1, 2. Tapande wa la afa nene ti dutingo na mbeni ye so azo kue ayeda na ni ti leke na atënë so andu tënë ti vorongo Nzapa?

MO PEUT ti hinga Nzapa tongana nyen? Eskê a yeke kota ye ti tene mo gi nda ti afango ye kue ti abungbi ti Nzapa si? Ên-ën, a yeke ngangu. Atâa so e peut ti sara ni, e yeke hinga tongana nyen la fango ye tongaso ayeke na lege ni?

² So azo ayeke fa aye nde nde na ndö ti Nzapa, e doit ti wara mbeni lege so apeut ti aidé e ti hinga tâ tënë, mbeni tâ tënë so azo kue ayeda na ni. Imaginé so mo yeke na gara, na mbeni tënë alondo na ndö ti yongo ti mbeni pagne. Zo ti kango ye ni atene so pagne ni ayo mètre ota, me zo ti vongo ye ni ake. A peut ti fâ yâ ti ngbanga so tongana nyen? Tongana ala mû mètre ala mesuré na ni.

3. A sû Bible lani ngbanga ti nyen?

³ Eskê mbeni mètre ayeke dä, so azo kue ayeda na ni, so a peut ti leke na atënë so andu abungbi ti vorongo Nzapa? En, a yeke Bible. Nzapa asara si a sû Bible ti tene na ndo kue azo apeut ti hinga tâ tënë na ndö ti lo. A imprimé abible milliard mingi. A traduire Bible kue, wala gï mbage ni, na ayanga ti kodro ahon 2 100. Mingi ti azo apeut ti diko Bible na yanga ti kodro ti ala wani ti hinga tâ tënë na ndö ti Nzapa.

4. Asango wa la mo yeke wara na yâ ti Bible?

⁴ Bible ayeke mbeni pendere cadeau so Nzapa amû na e. A fa na e nda ti ambeni ye  so sân Bible e peut ti hinga ni ape. A sara tënë ti acréature ti yingo. A fa na e apensé ti Nzapa, asarango ye ti lo nga na ye so lo leke ti sara. A fa lege so Nzapa asara na ye na mbage ti azo na yâ ti angu saki mingi so ahon. A fa na e aye so ayeke si ande kekereke nga tongana nyen ti wara lege ti fini ti lakue lakue.

5. Tapande wa la afa so Bible na science amä terê?

⁵ E yeke na araison mingi ti yeda so Bible ayeke biani Tënë ti Nzapa. Mbeni oko ayeke so atënë ti Bible ague oko na ti science. Giriri azo mingi apensé so sese aluti na ndö ti mbeni ye. Na tapande, na ouest ti Afrique, azo amä na bê so sese aduti na ndö ti mbeni ngbo so aroulé terê ti lo. Na so mbeni mbage ti terê ti lo ni ayeke na ndö ti sese ni na nduzu na mbeni mbage ni so ayeke na gbe ni ayô sese ni. Me ti gue oko na ye so science afa, ngu 3 500 kozoni mbeni wasungo Bible atene so Nzapa ‘azia sese na ndö ti ye oko pëpe.’—Job 26:7.

6. Kota ye wa la afa polele so Bible alondo biani na Nzapa?

⁶ Kota ye so afa so Bible alondo biani na Nzapa, a yeke so lo yeke tene tâ tënë na ndö ti kekereke. Azo alingbi ti hinga ye so ayeke si kekereke ape, me Nzapa ahinga biani ye so ayeke si kekereke; tënë kue so lo tene ayeke lakue tâ tënë.

7. Ambeni prophétie ti Bible so aga tâ tënë ândö awe ayeke so wa?

⁷ Aprophétie ti Bible ngbangbo mingi aga tâ tënë giriri. Na tapande, ngu 700 kozoni, Bible afa so a yeke dü Jésus na gbata ti Bethléhem, na a si biani (Michée 5:2; Matthieu 2:3-9). Bible afa nga ambeni prophétie mingi so andu Jésus, na tapande Bible afa kozo awe so mbeni maseka-wali so ade ti hinga koli ape la ayeke dü lo nga a yeke kä lo nginza ti argent 30. Aprophétie so nga aga lani tâ tënë. Biani, mbeni zo ti sese alingbi pëpe ti fa tënë ti aye so kozo!—Ésaïe 7:14; Zacharie 11:12, 13; Matthieu 1:22, 23; 27:3-5.

8. Ambeni prophétie ti Bible wa la ayeke ga tâ tënë laso, na a fa nyen?

⁸ Mingi ti aprophétie ti Bible ayeke ga tâ tënë na ngoi ti e. Ambeni ayeke so:

• “Mara ayeke londo na bira na terê ti mbeni mara, na royaume ayeke londo na bira na terê ti mbeni royaume. Sese ayeke yengi ngangu, nga na ando nde nde na peko ti terê, kota nzara ayeke tï nga asioni kobela so amû ndo.”—Luc 21:10, 11.

• “Kpengo ndia pëpe ayeke wu mingi.”—Matthieu 24:12.

• “Na lâ ti nda ni, . . . azo ayeke duti ande azo so andoye gï terê ti ala wani, azo so andoye nginza, . . . azo so ake yanga ti ababâ na amama ti ala, . . . azo so akanga nzara ti bê ti ala pëpe, azo so ayeke asioni zo, azo so andoye nzoni ye pëpe, . . . azo so wuma ti ala ahon ndö ni, azo so andoye ngia ahon ti ndoye Nzapa.”—2 Timothée 3:1-5.

A yeke aye so e yeke bâ laso la ape? So aprophétie ti Bible so aga tâ tënë afa so Bible ayeke tongana tanga ti ambeti ape. A yeke Tënë so a sû na gbe ti yingo ti Nzapa!—2 Timothée 3:16.

9, 10. Nyen la afa so Nzapa azia lege pëpe na azo ti changé atënë ti yâ ti Bible?

⁹ Bâ so mo yeke wa ti mbeni kota ndokua na mo sû mbeni mbeti so na yâ ni mo fa ambeni molongo ti ndia so azo ti kua ni adoit ti sara ye alingbi na ni. Me mbeni wato aga achangé ambeni tënë na yâ ni, mo yeke sara ande nyen? Mo yeke leke peko ti ye so lo changé so ape? Legeoko nga, Nzapa ayeke zia lege na azo pëpe ti changé atënë ti yâ ti Bible.

¹⁰ Azo atara lani ti changé yâ ti atënë ti Bible, me kue gbä atï na ngu. Tongana e mû Bible so e yeke na ni laso e haka na angbene rouleau ti Bible, atënë ti yâ ni kue ayeke oko. Ye so afa so na yâ ti angu mingi so ahon, a changé yâ ti atënë ti Bible ape.