1, 2. Kodi makhaliro a Ayuda akhali tani pidamala Zakariya kuona masomphenya acinomwe?

PIDAMALA Zakariya kuona masomphenya acinomwe, iye anyerezera pizinji kakamwe. Iye awangiswa kakamwe na pikiro ya Yahova toera kutcunyusa anthu akuipa. Mbwenye nee cibodzi cikhadacinja. Azinji akhapitiriza kucita pinthu pyakuipa, pontho basa yakumanga paswa templo mu Yerusalemu nee ikhadamala. Thangwi yanji Ayuda asiya mwakucimbiza basa ikhadapaswa iwo na Yahova? Iwo akhadabwerera ku Yerusalemu basi ene toera kacita pinthu pyawo?

² Zakariya akhadziwa kuti Ayuda adabwerera ku Yerusalemu mbadalambira Yahova. Iwo akhali ale ‘adapaswa cipapo na Mulungu wandimomwene’ toera kusiya nyumba zawo na mabasa awo ku Bhabhilonya. (Esdra 1:2, 3, 5) Iwo asiya dziko ikhadziwa iwo mwadidi mbaenda ku dziko yakuti azinji a iwo nee akhaidziwa. Kumanga paswa templo ya Yahova cikhali cinthu cakufunika kakamwe kwa Ayuda mbaperekeka toera kucita  ulendo wa makilometru 1.600 n’nthando yakugopswa.

3, 4. Ndi pinentso pipi pidathimbana na Ayuda pikhabwerera iwo ku Yerusalemu?

³ Nyerezerani nsindzo wakubuluka ku Bhabhilonya mpaka ku Yerusalemu. Anthu akhali na ndzidzi uzinji toera kunyerezera na kucedza thangwi ya nyumba zinafuna kakhala iwo. Ayavu awo akhadaapanga pya kubalika kwa Yerusalemu na templo. (Esdra 3:12) Khala ndimwe akhacita ulendo unoyu pabodzi na iwo, mbamudapibva tani khala mwaona nzinda wa Yerusalemu pa ulendo wakutoma? Mbamudatsukwala thangwi yakuona nyumba zakufudzika, zakudzala tsanga na mipanda ya nzinda yakufudzika yakuti kale ikhali na misuwo mikulu? Panango mbamudalandanisa mipanda idafudzika na mipanda yakuwanga ya ku Bhabhilonya. Mbwenye iwo nee atsukwala. Thangwi yanji? Thangwi mu ndzidzi ukhacita iwo ulendo, Yahova aaphedza mbaatsidzikiza. Pidafika iwo ku Yerusalemu, amanga guwa ya ntsembe mbatoma kupereka ntsembe kuna Yahova ntsiku zonsene. (Esdra 3:1, 2) Iwo akhali aphinga kakamwe, pontho akhali dzololo toera kuphata basa. Pikhaoneka ninga nkhabebve cikhafuna kuadzudzumisa.

⁴ Mu ndzidzi ukhamanga iwo papswa templo, Ayuda akhafunikambo kumanga mizinda na nyumba zawo. Akhafunikambo kulima toera kutsalakana mabanja awo. (Esdra 2:70) Basa ikhafuna iwo kucita ikhaoneka ninga ikulu kakamwe. Mbwenye mwakukhonda dembuka, anyamalwa awo abwera mbayesera kuapingiza. Pyenepi pyamala pyaka 15 mbipikacitika, natenepa mwapang’ono-pang’ono Ayuda afewa manungo. (Esdra 4:1-4) Cinentso cinango cacitika mu caka 522, mudakhondesa mambo wa ku Persiya mabasa akumanga mu Yerusalemu. Pikhaoneka ninga nzinda nee mbudamangwabve.—Esdra 4:21-24.

5. Kodi Yahova aphedza tani atumiki ace?

⁵ Yahova akhadziwa kuti atumiki ace akhafunika ciwangiso. Natenepa iye aonesa Zakariya masomphenya akumalisa toera kupasa cinyindiro atumiki ace kuti Iye akhaafuna na akhakomerwa na kuwangisira kwawo toera kuntumikira. Iye apikira toera kuatsidzikiza angacita pontho basa ikhadaapasa iye. Thangwi yakumanga papswa templo, Yahova alonga: ‘Ipi pyonsene pinadzaoneka, mungabvera mafala a Yahova Mulungu wanu.’—Zakariya 6:15.

