1. Kodi alambiri a Yahova asapangiza tani kuti asafunana unango na ndzace?

ALAMBIRI a Yahova kuzungulira dziko yonsene yapantsi asacita khundu ya banja yace. Iwo ndi abale na alongo akufunana unango na ndzace. (1 Jwau 4:16, 21) Midzidzi inango iwo asaperekeka toera kuphedza abale awo, mbwenye kazinji kene iwo asapangiza ufuni wawo mu pinthu ping’ono pinaacitira iwo. Mwacitsandzo, iwo asalonga pinthu pyadidi kuna abale awo na kuatsalakana mwakukoma ntima. Tingatsalakana anango tisatowezera Babathu wakudzulu.—Aefesi 5:1.

2. Kodi Yezu atowezera tani ufuni wa Babace?

² Yezu atowezera mwadidi Babace. Midzidzi yonsene akhatsalakana anango mwakukoma ntima. Iye alonga: ‘Bwerani kuna ine imwe monsene adaneta na adalemerwa, ine ndinadzakupumisani.’ (Mateo 11:28, 29) Tingatowezera Yezu ‘mbatitsalakana amphawi,’ tinatsandzayisa Yahova mbatikhalambo  akutsandzaya. (Masalmo 41:1) Mu nsolo uno, tinadzaona kuti tinakhala tani acitsalakano kuna anthu a pabanja pathu, abale na alongo athu na ale anagumana ife mu utumiki.

3. Kodi mamuna anakhala tani wacitsalakano kuna nkazace? (Onani cithundzithundzi cakutoma.)

³ Amuna asafunika kukhala acitsandzo cadidi pakutsalakana banja yawo. (Aefesi 5:25; 6:4) Bhibhlya isalonga kuti amuna asafunika kutsalakana na kubvesesa akazawo. (1 Pedro 3:7) Mamuna wakubvesesa asadziwa kuti maseze iye ndi wakusiyana na nkazace munjira zizinji, iye nee ndi wadidi kakamwe kupiringana nkazace. (Genesi 2:18) Iye asatsalakana mabvero ace, pontho asantsalakana mwacilemedzo. Nkazi m’bodzi wa ku Kanadha alonga pya mamunace: “Iye cipo apwaza mabvero anga, peno alonga, ‘Leka kukhala na mabvero anewa.’ Iye ndi nyakubvesera wadidi. Angandiphedza toera kucinja maonero anga, iye asacita pyenepi mwakukoma ntima.”

4. Mamuna anapangiza tani kuti asatsalakana mabvero a nkazace?

⁴ Mamuna anatsalakana mabvero a nkazace nee asasirira akazi anango peno kupangiza citsalakano cakukhonda thema kuna iwo. (Yobe 31:1) Iye nkhabe kusirira akazi anango mu interneti, peno kuona masaiti akukhonda thema. Iye asakhala wakukhulupirika kuna nkazace thangwi asanfuna, asafuna Yahova na asaida pinthu pyakuipa.—Lerini Masalmo 19:14; 97:10.

5. Nkazi anakhala tani wacitsalakano kuna mamunace?

⁵ Mamuna angatowezera ufuni wa nsolo wace, Yezu Kristu, pinadzakhala pyakukhonda nentsa kuna nkazace toera ‘kumulemedza.’ (Aefesi 5:22-25, 33) Pontho nkazi angalemedza mamunace, anabvesesa mabvero a mamunace mbantsalakana mwakukoma ntima mu ndzidzi unaphatika iye na mabasa a mpingo peno angatsalakana pinthu pinango. Mamuna m’bodzi ku Bhritanya alonga: “Midzidzi inango, nkazanga asadzindikira kuti ciripo cinandinentsa. Natenepa iye asaphatisira n’dida unagumanika pa Misangani 20:5, pontho midzidzi inango asadikhira ndzidzi wakuthema toera ndikhale wakusudzuka kumpanga pinandinentsa.”

6. Kodi tonsene tinakwanisa tani kuphedza ana toera kukhala na makhaliro adidi mbatsalakana anango, pontho ndi maphindu api anafuna kukhala na iwo?

