Ye ti Manda 7

Gango Ndulu na Nzapa na yâ Sambela

Ngbanga ti nyen a yeke kota ye ti sambela lakue? (1)

A lingbi e sambela zo wa, na tongana nyen? (2, 3)

Atene wa alingbi ti zia na yâ ti sambela? (4)

Na ngoi wa a lingbi mo sambela? (5, 6)

Nzapa amä asambela kue? (7)

1. Sambela ayeke salango tene na Nzapa na tâ be-ti-molenge. A lingbi mo sambela Nzapa lakue. Tongaso mo lingbi ti ba so mo yeke ndulu na lo tongana mbeni tâ kamarade. Jéhovah ayeke kota nga na ngangu mingi, me lo mä asambela ti e! Mo sambela Nzapa lakue?​—Psaume 65:3 (65:2, NW); 1 aThessalonicien 5:17.

2. Sambela ayeke mbeni mbage ti vorongo ti e. Tongaso, a lingbi e sambela gi Nzapa, Jéhovah. Tongana Jésus ayeke giriri na sese, lo sambela lakue Babâ ti lo,  me mbeni zo nde pepe. A lingbi e sala tongaso nga. (Matthieu 4:10; 6:9) Ye oko, a lingbi e tene asambela ti e kue na iri ti Jésus.  Salango tongaso afa so e yekia kota ndo ti Jésus na so e mä na bê na sadaka ti lo ti kota ngele.​—Jean 14:6; 1 Jean 2:1, 2.

3. Tongana e sambela a lingbi e sala tene na Nzapa na bê ti e kue. A lingbi e tene pepe gi peko ti asambela so e bata na li wala so e diko ni na yâ mbeni buku ti sambela. (Matthieu 6:7, 8) Na ngoi kue, nga na ndo kue, e lingbi ti duti, na lege ti yekiango zo, ti sambela. Nzapa alingbi ti mä même asambela so e sala na yâ ti bê ti e. (1 Samuel 1:12, 13) A yeke nzoni ti wara mbeni ndo so ayeke kpö yongoro na ambeni zo ti sambela e mveni.​—Marc 1:35.

4. Atene wa alingbi ti zia na yâ ti sambela? Aye kue so alingbi ti ndu songo ti mo na Nzapa. (aPhilippien 4:6, 7) Tapande ti sambela afa so a lingbi e sambela teti iri ti Jéhovah nga teti ye so lo leke ti sala. E lingbi nga ti hunda ti wara aye ti mitele so atia e, pardon ti asiokpari ti e, na mungo maboko ti gbu ngangu na gbele tara. (Matthieu 6:9-13) A lingbi e sambela gi teti aye ti e mveni pepe. A lingbi e sambela gi teti aye so ague legeoko na ye so bê ti Nzapa aye.​—1 Jean 5:14.

5. Mo lingbi ti sambela na ngoi kue so bê ti mo apusu mo ti kiri singila wala ti sepela Nzapa. (1 Chronique 29:10-13) A lingbi mo sambela tongana mo yeke na akpale na tongana a tara mabe ti mo. (Psaume 55:23 [55:22, NW]; 120:1) A yeke na lege ni ti sambela kozoni si mo te kobe. (Matthieu 14:19) Jéhovah atisa e ti sambela “na ngoi kue.”​—aEphésien 6:18.

6. A lingbi mbilimbili e sambela tongana e sala mbeni kota siokpari. Na angoi tongaso, a lingbi e toto ti wara be-nzoni na pardon ti Jéhovah. Tongana e fa na lo asiokpari ti e na e sala ngangu ti e kue ti kiri ti sala ni mbeni pepe, Nzapa ayeke biani “ndulu ti mu pardon.”​—Psaume 86:5, NW; aProverbe 28:13.

7. Jéhovah amä gi sambela ti azo ti mbilimbili. Ti tene Nzapa amä sambela ti mo, a lingbi mo sala ngangu ti mo kue ti duti na fini na lege ti andia ti lo. (aProverbe 15:29; 28:9) A lingbi mo sala tele ti mo kete tongana mo yeke sambela. (Luc 18:9-14) A yeke nzoni mo sala ngangu alingbi na ye so mo hunda. Tongaso fade mo yeke fa so mo yeke na mabe na mo yeda biani na ye so mo tene. A yeke gi tongaso si fade Jéhovah akiri tene na asambela ti mo.​—aHébreu 11:6.