Desicar, so ayeke mbeni mama so gï lo oko la ayeke bata molenge ti lo aye lani ti sara kua ti Jéhovah mingi na lege so lo mû kua ti pionnier permanent. Lo vivre na Vénézuéla, mbeni kodro so kota kpale ti nginza ayeke dä. Me, lo leke lani na bê ti lo ti mû kua ti pionnier, na lo sara ni. Anzere lani na lo ti sara ni, me na pekoni pandémie ti COVID-19 akomanse.

 Na temps so pandémie ti COVID-19 akomanse, a yeke lani ngangu na Desicar ti fa tënë na lege ti afini kode ti fango tënë. A yeke ngangu na lo ti sara alettre. Nga, lo peut ape ti sara kua na vidéoconférence ti fa tënë ndali ti so Internet ayeke cher mingi na ndo so lo yeke dä. Lo tene: “Mbi découragé lani. Mbi peut ti fa tënë tongana ti so mbi yeke sara ka ape. Mbi pensé so mbi peut ti sara kua ti pionnier permanent ni nzoni ape.”

 Na janvier 2021, filiale ti aTémoin ti Jéhovah ti Vénézuéla ayeda ti tene a sara mbeni campagne spéciale ti fango tënë. A leke lani ti tene a zia adiskur so atënë ni aluti na ndö ti Bible na yâ ti astation ti radio 60 nga na yâ ti achaîne ti télé 7 na yâ ti aweek-end oku kue ti nze ni. A encouragé lani aTémoin ti Jéhovah ti tene na azo so ayeda na tënë ni ti bâ ni wala ti mä ni. Filiale ni afa na aita ahundango tënë nga na aversê ti yâ ti adiskur oko oko, so ala peut ti sara kua na ni na yâ ti alettre ti ala nga na yâ ti alisoro so ala sara na lege ti téléphone. Na ndö ni, filiale ni a-encouragé aita ti fa tënë na lege ti amessage, a yeke lani mbeni fini kode ti fango tënë ndali ti mingi ti aita so ayeke na Vénézuéla.

 Anzere lani na Desicar ti mû mbage na yâ ti campagne ni. Atâa so lâ oko lo fa tënë na lege ti amessage ape, lo décidé ti tara ni. Me, lo bezoin ti tene a aidé lo. Desicar atene: “Mbi hinga ye nzoni ape na ndö ti technologie.” Lo hunda na molenge ti lo ti wali ti fa ni na lo, kete na peko ti so lo fa na lo ye na ndö ni, Desicar ayeke prêt ti fa tënë na temps ti campagne ni.

 Desicar atokua amessage na azo so lo hinga ala ti tene ala mä adiskur so a enregistré ni. Ye so asi na pekoni ahon gbungo li ti lo lani. Mingi ti azo so lo sara tënë ni na ala amä adiskur ni nga ala hunda aquestion. Me, ambeni so apeut ti mä ni ape wala abâ ni ape, ala hunda na Desicar ti fa na ala tënë ti yâ ti adiskur ni. Desicar atene: “Mbi sara kua na anote so mbi mû ti fa peko ti atënë ti adiskur ni na ala. Lâ oko ade mbi sara vizite ahon 5 ape na yâ ti mbeni nze, me na hunzingo ti campagne ni, mbi sara avizite 112.” a

 Desicar a-invité nga ita ti lo ti wali so ayeke Témoin ape, so alango nduru na lo ti tene lo mä adiskur ni na radio. Lo tene: “A-étonné mbi so ita ti mbi ni ayeda. Chaque dimanche na 8h, mbi yeke gue lani na yanga-da ti lo nga mbi na lo e yeke mä adiskur ni. Lo hunda gbâ ti question na mbi, na temps ti bungbi ni nga na pekoni.” Ita ti Desicar ti wali ni asuivre nga dango bê na kuâ ti Jésus na lege ti vidéoconférence, nga lo yeda ti tene Desicar a-utilisé Internet ti lo ti fa na tënë.

 Desicar atene: “Mbi kiri merci mingi na Jéhovah. Mbi kiri merci nga na a-ancien ti congrégation ti mbi so a-encouragé mbi lani. Ala aidé mbi ti kiri ti wara ngia na yâ ti kua ti fango tënë.” (Jérémie 15:16). Desicar angbâ ti sara kua ti pionnier nga lo yeke tokua message na azo so ayeda lani na tënë ni.