⁶ Anyakubala angatsalakanana mwadidi, anakhala citsandzo cadidi kuna anawo. Iwo asafunikambo kupfundzisa anawo toera kukhala na makhaliro adidi mbatsalakana anango. Mwacitsandzo, anyakubala anakwanisa kupfundzisa anawo toera akhonde kuthamanga-thamanga n’Nyumba ya Umambo. Peno angakhala pa phwando, anakwanisa kupanga anawo kuti adikhire akulu toera atome kupakula cakudya. Mwandimomwene, tonsene tinakwanisa kuphedzera anyakubala mu mpingo. Tisafunika kusimba mwana angacita pinthu pyadidi, ninga kutifungulira nsuwo toera tipite. Pyenepi pinacitisa  mwana kupibva mwadidi, pontho pinam’phedza kudziwa kuti ‘kupasa kusatsandzayisa kakamwe kupiringana kutambira.’—Machitiro 20:35.

7. Yezu apangiza tani citsalakano kuna mamuna wakukhonda kubva, pontho tisapfundzanji na citsandzo cace?

⁷ Ntsiku inango, pikhali Yezu mu cisa ca Dhekapoli, anthu ‘abweresa mamuna m’bodzi wakukhonda kubva wakuti akhali na cibubu kakamwe.’ (Marko 7:31-35) Yezu nee amuwangisa pamaso pa anthu. Thangwi yanji? Nakuti mamuna akhali wakukhonda kubva, panango nee akhali wakusudzuka pamwinji wa anthu. Yezu abvesesa mabvero ace, natenepa ‘aenda naye pakhundu,’ mbuto yakuti nee ikhali na anthu mbamuwangisa. Mwandimomwene, ife nee tinakwanisa kucita pirengo, mbwenye tisafunika kunyerezera pyakufuna na mabvero a abale athu mbatiaphedza mwakukoma ntima. Mpostolo Paulu alemba: ‘Tendeni tinyerezerane unango na ndzace, mbatiwangisana toera kupangiza ufuni na kucita mabasa adidi.’ (Ahebere 10:24) Yezu abvesesa mabvero a mamuna wakukhonda kubva mbantsalakana mwakukoma ntima. Ceneci ndi citsandzo cadidi kakamwe kwa ife!

8, 9. Tinapangiza tani kuti tisatsalakana abale na alongo akugwesera na akulamala? (Perekani pitsandzo.)

⁸ Khalani wacitsalakano kuna akugwesera na akulamala. Cinthu cakufunika kakamwe cinadziwika na mpingo Wacikristu ndi ufuni, tayu maluso. (Jwau 13:34, 35) Ufuni usatikulumiza kucita pyonsene pinakwanisa ife toera kuphedza abale na alongo athu akugwesera peno akulamala toera akwanise kugumanika pa misonkhano na m’basa yakumwaza mphangwa. Ife tisaaphedza maseze pinentse peno acimwane kucita pizinji. (Mateo 13:23) Michael, wakuti asafamba pa njinga ya anyakulamala asapereka takhuta kakamwe na ciphedzo cinatambira iye kuna acibale ace na abale mu mpingo. Iye alonga: “Thangwi ya ciphedzo cawo, ndisakwanisa kugumanika pa misonkhano na kumwaza mphangwa ndzidzi onsene. Makamaka pakupereka umboni wapakweca.”

⁹ M’mabheteli mazinji, muli na abale na alongo akukhulupirika akuti ndi akugwesera peno akulamala. Abale anaatsalakana asapangiza ufuni kuna iwo mukucita masasanyiro toera akwanise kumwaza mphangwa mukuphatisira matsamba na mitokodzi ya m’manja. Bill, wa pyaka 86 pyakubalwa, pontho wakuti asalembera matsamba anthu anagumanika m’mbuto zakutali alonga: “Tisapereka takhuta na mwai unoyu wakulemba matsamba.” Nancy, wakuti ali cifupi na pyaka 90 alonga: “Nee ndisalemba matsamba basi ene toera kudzadza maenvelopi. Mbwenye ninga basa yakumwaza mphangwa. Anthu asafunika kudziwa undimomwene!” Ethel, adabalwa mu caka 1921 alonga: “Ntsiku zonsene manungo anga asandipha kakamwe. Ntsiku zinango  ndisanentseka kakamwe toera kubvala nguwo.” Ngakhale tenepo, iye asakomerwa na kumwaza mphangwa mukuphatisira ntokodzi, pontho ali na maulendo akubwereza. Barbara, wa pyaka 85 pyakubalwa alonga: “Thangwi ya ungumi wanga, midzidzi inango ndisanentseka kakamwe toera kugumanika m’basa ya m’munda. Mbwenye kumwaza mphangwa mukuphatisira ntokodzi kusandiphedza toera kulonga na anango. Takhuta kakamwe Yahova!” Mbacidzati kupita caka cibodzi, nsoka wa abale na alongo akugwesera aphatisira midzidzi 1.228 mu utumiki, alemba matsamba 6.265, amenya mitokodzi maulendo akukwana 2.000 na agawira mabukhu 6.315! Mwakukhonda penula, kuwangisira kwawo kwatsandzayisa kakamwe Yahova!—Misangani 27:11.