6. (a) Kodi masomphenya acisere a Zakariya asatoma tani? (Onani cithundzithundzi cakutoma.) (b) Thangwi yanji makavalo akhali akusiyana makore?

⁶ Masomphenya acisere a Zakariya panango awangisa cikhulupiro cawo onsene. (Lerini Zakariya 6:1-3.) Yeserani kunyerezera pidaona Zakariya. ‘Pakati-nakati pa mapiri mawiri’ ankuwa pakhabuluka makavalo mbakakwewa ngolo. Makavalo anewa akhali akusiyana makore, mbapicitisa kukhala pyakukhonda nentsa kudzindikira ale akhaatsogolera. Zakariya abvundza: ‘Ngolo zenezi zisaimiriranji?’ (Zakariya 6:4) Ife tisafunambo kudziwa, thangwi masomphenya anewa asatikhuya.

7, 8. (a) Kodi mapiri mawiri asaimiriranji? (b) Thangwi yanji mapiri anewa akhali ankuwa?

⁷ M’Bhibhlya, mapiri asaimirira maumambo peno mautongi. Mapiri adaona Zakariya ndi sawasawa na mapiri analongwa mu profesiya ya Dhanyeli. Ibodzi mwa mapiri  anewa isaimirira utongi ukulu wa Yahova, wakuti ndi wakukhonda kumala, inango isaimirira Umambo Waumesiya wakuti Mambo wace ndi Yezu. (Danyele 2:35, 45) Kutomera mu ndzidzi udakhala Yezu Mambo mu caka 1914, mapiri anewa onsene akhalipo, pontho akhali akufunika kakamwe toera kukwanirisa cifuniro ca Mulungu pa dziko yapantsi.

⁸ Thangwi yanji mapiri anewa akhali ankuwa? Nkuwa ndi utale wakufunika kakamwe wakuti usayetimira. Mwandimomwene, Yahova akhadapanga Aisraeli toera kuphatisira nkuwa mudamanga iwo tabernakulu na templo ku Yerusalemu. (Eksodo 27:1-3; 1 Amambo 7:13-16) Mapiri anewa ankuwa, asagomezera makhaliro adidi a utongi ukulu wa Yahova na wa Umambo Waumesiya, wakuti unadzatsidzikiza anthu na kuabweresera nkhombo zizinji.

9. Mbani akhali mu ngolo za makavalo, pontho basa yawo ikhali ipi?

⁹ Kodi mbani akhali mu ngolo za makavalo? Anatsogolera ngolo zenezi ndi aanju, pontho ngolo ibodzi na ibodzi isaimirira nsoka ukulu wa aanju. (Lerini Zakariya 6:5-8.) Iwo akhabuluka ‘pamaso pa Mbuya wa pantsi ponsene’ na basa yakufunika kakamwe. Aanju anewa atumwa toera katsidzikiza mbumba ya Mulungu ku Bhabhilonya, ‘dziko ya kunkwiriro.’ Yahova aphatisira masomphenya anewa toera kuphedza atumiki ace kuti iwo nee mbadakhala pontho mabitcu ku Bhabhilonya. Pyenepi pyawangisa kakamwe anyakumanga templo mu ntsiku za Zakariya! Pyaapasambo cinyindiro cakuti anyamalwa awo nee mbadaapingiza kucita basa yakumanga.

10. Kodi masomphenya a Zakariya analonga pya ngolo na ale anatsogolera ngolo asatiphedza tani lero?

¹⁰ Lero, Yahova asapitiriza kuphatisira aanju ace toera kutsidzikiza na kuwangisa atumiki ace. (Malakiya 3:6; Ahebere 1:7, 14) Kutomera mu caka 1919, mudabuluswa atumiki a Yahova mu ubitcu wakuphiphirisa mu Bhabhilonya Wankulu, ulambiri wandimomwene usapitiriza kukula mwakukhonda tsalakana mitcingo. (Apokalipse 18:4) Mbwenye anyamalwa nee akwanisa kucita pyenepi. Nakuti aanju asatsidzikiza gulu ya Yahova, ife nkhabe funika kugopa kuti panango atumiki a Yahova anadzakhala mabitcu mu uphemberi waunthawatawa. (Masalmo 34:7) M’mbuto mwace, ife tisapitiriza kukhala akutsandzaya na kucita pizinji m’basa ya Yahova. Profesiya ya Zakariya isatiphedza kubvesesa kuti mapiri mawiri asatitsidzikiza.

