluza miyai yakutumikira mu mpingo. Kodi Pablo acitanji? Iye alonga: “Ine ndaipirwa kakamwe, pontho mwapang’ono-pang’ono ndatoma kusiya kusonkhana.”

7. Ninji pinacitika munthu angakhala na mabvero akupasika mulando?

⁷ Anango angacita madawo makulu asakhala na mabvero akupasika mulando mu ndzidzi uzinji, mbanyerezera kuti Mulungu nkhabe kuafuna. Maseze iye atcunyuka mbabverwa ntsisi, panango iye anapitiriza kukhala na mabvero akuti nee athema kutumikira Mulungu. Pyenepi pyacitika na m’bale anacemerwa Francisco. Iye alonga: “Ine ndikhadasandikwa thangwi yakucita ulukwali. Pakutoma ndikhapitiriza kuenda kumisonkhano, mbwenye mukupita kwa ndzidzi ndatoma kufewa manungo mbandiona kuti nee ndathema kukhala pabodzi na abale na alongo. Ine ndikhapitiriza kupasika mulando, pontho ndikhaona kuti Yahova nee andilekerera. Natenepa, ndasiya kusonkhana na kumwaza mphangwa.” Ndi api mabvero anu thangwi ya nyatwa zidathimbana na abale na alongo adalongwa mu ndima yacinai mpaka yacinomwe? Kodi musaabvera ntsisi? Pontho Yahova asaona tani nyatwa zinathimbana na abale na alongo anewa?

8. Kodi Yahova asaduwala ale adasiya kuntumikira? Fokotozani.

⁸ Yahova nkhabe kuduwala atumiki ace adasiya kusonkhana peno kumwaza mphangwa. Pontho iye nkhabe kuduwala mabasa adacita  iwo kuna iye. (Aheb. 6:10) Mprofeta Izaiya alemba citsandzo cadidi kakamwe cinapangiza njira inatsalakana Yahova atumiki ace. Iye alemba: ‘Ninga nkumbizi iye anadzakumbiza mabira ace. Na nkono wace anadzagumanya mabira ace mbaakhumbatira paditi pace.’ (Iza. 40:11) Kodi Yahova, nkumbizi wankulu asabva tani m’bodzi wa atumiki ace angasiya kuntumikira? Yezu apangiza pakweca mabvero a Yahova mu ndzidzi udabvundza iye anyakupfundzace kuti: “Musaona tani? Munthu angakhala na mabira 100 ibodzi mbitayika, kodi iye nee anasiya mabira 99 m’mapiri mbaenda kasaka bira idatayika? Mwandimomwene ndinakupangani kuti angaigumana, iye anakomerwa kakamwe na bira ineyi kupiringana na mabira 99 adakhonda kutayika.”—Mat. 18:12, 13.

9. Kodi akumbizi adidi asatsalakana tani mabira awo? (Onani foto iri pa tsamba yakutoma.)

⁹ Thangwi yanji ndi pyakuthema kulandanisa Yahova na nkumbizi? Thangwi nkumbizi wadidi asatsalakana mwadidi mabira ace. Mwacitsandzo, Dhavidhi apha nkhalamu na ursu toera kutsidzikiza mabira ace. (1 Sam. 17:34, 35) Nkumbizi wadidi akhakwanisambo kuona khala bira ibodzi yataika. (Juwau 10:3, 14) Nkumbizi unoyu wadidi mbadasiya mabira ace 99 pa mbuto yadidi mbaenda kasaka ire idatayika. Yezu aphatisira nsangani unoyu toera kutipfundzisa cinthu cakufunika kakamwe: “Munjira ibodzi ene, Babanga wakudzulu nkhabe funa kuti m’bodzi wa anthu awa akucepeseka atayike.”—Mat. 18:14.

