1. Kodi Akristu akubatizwa asafunika kupitiriza kucitanji?

KODI imwe ndimwe wakubatizwa? Khala ndi tenepo, ntsiku idabatizwa imwe mwapangiza kuna anthu onsene kuti musakhulupira Yahova, pontho muli dzololo toera kuntumikira pabodzi na gulu yace. * Mwandimomwene, imwe musafunika kupitiriza kuwangisa cikhulupiro canu kuna Yahova. Pontho imwe musafunika kutawira na ntima onsene kuti Yahova asapitiriza kuphatisira gulu yace lero toera kucita basa inafuna iye.

2-3. Kodi Yahova asatsogolera tani gulu yace lero? Perekani citsandzo.

² Munjira inatsogolera Yahova gulu yace lero, isapangiza makhaliro ace, cifuno cace, na midida yace. Tendeni tione makhaliro matatu a Yahova akuti asaapangiza mu gulu yace.

³ Wakutoma, “Mulungu nkhabe tsankhulo.” (Mabasa 10:34) Ufuni wakulumiza Yahova toera kupereka Mwanace ninga “ciomboli kuna anthu onsene.” (1 Tim. 2:6; Juwau 3:16) Yahova asaphatisira atumiki ace toera kumwaza mphangwa kuna anthu onsene ale anafuna kubvesera, toera akwanise kuphindula na ciomboli. Waciwiri, Yahova ndi Mulungu wakuti asacita pinthu mwakulinganira na wantendere. (1 Akor. 14:33, 40) Natenepa, Yahova asadikhira kuti atumiki ace amulambire mwakulinganira na mwantendere. Wacitatu, Yahova ‘ndi Mpfundzisi Wankulu.’ (Iza. 30:20, 21) Na thangwi ineyi atumiki ace asawangisira kakamwe toera kupfundzisa anango Mafalace, Bhibhlya mu mpingo na mu utumiki. Kodi Akristu a mu ndzidzi wa apostolo atowezera tani makhaliro anewa matatu a Yahova? Mphapo lero atumiki a Yahova asatowezera tani makhaliro anewa? Pontho lero nzimu wakucena unakuphedzani tani mu ndzidzi unatumikira imwe gulu ya Yahova?

4. Mwakubverana na Mabasa 1:8, Yezu apanga anyakupfundzace toera kucitanji, pontho iwo mbadaphedzwa na ani?

⁴ Mphangwa zikhamwaza Yezu mu ndzidzi wa apostolo zaphedza anthu toera kukhala na cidikhiro. (Luka 4:43) Iye apanga anyakupfundzace toera kupitiriza kucita basa idatomesa iye yakumwaza mphangwa “mpaka kunkhomo kwa dziko yapantsi.” (Lerini Mabasa 1:8.) Mwandimomwene, iwo nee mbadacita basa ineyi okhene. Iwo ‘mbadaphedzwa’ na nzimu wakucena udapikira Yezu.—Juwau 14:26; Zak. 4:6.

5-6. Nzimu wakucena waphedza tani anyakupfundza a Yezu?

⁵ Anyakupfundza a Yezu atambira nzimu wakucena pa Pentekoste 33 Pakumala Kubalwa Kwa Kristu. Pidatambira iwo nzimu wakucena, mwakukhonda dembuka iwo atoma kumwaza mphangwa, pontho mu ndzidzi wakucepa anthu azinji atawira mphangwa zenezi zadidi. (Mabasa 2:41; 4:4) Pidatoma iwo kutcingwa, iwo nee agopa mbwenye iwo aphemba Mulungu toera kuaphedza. Iwo alonga: “Phedzani atumiki anu toera apitirize kulonga mafala anu na cipapo consene.” Buluka penepo iwo adzala na nzimu wakucena mbatoma “kulonga mafala a Mulungu mwacipapo.”—Mabasa 4:18-20, 29, 31.

