1, 2. Ndi mbvundzo upi wakuti panango tinaucita tingathimbana na utenda, mphapo ndi pitsandzo pipi pya m’Bhibhlya pyakuti tinakwanisa kupinyerezera?

PIKHATHIMBANA imwe na utenda, panango mwabvundzika: ‘Ndina wanga ine?’ Panango mwadzudzumika thangwi ya utenda unathimbana na acibale anu peno xamwali wanu khala anawanga peno nkhabe. Mphyacibaliro munthu onsene kukhala na mabvero anewa angathimbana na utenda. Mu ntsiku za aprofeta Elizeu na Eliya, amambo awiri akhalambo na mabvero mabodziene. Mambo Okoziya, mwana wa Akabu na Yezabele, aduwala kakamwe, natenepa abvundza: “Ndinapulumuka peno nkhabe?” Mukupita kwa ndzidzi, Mambo Bene-Hadade wa ku Sirya akhaduwala kakamwe, natenepa iye abvundza: “Ndinawanga peno nkhabe?”​—2 Am. 1:2; 8:7, 8.

² Mwandimomwene, ife na ale anatsalakana ife tisadikhira tsogolo yadidi. Ngakhale tenepo, azinji asadzudzumika kuti Mulungu anadzacitanji toera kutiphedza. Mu ntsiku za amambo adalongwa padzulu, Yahova midzidzi inango aphatisira aprofeta ace toera kucita pirengo mu kuwangisa mautenda na kulamusa anyakufa. (1 Am. 17:17-24; 2 Am. 4:17-20, 32-35) Kodi tisafunika kudikhira kuti Mulungu acitembo pibodzi pyene lero?

3-5. Ndi mphambvu zipi ziri na Mulungu na Yezu, mphapo ndi mibvundzo ipi inacitwa na anango?

 ³ Nee tisapenula kuti Mulungu ali na mphambvu zakutiwangisa tingaduwala. Bhibhlya isapasa cinyindiro ceneci. Midzidzi inango, iye atcunyusa anthu anango na utenda ninga Farao mu ntsiku za Abhrahamu, na mwanankazi wa Mose, Miriamu. (Gen. 12:17; Num. 12:9, 10; 2 Sam. 24:15) Mulungu acenjeza Aisraele kuti mbadankhonda kukhulupirika, iye mbadaatcinyusa na ‘mautenda peno miliri.’ (Deut. 28:58-61) Munjira inango, Yahova mbadamalisa mautenda peno kuatsidzikiza m’mautenda anewa. (Eks. 23:25; Deut. 7:15) Pontho mbadakwanisa kuwangisa anthu. Mu ndzidzi ukathabuka Yobe na utenda iye aphemba kufa, mbwenye Mulungu amuwangisa!​—Yob. 2:7; 3:11-13; 42:10, 16.

⁴ Inde, Mulungu na Yezu ali na mphambvu za kutsidzikiza na kuwangisa munthu anathimbana na utenda. Tisapfundza kuti Yezu awangisa anyamatanya, anthu akhathabuka na utenda wa njirinjiri, maboliboli na anyakulamala. (Lerini Mateo 4:23, 24; Jwau 9:1-7) Mphyakuwangisa kudziwa kuti pirengo pikhacita Yezu pikhapangiza pinafuna kudzacita iye ntsogolo mu dziko ipswa. Mu ndzidzi unoyu, ‘nee m’bodzi anadzalonga kuti: ‘Ndikudwala.’’​—Iza. 33:24.

⁵ Mphapo tisafunika kudikhira kuti Mulungu peno Yezu atiwangise mwacirengo? Tisafunika kunyerezeranji mu ndzidzi unasankhula ife njira ya ukondzi?

6. Kodi Bhibhlya isalonganji thangwi ya pirengo pikhacita Akristu mu pyaka dzana yakutoma?

⁶ Bhibhlya isalonga kuti mu pyaka dzana yakutoma, Yahova apasa atumiki ace anango akudzodzwa mphambvu yakucita pirengo. (Mach. 3:2-7; 9:36-42) Mwacitsandzo, iwo akhakwanisa kuwangisa anthu na kulonga pilongero pyakusiyana-siyana. (1 Akor. 12:4-11) Mbwenye miyoni ineyi na inango ninga yakulonga pilongero pyakusiyana-siyana na yakulonga maprofesiya mwakukhonda dembuka mbidamala. (1 Akor. 13:8) Natenepa, lero miyoni ineyi nkhabepo. Na thangwi ineyi nee tisadikhira kuti Mulungu anacita pirengo toera kuwangisa ife na anyakufunika athu.

