Na yâ ti Bible, a yeke wara pëpe tënë “tukungo ngo,” me aversê mingi na yâ ti Bible afa tongana nyen la Nzapa abâ fini ti zo, même ti mbeni foroto so ade na yâ ti mama ti lo.

 Fini ayeke mbeni cadeau ti Nzapa (Genèse 9:6; Psaume 36:9). Lo bâ fini kue na nene ni mingi, même fini ti mbeni molenge so ade na yâ ti mama ti lo. Tongaso, tongana mbeni zo afâ mbeni molenge so ade na yâ ti mama ti lo na mbana, a ye ti tene so lo fâ zo awe la.

 Na yâ ti Ndia so Nzapa amû lani na amolenge ti Israël, a tene: “Tongana azo ayeke tiri, na ala pusu mbeni mama ti ngo si molenge ti lo asigi kozo na ngoi ti dungo lo, me kuâ asi dä pëpe, a lingbi a hunda na lo so asara ye ni so ti futa mbeni ye alingbi na ye so koli ti wali ni ahunda na lo; lo yeke futa ni na gbele ajuge. Me tongana kuâ asi na pekoni, a lingbi mo mû fini na place ti fini.”​—Exode 21:22, 23. a

•  Fini ti zo ayeke komanse na ngoi wa?

•  Eskê Nzapa ayeke pardonné azo so atuku ngo?

•  Eskê a yeke sioni ti tuku ngo tongana fini ti mama ni wala ti molenge ni ayeke na lê ti kuâ?

 Na lê ti Nzapa, fini ti zo akomanse na ngoi so a mû ngo ti lo. Na yâ ti Mbeti ti lo, Bible, lakue Nzapa abâ molenge so ade na yâ ti mama ti lo tongana mbeni zo. Zia e bâ ambeni tapande so afa so Nzapa ayeke sara kangbi pëpe na popo ti fini ti molenge so ade na yâ ti mama ti lo na ti lo so a dü lo awe.

•   Gbia David atene lani na Nzapa atene: “Lê ti mo abâ mbi même na ngoi so mbi ngbâ gï mênë.” (Psaume 139:16). Nzapa abâ lani David tongana mbeni zo so ayeke na fini, même na temps so lo de na yâ ti mama ti lo.

•   Na ndö ni, kozo même si a dü prophète Jérémie, Nzapa ahinga so lo yeke mû ande na lo mbeni kua ti sara so ayeke nde. Nzapa atene na lo atene: “Kozo si mbi sara mo na yâ ti mama ti mo, mbi hinga mo, kozo si a dü mo, mbi zia mo nde ndali ti mbi. Mbi soro mo ti sara mbeni kua so ayeke nde, kua ti prophète ti amara.”​—Jérémie 1:5.

•   Luc, so ayeke mbeni zo so asû Bible nga mbeni wanganga, asara kua na même tënë na yanga ti Grec na ngoi so lo yeke sara tënë ti mbeni molenge so ade na yâ ti mama ti lo wala na ngoi so lo yeke sara tënë ti mbeni molenge so a dü lo awe.—Luc 1:41; 2:12, 16.

 Nzapa apeut ti pardonné azo so atuku ngo. Tongana laso ala yeda ti duti na oko bango ndo so Nzapa ayeke na ni na ndö ti fini, ala doit ti gï bê ti ala ahon ndö ni ape. “Jéhovah asara nzoni bê na zo nga lo bâ mawa ti zo . . . Tongana ti so ndo so lâ asigi dä ayo mingi na ndo so lâ alinda dä, lo zi akengo ndia ti e, lo zia ni yongoro na e.” b (Psaume 103:8-12). Jéhovah ayeke pardonné azo kue so achangé biani bê ti ala, même ala so atuku ngo.—Psaume 86:5.

 Ti gue oko na ye so Bible afa na ndö ti fini ti mbeni foroto so ade na yâ ti mama ti lo, tongana mbeni zo atuku ngo ndali ti so risque ayeke dä ti tene mama ni wala molenge ni awara sioni, a yeke na lege ni ape.

 Me ka tongana na ngoi ti dungo molenge, mbeni kpale asi so a hunda ti choisir na popo ti fini ti mama ni na ti molenge ni? Na yâ ti mara ti situation tongaso, a yeke na azo so tënë ni abâ ala ti mû desizion ala wani na ndö ti fini wa la ala ye ti tene a sara effort a bata ni.