⁶ Anyakupfundza a Yezu athimbanambo na pinentso pinango. Mwacitsandzo, iwo nee akhali na makopya mazinji a Bhibhlya. Pontho iwo nee akhali na mabukhu akubuluswa m’Bhibhlya ninga ali na ife lero. Kusiyapo pyenepi, iwo akhafunika kumwaza mphangwa kuna anthu a pilongero pyakusiyana-siyana. Mwakukhonda tsalakana pinentso pikhathimbana na iwo, anyakupfundza anewa aphinga akwanisa kumwaza mphangwa “kuna anthu onsene pa dziko yapantsi.”—Akol. 1:6, 23.

7. Mu pyaka pyakupiringana 100, atumiki a Yahova akhadziwa tani pikhafuna Mulungu kuna iwo, pontho ninji pidacita iwo?

⁷ Lero, Yahova asapitiriza kutsogolera na kupasa atumiki ace mphambvu toera kucita cifuno cace. Mbwenye iye asaphatisira Bhibhlya toera kutsogolera atumiki ace. Pontho Bhibhlya isalonga thangwi ya utumiki wa Yezu na basa idapasa iye anyakupfundzace toera kupitiriza kuicita. (Mat. 28:19, 20) Revista ya cingerezi ya mwezi wa Julho ya caka 1881 yalonga: “Yahova nee aticemera toera kupaswa mbiri na anthu peno kukhala na mpfuma mbwenye toera kuphatisira pinthu pyathu pyonsene kuti timwaze mphangwa zadidi.” Bukhu inango ing’ono ya cingerezi ya nsolo wakuti To Whom the Work Is Entrusted idabuluswa mu caka 1919 yalonga kuti: “Basa ineyi ndi ikulu kakamwe, mbwenye ndi ya Mbuya. Natenepa na ciphedzo cace ife tinakwanisa kuicita.” Mwandimomwene, ninga Akristu a mu ndzidzi wa apostolo, abale anewa aphinga acita pyonsene pikhakwanisa iwo toera kuphata basa ineyi mbakhala na cinyindiro cakuti nzimu wa Yahova unakwanisa kuaphedza toera kumwaza mphangwa kuna anthu a mitundu yonsene. Natenepa, ife tiri na cinyindiro cibodzi cene cakuti nzimu wakucena unakwanisa kutiphedza.

8-9. Ndi njira zipi zinaphatisira atumiki a Yahova toera kumwaza mphangwa?

⁸ Gulu ya Yahova isaphatisira mafaramentu adidi kakamwe toera kumwaza mphangwa zadidi. Kale iwo akhaphatisira mabukhu akudhindwa, “Fotodrama da Criação,” fonógrafos, makaro a som, radhyo, mbwenye cincino asaphatisira makomputadhore na interneti. Kusiyapo pyenepi, gulu ya Yahova isathumburuza mphangwa za Bhibhlya mu pilongero pyakusiyana-siyana. Thangwi yanji? Thangwi iwo asafuna kuti anthu a mitundu yonsene abve mphangwa zadidi mu pilongero pyawo. Yahova ndi wakusowa tsankhulo, pontho iye alonga mwanyapantsi kuti mphangwa zadidi mbizidamwazwa “kuna anthu a madziko onsene, a madzindza onsene, a pilongero pyonsene na mbumba zonsene.” (Apok. 14:6, 7) Natenepa iye asafuna kuti anthu onsene abve mphangwa za Umambo.

