Josaphat, so ayeke gbia ti Juda, afuti agbalaka ti Baal nga na ayanda kue na yâ ti kodro ni. Lo ye si azo ni ahinga andia ti Jéhovah. Tongaso, lo tokua ndo na amokonzi nga na azo ti mara ti Lévi ti gue na yâ ti Juda kue ti fa andia ti Jéhovah na azo.

Amara so ayeke na terê ti Juda asara mbeto ti tiri na ala ndali ti so ala hinga so Jéhovah ayeke na azo ti lo. Ala ga même na acadeau na Gbia Josaphat. Me na pekoni, azo ti Moab, azo ti Ammon nga na ala so alondo na sese ti Séir aga ti tiri na Juda. Josaphat ahinga so lo bezoin ti tene Jéhovah amû maboko na lo. Lo hunda na akoli, awali nga na amolenge kue ti bungbi na Jérusalem. Na lê ti ala kue, lo sambela, lo tene: ‘Jéhovah, sân mo, e peut ti sö benda ape. Pardon, fa na e ye so a lingbi e sara.’

Jéhovah akiri tënë na sambela ni, lo tene: ‘Sara mbeto ape. Mbi yeke aidé ande ala. Ala luti kpô na ala bâ tongana nyen la mbi yeke sö ala ande.’ Jéhovah asö ala tongana nyen?

Na ndade ni, Josaphat asoro azo ti hengo bia na lo tene na ala ti tambela na devant ti aturugu ni. Ala londo na Jérusalem juska na ndo ti sarango bira ni so a iri ni Técoa.

Na ngoi so azo ti hengo bia ni ayeke sepela Jéhovah na ngia nga na kota go, Jéhovah ayeke tiri ndali ti azo ti lo. Lo sara si li ti azo ti Ammon nga na ti azo ti Moab aga kirikiri na ala komanse ti tiri na popo ti ala, na mbeni oko na popo ti ala asö kuâ ape. Me Jéhovah abata azo ti Juda, aturugu nga na aprêtre. Azo kue so ayeke nduru na kodro ni amä tënë ti ye so Jéhovah asara so na ala hinga so Jéhovah angbâ ti mû mbage ti azo ti lo. Tongana nyen la Jéhovah asö azo ti lo? Lo sara ni na alege mingi. Lo yeke pëpe na bezoin ti mungo maboko ti azo si lo sara ni.