NGU 10 ahon awe ngbene ye so gbia Nébucadnezzar agbu azo ti Israël kue so ahinga mbeti mingi lo gue na ala na Babylone. Bâ ye so asi fadeso! A gbi kodoro ti Jérusalem kue. Azo ti Israël so akui pëpe, a mû ala a gue na ala na ngbâa na Babylone.

Girisa pëpe, ye so asi tongana ti so aprophète ti Jéhovah atene lani tongana azo azia sioni sarango ye ti ala pëpe. Me azo ti Israël amä tënë ti aprophète pëpe. A hon ti voro Jéhovah, ala ngbâ ti ala ti voro gi anzapa ti wataka. Tongaso, a lingbi a fâ ngbanga na ndo ti ala. E hinga ni ngbanga ti so prophète Ezéchiel afa na e asioni ye kue so ala sara.

Ezéchiel ayeke zo wa? Mo hinga lo? Lo yeke oko ti amaseka-koli so gbia Nébucadnezzar amû ala a gue na ni na Babylone a sara ngu 10 awe, kozoni si a futi Jérusalem. Daniel na amba ti lo ota, Sadrac, Mésac na Abed-Nego, ague na Babylone na oko ngoi ni so.

Tongana Ezéchiel ade na Babylone, Jéhovah afa na lo asioni ye so ayeke si kâ na temple na Jérusalem. Jéhovah afa na lo aye so na lege ti miracle. Ezéchiel angbâ tâ gi na Babylone, me Jéhovah amû lege na lo ti bâ ye kue so asi na yâ ti temple ni. Ye so Ezéchiel abâ so ayeke sioni mingi!

Jéhovah atene na Ezéchiel: ‘Bâ asioni ye so azo ayeke sara na yâ ti temple! Bâ afoto ti angbo na ti anyama nde nde na ndo ti amur ni so azo ti Israël ayeke voro ni!’ Ezéchiel abâ ye so kue, na lo zia aye so na mbeti.

Jéhovah ahunda na Ezéchiel, lo tene: ‘Mo bâ ye so amokonzi ti Israël ayeke sara na hondengo ni?’ Ezéchiel abâ ye so kue. Lo bâ akoli 70 kâ, na ala kue ayeke voro anzapa ti wataka. Ala yeke tene: ‘Jéhovah ayeke bâ e pëpe. Jéhovah azia kodoro ni awe.’

Na pekoni Jéhovah afa na Ezéchiel ambeni wali so ayeke na yanga-da so ayeke na mbage ti banga ti temple ni. Ala yeke voro Thammuz, mbeni nzapa ti wataka. Ezéchiel abâ nga akoli 25 tongaso na kota yanga-da ti temple ni. Ala yeke kuku na mbage ti tö na ala yeke voro lâ.

Jéhovah atene: ‘Azo so akpe mbeto ti mbi pëpe. Ala sara gi aye ti sioni pëpe, me ala ga nga na yâ ti temple ni ti sara asioni ye ti ala ni!’ Tongaso lo tene: ‘Ala yeke bâ ngangu ti ngonzo ti mbi. Mbi yeke bâ nga mawa ti ala pëpe tongana mbi yeke futi ala.’

A yeke gi ngu ota tongaso na pekoni so Jéhovah afa aye so kue na Ezéchiel si azo ti Israël alondo ti ke yanga ti gbia Nébucadnezzar. Tongaso, Nébucadnezzar ague asara bira na ala. Ngu oko na ndambo na pekoni, aturugu ti Babylone akungbi gbagba ti Jérusalem na sese na ala gbi kodoro ni kue. Ala fâ azo ti Israël mingi na ala gue na ambeni na ngbâa na Babylone.

Ngbanga ti nyen Jéhovah azia si mara ti sioni ye tongaso asi na azo ti Israël? A yeke ngbanga ti so ala mä Jéhovah pëpe na ala bata andia ti lo nga pëpe. Ye so afa na e so a yeke kota ye ti tene e sara lakue ye so Nzapa atene.

Kozoni, gbia Nébucadnezzar azia gi azo kete ti ngbâ na sese ti Israël. Lo zia Guedalia, mbeni Juif, na ndo ti azo ni so. Me ambeni na popo ti ala afâ Guedalia. Azo ni asara fadeso mbeto ti tene azo ti Babylone aga afâ ala kue, ngbanga ti so ala sara sioni ye so. Tongaso ala gbu Jérémie na ngangu ti mû peko ti ala, na ala kpe kodoro ni, ala gue na Égypte.

Zo oko angbâ na sese ti Israël pëpe. Teti ngu 70 kodoro ni aduti senge senge, zo oko ayeke na yâ ni pëpe. Me Jéhovah amû yanga so fade lo yeke kiri na azo ti lo na sese ti ala na peko ti ngu 70. Me zia e bâ aye so asi na azo ti Nzapa na ngoi so ala de na sese ti Babylone tongana angbâa.