⁹ Ndiye tani kuna anthu akuti asakhala m’manyumba akuti ali na anyakuonera peno misuwo isakhala yakufungwa? Toera kumwaza mphangwa  kuna anthu anewa, Yahova asaphedza atumiki ace toera kucita masasanyiro akumwaza mphangwa munjira zakusiyana-siyana. Mwacitsandzo, mu caka ca 2001, Mathubo Akutonga atawirisa abale na alongo a ku Fransa toera kuphatisira makarinya akuikhira mabukhu na njira zinango zakugawira mabukhu. Natenepa njira zenezi zaphedza kakamwe. Mu caka 2011, ku Estados Unidos kwatomeswa njira ipswa yakumwaza mphangwa ku mbuto ibodzi mwa mbuto za nzinda wa Nova York yakuti isagumanika anthu azinji kakamwe. Mu caka cakutoma, agawirwa mabukhu akukwana 102.129 na marevista akukwana 68.911. Pontho anthu akukwana 4.701 aphemba toera kupfundza Bhibhlya. Mwakukhonda penula, ife takwanisa kuona kuti Yahova aphatisira nzimu wace wakucena toera kuphedzera basa ineyi. Kusiyapo pyenepi, Mathubo Akutonga atawirisa abale na alongo pa dziko yonsene yapantsi toera kuphatisira njira zenezi zakumwaza mphangwa.

10. Tisafunika kucitanji toera kuthimizira maluso athu akumwaza mphangwa na kupfundzisa?

¹⁰ Ninji pisafunika imwe kucita? Phatisirani pinthu pyonsene pinakupfundzisani Yahova pa misonkhano ya mpingo. Pontho mwazani mphangwa mwakukhonda phonya pabodzi na abale na alongo a mu nsoka wanu wa basa ya m’munda. Kusiyapo pyenepi, abale na alongo anewa anakwanisa kukuphedzani toera kuthimizira maluso anu akumwaza mphangwa na kupfundzisa, pontho iwo anakwanisa kukuphedzani thangwi ya citsandzo cawo cadidi. Pontho pitirizani kumwaza mphangwa mwakukhonda tsalakana pinentso pinathimbana na imwe. Mwandimomwene, ife nee tisacita cifuno ca Mulungu na mphambvu zathu mbwenye na ciphedzo ca nzimu wakucena. (Zak. 4:6) Natenepa tisafunika kukhala na cinyindiro consene cakuti Yahova anakwanisa kutipasa mphambvu, thangwi tisacita basa yace.

11. Kodi mu ndzidzi wa apostolo, mathubo akutonga aphata tani basa pabodzi toera kuphedza atumiki a Mulungu kuti akhale akuphatana?

¹¹ Mu ndzidzi wa apostolo, mathubo akutonga mu Yerusalemu aphata basa pabodzi toera kuphedza atumiki a Mulungu kuti akhale muntendere. (Mabasa 2:42) Mwacitsandzo, mu caka cifupi na 49 Pakumala Kubalwa Kwa Kristu, Akristu azinji akhali na maonero akusiyana thangwi ya kusidzwa,  natenepa mathubo akutonga mukutsogolerwa na nzimu wakucena iwo akwanisa kutsalakana nkandzo unoyu. Khala nkandzo unoyu mbudapitiriza, Akristu mbadakhala akugawana, pontho pyenepi mbapidapingiza basa yakumwaza mphangwa. Maseze apostolo na akulu mu Yerusalemu akhali Ayuda, iwo nee akhatowezera pipfundziso pya Ciyuda thangwi ya kusidzwa. M’mbuto mwace, iwo akhatsogolerwa na Mafala a Mulungu, pontho aphemba ciphedzo ca nzimu wakucena toera kucita cisankhulo cadidi. (Mabasa 15:1, 2, 5-20, 28) Yahova aapasa nkhombo thangwi ya cisankhulo cidacita iwo, pontho mpingo wapitiriza kukhala pa ntendere na kuphatana. Kusiyapo pyenepi, iwo apitiriza kumwaza mphangwa zadidi.—Mabasa 15:30, 31; 16:4, 5.

