MBAGE 5
Tâ tënë na ndö magie, yorö na likundu
1. Na lege wa la tënë ti magie, yorö na ti likundu amû ndo?
MBENI buku Lege ti vorongo ti akotara na Afrika (Angl.) atene: “Na Afrique zo abezoin pëpe ti hunda ti hinga eskê azo ti likundu ayeke dä,” na buku ni akiri atene so “ti azo ti Afrique nde nde kue, likundu ayeke vrai ye.” Azo so ahinga mbeti pëpe nga na azo so amanda mbeti ayo kue amä na bê na magie, yorö nga na likundu. Akota zo ti bungbi ti nzapa ti Islam nga na ati so atene ala mû peko ti Christ kue amä na bê na ni.
2. Azo mingi amä na bê so magie alondo na ndo wa?
2 Na Afrique azo mingi amä na bê so mbeni ngangu ayeke dä, so zo ayeke bâ ni ape na so ayeke ti ndima. Me ngangu ti Nzapa ahon ni. Ayingo na akotara apeut ti mû ngangu ni so ti sara na aye. Na ambeni zo nga ahinga tongana nyen ti sara kua na ni ti sara na ambeni ye, atâa a yeke ti sara na nzoni ye (magie blanche) wala ti sara na sioni na zo (magie noire).
3. Magie noire ayeke nyen, na azo atene a peut ti sara nyen?
3 Magie noire, wala likundu, ayeke ti sara na sioni na awato. Azo amä na bê so azo so ayeke na magie noire, ala yeke na pouvoir ti tokua achauve-souris, andeke, angungu nga na ambeni nyama nde ti sara sioni na azo. Azo mingi amä na bê so magie noire la asara si azo ayeke tiri, ambeni wali adü ape, terê ti azo ason na même ala kui.
4. Azo mingi atene nyen na ndö ti azo ti likundu? Tënë wa la ambeni ngbene zo ti likundu atene?
4 Mingi ni a tene so likundu ayeke magie noire. Azo atene so na bï, azo ti likundu ayeke zi terê ti ala azia na ala yeke huru ala hon, ti gue ti tingbi na ambeni mba ti ala ni wala ti gue ti te azo yeke yeke ti fâ ala. So a tene azo ti likundu ayeke zi terê ti ala azia angbâ ti lango na ndö ti gbogbo si ala hon; ti fa so tënë ni so ayeke vrai, mingi ti azo atene so ayeke tënë so angbene zo ti likundu la atene ni. Na tapande, mbeni mbeti-sango ti Afrique afa peko ti atënë ti ambeni ngbene zo ti likundu (so mingi ni ayeke gï amaseka-wali) so ala tene: “Mbi fâ azo 150 na ziango ala na lê ti accident ti oto.” “Mbi fâ amolenge oku ndali ti so mbi nyon mênë ti ala kue ahunzi.” “Mbi fâ andeko ti mbi ota so ake mbi.”
5. Magie blanche ayeke nyen, na azo ayeke sara ni tongana nyen?
5 A tene so magie blanche ayeke ti tene zo abata na terê ti lo. Azo so ayeke sara magie blanche ayeke yü na terê ti ala abague nga na abracelet ti magie. Ala yeke nyon ambeni ngu ti yorö ti bata na terê ti ala, wala ayeke kpaka ambeni na terê ti ala. Ala yeke honde na yâ ti da ti ala wala na gbe ti sese ambeni ye so ala tene ayeke na pouvoir ti bata zo. Ala zia bê ti ala na ndö ti ambeni waraga so a zia aversê ti Coran wala ti Bible dä.
Mvene na handa
6. Nyen la Satan na adémon ti lo asara ândö? A lingbi e bâ ngangu ti ala tongana nyen?
6 A yeke tâ tënë so Satan na adémon ti lo ayeke asioni wato ti azo. Ala yeke na ngangu ti sara ye na ndö ti apensé nga na fini ti azo; giriri ala yeke lï même na yâ ti azo nga na anyama (Matthieu 12:43-45). Atâa so e peut ti dë kite ape na ngangu so ala yeke na ni, e doit ti bâ so ala yeke na ngangu ahon ndö ni ape.
