TONGANA azo kue asala ye ti nzoni, ye kue ayeke duti ande nzoni mingi ape?— Me zo oko ti sala lakue aye ti nzoni ayeke pëpe. Mo hinga ngbanga ti nyen e kue e yeke sala aye ti sioni ngoi na ngoi, même tongana e ye ti sala ye so ayeke nzoni?— Ngbanga ti so a dü e kue na yâ ti siokpari. Me ambeni zo ayeke sala aye ti sioni mingi. Ala ke ambeni zo na ala yeke sala sioni na ala na mbana. Ti mo, ala lingbi ti zia lege ti sioni na ti manda ti sala nzoni?—

Bâ maseka-koli so ayeke bata bongo ti azo so ayeke bo Etienne na tênë. Iri ti lo na yanga ti Hébreu ayeke Saul, me na yanga ti azo ti Rome ayeke Paul. A nzere na lo ti tene a fâ Etienne, mbeni disciple ti Kota Wafango ye. Zia e bâ ngbanga ti nyen Saul asala mara ti aye ti sioni tongaso.

Saul ayeke mbeni oko ti azo ti mbeni bungbi ti vorongo ti aJuif. A hiri ala aFarizien. A-Farizien ayeke na Tënë ti Nzapa, me ala yeke bata mingi afango ye ti ambeni mokonzi ti vorongo ti ala. A yeke ndali ni si Saul asala ye ti sioni.

Na ngoi so a gbu Etienne na Jérusalem, Saul ayeke lani dä. A gue na Etienne na ngbanga. Ambeni zo ti fango ngbanga ni ayeke aFarizien. Atâa so a tene asioni tënë na ndo ti Etienne, lo dö na mbito pëpe, na lo tene na ala anzoni tënë mingi na ndo Jéhovah Nzapa nga na Jésus.

Me ye so azo ti fango ngbanga ni amä anzere na ala pëpe. Ala hinga ye mingi awe na ndo Jésus. Teti, ngoi kete kozoni na so, ala  sala si a fâ Jésus. Me na pekoni, Jéhovah amû Jésus na tele ti lo kâ na yayu. Fadeso, ahon ti tene ala zia sioni lege ti ala ni, awafango ngbanga ni ayeke sala sioni na adisciple ti Jésus.

Awafango ngbanga ni agbu Etienne, ala sigigi na lo na yâ ti kodoro ni. Ala pika lo sioni si lo tï na sese, na ala bo lo na atênë. Na tongana ti so mo yeke bâ na yâ foto so, Saul ayeke bâ lani ye so. Ti lo, a yeke na lege ni ti fâ Etienne.

Mo hinga ngbanga ti nyen Saul abâ ti lo lani ye tongaso?— Na yâ fini ti lo kue, lo yeke lani mbeni Farizien, na ti lo afango ye ti aFarizien ayeke na lege ni. Lo bâ akoli so tongana atapande ti tene lo mû pekoni.​—Kusala 7:54-60.

Na peko ti so a fâ Etienne awe, Saul asala nyen?— Lo gi lege ti hunzi adisciple ti Jésus kue! Lo gue lo lï tâ na yâ da ti ala na lo gboto akoli nga na awali na gigi. Lo hunda si a bi ala na da ti kanga. Ndali ni, mingi ti adisciple ti Jésus akpe Jérusalem. Me ala ngbâ lakue ti fa tënë na ndo Jésus.​—Kusala 8:1-4.

 Ye so asala si Saul akiri ake adisciple ti Jésus ahon ti kozo. Tongaso, lo gue lo bâ Kota Prêtre Caïphe ti tene a mû lege na lo ti gbu aChrétien so ayeke na kodoro ti Damas. Lo ye ti gbu ala ti ga na ala na Jérusalem si a fâ ngbanga na li ti ala. Me tongana lo yeke na lege ti gue na Damas, mbeni ye ti dongo bê asi.

Wâ alondo na yayu aza, na mbeni go atene: “Saul, Saul, teti nyen mo sala ngangu na Mbi?” Jésus la ayeke sala tënë so! Wâ ni aza ngangu mingi si avuko lê ti Saul, na a hunda ti tene azo ti Saul afa lege na lo ti gue na Damas.

Lango ota na pekoni, na yâ ti mbeni ye tongana bango li, Jésus asi na mbeni disciple ti lo na Damas. Iri ti lo ayeke Ananias. Jésus atene na lo ti gue ti bâ Saul, ti sala si lo bâ ndo, na ti sala tënë na lo. Tongana Ananias asala tënë na lo, Saul ayeda na tâ tënë na ndo Jésus. Lo kiri lo bâ ndo. Gigi ti lo kue achangé, na lo ga mbeni wakua be-ta-zo ti Nzapa.​—Kusala 9:1-22.

