TONGANA e kui, Nzapa ayeke ye ande ti zingo e wala ti kiri e na fini?— Job, mbeni zo ti mbilimbili, amä na bê lani so Nzapa aye biani. Ni la, tongana Job abâ ti lo lani so lo yeke kui kuingo, lo tene na Nzapa: “Fade Mo hiri ndo, na mbi kiri tënë na Mo.” Job atene so Jéhovah Nzapa ayeke ye ande mingi ti zingo lo na kuâ.​—Job 14:14, 15.

Jésus ayeke tâ gi tongana Babâ ti lo, Jéhovah Nzapa. Jésus aye ti mû maboko na e. Tongana mbeni koli so ayeke na kobela ti buruma atene na lo, ‘Tongana Mo ye, Mo lingbi ti sala si tele ti mbi aga nzoni,’ Jésus akiri tënë na lo atene: ‘Mbi ye.’ Na lo zi buruma ni na tele ti koli so.​—Marc 1:40-42.

Jésus amanda na mbage ti Babâ ti lo ti ye amolenge. Giriri, Jéhovah asala kusala lege use na ambeni wakua ti lo ti zingo akete molenge na kuâ. Na tapande, Elie atoto lani na Jéhovah ti zingo molenge-koli ti mbeni wali so asala ye ti nzoni mingi na lo Elie ni. Na Jéhovah azingo lo na kuâ. Na lege ti  wakua ti lo Elisée, Jéhovah azingo nga mbeni kete molenge-koli.​—1 aGbia 17:17-24; 2 aGbia 4:32-37.

Ti hinga so Jéhovah aye e mingi anzere na e ape?— Lo yeke bi bê na ndo ti e gi pëpe tongana e yeke na fini. Même tongana e kui, lo yeke girisa e pëpe. Jésus atene so Babâ ti lo ayeke bâ même azo so akui awe tongana azo so ade na fini! (Luc 20:38). Bible atene so ‘atâa kui, atâa fini, atâa aye ti fadeso, atâa aye ti kekereke alingbi ti kangbi e na ndoye ti Nzapa pëpe.’​—aRomain 8:38, 39.

Tongana Jésus ayeke lani na sese ge, lo fa so tënë ti akete molenge agbu bê ti Jéhovah. Dabe mo so Jésus amû lani ngoi ti sala tënë ti Nzapa na amolenge. Me mo hinga so Nzapa amû ngangu na Jésus ti zingo akete molenge na kuâ?— Zia e bâ ye so asi tongana Jésus azingo mbeni kete molenge-wali ti ngu 12 na kuâ. A yeke molenge ti mbeni koli so iri ti lo ayeke Jaïrus.

Jaïrus na wali ti lo nga na oko molenge ti ala alango lani ndulu na Ngu ti Galilée. Mbeni lâ, kota kobela agbu molenge-wali ni, na Jaïrus abâ so lo ga ndulu ti kui. Lo dabe ti lo na Jésus, koli so Jaïrus amä tënë ti lo na so alingbi ti zi kobela ti azo. Tongaso, lo londo lo gue lo gi peko ti Lo. Lo wara Jésus na yanga ti Ngu ti Galilée, na ngoi so lo yeke fa tënë na gbâ ti azo.

Jaïrus ahon na popo ti gbâ ti azo so na lo gue lo tï na gere ti Jésus. Lo tene: ‘Tele ti molenge ti mbi ti wali aso mingi. Mbi gbu gere ti mo, ga mo mû maboko na lo. Mbi hunda mo mingi ti ga.’ Gi na mango tënë so, Jésus alondo amû peko ti Jaïrus. Gbâ ti azo so aga ti bâ Kota Wafango ye amû nga peko ti lo. Me na lege, ambeni zo ti da ti Jaïrus asi, ala tene na lo: ‘Molenge ti mo ti wali akui awe, nyen si mo ngbâ ti hunda wafango ye ni ngbanga ni?’

Tënë ti akoli so atï na mê ti Jésus. Lo hinga tongana nyen mawa ahon ndo ti Jaïrus ti girisa oko molenge ti lo ni. Tongaso Lo tene  na lo: ‘Zia mbito. Mä gi na bê na Nzapa, na fade molenge ti mo ni aga nzoni.’ Tongaso ala gue asi na da ti Jaïrus. Kâ, akamarade ti fami ti lo ayeke toto. Mawa asala ala ngbanga ti so kete kamarade ti ala akui. Me Jésus atene na ala: ‘Ala zia ti toto. Molenge ni akui pëpe, me lo yeke lango.’

