TONGANA zo ake mbeni zo senge senge, mo hinga nda ni?— A yeke pëpe gi ngbanga ti so zo ni ayeke nde na lo, wala yanga ti kodoro ti lo ayeke nde na ti lo. Me a yeke ngbanga ti so lo bâ zo ni na sioni lê kozoni si lo hinga lo nzoni.

Ti tene mo ke mba ti mo zo kozoni si mo hinga mbilimbili zo so lo yeke, wala gi ngbanga ti so lo yeke nde, a yeke na lege ni?— Oko pëpe, kengo zo senge senge ayeke na lege ni pëpe nga a yeke salango nzoni na zo la pëpe. A lingbi e sala sioni na zo pëpe gi ngbanga ti so lo yeke peut-être nde na e.

Bâ ye so si. Mo hinga mbeni zo so poro ti tele ti lo wala yanga ti kodoro ti lo ayeke nde na ti mo?— Peut-être mo hinga ambeni zo so ayeke nde ngbanga ti so ala wara sioni na tele ti ala wala ala yeke na mbeni kobela. Mo yeke sala ka nzoni na azo so ayeke nde na mo?—

Tongana e mä Kota Wafango ye, Jésus Christ, e yeke sala ande nzoni na azo kue. Atâa kodoro ti lo, wala poro ti tele ti lo, ye so kue ayeke duti ande senge na lê ti e. A lingbi e sala nzoni na lo. Atâa a yeke ye so azo kue ayeda na ni pëpe, a yeke mbeni ye so Jésus afa. Zia e bâ ni.

Mbeni Juif ayeke ândö dä. Lo ke ambeni zo senge senge. Tongaso lo ga ndulu na Jésus, na lo hunda: ‘A lingbi mbi sala nyen ti duti na fini ti lakue lakue?’ Jésus ahinga lani so koli ni aye peut-être ti mä lo na tenengo so a lingbi lo sala nzoni na azo ti  mara wala ti kodoro ti lo. Tongaso, ahon ti tene Jésus akiri tënë tâ gi na hundango tënë ni, Lo hunda mbeni tënë na lo: ‘Ndia ti Nzapa atene a lingbi e sala nyen?’

Koli ni akiri tënë: ‘A lingbi mo ye Jéhovah Nzapa ti mo na bê ti mo kue, na a lingbi mo ye mba ti mo zo tongana mo mveni.’ Jésus atene: ‘Mo kiri tënë na lege ni. Ngbâ ti sala tongaso lakue na mo yeke wara fini ti lakue lakue.’

Me, koli ni aye ti lo pëpe ti sala nzoni na azo so ayeke nde na lo. Tongaso, lo gi ti tene a yeda na lo. Ni la, lo hunda Jésus: ‘Tâ mba ti mbi ni ayeke zo wa?’ Peut-être lo ye si Jésus atene: “Mba ti mo ni ayeke akamarade ti mo” wala, “Azo so ayeke tongana mo.” Me ti kiri tënë na hundango tënë so, Jésus atene mbeni mbaï na ndo mbeni Juif nga na mbeni zo ti sese ti Samarie. Mä ni.

Mbeni koli alondo na Jérusalem lo yeke gue na Jéricho. Koli so ayeke mbeni Juif. Tongana lo yeke tambela, azo ti nzi agbu lo. Ala bi lo na sese na ala mû nginza na abongo na tele ti lo kue. Ala pika lo ngangu na ala zia lo ndulu na kuâ na tele ti lege.

 Kete na pekoni, mbeni prêtre ahon na lege so. Lo bâ koli ni so tele ti lo kue ayeke na kä. Mo yeke sala ti mo nyen?— Prêtre ni afâ gi na mbeni mbage ti lege ni na lo hon ti lo. Lo luti nga pëpe. Lo sala nga mbeni ye ti mû maboko na koli so pëpe.

