Ye ti Manda 5

Ye Wa Nzapa Aleke ti Sala Teti Sese?

Ngbanga ti nyen Jéhovah aleke sese la ni? (1, 2)

Ngbanga ti nyen laso sese ayeke mbeni paradis pepe? (3)

Fade ye nyen ayeke si na azo ti sioni? (4)

Ye wa Jésus ayeke sala ande teti azo ti kobela? ambakoro? na awakinda? (5, 6)

Ti wara mbage ti mo na yâ adeba nzoni so ayeke ga, a lingbi mo sala nyen? (7)

1. Jéhovah aleke la ni sese so si azo alingbi ti wara ngia ti duti na fini na ndo ni teti lakue lakue. Lo ye si azo so ayeke mbilimbili nga na ngia aduti na ndo sese lakue. (Psaume 115:16; Esaïe 45:18) Fade afuti sese lâ oko pepe; a yeke ngbâ teti lakue lakue.​—Psaume 104:5; Zo-ti-fa-tene 1:4.

2. Kozoni si Nzapa aleke koli, Lo soro mbeni kete mbage ti sese na lo sala si a ga mbeni pendere paradis. Lo di iri ni yaka ti Éden. A yeke na ndo so si lo zia kozo koli na kozo wali, Adam na Ève dä. Nzapa aleke ti tene ala wara amolenge na ala si ndo lê sese kue. Yeke yeke, fade ala sala si sese kue aga mbeni paradis.​—Genèse 1:28; 2:8, 15.

3. Adam na Ève asala siokpari na kengo ndia ti Nzapa na mbana. Tongaso Jéhovah atomba ala na yâ yaka ti Éden. Paradis aglisa. (Genèse 3:1-6, 23) Me Jéhovah aglisa pepe ye so lo leke ti sala teti sese so. Lo mu zendo ti sala si a ga mbeni paradis, ndo so azo ayeke duti dä lakue lakue. Fade lo sala ye so tongana nyen?​—Psaume 37:29.

4. Kozoni si sese so alingbi ti ga mbeni paradis, a hunda ti lungula azo ti sioni. (Psaume 37:38) Fade ye so ayeke si na Har-Maguédôn, so ayeke bira ti Nzapa ti hunzi sioye. Na pekoni, a yeke kanga Satan teti ngu 1 000. So aye ti tene ambeni zo ti sioni ayeke ngbâ pepe ti buba sese. Fade gi azo ti Nzapa si asö kuâ.​—Apocalypse 16:14, 16; 20:1-3.

5. Na ngoi ni kâ fade Jésus Christ ayeke komande tongana Gbia na ndo sese so teti angu 1 000. (Apocalypse 20:6) Fade lo zi yeke yeke siokpari na yâ abibe na tele ti e. Fade e yeke ga azo ti mbilimbili-kue tongana ti so Adam na Ève ayeke kozoni si ala sala siokpari. Na pekoni fade kobela, mbakoro, na kui ayeke mbeni pepe. Fade ayeke sava azo ti kobela, na azo so aga mbakoro akiri aga pendere.​—Job 33:25; Esaïe 33:24; Apocalypse 21:3, 4.

6. Na ngoi ti Komandema ti Ngu Saki Oko ti Jésus, abe-ta-zo ayeke sala kusala si sese kue aga paradis. (Luc 23:43) Nga, fade a yeke zingo na kuâ awakinda kutu mingi ti wara fini na ndo sese. (Kusala 24:15) Tongana ala sala ye so Nzapa ahunda na ala, fade ala ngbâ ti duti na fini na ndo sese teti lakue lakue. Tongaso pepe, fade afuti ala teti lakue lakue.​—Jean 5:28, 29; Apocalypse 20:11-15.

7. Tongaso fade kozo ye so Nzapa aleke ti sala teti sese aga nzoni. Mo ye ti wara mbage ti mo na yâ adeba nzoni so ayeke ga? Tongaso, a lingbi mo ngbâ ti manda ye na ndo Jéhovah na mo bata aye so lo hunda. Guengo na abungbi na Da ti Royaume ti aTémoin ti Jéhovah so ayeke ndulu na mo ayeke mu maboko na mo ti sala tongaso.​—Esaïe 11:9; aHébreu 10:24, 25.

[Foto na lembeti 10]

Aglisa Paradis

 [Afoto na lembeti 11]

Na peko ti Har-Maguédôn, fade a sala si sese aga mbeni paradis