Thangwi yanji musafunika kupanga anyakubalanu pinthu pinanyerezera imwe? (Mis. 23:26) Thangwi Yahova apasa basa anyakubalanu toera kukutsalakanani na kukutsogolerani. (Masal. 127:3, 4) Pinakhala pyakunentsa kuna iwo toera kukuphedzani mungakhonda kuapanga pinthu pinathimbana na imwe. Kusiyapo pyenepi, imwe munaluza mwai wakupfundza pinthu pizinji na iwo. Mphapo pisabveka kuti ndi pyakuipa kukhonda longa pinthu pinango kuna anyakubalanu? Nkhabe, mbwenye citani mphole-mphole toera mukhonde kunyengeza anyakubalanu.—Mis. 3:32.

Munakwanisa tani kucedza na anyakubalanu? Sankhulani ndzidzi wakuti ndi wakuthema kuna imwe na kuna iwo. Khala pyenepi ndi pyakunentsa, imwe munakwanisa kulembera tsamba pai wanu peno mai wanu toera kuapanga mabvero anu. Mphapo ndiye tani khala iwo asafuna kuti mucedze pinthu pyakuti imwe nee musafuna kupilonga? Kumbukani kuti iwo asafuna kakamwe kukuphedzani. Onani anyakubalanu ninga axamwali anu, tayu anyamalwa anu. Kuwangisira kunacita imwe toera kucedza mwakusudzuka na anyakubalanu kunakuphedzani mu umaso wanu onsene!—Mis. 4:10-12.

ONANI VIDHYU YA NSOLO WAKUTI VIDA DE ADOLESCENTE—COMO É QUE POSSO FALAR COM OS MEUS PAIS? , BULUKA PENEPO TAWIRANI MIBVUNDZO IYI:

• Ndi pinthu pipi pidadzindikira Esther na Partik thangwi ya iwo ene?

• Munapfundzanji na citsandzo ca Yezu?

• Kodi anyakubalanu asapangiza tani kuti asakutsalakanani?

• Ndi midida ipi ya Bhibhlya yakuti inakwanisa kukuphedzani toera kucedza mwadidi na anyakubalanu?