12. Ninji pinapangiza kuti gulu ya Yahova ndi yantendere na yakuphatana?

¹² Lero, gulu ya Yahova isaphedza atumiki a Yahova toera kukhala pa ntendere na akuphatana. Revista ya Zion’s Watch Tower and Herald of Christ’s Presence ya 15 de Novembro ya caka 1895 ikhali na nsolo udabuluswa mu lemba ya 1 Akorinto 14:40 unalonga kuti “pyonsene mbapicitwe munjira yadidi na yakulinganira.” Pontho nsolo unoyu wafokotoza kuti: ‘Apostolo alemba pinthu pizinji toera mpingo ucite pinthu mwakulinganira. Natenepa ndi pyakufunika kakamwe kupitiriza kubvera na ntima onsene pinthu pyonsene pidalembwa kalene toera kutipfundzisa.’ (Aroma 15:4) Na thangwi ineyi, gulu ya Yahova lero isaphata basa mwakuwanga kakamwe toera kuphedza mipingo Yacikristu kuti ikhale pa ntendere na yakuphatana ninga pikhacita mipingo Yacikristu mu ndzidzi wa apostolo. Mwacitsandzo, khala imwe mwagumanika pa Pfundziro ya Ncenjezi mu mpingo unango wakuti uli mu dziko yanu peno mu dziko inango, imwe musadziwa kuti pfundziro ineyi isacitwa tani, pontho musadziwa nsolo unafuna kupfundzwa. Natenepa imwe musakhala wakutsandzaya. Mwakukhonda penula, basi ene ndi nzimu wa Mulungu wakuti usatiphedza toera kukhala akuphatana munjira ineyi.—Sof. 3:9.

13. Mwakubverana na Tiyago 3:17, tisafunika kubvundzikanji?

¹³ Ninji pisafunika imwe kucita? Yahova asafuna kuti atumiki ace ‘akoye kuphatana kwawo kubulukira mu nzimu wakucena mbakhala akuphatana muntendere.’ (Aef. 4:1-3) Natenepa bvundzikani: ‘Kodi ine ndisaphedzera toera abale na alongo akhale akuphatana na antendere mu mpingo? Kodi ndisabvera abale anatsogolera mu mpingo? Kodi  anango asanyindira ine, makamaka khala ndisacita mabasa mazinji mu mpingo? Kodi ndisacita pinthu mwakubverana na ndzidzi? Pontho ndisaphedza anango mwakukwana?’ (Lerini Tiyago 3:17.) Mungaona kuti musafunika kusasanyira makhundu anango phembani ciphedzo ca nzimu wakucena. Thangwi mungatawirisa nzimu wakucena toera kucinja makhaliro anu, abale na alongo anakufunani kakamwe, pontho iwo anapereka takhuta kakamwe thangwi ya mabasa anacita imwe mu mpingo.

14. Mwakubverana na Akolose 1:9, 10, kodi Yahova apfundzisa tani atumiki ace mu ndzidzi wa apostolo?

¹⁴ Kutomera mu ndzidzi wa apostolo, Yahova asakomerwa kakamwe na kupfundzisa atumiki ace. (Masal. 32:8) Iye asafuna kuti iwo andziwe, anfune mbakhala na umaso wakwenda na kwenda. Mbwenye pyenepi pinakwanisika basi ene tingatawira kupfundziswa na Yahova. (Juwau 17:3) Yahova aphatisira mpingo wa Akristu a mu ndzidzi wa apostolo toera kupfundzisa atumiki ace. (Lerini Akolose 1:9, 10.) Pontho nzimu wakucena wakuti ndi “m’phedzi” wathu waphedzambo anyakupfundza a Yezu. (Juwau 14:16) Nzimu unoyu wakucena waphedza anyakupfundza toera kubvesesa Mafala a Mulungu na kukumbuka pinthu pyonsene pidalonga Yezu na pidacita iye pyakuti pisagumanika m’mabukhu manai a Evanjelyu. Kubvesesa kwawo Mafala a Mulungu kwaaphedza toera kukhala na cikhulupiro cakuwanga, kufuna Mulungu, Yezu, pontho kwaaphedza toera kufunana unango na ndzace.

