1. Ndi mafala api adalonga Yezu kuna amuna anai akuti akhali anyakusodza nyama za m’madzi, pontho iwo atawira tani?

NYAKUPFUNDZA Pedhru, Andreya, Tiyago na Juwau akhacita basa yakupha nyama za m’madzi mbagulisa. Nyerezerani mabvero adakhala na iwo mu ndzidzi udaapanga Yezu kuti: ‘Nditowereni, ine ndinadzakucitisani kukhala anyakusodza a anthu.’ * Kodi iwo atawira tani? Bhibhlya isalonga: “Penepo pene iwo asiya makokota awo mbatowera Yezu.” (Mat. 4:18-22) Cisankhulo ceneci mbacidacinja umaso wawo kwenda na kwenda. M’mbuto mwakukhala anyakusodza nyama za m’madzi, iwo mbadakhala ‘anyakusodza a anthu.’ (Luka 5:10) Lero, Yezu asacemerambo anthu a mitima yadidi akuti asafuna undimomwene. (Mat. 28:19, 20) Kodi imwe mwatawira ncemerero wa Yezu toera kukhala nyakusodza wa anthu?

2. Thangwi yanji tisafunika kunyerezera mwadidi mbatidzati kukhala m’mwazi mphangwa, pontho ninji pinafuna kutiphedza toera kucita cisankhulo ceneci?

² Panango mwapfundza Bhibhlya mu ndzidzi ungasi, pontho mwacita macinjo mu umaso wanu. Panango imwe musafuna kukhala m’mwazi mphangwa. Mbwenye nee muli na cinyindiro consene. Khala imwe musanyinyirika kutawira ncemerero wa Yezu, lekani kubwerera nduli. Pontho kunyinyirika kwanu kusapangiza kuti cisankhulo cinafuna kucita imwe ndi cakufunika kakamwe. Mbwenye Bhibhlya isalonga kuti Pedhru na andzace asiya makokota awo “mwakucimbiza.” Mbwenye Pedhru na m’bale wace nee acita cisankhulo ceneci mwakukhonda nyerezera. Iwo adziwa, pontho atawira Yezu ninga mesiya pidapita miyezi mitanthatu. (Juwau 1:35-42) Munjira ibodzi ene, panango musafuna kupfundza  pizinji thangwi ya Yahova na Yezu, pontho musafuna kupitiriza kukhala na uxamwali wakuwanga na Yahova. Natenepa, khala musafuna kukhala m’mwazi mphangwa, musafunika kunyerezera mwadidi thangwi ya pyenepi. Ninji pidaphedza Pedhru, Andreya na anango toera kucita cisankhulo ceneci?

3. Ndi makhaliro api anafuna kukuphedzani toera kukhala m’mwazi mphangwa wadidi?

³ Anyakupfundza akutoma a Yezu akhali akutsandzaya, akhadziwa mwadidi basa yawo, acipapo, pontho akhali akudzitonga. Makhaliro anewa aaphedza toera kukhala amwazi mphangwa adidi. Nsolo uno unakuphedzani toera kukulisa makhaliro anewa mbamukhala nyakupfundza wadidi wa Kristu.

4. Ninji pidaphedza Pedhru toera kukhala m’mwazi mphangwa wadidi kakamwe?

⁴ Pedhru akhapha nyama za m’madzi toera kutsalakana banjace, pontho iye akhakomerwa kakamwe na basa ineyi. (Juwau 21:3, 9-15) Kusiyapo pyenepi, iye adzakomerwambo kakamwe na basa yakumwaza mphangwa. Pontho na ciphedzo ca Yahova, Pedhru adzakhala m’mwazi mphangwa wadidi kakamwe.—Mabasa 2:14, 41.

5. Mwakubverana na Luka 5:8-11, thangwi yanji Pedhru agopa, pontho ninji pinafuna kutiphedza toera kukunda mabvero mabodzi ene?

