Na peko ti ye ti mungo mbeto so asi na ala na lê ti ngu, adisciple ni akiri na yanga ti ngu ni. Mbeni ye ayeke ku ala encore. Ambeni sioni koli use, so asioni yingo ayeke na yâ ti ala, alondo na yâ ti mbeni cimetière so ayeke nduru na yanga ti ngu ni, na ala mû loro ti ga na mbage ti Jésus! Mbeni oko la azo ayeke sara mbeto ti lo mingi, peut-être ngbanga ti so lo yeke sara ye ti ngangu mingi na azo nga ndali ti so asioni yingo ni aninga mingi na yâ ti lo.

Koli so ayeke tambela lani tere senge. Bï na lâ, lo yeke “dekongo lakue na yâ ti cimetière nga na li ti ahoto, na lo mû atênë lo yeke suru na tere ti lo na kä.” (Marc 5:5). Teti so lo yeke sioni mingi, azo akpe kpengo ti hon na lege so ayeke na tere ti cimetière ni. Ambeni zo atara ti kanga lo, me lo yeke fâ yâ ti achaîne ni na lo yeke zi awen ni na gere ti lo. Lo kara azo kue.

Tongana koli ni asi na tere ti Jésus, lo ti na sese na asioni yingo so ayeke na yâ ti lo asara si lo dekongo, lo tene: “Jésus, Molenge ti Nzapa so ayeke na nduzu na ndo ti aye kue, ti mo nyen na mbi? Mbi hunda na mo ti deba yanga ti mo na iri ti Nzapa ti sara mbi pasi ape.” Jésus afa so lo yeke na ngangu na ndo ti asioni yingo na ngoi so lo tene: “Mo sioni yingo, mo sigi na yâ ti koli so!”—Marc 5:7, 8.

Asioni yingo ayeke lani gbani na yâ ti koli so. Jésus ahunda ndo atene: “Iri ti mo ayeke nyen?” Lo kiri tënë lo tene: “Iri ti mbi ayeke Légion, ngbanga ti so e yeke mingi.” (Marc 5:9). Na Rome ândö, légion ayeke mbeni bungbi ti aturugu so wungo ti ala ahon saki oko tongaso. So koli so abâ pasi mingi tongaso, a ye ti fa so gbâ ti asioni yingo la ayeke na yâ ti lo. Ala hunda na Jésus ti tene “na ala pëpe ti gue na yâ ti kota dû so alï mingi.” Ala kue ahinga awe ye so ayeke ku ala na mokonzi ti ala Satan.—Luc 8:31.

Nduru na ndo ni so, a ga na ambeni cochon 2 000 tongaso ti tene ala te ye. Na gbe ti Ndia ti Moïse, aJuif abâ lani cochon tongana mbeni nyama so ayeke sioni, na même ala doit ti bata ni ape. Asioni yingo ni atene: “Tokua e na yâ ti acochon so, si e lï na yâ ti ala.” (Marc 5:12). Jésus ayeda, na ala gue alï na yâ ti acochon ni. Acochon 2 000 so kue alondo na mbeni loro na li ti hoto ni na ala tï na yâ ti kota ngu, ala nyon ngu ala kui.

Tongana azo ti batango acochon ni abâ ye ni so, ala kpe ague asara tënë ni na azo ti yâ ti gbata ni nga na akete kodro so ayeke na tere ni. Azo ni angbâ aga ti bâ ye so apassé. Tongana ala si, ala bâ koli so asioni yingo asigi na yâ ti lo so. Koli ni ayeke nzoni fadeso na li ti lo akiri nzoni. Lo yü même bongo na lo duti na tere ti gere ti Jésus!

Tere ti azo so amä tënë ti ye ni so wala abâ aye ni so adö na mbeto ndali ti so ala gi li ti ala na ye ni gbä. Ala tene na Jésus ti hon. Tongana Jésus ayeke monté na yâ ti ngö ni ti hon, koli ni so si asioni yingo asigi na yâ ti lo so ahunda na Jésus ti tene ni kue ni monté na yâ ti ngö ni. Me Jésus atene na lo: “Kiri na ndo ti afami ti mo, na mo fa na ala peko ti aye so kue Jéhovah asara ndali ti mo nga nzoni bê so lo sara na mo.”—Marc 5:19.

Mingi ni, tongana Jésus asava mbeni zo, lo yeke tene ka na azo ni so ti sara pëpe tënë ti ye ni so na ambeni zo, ndali ti so lo ye pëpe si azo atene atënë kirikiri na ndo ti lo. Me ti ge, gi lo koli ni so aga nzoni so la afa polele ngangu ti Jésus. Tongaso, koli ni apeut ti gue ti fa tënë na azo so Jésus awara lege lo wani ti sara tënë na ala ape. Tënë so koli ni ayeke fa ande, a peut ti kaï sioni tënë so azo alingbi ti tene na ndo ti kuâ ti acochon ni. Tongaso, koli ni ague afa na azo ti Décapole kue, peko ti ye so Jésus asara ndali ti lo so.