1. Nyen la e doit ti sara ti nzere na lê ti Nzapa?

TI DUTI na mbeni kpengba songo na Nzapa so ndoye la atingbi e na lo, e doit ti zi terê ti e biani biani na bungbi ti vorongo nzapa ti wataka. E doit ti duti na yâ ti tâ bungbi ti vorongo Nzapa. A yeke ye so azo kutu mingi na yâ ti dunia kue ayeke sara la.

2. A yeke wara aTémoin ti Jéhovah na ndo wa, na kua ti ala ayeke nyen?

² Tongana ti so Bible afa ni kozo, atâ wakua ti Nzapa abungbi aga “azo mingi mingi” so alondo na “popo ti amara kue, akete mara kue, azo ti kodro kue, ayanga ti kodro kue”. (Apocalypse 7:9). Na yâ ti akodro ahon 235, aTémoin ti Jéhovah kutu mingi ayeke aidé amba ti ala ti manda ye na ndö ti aye so na ndoye Jéhovah ahunda na e ti sara ye alingbi na ni.

3. Zo wa la aTémoin ayeke voro lo, me nyen la ala ke ti voro ni?

³ A-Témoin ahinga so gï Jéhovah oko la azo adoit ti voro lo. Ala ke ti kuku na gbe ti ayanda wala a-image so azo ayeke voro ni (1 Jean 5:21). Ala yeke voro akuâ ape na lege so ala yeke lango na place ti kuâ ape wala ala yeke mû mbage ti ala pëpe na yâ ti ambeni sarango ye so asara si atënë ti nzapa ti wataka nga na “afango ye ti asioni yingo” amû ndo. (1 Timothée 4:1). Me, ala yeke dë bê ti azo so ayeke na vundu na lege so ala yeke fa na azo ni zendo so Nzapa amû ti zingo ande azo so akui awe na yâ ti paradis na ndö ti sese.—Jean 5:28, 29; Kusala 24:15.

4. Azo ti Nzapa abâ magie tongana nyen?

⁴ A-Témoin ake sarango magie, yorö wala likundu, ndali ti so ala hinga so aye so alondo na Zabolo. Ala zia bê ti ala pëpe na ndö ti magie ti bata ala, ala sara confiance na Jéhovah.—aProverbe 18:10.

5. Na lege wa la aTémoin ti Jéhovah ayeke “ti dunia so pëpe”?

⁵ Jésus atene so adisciple ti lo ayeke “ti dunia so pëpe”. (Jean 17:16). Jésus ake lani ti yôro terê ti lo na yâ ti aye ti poroso ti ngoi ti lo (Jean 6:15). Tongana ti lo, aTémoin ayeke yôro terê ti ala pëpe na yâ ti poroso, tënë ti vorongo kodro, nga atënë ti tiri ti warango kota ndo na yâ ti dunia. Me, ala yeke futa impôt nga ala yeke kpe andia ti kodro so ala yeke dä.—Jean 15:19; aRomain 13:1, 7.

6. Afango lege wa la awakua ti Nzapa ayeke mû pekoni na ndö ti tënë ti mariage nga na divorce?

⁶ So ala yeke mä yanga so gouvernement amû, aTémoin ayeke sara mariage tongana ti so ndia ti kodro afa (Tite 3:1). Ala yeda na fango lege ti Nzapa, ni la ala ye ti mû awali sambâ ape (1 Timothée 3:2). Nga, ndali ti so ala yeke sara ye alingbi na amama-ndia ti Bible, a yeke ngangu na ala ti sara divorce.

7. A-Témoin afa ndoye na popo ti ala tongana nyen?

⁷ A-Témoin andoye terê na popo ti ala. Ndoye ti amba ti ala nga na ti Nzapa abungbi ala na yâ ti tâ songo ti aita, atâa so ala londo na amara nde nde nga na akodro nde nde. Tongana aye ti ngangu asi, hio ala yeke mû maboko na amba ti ala. Ala yeke fa ndoye na yâ ti gigi ti ala ti lâ oko oko.—Jean 13:35.

8. Asioni sarango ye wa la azo ti Nzapa ake ni?

⁸ Awakua ti Jéhovah ayeke sara kue ti sara gï ye mbilimbili nga na lege ni. Ala ke nzi, mvene, lango-sioni, nyongo sämba ahon ndö ni nga na sarango ye ti likisi na yâ ti dengo buze. Akoli ayeke pika awali ti ala ape. Kozo ti ga Témoin, ambeni ayeke sara ândö aye ni so, me na aide ti Jéhovah, ala dö lege ni azia. Na lê ti Nzapa “a sukula ala si ala ga nzoni” awe.—1 aCorinthien 6:9-11.

9. Mbeni buku atene nyen na ndö ti a-eglize so ayeke na Afrique so atene ala yeke mû peko ti Christ?

⁹ Tâ tënë, abungbi ti vorongo Nzapa mingi atene so ala yeke fa tâ tënë. Mbeni ye so ala yeke  sara ti fa so ala yeke fa tâ tënë ayeke so ala yeke sara aye ti kpene. Na tapande, na ndö ti a-eglize so ayeke na Afrique so atene ala yeke mû peko Christ, mbeni buku atene: “[Afini bungbi ti nzapa so atene ala mû peko Christ] la amû fadeso place ti azo ti magie wala ti azo ti nganga. . . . Ala tene so ala yeke fa ye so ayeke si kekereke na azo, nga so ala yeke sara amiracle. Ala yeke na aprophète so awara avision nga ala fa nda ti abango li na azo. Ala yeke na eau bénite, huile d’onction, mburu ti wâ, abougie nga na dukane ti tene ala soigné na azo nga ti kanga lege na akobela ti mû azo.”

