Jésus alondo ti mû na adisciple ti lo mbeni nzoni wango na ndo ti aye so a lingbi ala sara na amosoro ti ala. Me, a yeke gi adisciple ti lo oko la ayeke mä lo lani ape. A-Farizien kue ayeke lani dä na ngoi ni so na a yeke nzoni ala manda ye na lege ti atënë ti Jésus so. Ngbanga ti nyen? Ngbanga ti so ala ‘ye nginza mingi’. Na mango atënë so Jésus atene, ala “to nda ti zere lo.”—Luc 15:2; 16:13, 14.

Mbeto agbu nga Jésus na ye so ala sara so ape. Lo tene na ala, lo tene: “Ala yeke azo so afa na lê ti azo so ala ayeke mbilimbili, me Nzapa ahinga bê ti ala. Ye so azo ane ni mingi ayeke ye ti saleté na lê ti Nzapa.”—Luc 16:15.

Teti angu mingi, aFarizien ayeke azo so ‘azo ane ala mingi’, me ngoi ti tene ye kue achangé alingbi awe. A yeke gue ti sara si akota zo so azo ane ala mingi, azo ti mosoro ti dunia so, azo ti komande nga na amokonzi-nzapa so ayeke sara ngangu na ndo ti azo, akiri na gbe ni. Ti asenge azo so ahinga so ala yeke na bezoin ti aye ti yingo, a yeke yô ala na nduzu. Jésus afa polele so a ngbâ ti leke ti sara lani mbeni kota changement.

Lo tene: “A fa tënë ti Ndia nga na ambeti ti aProphète juska a si na Jean. Ti londo na ngoi ti Jean ti ga na ni, Royaume ti Nzapa la a yeke fa ni tongana nzoni tënë, na mara ti azo nde nde kue ayeke sara ngangu ti si dä. Biani, yayu na sese alingbi ti hon, me mbeni kete marque ti gere-mbeti ti Ndia ayeke hon ape juska aye ni kue asi awe si.” (Luc 3:18; 16:16, 17). Na yâ ti tënë ti Jésus so, nyen la afa so mbeni changement ayeke si ande?

Amokonzi-nzapa ti aJuif afa tâ na lê ti azo kue so ala la ayeke bata Ndia ti Moïse mingi. Tongana mo rappelé, na ngoi so lani Jésus asara si lê ti mbeni waziba azi na Jérusalem, aFarizien atene na lê ti azo kue atene: “E yeke ti e adisciple ti Moïse. E hinga so Nzapa asara tënë ândö na Moïse.” (Jean 9:13, 28, 29). Mbeni raison so a mû lani Ndia na lege ti Moïse ayeke ti gue na azo so asara tere ti ala kete na Messie ni, so ayeke Jésus. Jean Baptiste afa Jésus tongana Kete taba ti Nzapa (Jean 1:29-34). A londo na ngoi so Jean akomanse kua ti lo ti fango tënë ti ga na ni, aJuif, so ayeke sara tere ti ala kete, so mbilimbili ayeke na popo ti awayere, akomanse ti mä lani tënë na ndo ti “Royaume ti Nzapa.” Biani, mbeni “nzoni sango” ayeke dä ndali ti azo so aye ti wara aye ti nzoni na gbe ti Royaume ti Nzapa.

Ndia ti Moïse ni alï ngu lani ape. Nde na so a gue na azo juska na Messie ni. Me a yeke ngbâ ande ti sara kua na ni lakue lakue ape. Na tapande, Ndia amû lani lege ti sara divorce ndali ti araison nde nde, me Jésus atene: “Zo kue so asara divorce na wali ti lo na lo sara mariage na mbeni wali nde, lo gi mbeni wali nde la. Nga, zo so asara mariage na wali so asara mara ti divorce so, andâ lo gi mbeni wali nde la.” (Luc 16:18). Tënë so adoit ti gbi yâ ti bê ti aFarizien so ayeke gi lani gingo ti zia andia na ndo ti aye kue!

Ti fa na ala so a ngbâ ti sara mbeni kota changement na ndembe ni so lani, Jésus amû mbeni toli. Lo sara tënë ti akoli use, so dutingo ti ala use kue achangé mingi, na peko ti so mbeni ye asi na ala. Na ngoi so mo yeke gbu li na ndo ti tapande so, bata na yâ ti li ti mo so, na popo ti azo so ayeke mä lani tapande ni so, a yeke wara aFarizien so aye nginza mingi na so azo ayeke mû nengo na ala mingi.