10. Tinaphedza tani abale na alongo athu toera kuphindula na misonkhano?

¹⁰ Khalani wacitsalakano pa misonkhano Yacikristu. Tingakhala acitsalakano, tinaphedza abale na alongo athu toera kuphindula na misonkhano. Munjira ipi? Njira ibodzi ndi kufika nakweru toera tikhonde kudzudzumisa anango. Midzidzi inango, pinthu pyakukhonda dikhira pinakwanisa kutidembukisa. Khala tisadembuka kazinji kene, tisafunika kunyerezera kuti pyenepi pinakhuya tani abale athu, pontho ndi macinjo api anafunika ife kucita toera kupangiza kuti tisaatsalakana. Kumbukanimbo kuti ndi Yahova na Mwanace adaticemera toera kugumanika pa misonkhano. (Mateo 18:20) Natenepa tingafika nakweru tisapangiza cilemedzo kuna iwo!

11. Thangwi yanji abale anakhala na khundu pa misonkhano asafunika kubvera n’dida unagumanika pa 1 Akorinto 14:40?

¹¹ Tingatsalakana abale athu, tikubvera n’dida wakuti: ‘Pinthu pyonsene mbapicitwe munjira yadidi na yakulinganira.’ (1 Akorinto 14:40) Abale anakhala na khundu pa misonkhano anabverambo n’dida unoyu angacita nkhani yawo mwakubverana na ndzidzi udapaswa iwo. Natenepa  iwo asatsalakana tayu basi m’bale anatowera, mbwenye mpingo onsene. Nyerezerani kuti anango anapibva tani misonkhano ingamala mwakudembuka. Abale anango asafamba nsindzo wakulapha toera kufika kunyumba kwawo. Anango asafunika kukwira maxapa peno xitima. Anangombo amanga banja na munthu wakukhonda khulupira wakuti asaadikhira kufika panyumba pa ndzidzi udabverana iwo.

12. Thangwi yanji akulu a mpingo athema cilemedzo cathu na ufuni wathu? (Onani bokosi “ Khalani Wacitsalakano Kuna Ale Anatsogolera.”)

¹² Akulu a mpingo asaphata basa mwaphinga pa mpingo na mu utumiki, natenepa iwo athema cilemedzo cathu na ufuni wathu. (Lerini 1 Atesalonika 5:12, 13.) Mwandimomwene musapereka takhuta thangwi ya basa yonsene inacita iwo kuna imwe. Munacita pyenepi mungaabvera na kuaphedza, ‘thangwi iwo asakuonerani ninga anthu akuti anadzatawirira mulando.’—Ahebere 13:7, 17.

13. Tinapfundzanji na njira idatsalakana Yezu anthu?

¹³ Mu profesiya inalonga pya Yezu, Izaiya alonga: ‘Iye nee anagwanda ntete wakugongonyeka, nee anadzathimisa nyale yakupucira.’ (Izaiya 42:3) Ufuni ukhali na Yezu kuna anthu ukhankulumiza toera kuabvera ntsisi. Iye akhabvesesa mabvero a anthu akutsukwala na akufewa ninga ‘ntete wakugongonyeka’ peno ‘nyale yakupucira,’ natenepa iye akhaatsalakana mwakukoma ntima na mwakupirira. Ngakhale ana akhakomerwa kukhala na Yezu. (Marko 10:14) Ndimomwene kuti nee tinakwanisa kubvesesa na kupfundzisa ninga Yezu! Mbwenye tinapangiza citsalakano kuna anthu anamwazira ife mphangwa munjira inalonga ife na iwo, pontho ndzidzi unamala ife toera kucedza nawo.

