MBENI zo asala mbeni ye ti sioni na mo awe?— Lo sala sioni na mo wala lo tene na mo mbeni tënë so anzere pëpe?— A lingbi mo sala nga ni na lo?—

Ti azo mingi, tongana zo asala sioni na ala, ala nga kue ayeke sala ni na lo. Me Jésus afa so a lingbi e pardone azo so asala sioni na e (Matthieu 6:12). Ka tongana zo asala sioni na e lege mingi, a lingbi e pardone lo lege oke?—

Pierre aye lani ti hinga tënë na ndo ni. Tongaso lo hunda mbeni lâ na Jésus: ‘A lingbi mbi pardone lo lege mbasambala?’ Lege mbasambala alingbi pëpe. Jésus atene so tongana zo ni asala siokpari na tele ti mo lege mingi, ‘a lingbi mo pardone lo lege bale-mbasambala na ndo ni mbasambala’.

So ayeke mingi! Aye ti sioni mingi so zo ni asala na e, e lingbi ti diko ni kue? Bâ ye so Jésus aye lani ti tene na e la: A lingbi e gi pëpe ti diko wungo ti asioni kue so azo asala peut-être na e. Tongana ala hunda pardon, a lingbi e pardone ala.

Jésus aye lani ti fa na adisciple ti lo ngbanga ti nyen a yeke kota ye mingi ti pardone zo. Tongaso, tongana lo kiri tënë na Pierre awe, lo tene mbeni mbaï na adisciple ti lo. Mo ye ti mä ni?—

 Mbeni gbia ayeke ândö dä. Lo yeke lani nzoni mingi. Tongana angbâa ti lo ayeke na yâ ti kpale ti nginza, lo mû même bon ti nginza na ala. Me ngoi ti tene angbâa ni akiri na nginza ni na lo asi awe. Tongaso, a ga na mbeni ngbâa ni na gbele lo. Ngbâa ni asala bon ti lê ti nginza kutu 60 na tïtî gbia ni. So tâ kota wungo ti nginza!

Me ngbâa ni abuba nginza ti gbia ni kue, na lo lingbi ti kiri na lo ni  pëpe. Tongaso, gbia ni amû yanga ti tene a kä lo. Lo tene nga so a lingbi a kä wali ti ngbâa ni na amolenge ti lo na aye kue so ayeke ti lo. Na a mû nginza ni na gbia ni. Ti mo, ye so asala nyen na ndo ngbâa ni?—

Lo tï na gere ti gbia ni na lo voro tele ti lo, lo tene: ‘Bâ mawa ti mbi, mû na mbi mbeni ngoi, na fade mbi yeke kiri ye kue so mbi mû na tïtî mo.’ Tongana mo yeke fade gbia ni, mo yeke sala nyen na ngbâa ni so?— Gbia ni abâ mawa ti ngbâa ti lo ni, na lo pardone lo. Lo tene na ngbâa ni ti futa même lê ti nginza oko ti anginza kutu 60 so pëpe. So nzerengo tele na ngbâa ni!

Me nyen la ngbâa so asala na pekoni? Lo sigigi lo gue lo wara mbeni mba ti lo ngbâa ni. Lê ti nginza 100 ti lo ayeke na li ti ngbâa ni so. Lo gbu go ti mba ti lo ni na lo komanse ti pete, lo tene: ‘Kiri na mbi alê ti nginza 100 so mbi mû na mo so!’ Bâ tâ tongana nyen zo alingbi ti sala mara ti ye tongaso, mbilimbili na peko ti so gbia ni apardone lo mingi! A yeke na lege ni la?—

Me, mba ti ngbâa ni so ayeke ti lo zo ti mawa. Lo lingbi ti kiri na nginza ni fade fadeso pëpe. Tongaso, lo tï na gere ti mba ti lo ni na lo voro tele ti lo, lo tene: ‘Bâ mawa ti mbi, mû na mbi mbeni ngoi, na fade mbi yeke kiri ye ti mo na mo.’ A lingbi ngbâa ni amû mbeni ngoi na mba ti lo ni?— Mo yeke sala ti mo nyen?—

Bê ti koli so ayeke sioni. Lo yeke tongana gbia ni pëpe. Lo ye si a mû na lo nginza ti lo fade fadeso. Na teti so mba ti lo ni alingbi ti kiri na lo ni pëpe, lo hunda si a bi lo na kanga. Tanga ti angbâa ni abâ ye kue so asi, na bê ti ala aso. Mawa ti ngbâa so ayeke na da ti kanga agbu ala. Tongaso ala gue asala tënë ni na gbia ni.

 Ye so asi so anzere nga na gbia ni oko pëpe. Ngonzo agbu lo ngangu na tele ti ngbâa so aye pëpe ti pardone mba ti lo. Tongaso, lo hiri lo, na lo tene: ‘Mo sioni ngbâa, mbi pardone mo fade ape? A yeke nzoni mo pardone nga mba ti mo pëpe?’

A yeke nzoni fade sioni ngbâa ni amanda ye na mbage ti nzoni gbia so. Me lo sala ni pëpe. Tongaso, gbia ni amû yanga ti tene a bi ngbâa ni na kanga ngbii lo kiri na lo alê ti nginza kutu 60 ni kue si. Me kâ na da ti kanga, lege ti kiri na nginza ni na gbia ni ayeke dä pëpe. Tongaso, lo yeke ngbâ kâ juska na kuâ ti lo.

Tongana Jésus ahunzi ti tene mbaï ni awe, lo tene na adisciple ti lo: “Fade Babâ ti Mbi na yayu asala tongaso na i nga, tongana i oko oko kue i pardone aita ti i na bê ti i pëpe.”​—Matthieu 18:21-35.

 Mo bâ, bon ti Nzapa ayeke na li ti e mingi mingi. Tâ fini ti e mveni alondo na Nzapa! Tongaso, tongana e haka bon ti e so ayeke na li ti azo na ti Nzapa so ayeke na li ti e, a yeke ye oko pëpe. Bon ti azo ni ayeke tongana lê ti nginza 100 so ngbâa ni ayeke na ni na li ti mbeni mba ti lo. Me bon ti Nzapa so ayeke na li ti e ndali ti asioni ye so e sala ayeke tongana alê ti nginza kutu 60 so a lingbi ngbâa ni so akiri na ni na gbia ni.

Nzapa ayeke na nzoni bê mingi. Atâa e sala aye ti sioni, lo yeke pardone e. Lo yeke mû fini ti e biaku biaku pëpe na place ni. Me a lingbi e girisa pëpe kota ye so: Nzapa ayeke pardone gi tongana e pardone azo so asala sioni na e. So tâ kota tënë ti gbu li dä, ni la ape?—

Tongaso, tongana mbeni zo asala sioni na mo, me na pekoni lo tene pardon, mo yeke sala nyen? Mo yeke pardone lo?— Ka tongana lo sala ni lege mingi, mo yeke pardone lo lakue?—

Tongana fade a yeke e si e hunda pardon ni, e ye si mba ti e ni apardone e ape?— A lingbi e sala nga tongaso na lo. A lingbi e tene gi pëpe so e pardone lo, me a lingbi e pardone lo na bê ti e kue. Tongana e sala tongaso, e yeke fa so e ye biani ti duti adisciple ti Kota Wafango ye.