11. Thangwi yanji nee tisafunika kugopa kupomokerwa kunafuna kucitwa atumiki a Mulungu?

¹¹ Mwakukhonda dembuka, anyandale a dziko ya Sathani anadzagumanyikana pabodzi toera kuyesera kufudza atumiki a Mulungu. (Ezekyele 38:2, 10-12; Danyele 11:40, 44, 45; Apokalipse 19:19) Profesiya ya Ezekyeli, isapangiza kuti anyandale  anewa anadzaphimbira dziko ninga mitambo. Iwo anadzatsogolera makavalo mbabwera mwakuipirwa toera kupomokera atumiki a Mulungu. (Ezekyele 38:15, 16) * (Onani cidzindikiro capantsi.) Kodi tisafunika kuagopa? Nkhabe! Yahova wa anyankhondo ali kukhundu yathu. Mu ndzidzi wa nyatwa ikulu, aanju a Yahova anadzatsidzikiza mbumba yace mbafudza munthu onsene anakhonda kubvera utongi wa Yahova. (2 Atesalonika 1:7, 8) Ineyi inadzakhala ntsiku yakutsandzayisa kwa atumiki a Mulungu! Mphapo mbani anafuna kutsogolera nsoka wa anyankhondo akudzulu a Yahova?

12, 13. (a) Kodi Yahova apanga Zakariya toera kucitanji? (b) Tisadziwa tani kuti mamuna anacemerwa Nthawi Ipswa ndi Yezu Kristu?

¹² Zakariya ndiye basi adaona masomphenya anewa masere. Mbwenye buluka penepo acita cinthu cakuti anthu mbadakwanisa kuciona, pontho mbicidawangisa anyakumanga paswa templo ya Mulungu. (Lerini Zakariya 6:9-12.) Amuna atatu, Holdai, Tobiya na Idaiya abwera buluka ku Bhabhilonya. Yahova apanga Zakariya kuti aphembe parata na ouro kuna amuna anewa toera kucita ‘nthimba ikulu.’ (Zakariya 6:11) Kodi nthimba ineyi ikhali ya ntongi Zorobhabhele, wakuti akhali wa dzindza  ya Yuda na ya Dhavidhi? Nkhabe. Yahova apanga Zakariya toera kubvazika nthimba Yoswa, Nyantsembe Wankulu. Pyenepi panango pyadzumatirisa onsene akhaona.

¹³ Kodi nthimba ineyi yacitisa Nyantsembe Wankulu Yoswa kukhala mambo? Nkhabe. Yoswa nee akhali wa dzindza ya Dhavidhi, natenepa nee akhadathema kukhala mambo. Nthimba idabvazikwa iye ikhaimirira pinthu pikhafuna kucitika kuna mambo na nyantsembe wantsogolo, anacemerwa Nthawi Ipswa. Bhibhlya isalonga kuti Nthawi Ipswa ndi Yezu Kristu.—Izaiya 11:1; Mateo 2:23.

14. Ndi basa ipi inacita Yezu ninga Mambo na Nyantsembe Wankulu?

¹⁴ Yezu ndi Mambo na Nyantsembe Wankulu. Iye asatsogolera anyankhondo a Yahova, pontho asaphata basa mwakuwanga toera kutsidzikiza atumiki a Mulungu n’dziko ino yakuipa. (Yeremiya 23:5, 6) Mwakukhonda dembuka, Kristu anadzakunda madzindza onsene munaphedzera iye utongi wa Mulungu na kutsidzikiza atumiki a Yahova. (Apokalipse 17:12-14; 19:11, 14, 15) Mbwenye mbidzati kufika ntsiku ineyi, Yezu, wakuti ndi Nthawi Ipswa, anadzakhala na basa ikulu kakamwe toera kucita.

15, 16. (a) Kodi atumiki a Mulungu aceneswa tani, pontho mbani adaacenesa? (b) Dziko yapantsi inadzakhala tani pakumala kwa Utongi wa Kristu wa Pyaka Cikwi?

¹⁵ Kusiyapo kukhala Mambo na Nyantsembe Wankulu, Yezu apaswa basa ‘yakumanga templo ya Yahova.’ (Lerini Zakariya 6:13.) Iye acita basa ineyi yakumanga mu caka 1919 mudasudzula iye atumiki a Mulungu mu uphemberi wauthambi, Bhabhilonya Wankulu. Yezu akhazikisa pontho mpingo na “m’bandazi wakukhulupirika na wandzeru.” Nsoka unoyu wa abale akudzodzwa usatsogolera basa yakufunika kakamwe inacitwa pa dziko yonsene yapantsi mu templo ikulu yauzimu. (Mateo 24:45) Yezu asacenesambo atumiki a Mulungu, mukuaphedza toera kulambira Yahova munjira yakucena.—Malakiya 3:1-3.