Jésus atene: “Mbeni zo ti mosoro ayeke lani dä, lo yeke yü gi bongo ti violet nga bongo ti lin. Lo yeke wara ngia na yâ ti gbâ ti anzoni ye ti lo lâ oko oko. Me mbeni zo ti iringo ye ayeke dä so iri ti lo ayeke Lazare. Lakue a yeke zia lo na yanga ti gbagba ti zo ti mosoro so; tere ti lo kue ayeke gi kä. Lo ye ti te aye so ayeke londo na ndo ti table ti zo ti mosoro ni so ayeke tï na sese. Ambo ayeke ga ti su lê ti akä ti lo ni.”—Luc 16:19-21.

A-Farizien aye nginza mingi, tongaso a yeke na lege ni ti tene Jésus ahaka ala na yâ ti toli ni so na “zo ti mosoro”. Nga, amokonzi-nzapa ti aJuif so aye ka mingi ti yü gi abongo so ngere ni ayeke ngangu na so ayeke nde na ti so asenge zo ayeke yü ka. Na ndo ti mosoro so ala yeke na ni, ala yeke nga na akota ndo. Biani, so Jésus ahaka ala na yâ ti toli ni na mbeni koli so ayü bongo ti violet tongana ti agbia so, a lingbi na akota ndo ti ala ni. Nga, vuru bongo ti lin ni aye ti fa tongana nyen la ala yeke bâ lani tere ti ala tongana azo ti mbilimbili.—Daniel 5:7.

Tongana nyen la azo ti mosoro so, so asara baba ndali ti so ala yeke amokonzi so, ayeke bâ  lani asenge zo? Ala yeke bâ lani atanga ti azo tongana a-‛am ha·’aʹrets, wala azo ti kodro (sese), so ahinga nga Ndia ape na so a yeke nzoni ti tene a fa ye na ala ape (Jean 7:49). Na yâ ti toli ti Jésus so, a yeke gi mara ti ye so asi na ‘zo ti iringo ye so iri ti lo ayeke Lazare,’ so ayeke na nzara même ti te “aye so ayeke londo na ndo ti table ti zo ti mosoro ni so ayeke tï na sese.” Legeoko tongana ti so tere ti Lazare kue ayeke gi kä, a yeke bâ lani asenge zo na nene ni ape, a kpa mo bâ mo tene ala yeke na kobela na lege ti yingo.

Teti mbeni ngoi, a yeke ye so apassé lani la. Me, Jésus ahinga so ngoi alingbi awe, ti tene a sara mbeni kota changement na yâ ti lege so a yeke bâ na azo, so ayeke tongana zo ti mosoro so, nga na ala so ayeke tongana Lazare.

Jésus akomanse ti fa akota changement so apassé. Lo tene: “Mbeni lâ, zo ti iringo ye so akui, na a-ange ague na lo na tere ti Abraham. ‘Zo ti mosoro so nga akui na a lu lo. Lo yeke na yâ ti pasi na yâ ti dû ti kuâ. Lo yô lê ti lo na nduzu, na yongoro kâ, lo bâ Abraham na Lazare so ayeke na tere ti lo.’”—Luc 16:22, 23.

Azo so ayeke mä lani Jésus ahinga so Abraham akui ti lo a ninga awe na lo yeke na yâ ti dû ti kuâ. Bible afa polele so azo so ayeke na yâ ti dû ti kuâ, wala na Shéol, so na popo ti ala a yeke wara Abraham, apeut ti sara tënë ape (Zo-ti-fa-tene 9:5, 10). Me, amokonzi-nzapa so amä lani yâ ti toli ti Jésus so tongana nyen? Nyen la Jésus aye ti fa na ndo ti asenge zo nga na mokonzi-nzapa so aye nginza mingi so?

Jésus alondo ti fa so a yeke sara mbeni changement na ngoi so lo tene ‘a fa tënë ti Ndia nga na ambeti ti aProphète juska a si na Jean Baptiste. Me, ti londo na ngoi ti Jean ti ga na ni, Royaume ti Nzapa la a yeke fa ni tongana nzoni tënë’. Fango tënë ti Jean nga na ti Jésus Christ asara si gigi ti Lazare na ti zo ti mosoro so achangé.

