Wali ti lo ahinga ye so lo yeke sara na hondengo ni. Lo hunda pardon mingi na wali ti lo. Lo tene na wali ti lo so lo yeke zia lege ni, na lo arrêté ni teti mbeni ngoi. Na pekoni lo kiri dä encore, na ye ni akiri fani mingi na peko ti terê.

 Eskê mo yeke na yâ ti mara ti situation so? Tongana mo yeke bâ porno, hinga so ye ni so ayeke joué na ndö ti wali ti mo. Tongana nyen la mo peut ti zia lege ni biani biani? a

Na yâ ti article so e yeke bâ:

•  Ye so mo doit ti hinga

•  Ye so mo peut ti sara

•  Tongana koli ti mo ayeke bâ porno

 Porno apeut ti buba yâ ti mbeni mariage. A peut ti sara si bê ti wali ti koli so abâ porno ape ason nga lo yeke na confiance na koli ti lo ape. b

 Bâ asentiment so mbeni wali so koli ti lo ayeke bâ porno apeut ti duti na ni:

•   Lo bâ so koli ti lo ayeke be-ta-zo ape. Mbeni wali so iri ti lo ayeke Sarah atene: “A yeke mo bâ mo tene lakue koli ti mbi ayeke gi mbeni wali nde.”

•   Lo bâ so lo yeke ye oko ape. Mbeni wali atene so koli ti mbi ayeke na habitude ti bâ porno asara si mbi bâ so mbi yeke “pendere ape nga kamene ayeke sara mbi.”

•   Zo aperdre confiance. Mbeni wali so iri ti lo ayeke Helen atene: “Mbi yeke na confiance ape na aye kue so koli ti mbi ayeke sara.”

•   Gingo bê. Mbeni wali so iri ti lo ayeke Catherine atene: “Mbi yeke gi bê ti mbi lakue na ndö ti sarango ye ti koli ti mbi.”

 Ti gbu li na ndö ni: Bible ahunda na koli ti ndoye wali ti lo (aÉphésien 5:25). Eskê lo yeke fa so lo ye wali ti lo tongana lo sara si wali ni aduti na asentiment so a fa na nduzu ge so?

 A yeke facile ape ti zia lege ti bango porno. Mbeni wali so iri ti lo ayeke Stacey atene: “Koli ti mbi azia lege ti nyongo manga, mbangi nga na sämba, me a yeke ngangu na lo ti zia lege ti bango porno.”

 Tongana mo yeke na yâ ti situation so, aye so a fa na gbe ni ge apeut ti aidé mo ti zia lege ni biani biani.

•   Gi ti hinga ndani so porno ayeke sioni. Porno ayeke pusu mbeni zo ti pensé gï na lo wani na lo yeke sara ye so ayeke nzere gï na lo wani; a yeke buba yâ ti yengo terê, confiance, nga na dutingo be-ta-zo na mba so ayeke aye so asara si azo aduti na ngia na yâ ti mariage ti ala. A fa nga so zo ni ane pëpe Jéhovah Nzapa, so ayeke na gunda ti mariage.

   Mama-ndia ti Bible: “Zia azo kue abâ mariage na nene ni mingi”.—aHébreu 13:4.

•   Yeda na faute ti mo. Tene ape: ‘Mbi peut fade ti bâ porno ape tongana wali ti mbi afa so lo ye mbi.’ Ti bi tënë na li ti wali ti mo ayeke na lege ni ape, a yeke mo bâ mo tene mo yeke gi raison ti kiri ti bâ porno.

   Mama-ndia ti Bible: ‘Zo oko oko ayeke wara tara tongana nzara ti bê ti lo agboto lo na ahanda lo.’—Jacques 1:14.

•   Sara lisoro polele na wali ti mo. Mbeni koli ti wali so iri ti lo ayeke Kevin atene: “Mbi yeke sara lisoro na wali ti mbi lâ oko oko. Mbi yeke hunda lo, eskê mbi bâ mbeni ye so ayeke zingo nzara ti terê ti zo so ayeke na lege ni ape? Ye ti peko ni ayeke so, wali ti mbi abâ so mbi honde ye oko na lo ape.”

   Mama-ndia ti Bible: “E ye ti sara ye mbilimbili na yâ ti aye kue.”—aHébreu 13:18.

•   Ngbâ ti sara ye na hange. Zo apeut ti kiri na angbene sarango ye ti lo même tongana asara angu mingi na peko ti so lo zia lege ni. Kevin, so e sara tënë ti lo fade, atene: “Mbi ke ti bâ porno teti ngu bale-oko na mbi pensé so kpale ni ahunzi awe. Me, nzara ni so angbâ, a yeke tongana mbeni sioni nyama so ahonde terê ti lo ti ku mbeni nzoni ngoi ti attaqué.”

   Mama-ndia ti Bible: “Zia zo so abâ ti lo atene ni luti awe asara hange si lo tï pëpe.”—1 aCorinthien 10:12.

•   Tongana bê ti mo apusu mo ti bâ porno, gbu li si. Atâa so mo peut ti kanga lege na asioni nzara ape, me mo peut ti soro ti sara ye alingbi na nzara ni wala pëpe. Asioni nzara ni ayeke hon même hio, tongana mo sara effort ti pensé na ndö ti mbeni ye nde.

   Mama-ndia ti Bible: “A yeke nzoni zo oko oko na popo ti ala ahinga ti kanga nzara ti terê ti lo wani si lo duti nzoni-kue nga na nengo terê, me pëpe na lege ti nzara ti terê so a kanga ni pëpe.”—1 aThessalonicien 4:4, 5.

•   Kpe aye so apeut ti zingo nzara ti terê ti zo. Mbeni buku (Willpower’s Not Enough) atene: “Tongana mo yeke na yâ ti mbeni situation so ayeke ngangu, a yeke mo bâ mo tene mo pika mbeni allumette. Na gï kete essence . . . apeut ti sara si wâ ni amû ndo.”

   Mama-ndia ti Bible: “Zia si mbeni ye ti sioni akomande mbi pëpe.”—Psaume 119:133.

•   Perdre espoir ape. A peut ti mû ngoi, même angu mingi ti tene wali ti mo akiri asara confiance na mo. Me, mingi ti acouple awara lege ti sara tongaso.

   Mama-ndia ti Bible: “Ndoye ahinga ti kanga bê ti ku.”—1 aCorinthien 13:4.