⁵ Thangwi ikulu inaticitisa kumwaza mphangwa ndi yakuti tisafuna Yahova. Ufuni wathu kuna Yahova unatiphedza toera kukunda pinentso pyonsene pinathimbana na ife thangwi ya basa yakumwaza mphangwa. Yezu pidacemera iye Pedhru toera akhale m’mwazi mphangwa iye ampanga: “Leka kugopa.” (Lerini Luka 5:8-11.) Pedhru nee akhagopa pinthu pikhafuna kucitika angadzakhala nyakupfundza. Mbwenye iye akhaona kuti nee akhali wakuthema toera kukhala nyakupfundza wa Yezu thangwi ya cirengo cidacita Yezu, mukuaphedza kupha nyama zizinji za m’madzi. Munjira ibodzi ene, panango imwe munadzudzumika munganyerezera pinthu  pyonsene pinaphembwa toera kukhala nyakupfundza wa Kristu. Khala ndi tenepo, wangisani ufuni wanu kuna Yahova, Yezu na kuna andzanu. Pyenepi pinakuphedzani toera kutawira ncemerero wa Yezu mbamukhala m’mwazi mphangwa wadidi.—Mat. 22:37, 39; Juwau 14:15.

6. Ndi mathangwi api anango anaticitisa kumwaza mphangwa?

⁶ Tendeni tione mathangwi anango anaticitisa kumwaza mphangwa. Thangwi yakutoma ndi yakuti ife tisafuna kubvera matongero a Yezu: ‘Ndokoni mukacite anyakupfundza.’ (Mat. 28:19, 20) Yaciwiri ife tisamwaza mphangwa thangwi anthu ‘asapwazwa na kutsalakanwa mwakuipa,’ natenepa iwo asafunika kupfundza undimomwene unalonga pya Umambo wa Mulungu. (Mat. 9:36) Yahova asafuna kuti anthu a mitundu yonsene adziwe mwadidi undimomwene, pontho apulumuswe.—1 Tim. 2:4.

7. Kodi lemba ya Aroma 10:13-15 isapangiza tani kuti basa yakumwaza mphangwa ndi yakufunika kakamwe?

⁷ Tinganyerezera kuti basa yathu yakumwaza mphangwa inakwanisa kupulumusa anthu, pyenepi pinatikulumiza toera kucita basa ineyi. Mwakusiyana na munthu wakuti asapha nyama za m’madzi mbadya zinango mbagulisa, ife tisamwaza mphangwa toera kuphedza anthu kuti apulumuke.—Lerini Aroma 10:13-15; 1 Tim. 4:16.

8-9. Nyakusodza nyama za m’madzi asafunika kudziwanji, pontho thangwi yanji?

⁸ Mu ntsiku za Yezu, Muizraeli angasodza nyama za m’madzi akhadziwa kuti ndi nyama zipi zikhafunika iye kupha. (Lev. 11:9-12) Pontho iye akhafunikambo kudziwa mbuto zikhagumanika nyama zenezi. Kazinji kene nyama za m’madzi zisagumanika mbuto zakuti ziri na madzi adidi, pontho na cakudya cakuinjipa. Munthu anapha nyama za m’madzi asadziwambo ndzidzi wakuthema toera kucita pyenepi. Misiyonariyo unango anakhala ku ntsuwa ya Pacific alonga kuti pana ndzidzi wakuthema toera kusodza nyama za m’madzi. Mu ndzidzi udaphembwa iye na m’bale toera aende kasodza pabodzi. Iye alonga: “Tinaonana mangwana 9 ora.” M’bale atawira: “Ife tinaenda mu ndzidzi wakuti tinagumana nyama, tayu mu ndzidzi unafuna ife.”

