Lani na ndangba bï ti Jésus lo na abazengele ti lo, lo tene na ala lo tene: “Tongana a zingo mbi na kuâ awe, mbi yeke gue ti ku ala na Galilée.” (Matthieu 26:32; 28:7, 10). Fadeso, mingi ti adisciple ti lo atï na lege ti gue kâ. Me, kua ti nyen la ala yeke sara kâ na Galilée ni?

Mbeni lâ, Pierre atene na amba ti lo bazengele omene, lo tene: “Mbi yeke gue ti gi susu si.” Ala omene ni kue angbâ atene: “E kue e yeke gue na mo.” (Jean 21:3). Na bï ni so kue, ala gbu susu oko ape. Na ngoi so ndo akomanse ti han kete kete, Jésus asi na yanga ti ngu ni, me ala hinga ape so a yeke lo la. Jésus adekongo na ala, lo tene: “Amolenge, ala yeke na mbeni ye ti tengo ni?” Ala tene: “Ên-ën!” Lo ngbâ lo tene na ala: “Ala bi gbanda ni na tere ti ngö ni na mbage ti koli, na ala yeke gbu asusu.” (Jean 21:5, 6). Ala gbu gbâ ti susu juska ala peut même ti gboto gbanda ti ala ni ape.

Jean angbâ atene na Pierre: “So Seigneur la!” (Jean 21:7). Hio, Pierre ayü bongo ti lo ti ndo ni, so lo zi ni fade na ngoi so ala yeke sara kua ti gingo asusu ni. Lo tï na lê ti ngu ni, lo komanse ti tï ngu ni juska mètre 90. Amba ti lo so ayeke na yâ ti ngö ni angbâ ti ga yeke yeke, yâ ti gbanda ni asi na susu!

Na ngoi so ala si na yanga ti ngu ni, ala bâ “wâ ti charbon so susu ayeke na lê ni nga na mapa.” Jésus atene na ala: “Ala ga na ambeni susu ni so ala londo ti gbu ni so.” Pierre agboto na gigi gbanda ni so asi singo na akota susu 153. Jésus atene na ala, lo tene: “Ala ga ala te ye.” Mbeni zo oko ti kanga bê ti hunda lo atene: “Mo yeke zo wa?” ayeke dä ape, ndali ti so ala hinga so a yeke Jésus la (Jean 21:10-12). So ayeke ti fani ota ni ti tene lo tingbi na ala na groupe la.

Jésus amû na ala oko oko kue mbeni mapa nga na susu ti tene ala te. Na pekoni, lo bâ peut-être ndo na mbage ti gbanda ti asusu ni, lo ngbâ lo hunda Simon, lo tene: “Simon molenge ti Jean, mo ye mbi ahon aye so?” Eskê Pierre aye kua ti gingo susu mingi ahon kua so Jésus amû na lo ti sara? Pierre angbâ akiri tënë atene: “En, Seigneur, mo hinga so mbi ye mo mingi.” Tongaso, Jésus atene na lo: “Mû kobe na akete taba ti mbi.”—Jean 21:15.

Jésus akiri ahunda lo: “Simon molenge ti Jean, mo ye mbi?” Peut-être li ti Pierre aga kirikiri si lo tene na lo: “En, Seigneur, mo hinga so mbi ye mo mingi.” Jésus akiri atene na lo: “Fa lege na akete taba ti mbi.”—Jean 21:16.

Jésus ahunda lo ti fani ota ni, lo tene: “Simon molenge ti Jean, mo ye mbi mingi?” Peut-être Pierre akomanse ti hunda tere ti lo wala Jésus ayeke na kite so ni yeke be-ta-zo na lo? Pierre atene na lo na bê ti lo kue: “Seigneur, mo hinga aye kue. Mo hinga so mbi ye mo mingi.” Jésus akiri aluti na ndo ti ye so Pierre adoit ti sara, lo tene: “Mû kobe na akete taba ti mbi.” (Jean 21:17). Biani, azo so amû li ni abezoin ti fa ye na azo so aga na yâ ti kundu ti ataba ti Nzapa.

A kanga Jésus nga a fâ lo lani ngbanga ti so lo sara kua so Nzapa atokua lo ti sara. Fadeso, lo yeke fa na Pierre so fini ti lo Pierre ni ayeke hunzi ande tongaso. Jésus atene na lo atene: “Na ngoi so mo ngbâ lani maseka, mo wani la mo yeke yü bongo ti mo nga mo yeke tambela na ndo so bê ti mo aye. Me tongana mo ga mbakoro ande, mo yeke yôro yâ ti maboko ti mo, na mbeni zo nde la ayeke yü bongo na mo nga lo yeke yô mo ti gue na mo na ndo so bê ti mo aye ape.” Me, Jésus atene na lo atene: “Ngbâ ti mû peko ti mbi.”—Jean 21:18, 19.

Pierre abâ bazengele Jean, na lo hunda ndo, lo tene: “Seigneur, ka ti lo ayeke tongana nyen?” So ti tene, nyen la ayeke si ande na bazengele so Jésus aye tënë ti lo mingi so? Jésus angbâ atene: “Tongana mbi ye ti tene lo ngbâ juska mbi ga, ti mo nyen dä?” (Jean 21:21-23). Pierre adoit ti mû peko ti Jésus sân ti tene lo gi bê ti lo na ndo ti ye so amba ti lo ayeke sara. Jésus aye ti fa so, na popo ti abazengele so kue, Jean la si ayeke ngbâ ande na fini aninga, na lo yeke bâ ande vision ti gango ti Jésus na yâ ti Royaume ti lo.

Ti tâ tënë ni, ambeni ye mingi ayeke dä so Jésus asara, so place ti tene a sû ni kue na mbeti ayeke dä ape.