¹⁶ Yezu na anyantsembe ace 144.000, akuti ndi amambo anadzatonga mu pyaka cikwi. Mu pyaka pyenepi, iwo anadzaphedza anthu akukhulupirika toera kukhala aungwiro. Amambo na anyantsembe anewa angamala kucita basa ineyi, pa dziko yapantsi basi ene panadzakhala alambiri andimomwene a  Yahova. Pakumalisa, ulambiri wandimomwene unadzaceneswa kwenda na kwenda!

17. Yahova awangisa tani atumiki ace, pontho mphangwa zenezi zaakhuya tani?

¹⁷ Kodi mphangwa za Zakariya zakhuya tani Ayuda mu ndzidzi unoyu? Yahova apikira toera kuphedza na kutsidzikiza atumiki a Mulungu toera akwanise kumalisa templo. Pikiro ineyi yaapasa cidikhiro. Mbwenye panango akhabvundzika kuti anthu akucepa mbadakwanisa tani kucita basa ineyi. Natenepa, Zakariya aapanga pinthu pyakuti pyamalisa kugopa na kupenula kwawo. Yahova alonga kuna atumiki ninga Holdai, Tobhiya na Idaiya kuti anthu anango ‘anadzabwera kudzamanga templo ya Yahova.’ (Lerini Zakariya 6:15.) Ayuda akhadziwa kuti Yahova akhaaphedza m’basa yawo. Iwo aenda kamanga paswa templo mwacipapo, maseze mambo wa ku Persya akhadakhondesa basa ineyi. Kukhondeswa kweneku kukhali ninga citca cikulu patsogolo pawo, mbwenye mwakukhonda dembuka Yahova abulusa citca ceneci. Natenepa, templo yamaliswa mu caka 515 Kristu mbadzati kubwera. (Esdra 6:22; Zakariya 4:6, 7) Mbwenye mafala anewa a Yahova asafokotozambo cinthu cakufunika kakamwe cinacitika lero.

18. Lemba ya Zakariya 6:15 isakwanirisika tani lero?

¹⁸ Lero, pikwi na pikwi pya anthu asalambira Yahova. Iwo asatsandzaya kumpasa ‘pinthu pyawo pyakufunika’ ninga ndzidzi, mphambvu na mpfuma zawo. Munjira ineyi, iwo asakwanisa kuphedzera templo ikulu yauzimu ya Yahova. (Misangani 3:9) Natenepa, ife tinakwanisa kukhala na cinyindiro cakuti Yahova asalemedza kuphedzera kwathu. Kumbukani kuti Holdai, Tobiya na Idaiya abweresa parata na ouro, buluka penepo Zakariya mbacita nthimba. Nthimba ineyi ikhali ‘cikumbuso’ cakuphedzera kwawo ulambiri wandimomwene. (Zakariya 6:14) Yahova cipo anadzaduwala basa yathu na ufuni unapangiza ife kwa iye.—Ahebere 6:10.

19. Masomphenya a Zakariya asafunika kutikulumiza toera kucitanji?

¹⁹ Ntsiku zino zakumalisa, atumiki a Yahova asacita basa ikulu kakamwe. Pyenepi pisakwanisika, basi ene thangwi ya nkhombo za Yahova na citsogolero ca Kristu. Tiri akutsandzaya kucita khundu ya gulu yakuti ndi yakuwanga, isatitsidzikiza, pontho ndi ya kwenda na kwenda. Kusiyapo pyenepi, tisadziwa kuti cifuniro ca Yahova thangwi ya ulambiri wakucena cinadzakwanirisika. Natenepa lemedzani mwai uli na imwe wakucita khundu ya atumiki a Mulungu, pontho ‘bveserani fala ya Yahova Mulungu wanu.’ Mungacita pyenepi, munatsidzikizwa na Mambo wathu na Nyantsembe Wankulu pabodzi na aanju. Citani pyonsene pinakwanisa imwe toera kuphedzera ulambiri wandimomwene. Yahova anakutsidzikizani ntsiku zino zakumalisa mpaka kwenda na kwenda!