⁹ Ninga anyakusodza nyama za m’madzi, anyakupfundza a Yezu akhaenda kamwaza mphangwa mbuto zikhagumanika anthu, pontho akhaenda mu ndzidzi ukhagumanika iwo. Mwacitsandzo, anyakupfundza a Yezu akhamwaza mphangwa mu templo, m’masinagoga, nyumba na nyumba na pa nsika. (Mabasa 5:42; 17:17; 18:4) Ife tisafunikambo kudziwa mbuto zinagumanika anthu mu cisa cathu. Pyenepi pinatiphedza toera kumwaza mphangwa mbuto zinagumanika anthu na mu ndzidzi unagumanika iwo mbuto zenezi.—1 Akor. 9:19-23.

10. Ndi pinthu pipi pinatipasa gulu ya Yahova toera kupiphatisira m’basa yakumwaza mphangwa?

¹⁰ Nyakusodza nyama za m’madzi asafunika kukhala na pinthu pyakusodza napyo, pontho asafunika kudziwa kuti anapiphatisira tani. Ife tisafunikambo kukhala na pinthu pyakukwana toera kumwaza napyo mphangwa. Pontho tisafunikambo kudziwa kuti tinapiphatisira tani. Yezu apanga anyakupfundzace kuti anamwaza tani mphangwa zadidi. Iye aapanga pinthu pikhafunika iwo kukwata, mbuto zikhafunika iwo kumwaza mphangwa na pinthu pikhafunika iwo kulonga. (Mat. 10:5-7; Luka 10:1-11) Lero, gulu ya Yahova isapereka mabukhu akusiyana-siyana toera kuaphatisira m’basa yakumwaza mphangwa. * Pontho gulu ya Yahova isatipfundzisa kuti tinaphatisira tani mabukhu anewa. Pyenepi pisatiphedza toera kukhala na cinyindiro mu ndzidzi unamwaza ife mphangwa na kupfundzisa anango.—2 Tim. 2:15.

11. Thangwi yanji amwazi mphangwa asafunika kukhala acipapo?

¹¹ Anyakusodza nyama za m’madzi asafunika kukhala acipapo. Midzidzi inango iwo asathimbana na pinthu pyakunentsa kakamwe m’madzi. Iwo asafunika kukhala acipapo thangwi kazinji kene asaphata basa namasiku, pontho midzidzi inango panango anaphatwa na condzi madzi mbacita mabimbi kakamwe. Amwazi mphangwa asafunikambo kukhala acipapo. Tingatoma kumwaza mphangwa mbitilonga kuti ndife Mboni za Yahova, panango tinatcingwa na acibale athu, kusingirirwa na axamwali athu, pontho anango anakhonda mphangwa zathu. Mbwenye ife nee tisafunika kudzudzumika na pyenepi. Yezu acenjeza atowereri ace kuti mbadamwaza mphangwa kuna anthu akuti mbadaatcinga.—Mat. 10:16.

12. Mwakubverana na Yoswa 1:7-9, ninji pinafuna kutiphedza toera kukhala acipapo?

¹² Musafunika kucitanji toera kukhala wacipapo? Cakutoma, musafunika kukhala na cinyindiro cakuti Yezu akupitiriza kutsogolera basa yakumwaza mphangwa. (Juwau 16:33; Apok. 14:14-16) Pontho khulupirani kuti Yahova anakutsalakanani. (Mat. 6:32-34) Mungakhala na cikhulupiro cakuwanga, pyenepi pinakuphedzani toera kukhala wacipapo. Pedhru na andzace apangiza kuti akhali na cikhulupiro cakuwanga mu ndzidzi udasiya iwo makokota awo mbatowera Yezu. Munjira ibodzi ene, imwe mwapangizambo kuti muli na cikhulupiro cakuwanga mu ndzidzi udapanga imwe axamwali anu na acibale  anu kuti musapfundza Bhibhlya na Mboni za Yahova, pontho musaenda kumisonkhano yawo. Mwakukhonda penula, imwe mwacita macinjo mu umaso wanu toera kukhala maso mwakubverana na midida ya Yahova. Imwe mwakwanisa kucita pyenepi thangwi ya cikhulupiro na cipapo. Mungapitiriza kukhala wacipapo, munakwanisa kukhala na cinyindiro cakuti ‘Yahova Mulungu wanu ali na imwe konsene kunaenda imwe.’—Lerini Yoswa 1:7-9.