Mo bâ awe ngbanga ti nyen Saul ayeke sala ka ândö aye ti sioni?— Ngbanga ti so a fa lani na lo ye so ayeke na lege ni pëpe. Lo mû peko ti azo so ayeke be-ta-zo na Nzapa pëpe. Lo yeke mbeni oko ti azo so azia atënë ti amba ti ala zo kozo na Tënë ti Nzapa. Me atâa so ambeni Farizien angbâ lakue ti tiri na Nzapa, ngbanga ti nyen Saul azia sioni salango ye ti lo ni na lo sala ye ti nzoni?— Ngbanga ti so, tongana a bâ ni nzoni, Saul ake lani tâ tënë pëpe. Ni la tongana a fa na lo tâ tënë, lo yeda na ni.

Saul aga nyen na pekoni? Mo hinga ni?— Na pekoni a hinga lo na iri ti bazengele Paul, mbeni bazengele ti Jésus. Na dabe mo so Paul asû gbâ ti ambeti ti Bible ahon tanga ti azo kue.

Azo mingi ayeke dä so, tongana Saul, alingbi ti changé. Me a yeke kete ye pëpe, teti so mbeni zo ayeke dä so ayeke sala ngangu mingi ti pusu azo ti sala sioni. Mo hinga zo ni?— Jésus asala tënë  ti lo tongana Lo si lani na Saul na lege ti Damas. Na yayu kâ, Jésus atene na Saul: ‘Mbi yeke tokua mo ti zi lê ti azo, ti mû ala na yâ ti vukongo ndo ti sigigi na ala na yâ ti lumière, na ti zi ala na gbe ti ngangu ti Satan ti gue na ala na Nzapa.’​—Kusala 26:17, 18.

Tâ tënë, a yeke Satan Zabolo si ayeke gi ti pusu azo oko oko kue ti sala sioni. Mo bâ so ngoi na ngoi a yeke ngangu na mo ti sala ye so ayeke nzoni?— E kue e bâ ni tongaso. Satan la asala si a yeke ngangu tongaso. Me mbeni nda ti tënë nde ayeke dä so afa ngbanga ti nyen a yeke lakue ngangu ti sala ye so ayeke nzoni. Mo hinga ni?— A yeke ngbanga ti so a dü e na yâ ti siokpari.

A yeke siokpari so la asala si mingi ni a yeke ngangu na e pëpe ti sala ye ti sioni ahon ti sala ye ti nzoni. Tongaso, a lingbi e sala nyen?— A lingbi e tiri ngangu ti sala ye ti nzoni. Tongana e sala tongaso, e lingbi ti hinga biani so Jésus, so aye tënë ti e, ayeke mû ande maboko na e.

Tongana Jésus ayeke lani na sese ge, lo fa so lo ye tënë ti azo so asala ândö aye ti sioni si ala zia lege ni. Lo hinga tongana nyen a yeke tâ ngangu mingi na ala ti zia lege ti sioni. Na tapande,  ambeni wali ayeke gi akoli nde nde. Salango ye so ayeke biani sioni. Bible ahiri mara ti awali tongaso awali-pitan.

Mbeni lâ, mbeni mara ti wali tongaso amä tënë na ndo Jésus, na lo gue na ndo so Jésus ayeke dä, na da ti mbeni Farizien. Lo tuku mafuta na ndo gere ti Jésus. Lo mû kuali ti lo, lo zi na ngu ti lê ti lo so ayuru na ndo ti gere ti Jésus. Mawa asala lo mingi ndali ti asiokpari so lo sala, tongaso Jésus apardone lo. Me aFarizien abâ ti ala so a yeke nzoni a pardone lo pëpe.​—Luc 7:36-50.

Mo hinga tënë so Jésus atene mbeni lâ na ambeni Farizien?— Lo tene: ‘Awali-pitan ayeke lï kozoni na i na yâ royaume ti Nzapa.’ (Matthieu 21:31). Jésus atene tënë so ngbanga ti so awali-pitan amä na bê na lo, na ala zia sioni lege ti ala. Me aFarizien angbâ ti ala ti sala ye ti sioni na adisciple ti Jésus.

Tongaso, tongana Bible afa atene ye so e yeke sala ayeke sioni, a lingbi e duti ndulu ti zia lege ni. Na tongana e manda ye so Jéhovah aye e sala, a lingbi e gi ti sala ni. E yeke zia ande ngia na bê ti Jéhovah na lo yeke mû fini ti lakue lakue na e.