Teti angu mingi, azo so ayeke lani na mosoro mingi ape, wala awayere, ayeke bâ pasi na lege ti yingo. Me, ala wara mungo maboko nga ala yeda na sango so Jean Baptiste nga na Jésus afa na ala na ndo ti Royaume. Ândö, ala wara lege ti ngbâ na fini grâce na ‘aye so ayeke londo na ndo ti table ti yingo’ ti amokonzi-nzapa si atï na sese. Fadeso, a yeke mû na ala atâ kobe ti yingo so ayeke na yâ ti Mbeti ti Nzapa, mbilimbili na lege ti apendere fango ye so Jésus azi ndani na ala. A yeke mo bâ mo tene na nda ni ala wara mbeni nzoni ndo na lê ti Nzapa.

Me, nde na ala, amokonzi-nzapa ti aJuif, so ayeke na mosoro mingi nga so ayeke na kota ndo, ake ti yeda na sango ti Royaume so Jean nga na Jésus ayeke fa ni lani na yâ ti akodro kue (Matthieu 3:1, 2; 4:17). Na ndo ni, ngonzo asara ala sioni tongana  ala mä sango ni so, juska a gue a sara si Nzapa afâ ngbanga ti wâ na li ti ala (Matthieu 3:7-12). A yeke nzere mingi na amokonzi-nzapa, so aye nginza mingi so, tongana Jésus na adisciple ti lo azia fade lege ti fango tënë ti Nzapa. Amokonzi-nzapa so ayeke tongana zo ti mosoro ti yâ ti toli ti Jésus so atene: “Babâ Abraham, sara nzoni bê na mbi. Tokua Lazare ti yôro li ti maboko ti lo na ngu ti dê ti zia ni na menga ti mbi, ndali ti so mbi yeke bâ pasi mingi na yâ ti wâ so ayeke za so.”—Luc 16:24.

Me, a yeke ye so ayeke passé ande la ape. Gbâ ti amokonzi-nzapa ni ayeke changé nga ande ape. Ala yeke ke ti “sara ye alingbi na mbeti ti Moïse na ti aprophète,” so adoit fade ti gue na ala ti yeda so Jésus ayeke Messie ni nga Gbia so Nzapa asoro lo (Luc 16:29, 31; aGalate 3:24). Ala gi nga ti sara tere ti ala kete ape nga ti yeda na atënë so awayere, so fadeso ayeda na atënë ti Jésus nga so Nzapa abâ ala na nzoni lê awe, ayeke fa ni na ala. Me, adisciple ti Jésus apeut pëpe ti ba yâ ti tâ tënë ndali ti so ala ye ti zia ngia na bê ti amokonzi-nzapa so wala ndali ti so ala ye ti dë bê ti ala. Na yâ ti toli ni, Jésus afa tënë ni so na yâ ti tënë so “Babâ Abraham” atene na zo ti mosoro ni.

A tene: “Molenge ti mbi, dabe ti mo so mo yeke lani na gbâ ti aye ti nzoni na ngoi so mo de na fini, me ti Lazare, lo wara lani aye ti sioni. Me fadeso, bê ti lo adë ge awe, me mo, mo yeke bâ pasi. Nga, a zia mbeni kota dû na popo ti e na ala, si azo so aye ti londo ge ti gue na ala kâ alingbi ti gue ape, nga azo alingbi pëpe ti londo na ala kâ ti ga na e ge.”—Luc 16:25, 26.

A yeke duti pendere mingi nga a yeke na lege ni ti tene mara ti kota changement so apassé. A ye ti tene so mbeni changement ayeke passé na popo ti amokonzi-nzapa nga na azo so asara tere ti ala kete ti yeda ti yô joug ti Jésus na so na nda ni ala wara dengo bê nga na kobe na lege ti yingo (Matthieu 11:28-30). Changement ni so ayeke sigi ande polele na yâ ti akete nze so aga na pekoni, tongana a zia mbeni fini mbele na sese na place ti mbele ti Ndia (Jérémie 31:31-33; aColossien 2:14; aHébreu 8:7-13). Na ngoi so Nzapa azia yingo vulu ti lo na ndo ti adisciple ti Jésus na Pentecôte ti ngu 33, a sigi polele so a yeke ala la Nzapa abâ ala na nzoni lê, me pëpe aFarizien nga na ambeni mokonzi-nzapa ni.