7. Ndi ciwangiso cipi cinagumana ife pa lemba ya Masalmo 41:3?

⁷ Mbwenye tingaduwala tinakwanisa kunyindira cibalangazo, udziwisi na ciphedzo ca Yahova, ninga mudaphedzera iye atumiki ace akale. Mambo Dhavidhi alonga: ‘Anyakutsandzaya ndi ale anatsalakana munthu wakutcerenga; Yahova anadzaapulumusa mu ntsiku za nyatwa. Yahova anadzaakoya mbatsidzikiza umaso wawo.’ (Sal. 41:1, 2) Mbwenye Dhavidhi nee akhafuna kulonga kuti munthu unoyu akhacita pyadidi mbadatsidzikizwa mwacirengo mbakhala maso kwenda na kwenda. Mphapo Yahova mbadaphedza tani munthu unoyu wadidi? Dhavidhi alonga: ‘Yahova anadzamphedza angaduwala; mbaapasa pontho mphambvu.’ (Sal. 41:3) Inde, munthu akhaphedza nyakupwazika mbadakwanisa kukhala na cinyindiro cakuti Mulungu akhadziwa kukhulupirika kwace. Nakuti Mulungu acita manungo a munthu na mphambvu yakuwanga okhene, pyenepi pinakwanisa kuphedza munthu unoyu toera kuwanga mu utenda wace.

8. Mwakubverana na lemba ya Masalmo 41:4, Dhavidhi aphembanji kwa Yahova?

⁸ Pa Masalmo 41:4, Dhavidhi alonga pya makhaliro ace: ‘Yahova, ndadawa kuli imwe; mundibvere ntsisi mbamundiwangisa.’ Panango iye alonga pyenepi, mu ndzidzi udansandukira mwanace Absaloni toera kukwata cidzo cace, mu ndzidzi unoyu Dhavidhi akhaduwala kakamwe, pontho iye nee akhali na mphambvu toera kuthimbana na mwanace. Maseze Mulungu akhadalekerera madawo ace, Dhavidhi nee aduwala madawo adacita iye na Bateseba na nyatwa zidaona iye thangwi ya macitiro ace. (2 Sam. 12: 7-14) Ngakhale tenepo, Mambo akhali na cinyindiro cakuti Mulungu mbadamphedza mu utenda wace. Mphapo Dhavidhi akhadikhira kuwangiswa na Yahova mwacirengo?

9. (a) Kodi Yahova acitanji kuna Mambo Ezekiya? (b) Kodi Dhavidhi mbadakwanisa kudikhiranji kwa Yahova?

⁹ Mudapita pyaka pingasi, Mulungu awangisa Mambo Ezekiya, wakuti ‘akhaduwala kakamwe, mpaka dhuzi na kufa.’ Mulungu amphedza mbawanga, mbapitiriza kukhala maso mu pyaka 15. (2 Am. 20:1-6) Mbwenye Dhavidhi nee aphemba Yahova toera kumuwangisa mwacirengo. M’mbuto mwace, iye aphemba Mulungu toera kumphedza ninga pidaphedza iye ‘munthu ule akhapangiza citsalakano kuna munthu wakutcerenga.’ Dhavidhi akhali na uxamwali wakuwanga na Yahova, iye mbadakwanisa kuphemba Yahova toera kum’balangaza na kuntsalakana mu ndzidzi ukhaduwala iye. Iye aphembambo toera manungo ace awangiswe kuti akhale mwadidi. Munjira ibodzi ene, ife tinakwanisambo kuphemba Yahova toera atiphedze.

10. Ninji pidacitikira Trofimo na Epafrodito, mphapo pyenepi pisatipfundzisanji?

¹⁰ Nee Dhavidhi peno Trofimo wakuti akhatumikira pabodzi na mpostolo Paulu awangiswa mwacirengo toera kukhala na umaso mu ntsiku zizinji. Tisadziwa kuti pa ndzidzi unango Paulu akhadapaswa mphambvu toera kuwangisa anyakuduwala. (Lerini Machitiro 14:8-10.) Iye awangisa ‘baba wa Publyo wakuti akhali pa bonde, thangwi ya utenda wakuphandza ciropa.’ Paulu ‘acita phembero, mbansandzikira manja, mbamuwangisa.’ (Mach. 28:8) Mbwenye Paulu nee acita pyenepi kuna Trofimo m’bodzi wa axamwali ace akhafamba na iye m’maulendo ace aumisionaryo. (Mach. 20:3-5, 22; 21:29) Pidaduwala Trofimo mbacimwana kufamba, Paulu nee amuwangisa; mbwenye ansiya ku Mileto toera awange. (2 Tim. 4:20) Munjira ibodzi ene, pikhaduwala Epafrodito ‘mpaka dhuzi na kufa,’ nkhabepo cipangizo cakuti Paulu awangisa xamwali wace wakufunika mwacirengo.​—Afil. 2:25-27, 30.

