TONGANA mo ye ti hinga mbeni zo nzoni, mo yeke hunda iri ti lo. A yeke tongaso ape?— A yeke tongaso. E kue e yeke na iri. Nzapa amû iri na kozo zo na ndo ti sese. Lo hiri lo Adam. Iri ti wali ti Adam ayeke Eve.

Me, a yeke gi azo si ayeke na iri pëpe. Bâ ambeni ye nde so ayeke nga na iri. Tongana mbeni zo amû na mo mbeni poupée wala mbeni kete nyama, mo yeke mû iri na lo, ni la ape?— Biani, iri ayeke kota ye mingi.

Yä lê ti mo na nduzu na bï na bâ gbâ ti atongoro so ayeke kâ. Ti mo, ala yeke na iri?— Biani, Nzapa amû iri na atongoro oko oko kue ti yayu. Bible atene na e: “Lo diko wungo ti atongoro; Lo di iri ti ala oko oko kue.”​—Psaume 147:4.

Ti mo, zo wa na yâ gigi kue ayeke kota ahon azo kue?— Tâ tënë, a yeke Nzapa. Lo yeke na iri?— Jésus atene so Lo yeke na ni. Mbeni lâ, Jésus atene na Nzapa na yâ ti sambela: ‘Mbi fa iri ti Mo na adisciple ti mbi.’ (Jean 17:26). Mo hinga iri ti Nzapa?— Nzapa mveni afa ni na e. Lo tene: ‘Mbi yeke Jéhovah, so ayeke iri ti Mbi.’ Tongaso, iri ti Nzapa ayeke JÉHOVAH.​—Esaïe 42:8, Genèse 22:14.

Tongana azo adabe ti ala na iri ti mo, mo yeke sala ye tongana nyen?— Tele ti mo ayeke nzere ape?— Jéhovah aye si azo ahinga nga iri ti lo. Tongaso, a lingbi e di iri ti Jéhovah tongana e sala tënë na ndo Nzapa. Kota Wafango ye adi lani iri ti Nzapa, Jéhovah, tongana lo sala tënë na azo. Mbeni lâ, Jésus atene: ‘A lingbi  mo ndoye Jéhovah Nzapa ti mo na bê ti mo kue, na âme ti mo kue, na bibe ti mo kue, na ngangu ti mo kue!’​—Marc 12:30.

Jésus ahinga so “Jéhovah” ayeke iri so ayeke kota mingi. Tongaso, lo fa na adisciple ti lo ti di iri ti Nzapa. Lo fa même na ala ti sala tënë na ndo iri ti Nzapa na yâ asambela ti ala. Jésus ahinga so Nzapa aye si azo kue ahinga iri ti Lo, Jéhovah.

Giriri, Nzapa afa kota ti iri ti lo na Moïse, so ayeke mbeni oko ti amolenge ti Israël; ala yeke lani na kodoro ti Egypte. Azo ni kâ amû ala na ngbâa nga ala sala aye ti sioni mingi na ala. Tongana Moïse aga kota koli awe, lo tara lani ti mû maboko na mbeni oko ti azo ti mara ti lo. Ye so azia ngonzo mingi na bê ti Pharaon, gbia ti Egypte. Lo ye lani ti fâ Moïse! Ndali ni, Moïse akpe Egypte lo gue yongoro.

 Moïse ague na mbeni kodoro nde. Lo gue na kodoro ti Madian. Kâ, lo mû wali na lo dü amolenge. Lo bata nga ataba. Mbeni lâ, tongana Moïse ayeke bata anyama ti lo ndulu na tele ti mbeni hoto, lo bâ mbeni ye so lo gi li ti lo na ni gbä. Wâ ayeke na yâ ti akî, me akî ni agbi pëpe! Moïse apusu ndulu na ni ti bâ ni nzoni.

Mo hinga ye so asi?— Moïse amä mbeni go so ahiri lo na popo ti akî ni, atene: “Moïse, Moïse!” Zo wa la ahiri lo tongaso?— A yeke Nzapa! Nzapa ayeke na gbâ ti kua ti mû na Moïse ti sala. Lo tene: ‘Ga mbi tokua mo na Pharaon, gbia ti Egypte, na mo sigigi na azo ti mbi, amolenge ti Israël, na Egypte.’ Nzapa atene na Moïse so ni yeke mû ande maboko na lo.

