E LINGBI ti sala nyen ti zia ngia na bê ti Nzapa? E lingbi ti mû mbeni ye na lo?— Jéhovah atene: “Anyama kue ti ngonda ayeke ti Mbi.” Lo tene nga: “Argent ayeke ti Mbi, na lor ayeke ti Mbi.” (Psaume 24:1; 50:10; Aggée 2:8). Ye oko, mbeni ye ayeke dä so e lingbi ti mû ni na Nzapa. A yeke nyen?—

Jéhovah amû lege na e ti soro ti sala kusala ti lo wala pëpe. Lo yeke gbu e gbungo na ngangu pëpe ti sala ye so lo ye. Zia e gi ti hinga nzoni ngbanga ti nyen Nzapa aleke e si e lingbi ti soro ti sala kusala ti lo wala pëpe.

Mo hinga robot? A yeke mbeni masini so a leke ni ti sala gi ye so zo so aleke lo ahunda ti sala. Tongaso, robot alingbi ti sala mbeni ye nde pëpe. Jéhovah alingbi fade ti leke e kue tongana arobot. Lo lingbi fade ti leke e ti sala gi ye so lo ye. Me Nzapa aleke e tongaso pëpe. Mo hinga ngbanga ti nyen?— Ambeni ye ti ngia ayeke tongana arobot. Tongana a pete mbeni bouton, ala yeke sala gi ye so zo so aleke ala azia na yâ tele ti ala ti sala. Mo bâ mbeni ye ti ngia tongaso awe?— Mingi ni, a si na mbeni ngoi, azo ahinga ye so ala lingbi ti sala pëpe na aye ti ngia so a leke  ala lekengo ti sala gi mbeni ye tongaso. Nzapa aye pëpe ti tene e mä yanga ti lo ngbanga ti so e yeke arobot so a leke ni lekengo ti sala gi kusala ti lo. Jéhovah aye si e sala kusala ti lo ngbanga ti so e ndoye lo nga so e ye ti mä yanga ti lo.

Ti mo, tongana e mä yanga ti Babâ ti e ti yayu ngbanga ti so a londo na bê ti e mveni, lo yeke bâ ni tongana nyen?— Tene na mbi, babâ na mama ti mo ayeke bâ salango ye ti tele ti mo tongana nyen?— Bible atene so molenge so ayeke na ndara “amû ngia na babâ ti lo,” me molenge so ayeke buba “amû vundu na mama ti lo.” (aProverbe 10:1). Mo bâ so tongana mo sala ye so babâ na mama ti mo ahunda na mo ti sala, a nzere na ala?— Me tongana mo ke yanga ti ala, ala yeke bâ ni tongana nyen?—

Zia e bâ fadeso tapande ti Jéhovah, Babâ ti e ti yayu. Lo fa na e tongana nyen e lingbi ti zia ngia na bê ti lo. Mo lingbi ti zi Bible ti mo na aProverbe 27:11? Na yâ versê so, Nzapa atene na e: ‘Molenge ti mbi, mo duti na ndara na mo mû ngia na bê ti mbi, si mbi lingbi kiri tënë na zo so azonga mbi [wala zo so agi yanga ti mbi].’ Ti gi yanga ti zo aye ti tene nyen?— Mbeni zo alingbi ti gi yanga ti mo na hengo mo na ngia nga na tenengo so mo yeke na ngangu pëpe ti sala ye so mo tene mo lingbi ti sala. Satan agi yanga ti Jéhovah tongana nyen?— Zia e bâ ni.

 Na chapitre 8 ti buku so, e manda lani so Satan aye ti duti na kozo ndo na so lo ye si azo kue amä yanga ti lo. Satan atene so azo ayeke voro Jéhovah gi ndali ti fini ti lakue lakue so Jéhovah atene lo yeke mû ni ande na ala, tongana ala voro lo. Tongana Satan apusu Adam na Eve ti ke yanga ti Jéhovah, lo bi mbeni kota tënë na sese. Lo tene na Nzapa: ‘Azo ayeke sala na mo gi ndali ti ye so mo mû na ala. Zi tâ gi lege na mbi, na mbi yeke zi azo kue na gbe ti mo.’

Tâ tënë, e yeke wara atënë so kue na yâ ti Bible pëpe. Me tongana e diko ye so asi lani na Job, a yeke polele so Satan atene mara ti tënë tongaso na Nzapa. A yeke tâ lani kota ye ndali ti Satan nga ndali ti Jéhovah ti bâ wala Job ayeke ngbâ be-ta-zo na Nzapa wala pëpe. Zia e zi Bible ti e na Job achapitre 1 na 2 na e bâ ye so asi.