11, 12. Thangwi yanji Luka akhali munthu wakuthema toera kuphedza Paulu? Tisadziwa tani kuti iye akhali na maluso anewa?

¹¹ ‘Luka dotoro wa pantima’ adalemba bukhu ya Macitiro akhacitambo ulendo na Paulu. (Akol. 4:14; Mach. 16:10-12; 20:5, 6) Natenepa, mphyakulinganira kukhulupira kuti Luka apereka pitsogolero na ciphedzo ca ukondzi kuna Paulu na andzace akhacita ulendo waumisionaryo na iye. Thangwi yanji Luka mbadacita pyenepi? Thangwi Paulu aduwalambo mu ndzidzi ukhacita iye ulendo. (Agal. 4:13) Luka mbadampasa ukondzi mwakubverana na pidalonga Yezu kuti: ‘Anafuna nyakukondza si anthu aungumi tayu, mbwenye ndi anyakuduwala.’​—Luka 5:31.

¹² Bhibhlya nee isalonga pya ndzidzi na mbuto idapfundza Luka cidziwiso ca ukondzi. Mbwenye basi ene isalonga kuti Paulu apereka m’mwanyikiro kwa Akristu a ku Kolose, mbalonga pya basa ya Luka ninga dotoro. Panango Luka apfundza pya ukondzi kuxikola ya ku Laodiseya. Mbwenye Luka nee akhacita basa yakupereka maonero akutsalakana ungumi, basi ene iye akhali dotoro. Pyenepi pisapangizika m’mafala adalemba iye m’bukhu ya Luka na ya Macitiro. Pidalonga Luka thangwi ya kuwangisa anthu kudacita Yezu, pisapangiza kuti akhadziwa pya ukondzi.

13. Kodi tisafunika kukumbukanji mbatidzati kupereka peno kutawira maonero a ukondzi?

¹³ Lero, abale nkhabe kwanisa kuphatisira ‘miyoni yakuwangisa’ toera kutiphedza. Mbwenye Akristu anango akuti asafuna kutiphedza, anakwanisa kutipasa maonero a ukondzi. Mwandimomwene maonero anango ndi adidi. Mwacitsandzo, Paulu apereka maonero adidi kuna Timoti pikhali iye na utenda wa  m’mimba, wakuti panango watoma thangwi ya kumwa madzi apacisa akuti akhali adidi. * (Lerini 1 Timoti 5:23.) Mbwenye pyenepi ndi pyakusiyana kakamwe na kuyesera kutundusa Nkristu ndzathu toera kuphatisira mitombwe ya ntsanga, ya kunyumba ya ungumi peno kucita dieta yakuti panango nee inaphata basa peno kuphekesa. Midzidzi inango, anango anakwanisa kutundusa andzawo mukupereka maonero ninga awa: ‘Wacibale wanga akhalimbo na utenda ninga unoyu, iye aphatisira ntombwe wa . . . mbawanga.’ Mwakukhonda tsalakana khala maonero asaoneka ninga adidi kakamwe, tisafunika kukumbuka kuti mitombwe peno ukondzi wakuti usaphatisirwa kakamwe, panango unakwanisa kuphekesa.​—Lerini Misangani 27:12.

14, 15. (a) Kodi anthu anango asaphatisira mautenda a andzawo toera kucitanji? (b) Tisapfundzanji pa lemba ya Misangani 14:15?

¹⁴ Ife tisafuna kukhala na ungumi wadidi toera kutsandzaya na umaso mbaticita pizinji m’basa ya Mulungu. Mbwenye ndife akusowa ungwiro, natenepa, nee tinakwanisa kucalira mautenda onsene. Tingaduwala, tisasaka ukondzi wakuthema, pontho munthu onsene ali na ufulu wakusankhula ntundu wa ukondzi unafuna iye. Mwakutsukwalisa, mu dziko ino ya umbirimi, anthu anango asaphatisira utenda wa andzawo toera kuwina kobiri. Anango asagulisa mitombwe yakuti iri na maphaso anaoneka ninga akutawirika mbwenye ndi authambi peno akupenulisa. Misoka inango isakulumiza anthu toera kuphatisira mitombwe ya kudhula kakamwe, basi ene toera kuwina kobiri izinji. Kwa munthu wakuduwala wakuti akusaka ukondzi mwakusowa cidikhiro, maonero anewa anakwanisa kuntundusa. Mbwenye tisafunika kukumbuka cenjezo ya Bhibhlya: ‘Munthu wandzeru pang’ono asatawira pyonsene pinapangwa iye, mbwenye nyandzeru asalengesa mathanyo ace.’​—Mis. 14:15.