15. Ndi munjira ipi Yahova akukwanirisa mafala anagumanika pa Izaiya 2:2, 3?

¹⁵ Mu ntsiku zino. Yahova akhadalonga mwanyapantsi kuti ‘mu ntsiku zakumalisa,’ anthu a madzindza onsene mbadaenda paphiri yace yakuti isaimirira ulambiri wandimomwene. (Lerini Izaiya 2:2, 3.) Lero ife tisaona kukwanirisika kwa profesiya ineyi. Ife tisaona kuti ulambiri wandimomwene ndi wadidi kakamwe kupiringana mauphemberi onsene authambi. Pontho tisaona kuti Yahova ali kupasa atumiki ace cakudya cizinji cauzimu. (Iza. 25:6)  Iye asaphatisira “m’bandazi wakukhulupirika na wandzeru” toera kutipasa cakudya cauzimu munjira zakusiyana-siyana. Mwacitsandzo, ife tisakwanisa kuleri marevista, kubvesera nkhani na kuona mavidhyu. (Mat. 24:45) Ife tiri na mabvero mabodzi ene ninga akhali na xamwali wace Yobe akhacemerwa Eliyu, adalonga kuti: ‘Ndi mpfundzisi upi unango adalandana na Mulungu?’—Yobe 36:22.

16. Musafunika kucitanji toera muphindule na cipfundziso cinapereka Yahova?

¹⁶ Ninji pisafunika imwe kucita? Nzimu wa Mulungu unakuphedzani toera kuphatisira pinthu pinaleri imwe na pinapfundza imwe m’Bhibhlya. Citani phembero ninga idacita nyamasalmo adalonga kuti: ‘Yahova, ndipfundziseni njira zanu. Ndinadzafamba mu undimomwene wanu. Ndicitiseni kugopa dzina yanu na ntima onsene.’ (Masal. 86:11) Natenepa, pitirizani kuleri na kupfundza Bhibhlya kuphatanizambo mabukhu anango anatipasa Yahova mukuphatisira gulu yace. Mbwenye cifuno canu nee cisafunika kukhala basi ene na udziwisi. Imwe musafunika kukhulupira undimomwene unapfundza imwe na kuuphatisira mu umaso wanu. Nzimu wa Yahova unakwanisa kukuphedzani toera kucita pyenepi. Imwe musafunikambo kuwangisa abale na alongo anu. (Aheb. 10:24, 25) Thangwi yanji musafunika kucita pyenepi? Thangwi iwo ndi abale anu auzimu. Phembani nzimu wakucena toera ukuphedzeni kuti mukwanise kupereka matawiro akuwangisa pa misonkhano, pontho citani pyonsene pinakwanisa imwe toera mucite makhundu anapaswa imwe pa misonkhano. Munjira ineyi, imwe munapangiza kuna Yahova na kuna Mwanace kuti musafuna “mabira” awo.—Juwau 21:15-17.

17. Munapangiza tani kuti musaphedzera mwakukhulupirika gulu ya Yahova?

¹⁷ Mwakukhonda dembuka, pa dziko yapantsi panadzasala basi ene gulu ibodzi yakutsogolerwa na nzimu wa Mulungu. Natenepa phatani basa mwaphinga pabodzi na gulu ya Yahova. Pangizani kuti musafuna anthu onsene ninga pinacita Mulungu mukuamwazira mphangwa zadidi. Towezerani ufuni wace toera mpingo ukhale wakuphatana, pontho muntendere. Pontho bveserani Mpfundzisi Wanu Wankulu mukupfundza mphangwa zonsene zinakupasani iye mukuphatisira gulu yace. Imwe nee musafunika kugopa kakamwe thangwi dziko ya Sathani iri cifupi toera kumala. Mbwenye musafunika kukhala acipapo, pontho musafunika kukhala pabodzi na ale anatumikira Yahova mwakukhulupirika.