Na chapitre 1 ti Job, tongana a-ange aga ti luti na gbele Jéhovah na yayu, Satan ayeke na popo ti ala. Tongaso, Jéhovah  ahunda Satan: “Mo londo na ndo wa?” Satan atënë so lo londo ti fono ti bâ aye na ndo ti sese. Tongaso Jéhovah ahunda lo: ‘Mo bâ Job, lo so asala kua ti mbi na lo sala sioni pëpe so?’​—Job 1:6-8.

Me tënë ayeke gi na yanga ti Satan ndulu ndulu. Lo tene: ‘Job ayeke voro mo gi ngbanga ti so kpale ayeke si na lo pëpe. Tongana mo zia ti bata lo na ti hiri deba nzoni na ndo ti lo, mo yeke bâ so lo yeke zonga mo tâ na lê ti mo.’ Tongaso, Jéhovah akiri tënë: ‘Nzoni, Satan, mo lingbi ti sala ye ti bê ti mo na lo, me hange! Sala sioni na lo pëpe.’​—Job 1:9-12.

Satan asala nyen?— Lo sala si azo anzi abagara na alele ti Job, na ala fâ azo so ayeke bata ala. Na pekoni, wâ ti bekpa asungba afâ ataba na azo so ayeke bata ala. Nga, azo aga anzi azambala na ala fâ azo so ayeke bata ala. Na nda ni, Satan asala si pupu asala ngangu na akungbi da so amolenge bale-oko ti Job ayeke na yâ ni, na afâ ala kue. Atâa aye so kue, Job angbâ ti sala kusala ti Jéhovah.​—Job 1:13-22.

Tongana Jéhovah akiri abâ Satan, lo fa so Job angbâ lakue be-ta-zo na lo. Satan ayeke na mbeni tënë nde ndulu na yanga ti lo, lo tene: ‘Tongana mo zia gi lege na mbi ti sala sioni tâ na tele ti lo, lo yeke zonga mo tâ na lê ti mo.’ Jéhovah azia si  Satan asala sioni na tele ti Job, me lo gboto mê ti lo ti fâ Job pëpe.

Satan apika Job na akä ti sanzo. Akä ni so amû tele ti lo kue. Akä ni afun sioni mingi, na zo oko aye ti ga ndulu na lo pëpe. Même wali ti Job atene na lo: “Mo zonga Nzapa, mo kui.” Azo so atene ala yeke akamarade ti Job aga ti bâ lo. Ala kiri akono vundu ti lo na tenengo so lo sala peut-être mbeni ye ti sioni, ni la si lo wara akpale so kue. Me, atâa akpale nga na apasi kue so Satan aga na ni na tele ti Job, Job angbâ lakue ti sala kusala ti Jéhovah be-ta-zo.​—Job 2:1-13; 7:5; 19:13-20.

Ti mo, dutingo be-ta-zo ti Job asala nyen na Jéhovah?— A zia ngia na bê ti lo ngbanga ti so Jéhovah alingbi ti tene na Satan: ‘Bâ Job! Lo yeke sala kusala ti mbi ngbanga ti so lo sala ni na bê ti lo mveni.’ Mo yeke duti ande tongana Job, zo so Jéhovah afa lo tongana mbeni tapande, so afa atene Satan ayeke zo ti mvene?— Biani, a yeke tâ mbeni kota matabisi ti kiri tënë na tënë so Satan atene lo lingbi ti zi azo kue na gbe ti Jéhovah. Jésus abâ ni lani tongana mbeni matabisi biani.

Kota Wafango ye azia lege lâ oko pëpe na Satan ti pusu lo ti sala ye ti sioni. Bâ tongana nyen tapande ti lo azia ngia na bê ti Babâ ti lo mingi! Jéhovah alingbi ti fa Jésus na ti tene na Satan: ‘Bâ Molenge ti mbi! Lo ngbâ be-ta-zo na mbi na yâ ye kue ngbanga ti so lo ye mbi!’ Bâ nga ngia so Jésus aduti na ni ti zia ngia na bê ti Babâ ti lo. Ndali ti ngia so, Jésus ayeda même ti kui na ndo keke ti pasi.​—aHébreu 12:2.

Mo ye ti duti tongana Kota Wafango ye ti e na ti zia ngia na bê ti Jéhovah?— Tongaso, manda lakue ye na ndo ye so Jéhovah aye si mo sala, na zia ngia na bê ti lo na salango ni!