¹⁵ ‘Munthu wandzeru’ anadzacita mpholemphole na ‘mafala’ peno maonero anaperekwa na munthu wakuti nee ndi wakunyindirika. ‘Munthu wandzeru’ anabvundzika: ‘Iye alonga kuti mavitamina, mitombwe ya ntsanga peno dieta ineyi yaphedza kale munthu, kodi pana umboni wakunyindirika unapangiza kuti pyenepi pyacitikadi? Anthu ndi akusiyana. Maseze waphedzadi anthu anango, ndisadziwa tani kuti unandiphedzambo? Si pyadidi tayu kufufudza mwakukwana peno kubvundzisa munthu wakuti asadziwa mwadidi pya mitombwe?’​—Deut. 17:6.

16. Tisafunika kudinganji mbatidzati kucita pisankhulo pyakutsalakana ungumi wathu?

¹⁶ Mafala a Mulungu asaticenjeza kuti ‘tikhale anthu andzeru mu dziko ino yakuipa.’ (Tito 2:12) ‘Tingakhala andzeru,’ peno akunyerezera mwadidi pinadzatiphedza tingapangwa njira zinango zakutsalakana ungumi zakukhonda thema. Kodi nyakukondza peno munthu adatipanga njira zenezi afokotoza mwadidi kuti zisaphatisirwa tani? Kodi madotoro asatawira kuti njira zenezi zinakwanisa kuwangisa anthu? (Mis. 22:29) Kodi mafokotozero awo ndi akutundusa basi? Panango munthu anakwanisa kutipanga kuti njira ineyi yadzindikira peno isaphatisirwa ku mbuto inango yakutali, mbwenye madotoro adzati kuidzindikira. Kodi pana umboni unapangiza kuti ukondzi unoyu ndi wandimomwene? Mitundu inango ya ukondzi peno mitombwe ‘isaphatisirwa mwacibisobiso’ peno isaphataniza kukhulupira pya mizimu. Natenepa, tisafunika kucita mpholemphole kakamwe na njira zenezi, thangwi Mulungu asaticenjeza toera tikhonde “kukhulupira mizimu”  peno pyakuombedza.​—Iza. 1:13; Deut. 18:10-12.

17. Kodi ndi cifuno cipi cakulinganira cisafunika ife kukhala naco?

¹⁷ Mathubo akutonga a pyaka dzana yakutoma atumiza tsamba yakufunika m’mipingo. Pakumala kulemba pinthu pyakuti Akristu asafunika kupicalira, tsamba ineyi yamalisira na mafala awa: ‘Mungacalira pinthu pyenepi, munadzapembera. Khalani na ungumi wadidi!’ (Mach. 15:29) Maseze kuti mafala akumalisa aphatisirwa ninga njira inango toera kupangana, mbwenye asatikumbusa kuti mphyakufunika kuna ife kukhala na ungumi wadidi toera tikwanise kutumikira Yahova.

18, 19. Ninji pinadikhira ife mu dziko ipswa?

¹⁸ Nakuti tikukhala mu dziko yakuipa, pontho ndife anthu akusowa ungwiro, tinapitiriza kuthimbana na mautenda. Natenepa, nee tisafunika kudikhira kuwangiswa mwacirengo. Mbwenye lemba ya Apokalipse 22:1, 2 isalonga kuti kutsogolo tinadzawangiswa kwenda na kwenda. Mpostolo Jwau alonga pya ‘madzi a umaso’ na ‘miti ya umaso’ pyakuti pinadzawangisa anthu onsene. Pyenepi nee pisabveka kuti ndi mitombwe ya ntsanga yakuti tinakwanisa kuiphatisira cincino peno mu dziko ipswa toera kutiwangisa. Mbuto mwace, pisabveka masasanyiro a Yahova akutipasa umaso wakukhonda mala kubulukira mwa Yezu.​—Iza. 35:5, 6.

¹⁹ Munadikhira ife tsogolo ineyi yakutsandzayisa, tisadziwa kuti Yahova asatsalakana m’bodzi na m’bodzi wa ife, ngakhale mu ndzidzi unaduwala ife. Tinakwanisa kukhala na cinyindiro ninga cidakhala na Dhavidhi cakuti Mulungu wathu anadzatiphedza tingathimbana na mautenda akusiyana-siyana. Ninga Dhavidhi tinakwanisa kulonga: “Musanditsidzikiza thangwi ya umumphu wanga; munadzandikoya pamaso panu kwenda na kwenda.”​—Sal. 41:12, Tradução do Novo Mundo.