Inde, m’Bhibhlya muli na umboni unapangiza kuti Mulungu alipodi. Bhibhlya isatipanga toera tiphatisire ‘luso yathu yakunyerezera’ na “yakubvesesa” toera kukhulupira Mulungu, tayu kubva basi pinalonga mauphemberi. (Aroma 12:1; 1 Juwau 5:20) Tendeni tione pinthu pingasi pinatowera pyakuti pinatiphedza mwakubverana na pinalonga Bhibhlya:

•   Munjira idacitwa pinthu n’dziko na umaso pisapangiza kuti alipo Adapicita. Bhibhlya isalonga: “Mwandimomwene, nyumba yonsene isamangwa na munthu, mbwenye adacita pinthu pyonsene ndi Mulungu.” (Ahebheri 3:4) Ngakhale kuti mafala anagumanika pa vesi ineyi ndi akukhonda nentsa kubvesesa, anthu azinji adapfundza kakamwe asaona kuti ndi amphambvu kakamwe. a

•   Ife anthu tacitwa na cifuno cakufuna kubvesesa cifuniro ca umaso. Maseze tikhale na pinthu pyonsene pinafuna ife, mbwenye cifuno ceneci cisapitiriza. M’Bhibhlya ico cisalongwa kuti ndi ‘cifuno cakudziwa Mulungu,’ cakuti cisaphataniza kufuna kundziwa na kumulambira. (Mateu 5:3; Apokalipse 4:11) Cifuno ceneci cisapangiza kuti Mulungu alipodi, pontho kuti iye ndi Nciti waufuni wakuti asafuna kuti tikhale axamwali ace.—Mateu 4:4.

•   M’Bhibhlya muli na maprofesiya akuti alembwa kale kakamwe, mbwenye onsene akwanirisika ninga mudalemberwa iwo. Pyenepi pisapangiza kuti maprofesiya anewa abuluka kuna munthu wamphambvu kakamwe kupiringana onsene.—2 Pedhru 1:21.

•   Anyakulemba Bhibhlya akhadziwa pya siyensiya, pinthu pyakuti anthu a mu ndzidzi unoyu nee akhapibvesesa. Mwacitsandzo, kale anthu akhakhulupira kuti dziko yapantsi ikhatsidzikizwa na cinyama, ninga ndzou, nkhumba ya ntsanga peno ng’ombe. Mwakusiyana na pyenepi, Bhibhlya isalonga kuti Mulungu “aikha dziko yapantsi lenga-lenga pa mbuto yakusowa cinthu.” (Yobe 26:7) Munjira ibodzi ene, Bhibhlya isalongambo kuti dziko yapantsi ndi “yakubulungika,” peno “yakuzungulira.” (Izaiya 40:22, cidzindikiro capantsi) Anthu azinji asalonga kuti anyakulemba Bhibhlya akhadziwa kakamwe pinthu pya siyensiya thangwi mphangwa zikhalemba iwo zikhabuluka kuna Mulungu.

•   Bhibhlya isatawira mibvundzo mizinji. Anthu azinji angakhonda kugumana mitawiro yadidi thangwi ya mibvundzo ineyi, asasiya kukhulupira Mulungu. Mwacitsandzo: Khala Mulungu ndi waufuni na wamphambvu zonsene, thangwi yanji pa dziko yapantsi pasacitika pinthu pizinji pyakuipa, pontho anthu asathabuka? Thangwi yanji kazinji kene mauphemberi asacitisa anthu kucita pinthu pyakuipa tayu pyadidi?—Tito 1:16.