Fani oko na yâ ti ngu oko oko, aTémoin ti Jéhovah ayeke bungbi na yâ ti dunia kue, legeoko na azo kutu mingi so ala tisa ala ti dabe na kuâ ti Jésus, gï tongana ti so lo mû lani yanga na ala ti sara ni (Luc 22:19). Ye so a-aidé e ti hinga ndani so Jésus amû fini ti lo ndali ti azo kue. Nga, a fa so sandaga ti lo apeut ti ga na aye ti nzoni na e laso nga na yâ ti angoi so ayeke ga.—Jean 3:16.

 Atâa tongana mo gue na Mémorial ti ngu so wala pëpe, tongana nyen la mo peut ti bâ nzoni na lege ti sandaga ti Jésus? Jésus afa so e doit ti sara ambeni kota ye use:

1.  1. Manda ye na ndö ti Nzapa nga na Jésus. Na yâ ti mbeni sambela so Jésus atene na Babâ ti lo so ayeke na yayu, lo tene: “Ti wara fini ti lakue lakue, a lingbi ala gi ti hinga mo, mo oko tâ Nzapa, nga na lo so mo tokua lo, Jésus Christ.”—Jean 17:3.

2.  2. Sara ye alingbi na ye so mo manda. Jésus afa polele so e bezoin ti sara ye alingbi na aye so lo fa na yâ ti gigi ti e. Na tapande, na ngoi so Jésus ayeke hunzi Fango tënë ti lo na ndö ti hoto, lo gonda azo kue so ‘amä atënë ti lo nga asara ye alingbi na ni.’ (Luc 6:46-48). Tongaso, na mbeni ngoi nde, lo tene: “Tongana ala hinga aye so, ala yeke duti na ngia tongana ala sara ye alingbi na ni.”​—Jean 13:17.

 Eskê mo ye ti hinga ye mingi na ndö ti Nzapa nga na Jésus? Eskê mo ye ti wara awango so apeut ti aidé mo ti sara ye alingbi na aye so mo manda? Bâ ambeni ye so apeut ti aidé mo.

 Mandango Bible a-aidé azo mingi ti hinga ye na ndö ti Bible nga ti sara ye alingbi na ni na yâ ti fini ti ala.

•   Gue na mbage Cours biblique particulier ti hinga ambeni ye mingi na ndö ni.

•   Bâ vidéo Bâ tongana nyen la a yeke manda Bible ti hinga comment aTémoin ti Jéhovah ayeke manda Bible na azo.

 A-Témoin ti Jéhovah ayeke bungbi fani use na yâ ti yengo oko ti voro Nzapa, na mbeni ndo so a iri ni Da ti Royaume. Na ngoi ti abungbi ni so, e yeke sara kua na Bible ti fa na ye nga e yeke gi ti bâ tongana nyen la e peut ti sara ye alingbi na afango ye ni so na yâ ti gigi ti e.

 Azo kue apeut ti ga na abungbi ni so; me gï aTémoin ti Jéhovah oko ape. Tongana dutingo ti mo amû lege na mo, mo peut ti ga na abungbi ni wala mo peut ti suivre ni na lege ti vidéoconférence.

•   Bâ vidéo E yeke sara abungbi ti e tongana nyen? ti hinga ye so ayeke passé na ngoi ti abungbi ni so.

•   Ti hinga mbeni place ti bungbi ni so ayeke nduru na mo, gue na mbage Abungbi ti aTémoin ti Jéhovah.

 Mingi ti a-article nga na avidéo so ayeke na ndö ti site ti e apeut ti aidé mo ti hinga ye mingi na ndö ti afango ye ti Jésus nga na nda ti sandaga so lo mû ti zi e.

 Na tapande, ti hinga tongana nyen la kuâ ti zo oko apeut ti ga na aye ti nzoni na azo kutu mingi, diko a-article “Jésus asö e tongana nyen?” nga “Ngbanga ti nyen la Jésus abâ pasi na lo kui?” wala bâ vidéo Jésus akui ngbanga ti nyen?