14. Thangwi yanji tisafunika kunyerezera kuti tinalonga tani na anthu?

¹⁴ Tinalonga tani na anthu? Anthu azinji lero ‘asapwazwa na kutsalakanwa mwakuipa’ na anyamalonda akuipa, anyandale na atsogoleri auphemberi a dziko ino. (Mateo 9:36) Ndi thangwi yace, azinji nkhabe nyindira anango, pontho nkhabe cidikhiro. Na thangwi ineyi, mafala athu, njira inalonga ife pisafunika kupangiza kuti ndife akukoma ntima, pontho tisaatsalakana! Anthu azinji asafuna kubvesera mphangwa zathu tayu basi ene thangwi tisaphatisira mwadidi Bhibhlya, mbwenye thangwi tisaatsalakana na ntima onsene mbatialemedza.

15. Ndi njira zipi zingasi zakuti zinatiphedza kukhala acitsalakano kuna anthu a n’cisa cathu?

¹⁵ Pana njira zizinji zakuti zinatiphedza kukhala acitsalakano kuna anthu anamwazira ife mphangwa mu cisa cathu. Tisafunika kucita mibvundzo mwakukoma ntima na mwacilemedzo. Mpainiya m’bodzi akhatumikira n’cisa cakuti anthu azinji akhali na manyadzo, natenepa iye akhacalira kucita mibvundzo yakuti mbidaapasa manyadzo angacimwana kuitawira. Iye nee akhacita mibvundzo ninga, “Musadziwa dzina ya Mulungu?” peno “Musadziwa kuti Umambo  wa Mulungu ninji?” M’mbuto mwace, iye akhalonga mafala ninga awa, “Ndapfundza m’Bhibhlya kuti Mulungu ali na dzina. Musafuna kuti ndikupangizeni dzina ineyi?” Njira ineyi nee inaphata basa mbuto zonsene, thangwi anthu ndi akusiyana, pontho misambo ndi yakusiyana. Mbwenye ndzidzi onsene tisafunika kutsalakana anthu a n’cisa cathu mwakukoma ntima na mwacilemedzo. Toera kucita pyenepi, tisafunika kuadziwa mwadidi.

16, 17. Tinapangiza tani kukoma ntima (a) pakusankhula ndzidzi wakuenda kalonga na anthu? (b) thangwi ya ndzidzi unafuna kumala ife mbaticedza nawo?

¹⁶ Ndi ndzidzi upi unafunika ife kuenda kalonga na anthu? Tingaenda nyumba na nyumba, anthu nee asadikhira kuti tinafika panyumba pawo thangwi iwo nee aticemera. Natenepa mphyakufunika kakamwe kuenda kalonga nawo mu ndzidzi wakuthema. (Mateo 7:12) Mwacitsandzo, kodi anthu a n’cisa canu asakomerwa kugona ndzidzi uzinji pakumala kwa sumana? Panango munatoma pyanu kumwazira mphangwa anthu mu nseu, kupereka umboni wapakweca peno kucita maulendo akubwereza kuna anthu anadziwa imwe kuti ali panyumba.

¹⁷ Tisafunika kumala ndzidzi ungasi? Anthu azinji asakhala akuphatika kakamwe, natenepa mphyakufunika kakamwe kucedza nawo mwacigwagwa, makamaka paulendo wakutoma. Mphyakufunika kakamwe kumalisa makani athu mwakucimbiza, m’mbuto mwakumala ndzidzi uzinji. (1 Akorinto 9:20-23) Anthu angaona kuti tisabvesesa kuti iwo ali akuphatika, panango anadzafuna pontho kulonga na ife paulendo unango. Tingapangiza makhaliro a nzimu wakucena wa Mulungu, tinadzakhala ‘anyakuphata basa pabodzi na Mulungu.’ Panango Yahova anatiphatisira toera kuphedza munthu kupfundza undimomwene!—1 Akorinto 3:6, 7, 9.

18. Tingakhala acitsalakano kuna anango, tinadzatambira nkhombo zipi?

¹⁸ Natenepa tendeni ticite pyonsene pinakwanisa ife toera kukhala acitsalakano kuna anthu a pabanja pathu, abale na alongo athu na anthu anamwazira ife mphangwa. Tingacita pyenepi tinatambira nkhombo zizinji cincino na ntsogolo. Ninga munalonga lemba ya Masalmo 41:1, 2: ‘Anyakutsandzaya ndi ale anatsalakana munthu wakutcerenga; Yahova anadzaapulumusa mu ntsiku za nyatwa. Yahova anadzaakoya mbatsidzikiza umaso wawo. Iye anadzacemerwa wakutsandzaya pa dziko yapantsi.’