Jésus asö azo so ayeke be-ta-zo na Nzapa na ngoi so lo mû fini ti lo tongana ye so a futa ti zi azo (Matthieu 20:28). Ni la Bible airi Jésus “Sauveur ti dunia.” (1 Jean 4:14). A tene nga atene: Salut ayeke na mbeni zo nde pëpe, ndali ti so mbeni iri nde ayeke dä pëpe na gbe ti yayu so a mû ni na azo, so gï na lege ni si e lingbi ti wara salut.”​—Kusala 4:12.

 Jésus ‘abâ pasi juska ti kui ndali ti zo oko oko kue’ so ayeke na mabe na lo (aHébreu 2:9; Jean 3:16). Na pekoni “Nzapa azingo lo na kuâ,” na lo kiri na yayu na terê so ayeke ti yingo (Kusala 3:15). So lo yeke kâ, “ala so ayeke ga nduru na Nzapa na lege ti lo, lo lingbi nga ti sö ala biani biani, ngbanga ti so lo yeke lakue na fini ti hunda ye ndali ti ala.”​—aHébreu 7:25.

Ngbanga ti nyen la e bezoin ti tene Jésus ahunda ye ndali ti e?

 E kue e yeke awasiokpari (aRomain 3:23). Siokpari akanga lege na e ti ga nduru na Nzapa, na a gue na e na kuâ (aRomain 6:23). Me Jésus ayeke tongana “zo ti gbungo koko” ti azo so afa so ala yeke na mabe na sandaga ti kuâ ti lo (1 Jean 2:1, bâ kete tënë na gbe ni). Lo voro yanga na Nzapa ti tene Lo mä sambela ti ala nga ti pardonné asiokpari ti ala grâce na sandaga ti kuâ ti lo (Matthieu 1:​21; aRomain 8:​34). Nzapa ayeke sara aye so Jésus ahunda so ndali ti so aye ni ague oko na ye so bê ti Lo aye. Nzapa atokua lani Jésus na ndö ti sese ti “sö dunia ni na lege ti lo.”​—Jean 3:17.

Eskê ti mä na bê na Jésus ayeke gï oko ye so a hunda ti tene a sö e?

 Ên-ën. Atâa so ti tene a sö e a lingbi e mä na bê Jésus, ambeni ye ayeke encore dä so a lingbi e sara ni (Kusala 16:30, 31). Bible atene: “Legeoko tongana terê so yingo ayeke dä pëpe akui awe, mabe so ayeke na akusala pëpe akui awe.” (Jacques 2:26). Ti tene a sö e:

•   A lingbi e manda ye na ndö ti Jésus nga na Babâ ti lo, Jéhovah.​—Jean 17:3.

•   A lingbi e kpengba mabe ti e na ala.​—Jean 12:44; 14:1.

•   A lingbi e fa so e yeke na mabe na lege so e yeke sara ye alingbi na acommandement so ala mû na e (Luc 6:46; 1 Jean 2:17). Jésus atene lani atene so a yeke pëpe zo kue so airi lo “Seigneur” si a yeke sö lo, me a yeke gï azo so “asara ye so bê ti Babâ ti [lo] so ayeke na yayu aye.”​—Matthieu 7:21.

•   A lingbi e ngbâ lakue ti fa so e yeke na mabe atâa na angoi so ayeke ngangu. Jésus atene polele atene: “Zo so agbu ngangu juska na nda ni, a yeke sö lo ande.”​—Matthieu 24:13.