Osman na wali ti lo, nga na molenge ti ala ti wali, ayeke fa tënë na présentoir nduru na terê ti mbeni cimetière na kodro ti Chili. Mo ye ti bâ, gbâ ti azo so ague ti lu kuâ asi, ala na azo ti pikango mozoko so ayeke pika mozoko ti ala ni ngangu. Ambeni zo ni abâ atene Osman la ayeke Pasteur ti Eglize ti ala, tongaso ala ga nduru na lo, ala gbu lo na kate, na ala tene: “Merci so mo si na l’heure Pasteur, e yeke ku mo kungo!”

 Osman atara ti tene na ala so lo la lo yeke Pasteur ti Eglize ti ala ape, me azo ni amä lo ape ndali ti so bruit ayeke mingi. Ngoi kete na peko ti so azo ni ague na place ti cimetière ni, ambeni akiri aga na ala tene na lo: “Pasteur, e yeke ku mo na cimetière.”

 Na ngoi so bruit ti azo ni adiminué, Osman afa terê ti lo na ala nga lo fa ngbanga ti nyen la lo yeke ge. Na peko ti so azo ni atene so bê ti ala ason ndali ti so Pasteur ti ala ni aga ape, ala ngbâ ahunda na Osman atene: “Eskê mo peut ti ga ti fa mbeni kete tënë ti Nzapa na lê ti azo kue?” Osman angbâ ayeda.

 Na temps so ala tambela ti gue na dû ti kuâ ni, Osman ahunda ambeni tënë na ala na ndö ti wakuâ ni, nga lo pensé na ambeni versê ti Bible so lo peut ti fa ande na ala kâ. Na ngoi so ala si na dû ti kuâ ni, lo fa terê ti lo na azo ni nga lo tene na ala so lo yeke mbeni Témoin ti Jéhovah, na lo yeke mû mbage na kua ti fango nzoni tënë na azo.

 Na pekoni, lo diko Apocalypse 21:3, 4 nga na Jean 5:28, 29, na lo fa na ala so Nzapa aleke lâ oko ape ti tene azo akui. Lo tene na ala so Nzapa aga nduru awe ti zingo akuâ, na ala yeke vivre ande na ndö ti sese teti lakue lakue. Na ngoi so Osman ahunzi tënë ti lo, azo ni aga agbu tâ lo na kate, nga ala kiri singila na lo ndali ti “nzoni tënë so alondo na Jéhovah.” Na pekoni, lo kiri na terê ti présentoir ti lo.

 Na peko ti so azo ni ahunzi ti lu kuâ ni awe, ambeni aga na terê ti présentoir ni na ala hunda atënë na Osman nga na sewa ti lo na ndö ti Bible. Ala na azo ni asara lisoro aninga, nga na ngoi so azo ni aga ti mû lege ti hon, ala mû presque ambeti kue so ayeke na yâ ti présentoir ni.