13. Kodi kucita phembero na kunyerezera mwadidi kunakuphedzani tani toera kukhala wacipapo?

¹³ Ndi cinthu cipi cinango cinafunika imwe kucita toera kukhala wacipapo? Phembani Yahova toera akupaseni cipapo. (Mabasa 4:29, 31) Yahova anatawira maphembero anu, pontho cipo anakusiyani. Ndzidzi onsene iye ali dzololo toera kukuphedzani. Pontho nyerezerani mwadidi njira idapulumusa Yahova anthu anango nduli. Nyerezeranimbo njira idakuphedzani iye toera kukunda pinentso na kucita macinjo mu umaso wanu. Mwakukhonda penula, Yahova m’bodzi ene adaphedza atumiki ace toera kuwambuka Bara Yakufuira anakwanisambo kukuphedzani toera kukhala nyakupfundza wa Kristu. (Eks. 14:13) Khalani na cinyindiro ninga cikhali na nyamasalmo adalonga kuti: ‘Yahova ali kukhundu yanga; nee ndinadzagopa. Kodi munthu anandicitanji?’—Masal. 118:6.

14. Mwapfundzanji na citsandzo ca mulongo Masae na Tomoyo?

¹⁴ Cinthu cinango cinafuna kutiphedza toera kukhala acipapo ndi kunyerezera njira idaphedza Yahova ale akuti akhali na manyadzo toera kumwaza mphangwa. Onani citsandzo ca Mulongo anacemerwa Masae. Iye akhali na manyadzo, pontho akhanyerezera kuti nee anakwanisa kumwaza mphangwa. Iye akhanyerezera kuti kulonga na anthu akuti nee asaadziwa ndi pyakunentsa kakamwe, pontho pikhali ninga ali kukwira phiri yakulapha kakamwe. Natenepa, Masae awangisira kakamwe toera kukulisa ufuni wace kuna Mulungu na kuna anthu. Iye aona kuti ndi pyakufunika kakamwe kumwaza mphangwa mwakucimbiza, pontho iye acita phembero toera akhale na cifuno cakumwaza mphangwa. Natenepa, Masae adzakhala wacipapo mbatumikira ninga mpainiya wa ndzidzi onsene. Yahova anakwanisambo kuphedza amwazi mphangwa apswa toera ‘akhale acipapo.’ Onani citsandzo cinango ca mulongo anacemerwa Tomoyo. Ntsiku idatoma iye kumwaza mphangwa nyumba na nyumba, nyumba yakutoma ikhafuna iwo kumwaza mphangwa agumana nkazi, pontho nkazi unoyu alonga: “Ine nkhabe funa kulonga na Mboni za Yahova,” buluka penepo afunga nsuwo wace. Mbwenye Tomoyo nee agopa, iye apanga mulongo akhali na iye: “Waona pidacita iye? Ine nee ndalonga cinthu, mbwenye iye adzindikira kuti ndine m’bodzi wa Mboni za Yahova. Ndiri wakutsandzaya kakamwe thangwi ya pyenepi.” Mulongo Tomoyo cincino asatumikira ninga mpainiya wa ndzidzi onsene.

15. Kodi kudzitonga ninji, pontho thangwi yanji ndi kwakufunika kakamwe kuna ife?

¹⁵ Toera munthu akhale nyakusodza wadidi wa nyama za m’madzi asafunika kukhala wakudzitonga. Kudzitonga kusabveka “kukakamizika toera kucita pinthu pinafunika kucitwa.” Munthu anacita basa yakupha nyama za m’madzi mbagulisa, asalamuka nakweru, asacita basa ineyi mpaka kuimalisa, pontho asapitiriza kucita pyenepi mwakukhonda tsalakana makhaliro akudambo. Ife tisafunikambo kukhala akudzitonga toera kucita basa idapaswa ife mpaka kunkhomo.—Mat. 10:22.

