MO HINGA tënë so molenge-wali so ayeke tene na wali so? Lo yeke sara tënë ti Élisée, prophète ti Jéhovah, nga na apendere ye so Jéhovah amû maboko na lo Élisée ni ti sara. Wali so ahinga ye na ndo ti Jéhovah pëpe ngbanga ti so lo yeke mbeni zo ti Israël pëpe. Zia e bâ ngbanga ti nyen molenge so ayeke na yâ ti da ti wali so.

Wali ni ayeke zo ti Syrie. Koli ti lo ayeke Naaman, mokonzi ti aturugu ti Syrie. Azo ti Syrie agbu lani kete molenge so na ngbâa, na ala gue na lo na wali ti Naaman ti tene lo sara kua na gbe ti lo.

Naaman ayeke na mbeni sioni kobela na tere ti lo. A yeke kobela ti buruma. Kobela so alingbi même ti sara si nyama ti tere ti zo azi atï. Bâ tënë so molenge-wali ni atene na wali ti Naaman, lo tene: ‘Tâ tongana fade wa ti mbi ague abâ prophète ti Jéhovah na Israël, ka buruma ti lo ni ayeke hon na tere ti lo.’ Na pekoni, a tene tënë so Naaman.

Naaman aye mingi ti tene a zi kobela so na tere ti lo; tongaso lo yeda ti gue na Israël. Tongana lo si kâ, lo gue na da ti Élisée. Me Élisée atokua wakua ti lo na gigi ti tene na Naaman ti gue na ngu ti Jourdain ti sukula tere ti lo fani mbasambala. Tënë so aso bê ti Naaman mingi, si lo tene: ‘Angu so ayeke na kodoro ti mbi ayeke nzoni mingi ahon angu kue ti Israël!’ Na pekoni, lo hon.

Me mbeni wakua ti Naaman atene na lo: ‘Seigneur, tongana Élisée atene na mo ti sara ye so ayeke ngangu mingi, mo yeke sara ni. Tongaso, ngbanga ti nyen mo gue ti sukula tere ti mo tongana ti so lo tene na mo so pëpe?’ Naaman amä tënë ti wakua ti lo ni si lo gue lo yôro tere ti lo na yâ ti ngu ti Jourdain fani mbasambala. Tongana lo sara tongaso, buruma ni ahon na tere ti lo kue, na tere ti lo aga nzoni.

Tere ti Naaman anzere mingi. Lo kiri na tere ti Élisée, na lo tene na lo: ‘Fadeso, mbi hinga biani so Nzapa ti Israël ayeke oko tâ Nzapa na ndo lê ti sese kue. Tongaso, mû matabisi so na tïtî mbi.’ Me Élisée atene na lo: ‘Mbi yeke mû ni pëpe.’ Élisée ahinga so a yeke duti ande na lege ni pëpe ti mû matabisi ni, ngbanga ti so Jéhovah la si azi kobela so na tere ti Naaman. Me Guéhazi, wakua ti Élisée, aye ti lo ti wara matabisi ni.

Bâ ye so Guéhazi asara. Tongana Naaman ague, Guéhazi akpe na peko ti lo. Lo tene na Naaman: ‘Élisée atokua mbi na mo ti hunda mo ti mû na lo mbeni matabisi ni ndali ti azo so aga fade fadeso ti bâ lo.’ Tâ gi mvene la lo tene so. Me Naaman ahinga pëpe so lo yeke tene mvene; tongaso lo mû ambeni matabisi ni na Guéhazi.

Élisée ahinga ye so lo sara. Jéhovah la si atene na lo. Ni la, tongana Guéhazi akiri awe, Élisée atene na lo: ‘Ndali ti sioni ye so mo sara so, buruma ti Naaman ayeke kiri na tere ti mo.’ Tâ gi na peko ti tënë so, buruma ni atï na tere ti lo!

E manda tënë ti nyen ge? Aye ota. Kozoni, a lingbi e duti tongana molenge-wali so na e fa tënë ti Jéhovah. Tënë ni alingbi ti sara nzoni mingi na azo. Use ni, a lingbi e zia baba aduti na yâ ti bê ti e pëpe tongana ti Naaman, me a lingbi e mä yanga ti awakua ti Nzapa. Ota ni, a lingbi e tene mvene pëpe tongana Guéhazi. Biani, e lingbi ti manda ye mingi tongana e diko Bible.