7. Satan aye ti tene e mä na bê na nyen, tapande wa la afa ni?
7 Satan ayeke tâ kota zo ti handango azo. Lo handa azo ti mä na bê so lo yeke na ngangu mingi ahon ti so lo yeke na ni. Bâ mbeni tapande: Na ngoi ti bira so asi ade ti ninga ape na yâ ti mbeni kodro ti Afrique, aturugu ni asara kua na baffle ti bi kota mbeto na yâ ti awato ti ala. Kozo na bira ni, aturugu ni azia go ti abruit ti akota ngombe nde nde so ala enregistré. Ala ye si awato ni apensé so ala yeke na angangu ye ti bira. Legeoko nga, Satan aye si azo amä na bê so lo yeke na ngangu ti sara aye kue. Ye so lo ye a yeke ti bi mbeto na yâ ti azo ti sara ye so lo ye me pëpe ti sara ye so bê ti Jéhovah aye. Zia e bâ fadeso amvene ota so Satan aye ti tene e azo e mä na bê na ni.
8. Kozo mvene so Satan asara si amû ndo ayeke so wa?
8 Kozo mvene ni ayeke so: Ye ti sioni ayeke si na zo senge ape; ye ti sioni kue so asi na mbeni zo tongana zo la asara ni na lo droit ape, andâ mbeni zo so ayeke na yorö la asara ni na lo. Na tapande, mbeni molenge akui na palu. Mama ti lo ahinga peut-être so angungu la ayeke mû na zo palu. Me lo peut nga ti mä na bê so mbeni zo ti likundu la si atokua ngungu ni ti te molenge ni.
Ngoi na ngoi aye ti sioni asi gï gbagburu tongaso
9. Tongana nyen la Bible afa so Satan la ayeke pëpe na gunda ti akpale oko oko kue?
9 Atâa so Satan ayeke na ngangu ti ga na ambeni kpale, a yeke na lege ni ape ti mä na bê so lo la lo ga na akpale kue. Bible atene: “Mbi bâ so azo so akpe loro mingi la ayeke sö benda lakue pëpe, wala awangangu la ayeke sö benda lakue na yâ ti bira pëpe, wala azo ti ndara la ayeke wara kobe ti te lakue pëpe; a yeke nga azo so ahinga mbeti la ayeke wara mosoro lakue pëpe, wala azo so ahinga ye la ye ti ala ayeke ga lakue nzoni pëpe, ndali ti so ye so ala ku terê ti ala na ni pëpe alingbi ti si na ala kue na ngoi kue.” (Zo-ti-fa-tene 9:11). Mbeni zo ti kpengo loro na yâ ti mbeni mandako apeut ti hinga ti kpe loro mingi ahon atanga ni kue, me a peut ti si so lo la lo sö benda ape. Mbeni ye so zo “aku terê” ti lo na ni ape apeut ti sara si lo sö benda ape. Peut-être lo pika gere ti lo, lo tï; terê ti lo ason wala amuscle ti lo azi na lê ti terê. Ye so apeut ti si na zo kue. A yeke gï Satan wala azo likundu la apeut ti sara si aye so asi ape; aye so asi gï tongaso.
10. Azo atene nyen na ndö ti azo ti likundu, tongana nyen la e hinga so a yeke mvene?
10 Use mvene ti Satan ni ayeke so: Na bï, azo ti likundu ayeke zi terê ti ala ala zia na ala hon ti gue ti tingbi na amba ti ala wala ala gue ti nyon mênë ti azo wala ti te azo so ala ye ti fâ ala. Hunda terê ti mo: ‘Tongana azo ti likundu apeut ti sara tongaso, nyen la asigi na yâ ti terê ti ala ni si ahon so?’ E bâ fade awe so, âme ayeke zo, ayeke mbeni ye so apeut ti sigi na yâ ti terê ti zo ape. Nga, yingo ayeke ngangu so asara si e ngbâ na fini, ni la ayeke mû ngangu na terê ti e ti sara kua, me sân terê ti zo yingo ni apeut ti sara mbeni ye oko ape.
Azo ti likundu apeut pëpe ti zi terê ti ala ti zia ti hon
11. Ngbanga ti nyen la e hinga so azo ti likundu alingbi pëpe ti sigi na yâ ti terê ti ala ti hon? Mo yeda na tënë so?
11 Âme wala yingo apeut ti sigi na yâ ti terê ti zo ape ti sara mbeni ye, atâa a yeke ye ti nzoni wala ti sioni. Tongaso, azo ti likundu apeut pëpe ti sigi na yâ ti terê ti ala ti hon. Aye so azo ti likundu atene ala sara ni wala so ala pensé ala sara ni awe so, ti vrai ni, ala sara ni ape.
