Yahova ndi dzina ya Mulungu wandimomwene analongwa m’Bhibhlya, ndiye Nciti wa pinthu pyonsene. (Apokalipse 4:11) Mprofeta Abhrahamu na Mose akhalambira Mulungu unoyu wandimomwene ninga pidacita Yezu. (Genesi 24:27; Eksodo 15:1, 2; Juwau 20:17) Yahova nee ndi Mulungu basi ene wa nsoka wa anthu akucepa, mbwenye ndi Mulungu wa pa “dziko yonsene yapantsi.”—Masalmo 47:2.

 Bhibhlya isalonga kuti Yahova ndi dzina ya Mulungu, dzina ineyi ndi yace basi. (Eksodo 3:15; Masalmo 83:18) Dzina ineyi yakubulukira mu fala Yacihebheri yakuti isabveka “kukhala” anyakudziwisa Bhibhlya azinji asalonga kuti dzina yakuti Yahova isabveka “Iye Asacitisa Pinthu Kukhalapo.” Mabvekero a dzina ineyi ndi akuthema, thangwi Ndiye adacita pinthu pyonsene, pontho ndzidzi onsene asacita pinafuna iye. (Izaiya 55:10, 11) Bhibhlya isatiphedzambo toera kudziwa makhaliro a Yahova makamaka n’khaliro wace ukulu kakamwe wakuti ndi ufuni.—Eksodo 34:5-7; Luka 6:35; 1 Juwau 4:8.

 Ncizungu dzina yakuti Yahova yabulukira ku maletra manai a Cihebheri anaimirira dzina ya Mulungu יהוה (YHWH), maletra anewa manai asacemerwa Tetragrama. Nkhabe munthu anadziwa kuti mwandimomwene dzina ineyi ikhacemerwa tani Mucihebheri ca mu ndzidzi wakale. Dzina yakuti “Yahova” isaphatisirwa kutomera kale kakamwe ncizungu, pontho isagumanika m’Bhibhlya idatoma kuthumburuzwa ncizungu. a

Thangwi yanji nee tisadziwa kuti dzina ya Mulungu ikhacemerwa tani Mucihebheri cakale?

 Pakulemba Cihebheri cakale anthu basi ene akhaphatisira makonsoanti tayu mavogali. Pakulonga anthu onsene akuti akhalonga Cihebheri akhadziwa mwakukhonda nentsa kuti anaphatisira mavogali api. Pidamala kuthumburuzwa Malemba Acihebheri peno (“Unthaka Wakale”) Ayuda anango adzacinja pikhakhulupira iwo, mbatoma kukhulupira kuti ndi pyakuipa kulonga dzina ya Mulungu. Angaleri khundu yakuti iri na dzina ya Mulungu, iwo akhaicinja mbaleri “Mbuya” peno “Mulungu.” Mukupita kwa ndzidzi manyerezero anewa adzamwazika, pontho anthu nee akhadziwabve kuti kale dzina ineyi ikhacemerwa tani. b

 Anthu anango akhanyerezera kuti dzina ya Mulungu ikhacemerwa “Yawe,” mbwenye anango asaicemera munjira inango. Mpukutu udagumanwa pa Bara Yakufa wa bukhu ya Levitiko udalembwa Mucigerego dzina ya Mulungu yathumburuzwa Iao. Kusiyapo njira zenezi, alembi Acigerego a mu ndzidzi wakale asalongambo kuti dzina ya Mulungu ndi Iae, I·a·beʹ, na I·a·ou·eʹ, nee ndi pyakukwanisika kudziwa kuti mwandimomwene dzina ya Mulungu ikhacemerwa tani Mucihebheri cakale. c

Uthambi unalonga anthu anango thangwi ya dzina ya Mulungu inagumanika m’Bhibhlya

 Uthambi: Dzina ya Mulungu nee isafunika kuphatisirwa m’Bhibhlya thangwi nee tisadziwa kuti ikhacemerwa tani Mucihebheri ca mu ndzidzi wakale.

 Undimomwene: Anthu asalonga pyenepi thangwi yakunyerezera kuti Mulungu asafuna kuti anthu onsene acemere dzina yace munjira ibodzi ene, mwakukhonda tsalakana cilongero cinalonga iwo. Mbwenye Bhibhlya isapangiza kuti atumiki a Mulungu akale akuti akhalonga pilongero pyakusiyana akhacemera madzina mwakubverana na pilongero pyawo.

 Onani dzina yakuti Yoswa wakuti akhali ntsogoleri wa Izraeli mu ndzidzi wakale. Akristu a mu ndzidzi wakale akuti akhalonga Cihebheri pisaoneka kuti dzina ineyi akhaicemera, Yehoh·shuʹaʽ, mbwenye ale akhalonga Cigerego, dzina ineyi akhaicemera I·e·sousʹ. Dzina Yacihebheri yakuti Yoswa yathumburuzwa Mucigerego. Pyenepi pisapangiza pakweca kuti Akristu akhacemera madzina mwakubverana na njira ikhalonga anthu azinji mu cilongero cawo.—Mabasa 7:45; Ahebheri 4:8.

 Pyenepi pisaphatambo basa pakuthumburuza dzina ya Mulungu. Cinthu cakufunika kakamwe nee ndi kulonga dzina ineyi ninga mukhalongerwa iyo mu ndzidzi wakale, mbwenye ndi kuiikha m’mbuto zinafunika iyo kukhala m’Bhibhlya.