10. Mwakubverana na Ezekyele 34:11-16, Yahova alonga kuti mbadacitanji kuna mabira ace adatayika?

¹⁰ Yahova asafuna ife tonsene kuphatanizambo ale adasiya kuntumikira. Kubulukira mwa mprofeta Ezekyeli, Mulungu alonga kuti mbadasaka mabira ace adatayika, pontho mbadaaphedza toera akhale na uxamwali wakuwanga na iye. Pontho iye alonga pinthu pikhafuna kucita iye toera kusaka mabira ace. Pinthu pyenepi ndi pyakulandana na pikhacita akumbizi a Izraeli mu ndzidzi ukhasaka iwo mabira awo angataika. (Lerini Ezekyele 34:11-16.) Cakutoma, nkumbizi akhafunika kukhala  na ndzidzi uzinji na mphambvu toera akwanise kusaka bira yace. Buluka penepo angaigumana akhaikwata mbaenda pontho kaikha pa nkumbi. Kusiyapo pyenepi, khala bira ineyi yaphekeka peno iri na njala, nkumbizi akhamanga pironda pyayo na masakala buluka penepo akhaithukula mbaenda kaidyesa. Akulu a mpingo akuti ndi akumbizi a “mabira a Mulungu” asafunika kucita pibodzi pyene toera kuphedza ale adasiya kusonkhana. (1 Ped. 5:2, 3) Akulu a mpingo angagumana abale na alongo adasiya kusonkhana, mwaufuni asaaphedza toera atome pontho kusonkhana mbakhala na uxamwali wakuwanga na Yahova. *

11. Kodi nkumbizi wadidi asadziwanji?

¹¹ Nkumbizi wadidi asadziwa kuti bira inakwanisa kutayika. Bira ingatayika nee pisabveka kuti nkumbizi aitsalakana mwakuipa. Cincino tendeni tione pinthu pidacita Mulungu toera kuphedza atumiki ace akuti akhagopa kucita basa idaapasa iye.

12. Kodi Yahova aphedza tani Yona?

¹² Mprofeta Yona nee abvera Yahova mbakhonda kuenda ku Ninive. Ngakhale tenepo, Yahova nee asiya kuphatisira Yona. Ninga nkumbizi wadidi, Yahova aphedza Yona kuti akhale na cipapo toera acite basa idampasa iye. (Yona 2:7; 3:1, 2) Mukupita kwa ndzidzi, Mulungu aphatisira muti toera kupfundzisa Yona kuti umaso wa anthu ndi wakufunika kakamwe. (Yona 4:10, 11) Tisapfundzanji? Akulu a mpingo nee asafunika kusiya kuphedza ale adasiya kusonkhana na kumwaza mphangwa. Mbwenye iwo asafunika kusaka kudziwa mathangwi adacitisa munthu kusiya kusonkhana na kumwaza mphangwa. Kusiyapo pyenepi, munthu angatoma pontho kutumikira Yahova akulu a mpingo asafunika kupitiriza kuntsalakana mwaufuni.

13. Tisapfundzanji na njira idatsalakana Yahova nyakulemba wa Masalmo kapitulu 73?

¹³ Nyakulemba wa Masalmo kapitulu 73 atsukwala kakamwe thangwi yakuona kuthimizirika kwa mpfuma za anthu akuipa. Natenepa iye atoma kupenula nkhombo zikhafuna kukhala  na iye thangwi ya kutumikira Mulungu. (Masal. 73:12, 13, 16) Kodi Yahova acitanji? Iye nee asandika nyamasalmo unoyu. Kusiyapo pyenepi, Mulungu atawirisa kuti mafala a nyamasalmo unoyu alembwe m’Bhibhlya. Mukupita kwa ndzidzi, nyamasalmo abvesesa kuti kukhala na uxamwali wakuwanga na Yahova ndi cinthu cakufunika kakamwe kupiringana pyonsene. (Masal. 73:23, 24, 26, 28) Tisapfundzanji? Akulu a mpingo nee asafunika kusandika mwakucimbiza ale anapenula nkhombo zinafuna kukhala na ife thangwi ya kutumikira Yahova. Mbwenye akulu a mpingo asafunika kuyesera kubvesesa kuti thangwi yanji anthu anewa asanyerezera munjira ineyi. Buluka penepo akulu a mpingo asafunika kuphatisira Bhibhlya toera kuaphedza.