12. Tongana nyen la Satan asara si azo amä na bê so ala sara ambeni ye, so ti vrai ni ala sara ni ape?
12 Ka ti aye so ambeni zo ti likundu atene na yanga ti ala wani so ala la asara ni so, e peut ti tene nyen dä? Satan apeut ti sara si azo amä na bê so ala sara ambeni ye, so ti vrai ni ala sara ni ape. Na lege ti avision, Satan apeut ti sara si ala pensé so ala bâ ambeni ye, ala mä go ti ambeni ye, so ti vrai ni asi ape. A yeke tongaso la Satan ayeke gi ti pusu azo ti zia Jéhovah nga ti sara si ala bâ so Bible atene tâ tënë ape.
13. (a) Magie blanche ayeke nzoni? (b) Bible atene nyen na ndö ti magie?
13 Ota mvene ni ayeke so: Magie blanche ayeke nzoni, a kanga lege na magie noire. Bible asara kangbi pëpe na popo ti magie blanche na magie noire. Lo ke asarango magie kue. Bâ andia so Jéhovah amû giriri na mara ti Israël na ndö ti magie nga na ndö ti azo so ayeke sara ni:
-
“Ala sara magie pëpe.”—Lévitique 19:26.
-
“Koli wala wali so ayeke zo ti sarango tënë na yingo ti akuâ wala zo ti fango aye so ayeke si ande na zo, ala fâ lo.”—Lévitique 20:27.
-
“A lingbi a wara na popo ti ala pëpe . . . zo ti bango mbadi, wala zo ti sarango magie, wala zo ti fango ye so ayeke si kekereke, wala zo ti yorö, wala zo ti kangango amba ti lo na yorö, wala zo so ague abâ zo ti sarango tënë na yingo ti akuâ”.—Deutéronome 18:10-14.
14. Ngbanga ti nyen la Jéhovah alu andia so ake sarango magie?
14 Andia so afa polele so Nzapa aye pëpe si azo ti lo asara magie. Jéhovah amû andia so na azo ti lo ngbanga ti so lo ndoye ala na lo ye pëpe si ala ga angbâa ti mbeto na ti aye ti akotara. Lo ye pëpe si adémon asara pasi na ala.
15. Tongana nyen la Bible afa so Jéhovah ayeke na ngangu mingi ahon Satan?
15 Atâa so Bible afa pëpe anzene nzene tënë na ndö ti ye so adémon apeut ti sara wala ti sara ape, Bible afa so Jéhovah Nzapa ayeke na kota ngangu mingi ahon Satan na adémon ti lo. Jéhovah asara si a tomba Satan na yayu (Apocalypse 12:9). Bâ, so ti tara Job, Satan ahunda Nzapa kozo si, nga lo mä tënë so Nzapa atene na lo ti fâ Job ape.—Job 2:4-6.
16. E doit ti gue na mbage ti zo wa ti bata terê ti e?
16 A-Proverbe 18:10 atene: “Iri ti Jéhovah ayeke mbeni ngangu tour. Zo ti mbilimbili akpe lo lï na yâ ni, na a bata lo.” A lingbi e bâ ndo na mbage ti Jéhovah ti bata e. Awakua ti Nzapa azia bê ti ala ape na awaraga wala na ayorö ti bata ala si Satan na adémon ti lo asara sioni na ala ape. Nga mbeto ti tene azo ti likundu abi ala na yorö asara ala ape. Ala mä na bê na ye so Bible atene: “Lê ti Jéhovah ayeke bâ ndo na ndö ti sese kue ti mû ngangu ti lo ti mû maboko na azo so azia bê ti ala kue na lo.”—2 Chronique 16:9.
17. Dengo bê wa la e wara na Jacques 4:7, me e doit ti sara nyen?
17 Mo nga kue mo peut ti duti na mara ti beku so tongana mo voro Jéhovah. Jacques 4:7 atene: “Ala woko terê ti ala na gbe ti Nzapa; me ala luti na Zabolo, na lo yeke kpe ande yongoro na ala.” Tongana mo voro tâ Nzapa, na mo woko terê ti mo na gbe ti lo, mo peut ti duti sûr so Jéhovah ayeke bata mo.