10, 11. Ngbanga ti nyen la amiracle so azo atene ala yeke sara la afa ape so Jéhovah ayeda na mbeni bungbi ti vorongo Nzapa?

¹⁰ Azo ti yâ ti abungbi ti nzapa ni atene so amiracle ni so afa so tufa ti Nzapa ayeke na ndö ti bungbi ti ala ni. Me amiracle la ayeke fa ape so Jéhovah ayeda na mbeni bungbi ti vorongo Nzapa. Satan ayeke mû ngangu ti lo na ambeni zo so ayeke na yâ ti abungbi ti vorongo nzapa ti wataka ti sara ‘akusala ti ngangu’. (2 aThessalonicien 2:9). Na ndö ni, Bible afa lani so amatabisi ti sarango amiracle so alondo na Nzapa, na tapande tenengo aprophétie, sarango tënë na ayanga nde nde wala hingango ye ayeke “kaï ni ande biaku”.—1 aCorinthien 13:8.

¹¹ Jésus agboto mê ti e, lo tene: “A yeke pëpe zo kue so atene na mbi, ‘Seigneur, Seigneur,’ si ayeke lï ande na yâ ti Royaume ti yayu. Me gï zo so asara ye so bê ti Babâ ti mbi so ayeke na yayu aye si ayeke lï ande dä. Mbeni lango ayeke ga ande so azo mingi ayeke tene na mbi: ‘Seigneur, Seigneur, e tene aprophétie na iri ti mo ape? E tomba asioni yingo na iri ti mo ape? E sara gbâ ti akusala ti ngangu mingi na iri ti mo ape?’ Me mbi yeke tene na ala: ‘Mbi hinga ala lâ oko pëpe! Ala hon yongoro na terê ti mbi kâ, ala azo so akpe ndia pëpe so.’”—Matthieu 7:21-23.

12. Zo wa la ayeke lï ande na yâ ti Royaume ti yayu?

¹² Tongaso, zo wa la ayeke lï ande na yâ ti Royaume ti yayu? A yeke azo so asara ye so bê ti Jéhovah aye.

13. Kua wa la Nzapa amû laso na azo ti lo ti sara ni? Azo wa la ayeke sara ni?

¹³ Laso, nyen la Nzapa aye ti tene a sara ndali ti azo ti lo? Jésus atene: “A yeke fa ande nzoni tënë ti Royaume na ndö ti sese kue so azo ayeke dä tongana mbeni tënë ti témoin ndali ti amara kue.” (Matthieu 24:14). Kua so aTémoin ti Jéhovah ayeke sara ni na ngangu ti ala kue la.

14. Royaume ti Nzapa ayeke nyen? Azo wa la ayeke komande ande na yâ ti Royaume ni?

¹⁴ Na “ndö ti sese kue so azo ayeke dä”, aTémoin ti Jéhovah ayeke fa so Royaume ti Nzapa ayeke mbeni gouvernement so ayeke na yayu na ayeke komande ande na ndö ti sese kue na lege ti mbilimbili. Ala fa so Jéhovah asoro Christ Jésus Gbia ti Royaume ni, lo soro nga na popo ti azo ti sese, azo 144 000 ti komande legeoko na Jésus.—Daniel 7:14, 18; Apocalypse 14:1, 4.

15. Nyen la Royaume ayeke futi ni ande?

¹⁵ A-Témoin ayeke fa na azo na yâ ti Bible so Royaume ti Nzapa ayeke futi ande dunia ti Satan. Bungbi ti vorongo nzapa ti wataka, na afango ye ti lo so abi zonga na ndö ti Nzapa na amû gloire na Zabolo, ayeke ngbâ ande ape. (Apocalypse 18:8). Agouvernement ti sese so kue so ake Jéhovah ayeke ngbâ ande nga ape!—Daniel 2:44.

16. Azo wa la ayeke ga ande azo ti gbe ti Royaume ti Christ Jésus, na ala yeke vivre na ndo wa?

¹⁶ Nga, aTémoin ti Jéhovah afa so Christ Jésus ayeke ga ande na aye ti nzoni mingi na azo kue so ayeke sara ye so bê ti Nzapa aye. Azo ni so ayeke duti na gbe ti komandema ti lo na ndö ti sese. Bible amû na e zendo so: “Lo yeke zi awayere so atoto ti tene a mû maboko na ala, nga na zo ti mawa na zo kue so zo ti mungo maboko na lo ayeke dä pëpe. Lo yeke bâ mawa ti azo ti mawa nga na ti awayere; lo yeke sö fini ti awayere.”—Psaume 72:12, 13.

17. Gï azo wa la ayeke fa tënë ti Royaume ti Nzapa?

¹⁷ Mbeni groupe ti azo nde so ayeke sara ye so bê ti Nzapa aye na lege so ala yeke fa nzoni tënë ti Royaume ayeke dä ape. Gï aTémoin ti Jéhovah la si ayeke fa tënë ti Royaume ti Nzapa na azo na ndö ti sese kue.