14. Thangwi yanji Eliya akhafunika ciphedzo, pontho Yahova am’phedza tani?

¹⁴ Mprofeta Eliya athawa Yezabhele. (1 Ama. 19:1-3) Iye akhanyerezera kuti akhadasala ekha ninga mprofeta wa Yahova, pontho basa yace nee ikhali yakufunika. Natenepa iye atsukwala kakamwe mbaphemba kufa. (1 Ama. 19:4, 10) M’mbuto mwakusandika Eliya, Yahova ampasa cinyindiro cakuti iye nee ali ekha. Kusiyapo pyenepi, Yahova ampanga kuti akhafunika kunyindira Mulungu, pontho akhali na basa toera kucita. Mwaufuni Yahova abvesesa mabvero a Eliya mbampasa basa inango. (1 Ama. 19:11-16, 18) Kodi pyenepi pisatipfundzisanji? Ife tonsene, maka-maka akulu a mpingo asafunika kutsalakana atumiki a Yahova mwaufuni. Maseze munthu alonge mwakuipirwa peno alonge kuti Yahova nee anamulekerera,  akulu a mpingo asafunika kumbvesera. Buluka penepo, iwo asafunika kumpasa cinyindiro cakuti Yahova asanfuna.

15. Mwakubverana na Juwau 6:39, Yezu akhaona tani mabira Babace?

¹⁵ Kodi Yahova asafuna kuti tione tani mabira ace adatayika? Toera kutawira mbvundzo unoyu tendeni tione citsandzo ca Yezu. Iye akhadziwa kuti mabira a Yahova ndi akufunika kakamwe. Natenepa iye acita pyonsene pikhakwanisa iye toera kuphedza “mabira akutayika a dzindza ya Izraeli” kuti atumikire pontho Yahova. (Mat. 15:24; Luka 19:9, 10) Kusiyapo pyenepi, Yezu awangisira kakamwe toera mabira a Yahova akhonde tayika.—Lerini Juwau 6:39.

16-17. Kodi akulu a mpingo asafunika kuona tani basa yakuphedza ale adasiya kutumikira Yahova? (Onani bokosi  yakuti “Ndi Mabvero Api Asakhala Na Munthu Anasiya Kutumikira Yahova.”)

¹⁶ Mpostolo Paulu akulumiza akulu a mpingo a ku Efeso toera atowezere citsandzo ca Yezu. Iye alonga: “musafunika kuphedza anthu akufewa. Pontho musafunika kukumbuka mafala a mbuya Yezu, pidalonga iye kuti: ‘Kupasa kusatsandzayisa kakamwe kupiringana kutambira.’” (Mabasa 20:17, 35) Lemba ineyi isapangiza kuti akulu a mpingo ali na basa yakufunika kakamwe toera kutsalakana atumiki a Yahova. Nkulu wa mpingo unango wa ku Espanya anacemerwa Salvador alonga: “Ndinganyerezera njira inatsalakana Yahova mabira ace, pisandikulumiza toera kucita pyonsene pinakwanisa ine toera kuaphedza. Ine ndisadziwa kuti Yahova asafuna kuti nditsalakane mabira ace.”

¹⁷ Ale onsene adalongwa munsolo uno akuti akhadasiya kutumikira Yahova aphedza mbakhala pontho na uxamwali wakuwanga na Yahova. Mpaka lero, azinji akuti akhadasiya kutumikira Yahova asafuna kubwerera kuna iye. Natenepa, nsolo unatowera tinadzaona kuti tinaphedza tani anthu anewa toera akhale pontho na uxamwali wakuwanga na Yahova.