Me Moïse atene na Nzapa: ‘Tongana mbi si na amolenge ti Israël kâ na Egypte na mbi tene na ala so Nzapa atokua mbi na mbage ti ala, si ala hunda, “Iri ti lo ayeke nyen?” Mbi yeke tene ande nyen?’ Nzapa atene na Moïse ti tene na amolenge ti Israël:  ‘Jéhovah atokua mbi na ala, na lo tene na mbi so Jéhovah ayeke iri ti lo teti lakue lakue.’ (Exode 3:1-15). Ye so afa atene iri ti Nzapa ayeke ngbâ gi Jéhovah. Lo yeke changé ni lâ oko pëpe. Nzapa aye si azo ahinga lo na iri ti lo, Jéhovah, teti lakue lakue.

Tongana Moïse akiri na Egypte, azo ti Egypte abâ ti ala lani atene Jéhovah, Nzapa ti Israël, ayeke gi mbeni kete nzapa. Ala bâ pëpe so lo yeke Nzapa ti dunia mobimba. Tongaso, Jéhovah atene na gbia ti Egypte: ‘Mbi yeke sala si azo ti sese kue ahinga iri ti mbi.’ (Exode 9:16). Biani, Jéhovah asala si azo ahinga iri ti lo. Mo hinga tongana nyen lo sala ni?—

Lo sala si Moïse asigigi na azo ti Israël na Egypte. Tongana ala si ndulu na Kota Ngu Bengba, Jéhovah afâ yâ ti ngu ni use. Amolenge ti Israël ahon na ndo kuru sese ni. Me tongana Pharaon na aturugu ti lo kue ayeke hon nga na yâ ni, angu ni so aluti mbage na mbage atuku na ndo ti ala, na ala kue akui.

Hio, azo na ndo ti sese kue ato nda ti mä tënë ti ye so Jéhovah asala na Kota Ngu Bengba. E hinga tongana nyen so ala mä tënë na ndo ni?— Bâ, angu 40 tongaso na pekoni, amolenge ti  Israël asi na kodoro ti Canaan. Canaan ayeke mbeni kodoro so Jéhovah atene lo yeke mû ni ande na ala. Kâ, Rahab, mbeni maseka-wali, atene na amolenge ti Israël use: ‘E mä tënë ti ye so Jéhovah asala si Kota Ngu Bengba ahule na gbele i giriri, tongana i sigigi na Egypte.’​—Josué 2:10.

Laso, azo mingi ayeke tongana azo ti Egypte so. Ala mä na bê pëpe so Jéhovah ayeke Nzapa ti dunia mobimba. Ni la, Jéhovah aye si azo ti lo asala tënë ti lo na ala. A yeke ye so Jésus asala  lani la. Ndulu na kuâ ti lo, lo tene na Jéhovah na yâ ti sambela: “Mbi fa na ala iri ti Mo.”​—Jean 17:26.

Mo ye ti sala ye tongana Jésus? Tongaso, fa na azo so iri ti Nzapa ayeke Jéhovah. Peut-être mo yeke bâ so azo mingi ahinga iri ni so pëpe. Mo lingbi ti fa na ala versê ni na yâ Bible na Genèse 22:14. Zia e mû Bible ti e na e diko versê so legeoko. A tene: “Abraham adi iri ti ndo so Jéhova-Jiré; azo atene juska laso, Na hoto ti L’Eternel, fade a bâ Lo.”

E manda nyen na yâ versê so?— Biani, e manda so Jéhovah ayeke iri so ayeke kota ahon a-iri kue. A yeke iri ti Nzapa ti Ngangu Ahon Kue, Babâ ti Jésus na Lo so asala ye kue. Girisa nga pëpe so Jésus atene na e so a lingbi e ye Jéhovah Nzapa na bê ti e kue. Mo ye Jéhovah?—

Tongana nyen e lingbi ti fa so e ye Jéhovah?— Mbeni lege ni ayeke ti gi ti hinga lo tongana mbeni Kamarade. Mbeni nde ayeke ti fa iri ti lo na azo. E lingbi ti fa na ala tâ gi na yâ Bible so iri ti lo ayeke Jéhovah. E lingbi nga ti fa apendere ye so Jéhovah aleke nga na anzoni ye so lo sala. A yeke zia ande ngia na bê ti Jéhovah mingi, ngbanga ti so lo ye si azo ahinga lo. E nga kue e lingbi ti sala si azo ahinga ni, ni la ape?—

Me a yeke azo kue pëpe si ayeke ye ande ti mä e tongana e sala tënë na ndo Jéhovah. Même tongana Jésus, Kota Wafango ye, ayeke sala lani tënë ti Nzapa na azo, mingi ti ala ake ti mä lo. Me ye so akanga lege na Jésus pëpe ti sala tënë ti Jéhovah.

Tongaso, zia e sala ye tongana Jésus. Zia e ngbâ lakue ti sala tënë ti Jéhovah. Tongana e sala ni, e yeke nzere ande na lê ti Jéhovah Nzapa, ngbanga ti so e fa so e ye iri ti lo.