Abraham afa na molenge ti lo Isaac ti ye Jéhovah mingi nga ti sara confiance na azendo ti lo. Me na ngoi so Isaac ayeke na ngu 25 tongaso, Jéhovah ahunda na Abraham ti sara mbeni ye so ayeke tâ ngangu mingi na lo ti sara ni. A yeke nyen?

Nzapa atene na Abraham: ‘Pardon, mû gï oko molenge ti mo so na mo mû lo na sandaga na ndö ti mbeni hoto so ayeke na yâ ti gbata ti Moriah.’ Abraham ahinga pëpe ngbanga ti nyen la Jéhovah ahunda na lo ti sara mara ti ye so. Me lo ngbâ lakue ti mä yanga ti Jéhovah.

Na ndade ni, na yanga ti ndapre, Abraham amû Isaac na ambeni zo ti kua ti lo use, ala gue na Moriah. Na peko ti lango ota, ala bâ hoto ni so angbâ ayo. Abraham atene na azo ti kua ti lo ti ku lo na gbe ni ge, lo na Isaac ague ti mû sandaga ni. Abraham amû keke ti wâ ti zongo na sandaga ni na Isaac ti yô ni, nga lo mû zembe na maboko ti lo. Isaac atene na babâ ti lo: ‘Nyama so e yeke gue ti mû na sandaga ni ayeke na ndo wa?’ Abraham atene: ‘Molenge ti mbi, Jéhovah la ayeke mû ande ni.’

Na ngoi so ala si na ndö ti hoto ni, ala leke mbeni gbalaka. Na pekoni, Abraham akanga maboko nga na gere ti Isaac na lo zia lo na ndö ti gbalaka ni.

Abraham amû zembe. Mo ye ti bâ, ange ti Jéhovah angbâ na yayu kâ, lo iri lo, lo tene: ‘Abraham! Sara sioni na molenge ni pëpe. Fadeso, mbi hinga so mo mä na bê na Nzapa ndali ti so mo ye ti mû molenge ti mo na sandaga.’  Na pekoni, Abraham abâ mbeni koli-taba so mbeni kete keke so amaboko ni adü gbani agbu didi ti lo. Hio lo zi kamba na terê ti Isaac na lo mû koli-taba ni na sandaga na place ti lo.

Ti londo na lango ni so, Jéhovah airi Abraham kamarade ti lo. Êske mo hinga ndani? Abraham asara ye kue so Jéhovah ahunda na lo ti sara, atâa tongana lo hinga pëpe ndani so Jéhovah ahunda na lo ti sara ye ni so.

Jéhovah akiri atene na Abraham oko zendo so lo tene na lo lani, lo tene: ‘Mbi yeke iri ande tënë nzoni na ndö ti mo, mbi yeke sara si amolenge ti mo wala hale ti mo awu mingi.’ Jéhovah amû nga zendo so lo yeke sara tufa na ndö ti anzoni zo kue na lege ti sewa ti Abraham.