16. Ninji pinafuna kutiphedza toera kucita pinthu pinaona ife kuti ndi pyakunentsa?

¹⁶ Kazinji kene tisafuna kucita pinthu pinaona ife kuti nee ndi pyakunentsa. Mbwenye midzidzi inango toera kucita pinthu pyakufunika kakamwe pisakhala pyakunentsa. Natenepa tisafunika kukhala akudzitonga. Pontho kudzitonga ndi kwakufunika kakamwe toera kucita pinthu pinaona  ife kuti ndi pyakunentsa. Mbwenye Yahova asatiphedza mukuphatisira nzimu wace wakucena.—Agal. 5:22, 23.

17. Mwakubverana na 1 Akorinto 9:25-27, mpostolo Paulu alonga kuti acitanji toera kukhala wakudzitonga?

¹⁷ Mpostolo Paulu akhali wakudzitonga. Mbwenye iye alonga kuti akhafunika kutcunyusa manungo ace toera akwanise kucita pinthu pyadidi. (Lerini 1 Akorinto 9:25-27.) Iye apanga Akristu toera atcunyuse manungo awo, pontho toera acite pinthu pyonsene “munjira yadidi na yakulinganira.” (1 Akor. 14:40) Ife tisafunika kuwangisira kakamwe toera kupitiriza kulambira Yahova, kwakuti kusaphataniza kumwaza mphangwa zadidi ndzidzi onsene na kupfundzisa anthu.—Mabasa 2:46.

18. Tisafunika kucitanji toera Yahova atsandzaye na basa yathu yakumwaza mphangwa?

¹⁸ Nyakusodza nyama za m’madzi asatsandzaya kakamwe angapha nyama zizinji. Mbwenye pyenepi ndi pyakusiyana kakamwe na basa yathu yakumwaza mphangwa. Ife nee tisakhala akutsandzaya thangwi basi ene taphedza anthu azinji toera kukhala Mboni za Yahova. (Luka 8:11-15) Tingapitiriza kumwaza mphangwa zadidi na kupfundzisa anango, Yahova anakomerwa kakamwe na basa yathu. Thangwi yanji? Thangwi tisapangiza kuti tisabvera iye pabodzi na Mwanace.—Marko 13:10; Mabasa 5:28, 29.

19-20. Ndi thangwi ipi inango inaticitisa toera kumwaza mphangwa?

¹⁹ M’madziko anango, basa yakusodza nyama za m’madzi nee isatawiriswa miyezi yonsene. M’madziko anewa, anyakusodza nyama za m’madzi panango asaphata basa yawo mwaphinga angaona kuti miyezi idapaswa iwo iri dhuzi na kumala. Ninga amwazi mphangwa, ife tisacita basa ineyi mwaphinga mu ndzidzi unaona ife kuti kumala kwa dziko ino kuli cifupi. Ndzidzi udasala toera kumwaza mphangwa zakupulumusa umaso ndi wakucepa kakamwe. Natenepa lekani kudembuka, pontho lekani kudikhira kuti pinthu pyonsene pikhale mwadidi mu umaso wanu toera kucita basa ineyi yakufunika kakamwe.—Koel. 11:4.

²⁰ Khalani akutsandzaya, pfundzani pizinji thangwi ya Bhibhlya, pontho pitirizani kukhala acipapo na akudzitonga. Kusiyapo pyenepi, mwazani mphangwa zadidi pabodzi na abale na alongo akupiringana mamiliyau masere, natenepa Yahova anadzakuphedzani toera kukhala akutsandzaya. (Neh. 8:10) Pitirizani kucita basa ineyi mpaka pa ndzidzi unafuna kuifunga Yahova. Nsolo unatowera tinadzadinga njira zitatu zakuti zinatiphedza toera kupitiriza kumwaza mphangwa zadidi za Umambo.