Na pekoni, mbeni koli so ahinga tënë ti Nzapa mingi ahon na lege so. Lo yeke mbeni zo ti mara ti Lévi, lo yeke sala kua na yâ temple ti Jérusalem. Fade lo yeke luti ti mû maboko?— Oko pëpe. Lo sala gi oko ye so prêtre ni asala kozo.

Na nda ni, mbeni zo ti Samarie ahon na lege so. Mo bâ lo na ndo ti lege so?— Lo bâ Juif ni, tele ti lo kue ayeke na kä. Me hinga so mingi ti azo ti Samarie na aJuif aye tele oko pëpe (Jean 4:9). Fade  zo ti Samarie ni ayeke zia koli ni tongaso? Fade lo yeke tene atënë so na bê ti lo: ‘Nda ni nyen ti mû maboko na Juif so? Tongana mbi la fade mbi yeke na place ti lo, lo yeke mû ande maboko na mbi pëpe.’

Nde na so, zo ti Samarie ni abâ koli so ayeke lango na tele ti lege, na mawa ti lo asala lo. Lo lingbi ti zia lo na ndo so ti kui pëpe. Tongaso, lo zia nyama ti lo, lo gue na tele ti koli ni, na lo komanse ti bâ lege ti akä ti lo. Lo tuku mafuta na vin na ndo akä ni, ti tene ala mü. Na pekoni, lo kanga bongo na ndo ni.

Zo ti Samarie ni amû koli so yeke, lo zia lo na ndo ti nyama ti lo. Na pekoni, ala tambela yeke yeke na ndo lege juska ala si na mbeni ndo ti lango. Kâ, zo ti Samarie ni awara mbeni ndo ti tene koli ni angbâ dä, si lo bâ lege ti lo nzoni.

Fadeso Jésus ahunda koli ni: ‘Na popo ti akoli ota so, lo so wa si ayeke tâ mba ti koli so?’ Mo yeke tene ti mo nyen? A yeke prêtre ni, zo ti mara ti Lévi ni, wala zo ti Samarie ni?—

Koli ni akiri tënë: ‘A yeke koli so aluti na abâ lege ti zo so awara sioni so, si ayeke tâ mba ti lo.’ Jésus atene: ‘Mo kiri tënë nzoni. Gue mo sala tongaso nga.’​—Luc 10:25-37.

 So tâ pendere mbaï la ape? A fa na e polele zo wa si ayeke mba ti e. A yeke pëpe gi akota kamarade ti e. A yeke nga pëpe gi azo so poro ti tele ti e na ti ala ayeke oko, wala azo so ayeke tene yanga ti kodoro ti e. Jésus afa na e ti sala nzoni na azo atâa ndo so ala londo dä, poro ti tele ti ala, wala yanga ti kodoro ti ala.

Jéhovah Nzapa ayeke tongaso. Lo yeke ke zo senge senge pëpe. Jésus atene: ‘Babâ ti mo so ayeke na yayu asala si lâ ti lo asu na ndo ti azo ti sioni na azo ti nzoni. Na lo sala nga si ngu apika na ndo azo ti nzoni na azo ti sioni.’ Tongaso, a lingbi e sala nzoni na azo kue, tongana Nzapa.​—Matthieu 5:44-48.

Tongaso, tongana mo bâ mbeni zo awara sioni, mo yeke sala nyen?— Ka tongana zo ni ayeke ti mbeni kodoro nde wala poro ti tele ti lo ayeke nde na ti mo? Lo yeke lakue mba ti mo, na a yeke nzoni mo mû maboko na lo. Tongana mo bâ so a hon ngangu ti mo, hunda mbeni kota zo ti mû maboko. Wala mo lingbi ti hiri mbeni zo ti lapolice wala mbeni wafango mbeti. So salango nzoni na zo la, tongana zo ti Samarie so.

Kota Wafango ye aye si e sala nzoni na zo. Lo ye si e mû maboko na azo, atâa ala yeke azo wa. A yeke nda ni la si lo tene mbaï ti nzoni zo ti Samarie so.