Ambeni koli na wali so ayeke mä ka terê ape apensé so ndali ti nzoni duti ti amolenge ti ala a yeke nzoni ala sara divorce, ahon ti tene amolenge ni avivre ndo oko na mbeni babâ na mama so amä terê ape. Me aye so asi afa nyen?

•  Aye wa la divorce ayeke sara na ndö ti amolenge?

•  Eskê molenge ti mbi ayeke duti na ngia mingi tongana mbi sara divorce?

•  Ye so ayeke si tongana koli na wali akangbi me si ala kue angbâ ti bata amolenge ti ala ni

•  Eskê mbeni nzoni solution ayeke dä?

 Mbeni gingo nda ti ye afa so divorce ayeke ga na kpale mingi na amolenge. Amolenge so babâ na mama ti ala asara divorce apeut ti wara akpale mingi, na tapande:

•   ngonzo, gingo bê nga na kota vundu

•   ala yeke sara ye kirikiri

•   ala yeke manda mbeti gbä wala ala yeke ke ekole

•   ala ninga ti tï kobela ape

 Na ndö ni, mingi ti amolenge apensé so a yeke faute ti ala la babâ na mama ti ala asara divorce, wala ala pensé so ala doit fade ti sara mbeni ye ti kanga lege na ni.

 Divorce apeut ti sara ye mingi na ndö ti amolenge juska na ngoi so ala kono. Ala peut ti pensé so ala yeke na valeur ape, wala a yeke ngangu na ala ti sara confiance na amba ti ala. Ala nga kue ayeke ye hio ti sara divorce tongana mbeni lâ ala wara kpale na koli wala wali ti ala.

 Na nduru tënë: Atâa so ambeni zo so aye ti sara divorce ayeke pensé so ni la ayeke nzoni ndali ti amolenge ti ala, awandara ayeda na tënë ni so ape. Wandara Penelope Leach asû na mbeti atene: “Divorce ayeke sara si amolenge ayeke na ngia ape.” a

  Mama-ndia ti Bible: “[Ala zia] lê ti ala gï na ndö ti aye ti ala wani pëpe, me nga na ndö ti aye ti amba ti ala.” —aPhilippien 2:4.

 Ambeni zo apeut ti tene en. Me mingi ni, hinga so ye so babâ wala mama asentir ayeke nde na ye so molenge asentir ni. Zo so aye ti sara divorce aye ti vivre mbeni fini vie. Me mingi ni amolenge aye ka ti ala ti vivre mbeni fini vie ape nga ala ye ti tene babâ na mama ti ala akangbi ape.

 Ambeni wali so asara lisoro na amolenge saki mingi, so babâ na mama ti ala asara divorce, asû na yâ ti mbeni mbeti (The Unexpected Legacy of Divorce) atene: “Mbeni tënë oko ayeke polele: amolenge ni atene ape so ala na ngia. Me, ala tene vîi so: ‘Lango so babâ na mama ti mbi asara lani divorce ayeke lango so mbi yeke lani na ngia encore ape.’” A kiri a tene na yâ ti buku ni a tene so ala yeke bâ so ala peut ti sara confiance na azo na yâ ti dunia so ape, ndali ti so même songo so ayeke na popo ti azo so ala yeke nduru mingi na ala aluti ape.

 Na nduru tënë: Kite ayeke dä ape so amolenge ayeke duti ande na ngia ape na peko ti so babâ na mama ti ala asara divorce.

 Mama-ndia ti Bible: “Bê so awoko kue azi ngangu ti zo kue.”—aProverbe 17:22.

 Ambeni babâ na mama so asara divorce atara ti ngbâ ti sara kua ti batango amolenge ti ala mo bâ mo tene ala use kue angbâ na mba. Me, ti sara tongaso ayeke kete ye ape. Gingo nda ti ye afa so mingi ni akoli na wali so asara divorce ayeke:

•   passé temps mingi ape na terê ti amolenge ti ala ni

•   fa ye nde nde na ala

•   mû lege na amolenge ni ti sara ye ti bê ti ala ndali ti so conscience ti babâ wala mama ni afâ ngbanga na ndö ti lo wala lo fatigué mingi

 Mbeni molenge so babâ na mama ti lo asara divorce apeut ti komanse ti sara kpengba-li na babâ na mama ti lo. Na ndö ni kue, na lê ti lo babâ na mama ti lo asara ye pëpe alingbi na zendo so ala mû lani ti kangbi ape. Molenge ni apeut ti tene ‘Ngbanga ti nyen ti mä ala?’

 Na nduru tënë: A yeke lakue ngangu na akoli na awali so asara divorce so alango nde nde ti ngbâ ti bata amolenge ti ala mo bâ mo tene ala use kue angbâ na mba. Me situation ni so ayeke encore ngangu mingi na amolenge ni.

 Mama-ndia ti Bible: “Ala gi yanga ti amolenge ti ala pëpe, si bê ti amolenge ni awoko pëpe.”—aColossien 3:21.

 Ti komanse mbeni fini vie na peko ti divorce a hunda ti sara effort mingi. A yeke duti nzoni ti mû effort ni so ti sara kue ti ngbâ na koli wala wali ti mo. Mbeni mbeti (The Case for Marriage) atene: “Tongana songo ti mbeni koli na wali so asara mariage ayeke nzoni ape, a ye ti tene ape so awe la apeut ande ti ga nzoni lâ oko ape. Mingi ti acouple so ayeke na ngia ape, me si ala ngbâ na mba, songo ti ala akiri aga nzoni, même nzoni mingi tongana ngoi ayeke hon.” Tongana a bâ ni nzoni, amolenge ayeke sara ye nzoni tongana babâ na mama ti ala angbâ ndo oko.

 Ye so aye ti tene ape so divorce ayeke lâ oko mbeni solution ape. Bible ayeda ti tene zo asara divorce tongana a yeke ndali ti lango-sioni (Matthieu 19:9). Me, Bible atene nga so “zo so lê ti lo ahan agbu li kozo si lo bi gere ti lo.” (aProverbe 14:15). Akoli na awali so ayeke na kpale na yâ ti mariage ti ala na so aye ti sara divorce adoit ti gbu li nzoni na ndö ti desizion so ala ye ti mû so; ye so andu nga ti gbu li na ndö ti ye so divorce ni ayeke sara ande na ndö ti amolenge ti ala.

 Ye so aye ti tene ape so a lingbi e bâ gï kpale ni na lê. Bible amû nzoni wango na akoli na awali ti aidé ala ti duti na anzoni sarango ye so ala bezoin ni ti gbu ngangu nga ti duti na ngia na yâ ti mariage ti ala. Ye so a-étonné e ape, ndali ti so zo so ayeke wa ti Bible, so iri ti lo ayeke Jéhovah la azia gere ti mariage na sese.—Matthieu 19:4-6.

 Mama-ndia ti Bible: “Mbi Jéhovah, mbi yeke Nzapa ti mo. Mbi la mbi yeke fa ye na mo ti tene mo bâ nzoni dä.”—Ésaïe 48:17.