Tongana Jésus atene atënë so, azo ni akomanse ti he lo, teti ala hinga so molenge ni akui ti lo awe. Ka a sala tongana nyen si Jésus atene lo yeke lango so?— Ti mo, lo ye ti fa nyen na azo ni?— Lo ye ti fa na ala so kuâ ayeke tongana mbeni kota lango. Lo ye ti fa na ala so na lege ti ngangu ti Nzapa, lo lingbi ti zingo hio mbeni zo na kuâ tongana ti so e lingbi ti zingo mbeni zo na lango.

Jésus ahunda ti tene a sigigi na azo kue. Gi Pierre, Jacques, na Jean nga na babâ na mama ti molenge ni si angbâ. Na pekoni, lo gue na ndo so a zia molenge ni dä. Lo gbu tïtî molenge ni na lo tene: “Molenge, mo londo!” Mo ye ti bâ, molenge ni alondo na lo komanse ti tambela! Bê ti babâ na mama ti lo asi na kota ngia.​—Marc 5:21-24, 35-43; Luc 8:40-42, 49-56.

 Gbu li ti mo fadeso na ndo ye so. Teti so Jésus alingbi ti kiri na kete molenge-wali so na fini, lo lingbi ti sala nga tongaso na ambeni zo nde?— Ti mo, lo yeke sala ni biani ande?— Lo yeke sala ni. Jésus lo mveni atene: “L’heure ayeke ga so azo kue so ayeke na dukua, fade ala mä yanga ti [mbi], na ala sigigi.”​—Jean 5:28, 29.

Ti mo, Jésus aye ti zingo azo?— Mbeni tapande nde na yâ ti Bible ayeke mû maboko na e ti kiri tënë na ni. Ye so asi mbeni lâ ndulu na kodoro ti Naïn afa tongana nyen Jésus ayeke bâ azo so ayeke na vundu na ngoi ti lungo kuâ.

Mbeni wali na ambeni zo mingi mingi asigigi na kodoro ti Naïn ti gue ti lu kuâ ti molenge ti lo. Koli ti lo akui kozoni awe, na fadeso molenge ti lo ngengele oko ti koli akui. Mawa ahon ndo ti lo! Mingi ti azo ti Naïn ayeke tambela nga na tele ti kuâ ti molenge ni. Mama ni ayeke toto, na azo ahinga ye so ala lingbi ti sala pëpe ti zi vundu ti lo.

Na lango ni so, Jésus na adisciple ti lo ayeke gue nga na mbage ti kodoro ti Naïn. Ndulu na yanga ti kodoro ni, ala tingbi na azo ni na guengo ti lu kuâ ti molenge ti wali ni so. Tongana Jésus abâ wali ni so ayeke toto, mawa ti lo agbu lo. Kota vundu ti lo azia vundu na bê ti Jésus. Lo ye ti sala mbeni ye ndali ti wali so.

Tongaso, na ngangu pëpe me na go so apusu wali ni ti mä lo, lo tene: “Toto pëpe!” Salango ye ti tele ti lo asala si azo kue ayeke bâ ye so lo ye ti sala. Na ngoi so Jésus ayeke gue ndulu na kuâ ni, ala kue ayeke hunda peut-être tele ti ala na ye so lo ye ti sala. Jésus akomande, lo tene: ‘Maseka-koli, mbi tene na mo, mo londo!’ Tâ gi na lê ni lê ni, lo londo lo duti! Lo komanse ti sala tënë.​—Luc 7:11-17.

Bâ tâ nzerengo tele ti mama ni! Mo yeke sala ande ye tongana nyen ti kiri ti bâ mbeni zo so mo ye lo mingi so azingo na kuâ?—  Ye so afa atene Jésus aye biani azo na lo ye ti mû maboko na ala ape?— Bâ tongana nyen aye ayeke duti ande nzoni mingi ti yamba azo so azingo na kuâ na yâ fini sese ti Nzapa!​—2 Pierre 3:13; Apocalypse 21:3, 4.

Ande na ngoi ni kâ, na popo ti azo so ayeke zingo na kuâ, ambeni ayeke duti azo so e hinga ala kozo, so abâ nga amolenge. E yeke hinga e tene ala la, legeoko tongana ti so Jaïrus ahinga so molenge ti lo la si Jésus azingo lo na kuâ. Ambeni ayeke duti ande azo so akui asala angu ngbangbo wala saki mingi awe. Me Nzapa ayeke girisa ala pëpe gi ngbanga ti so ala kui a ninga awe.

Ti hinga so Jéhovah Nzapa na Molenge ti lo aye e mingi amû ngia na bê ape?— Ala ye si e ngbâ na fini, gi teti kete ngoi pëpe, me teti lakue lakue!