“Biani, tënë ti Nzapa ayeke na fini na ayeke na ngangu ti sara ye, a za ahon épée so yanga ni ayeke use na a kpo a lï juska a kangbi popo ti âme na yingo, a kangbi nga popo ti ando so abio atingbi terê dä na mafuta ti yâ ti abio ni, na a lingbi ti hinga nda ti abibe ti bê ti zo nga na aye so bê ti zo ni aye ti sara.”—aHébreu 4:12, Mbeti ti Nzapa ti fini dunia.

 “Teti Tënë ti Nzapa ayeke na fini, na a yeke na ngangu ti sara ye, a za ahon épée kue ti yanga use, na a kpo si a kangbi âme na yingo, na a kangbi kutu na mafuta ti bio, na a fa nda ti bibe na a fa nda ti ye so bê aye.”—aHébreu 4:12, La Sainte Bible en Sango.

 Nzapa amû tënë ti lo na azo na lege ti Bible, a yeke na ngangu ti fa avrai ye so ayeke na yâ ti pensé ti e nga na aye so ayeke pusu e ti sara ye. Atënë ni so apeut nga ti changé fini ti azo si ala ga nzoni.

 “Tënë ti Nzapa ayeke na fini.” Tënë so a tene “tënë ti Nzapa ayeke na fini” aye ti sara tënë ti aye so Nzapa amû zendo ni, wala aye so lo leke na bê ti lo ti sara so a fa ni na yâ ti Bible. a Mbeni oko ti akota ye so Nzapa aleke na bê ti lo ti sara, a yeke ti mû lege na azo so amä yanga ti lo ti ngbâ ande na fini lakue lakue na ndö ti sese na yâ ti siriri nga ti duti beoko.—Genèse 1:28; Psaume 37:29; Apocalypse 21:3, 4.

 Na lege wa la tënë ti Nzapa, wala ye so lo leke na bê ti lo ti sara, ayeke na “fini”? Mbeni lege ni ayeke so, tënë ni ayeke sara ngangu na ndö ti bê ti azo so ayeda na ni, na a mû na ala beku nga ala hinga ndani so ala yeke na fini (Deutéronome 30:14; 32:47). Tënë ti zendo ti Nzapa ayeke nga na “fini” ndali ti so Nzapa ayeke sara si azendo ti lo kue aga tâ tënë (Jean 5:17). Nde na azo, tongana Nzapa amû mbeni zendo, lo yeke girisa na ndö ni ape nga lo yeke sara ye alingbi na ni (Nombre 23:19). Tënë ti lo ‘ayeke kiri na lo senge pëpe.’—Ésaïe 55:10, 11.

 “Tënë ti Nzapa . . . ayeke na ngangu ti sara ye.” A peut nga ti kiri na peko ti tënë “ayeke na ngangu” na “ti sara ye kue so [tënë ni] adoit ti sara.” Tongaso, ye kue so Jéhovah b Nzapa atene wala lo mû zendo ni ayeke ga lakue tâ tënë (Psaume 135:6; Ésaïe 46:10). Ti vrai ni, Nzapa apeut ti sara si azendo ti lo aga tâ tënë na mbeni lege so ahon gbungo li ti e.—aÉphésien 3:20. c

 Tënë ti Nzapa ayeke na “ngangu ti sara ye” na lege so ayeke aidé azo so abâ ni na nene ni na ala yeke sara achangement na yâ ti fini ti ala. So ala sara ye alingbi na afango ye ti Nzapa asara si ayeke sara ngangu na ndö ti apensé ti ala, sarango ye ti ala, nga na a-objectif ti ala (aRomain 12:2; aÉphésien 4:24). A yeke tongaso la, “tënë ti Nzapa . . . ayeke sara nga kua” na yâ ti bê ti azo so ayeda na tënë ni.—1 aThessalonicien 2:13.

 “Tënë ti Nzapa . . . a za ahon épée so yanga ni ayeke use.” Ti tene ni na mbeni lege nde, tënë ti Nzapa aza ahon épée ndali ti so ayeke na ngangu ti sara ye na ndö ti zo. Tënë ti Nzapa apeut ti ndu bê ti zo, so ti tene, zo ti e ti yâ ni, ahon fango ye ti azo. A yeke ye so aHébreu 4:12 aye ti tene la.

