A forcé azo ti Israël ti sara kua ngangu tongana angbâa. Jéhovah atokua Moïse na Aaron ti gue ti tene na Pharaon, atene: ‘Mo zia azo ti mbi ague tongaso si ala lingbi ti voro mbi na yâ ti benyama.’ Na baba, Pharaon atene: ‘Tënë ti Jéhovah ni so abâ mbi ape, na mbi yeke zia azo ti Israël ti gue ape.’ Tongaso Pharaon aforcé ala ti kiri ti sara kua ngangu ahon ti kozo. Ni la, Jéhovah aleke na bê ti lo ti punir Pharaon. Mo hinga ye so lo ye ti sara? Lo ga na aye ti ngangu bale-oko na ndö ti Égypte. Jéhovah atene na Moïse: ‘Pharaon amä mbi ape. Na ndapre lo yeke gue na Ngu ti Nil. Gue na peko ti lo na mo tene na lo so ndali ti so lo ke ti zia azo ti mbi ti gue, Ngu ti Nil ayeke ga mênë.’ Moïse amä yanga ti Jéhovah na lo gue na peko ti Pharaon. Pharaon abâ Aaron so apika lê ti Ngu ti Nil na keke ti lo na ngu ni aga mênë. Ngu ni akomanse ti fu sioni, asusu akui, na nzoni ngu ti nyongo ni ayeke dä ape. Me Pharaon ake lakue ti zia azo ti Israël ti gue.

 Lango mbasambala na pekoni, Jéhovah atokua Moïse ti kiri ti tene na Pharaon: ‘Tongana mo zia azo ti mbi ahon ape, adale ayeke mû ande yâ ti kodro ti Égypte kue.’ Aaron ayôro keke ti lo na nduzu na adale akomanse ti mû yâ ti kodro ni kue. Azo awara adale na yâ ti ada, na ndö ti agbogbo nga na yâ ti asembe ti ala. Adale amû ndo ni kue! Pharaon ahunda na Moïse ti voro terê na Jéhovah ti kaï ye ti ngangu ni so. Pharaon atene so ni yeke zia ande azo ti Israël ague. Tongaso, Jéhovah asara si ye ti ngangu ni akaï. Azo ti Égypte abungbi adale ni, ala dö ala na ndö ti terê gbani gbani. Kodro ni kue afun sioni. Me Pharaon akiri ake ti zia azo ni ti gue.

Na pekoni, Jéhovah atene na Moïse: ‘Aaron adoit ti yôro keke ti pika fuku ti sese, a yeke ga ande angungu ti tengo zo.’ Gï hio tongaso, angungu amû ndo ni kue. Ambeni zo ti kodro ti Pharaon wani atene na lo, atene: ‘Aye ti ngangu so alondo na Nzapa.’ Me, Pharaon angbâ lakue ti ke ti tene azo ti Israël ague.