 “Tënë ti Nzapa . . . a kpo a lï juska a kangbi popo ti âme na yingo, a kangbi nga popo ti ando so abio atingbi terê dä na mafuta ti yâ ti abio ni.” Na yâ ti Bible, tënë “âme” apeut ti sara tënë ti ye so zo ayeke ni, me “yingo” apeut ti sara tënë ti zo ti yâ ni ti e (aGalate 6:18). Ti tene ni na mbeni fason, “tënë ti Nzapa” alï na yâ ti “mafuta ti yâ ti abio”, so ti tene, a yeke lï na yâ ti “asentiment ti e nga na apensé ti e”. A yeke fa na e vrai zo so e yeke ni, so zo oko apeut ti hinga ni ape, afango ye ti Jéhovah apeut ti pusu e ti sara achangement. Ye so ayeke nzere na Jéhovah nga na e kue.

 “Tënë ti Nzapa . . . a lingbi ti hinga nda ti abibe ti bê ti zo nga na aye so bê ti zo ni aye ti sara.” Fason so zo asara ye alingbi na tënë ti Nzapa apeut ti fa ye so bê ti lo aye wala aye so apusu lo ti sara ye, so ayeke sara ngangu na ndö ti asarango ye ti lo. Na tapande, tongana mbeni zo ayeda na tënë ti Nzapa na lo sara achangement so lo bezoin ti sara ni na yâ ti fini ti lo, lo fa biani so lo sara terê ti lo kete. Lo ye ti zia ngia na bê ti Jéhovah. Na mbage, tongana lo yeke gi ti wara ambeni ye so ayeke na lege ni ape na yâ ti mbeti ti Nzapa, peut-être lo yeke na mbeni sioni sarango ye, na tapande, lo yeke zo ti baba wala lo yeke zo ti kion. Peut-être lo yeke gi ti justifié mbeni sarango ye so Nzapa ake.—Jérémie 17:9; aRomain 1:24-27.

 Mbeni mbeti atene so, tënë ti Nzapa “apeut ti gue juska andu tâ ye so ayeke na gbe ti bê ti e kâ.” Mbeni place na yâ ti bê ti e so ahonde na lê ti Nzapa ayeke dä ape wala so tënë ti lo apeut ti fa ni polele na gigi ape ayeke dä ape. Ni la, aHébreu 4:13 atene: “Aye kue ayeke na gigi senge nga aluti dandara na lê ti lo so e yeke na tënë ti kiri na ni na lo”.

 Na ngu 61 tongaso, na gbe ti yingo ti Nzapa, bazengele Paul asû lani mbeti na aHébreu ndali ti aChrétien so ayeke aJuif na Jérusalem nga na Judée.

 Na chapitre 3 nga na 4, Paul afa tongana nyen la tapande ti azo ti Israël ayeke mbeni gbotongo mê ndali ti aChrétien (aHébreu 3:8-12; 4:11). Jéhovah amû lani zendo ti zi azo ti Israël na gbe ti ngbâa nga ti gue na ala na mbeni ndo so ala peut ti “duti na siriri.” (Deutéronome 12:9, 10). Me, na temps so azo ti Israël ayeke quitté Égypte, fani mingi ala fa so ala yeke na mabe ape na azendo ti Nzapa nga fani mingi ala sara ye alingbi na acommandement ti lo ape. Ye ti peko ni ayeke so, ala ‘lï na yâ ti wungo terê ti Nzapa pëpe’ nga ala yeke na nzoni songo na Nzapa ape. Na ndani, ala kui na yâ ti désert. Atâa so ahale ti ala la alï na Sese ti zendo ni, ala nga kue akomanse ti ke yanga ti Jéhovah. Na ambeni ngoi, ye so aga na kota kpale na mara ni.—Néhémie 9:29, 30; Psaume 95:9-11; Luc 13:34, 35.

 Paul afa so aChrétien adoit ti manda ye na lege ti sioni tapande ti azo ti Israël so ayeke lani be-ta-zo ape. Nde na ala, e lingbi ti lï na yâ ti wungo terê ti Nzapa, tongana e sara ye alingbi na tënë ti lo nga e sara confiance na azendo ti lo.—aHébreu 4:1-3, 11.

 Bâ nduru vidéo so ti bâ ambeni ye so ayeke na yâ ti mbeti ti aHébreu.